ᓂᖀᑦ ᓄᓇᓕᒻᒥ ᐸᕐᓇᓯᒪᒍᑎᒋᔭᐅᔪᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᑮᓇᐅᔭᖃᕐᑎᓯᒍᑎᖏᑦ ᐊᒻᒪᓗ ᐃᑲᔪᒍᑎᖏᑦ 2021-2022 ᐊᕐᕌᒍᖓᓂᑦ

 

ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᐱᓇᓱᑦᑎᖏᑦ ᑲᒪᔪᑦ ᓱᒃᑯᑌᓕᑎᑦᓯᓂᕐᒥᒃ ᓯᕗᓕᐅᕐᓯᓯᒪᒐᓱᐊᕐᓂᒥᑦ ᐊᒻᒪᓗ ᖃᓄᐃᖕᖏᓯᐊᕋᓱᐊᕈᑎᑦᓴᓂᑦ ᖁᕝᕙᑎᑦᓯᒐᓱᐊᕐᓂᒥᓪᓗ ᐃᑲᔪᒍᓐᓇᑐᑦ ᑎᒥᐅᔪᓂᑦᓄᓇᓕᓐᓃ ᖃᓄᐃᓕᖓᐅᑎᖏᓐᓂᒃ ᐊᑐᐃᓐᓇᕈᕐᑎᓯᑦᓯᐊᓗᑎᑦ ᐱᓇᓱᐊᕐᑕᐅᔪᓄᑦ ᓂᕿᓅᓕᖓᔪᓄᑦ ᐃᑲᔪᓚᕿᑦᓱᑎᑦ ᓂᕿᖃᑦᓯᐊᑎᑦᓯᓚᕿᑦᓱᑎᑦ, ᐃᓗᓯᓕᕆᓂᕐᒧᓗ ᐊᒻᒪᓗ ᖃᓄᐃᖕᖏᓯᐊᕐᓂᒧᓪᓗ. ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᐃᑲᔪᕈᓐᓇᑐᑦ, ᑮᓇᐅᑦᔭᓴᖁᑎᒃᑯᑦ, ᐱᒋᐅᕐᓴᓂᒃᑯᑦ ᐊᒻᒪᓗ ᐱᒍᑦᔨᒍᑎᒃᑯᑦ (ᐃᒐᐅᑏᑦ, ᐃᒐᓂᕐᒧᑦ ᒪᓕᒐᐃᑦ, ᐊᓯᖏᓪᓗ).

ᓄᓇᓕᒻᒥ ᐱᓇᓱᐊᕐᑕᐅᒍᒪᔪᑦ ᑮᓇᐅᑦᔭᓴᕈᓐᓇᑕᕗᑦ ᐊᒻᒪᓗ ᓴᐳᒻᒥᒍᓐᓇᑕᕗᑦ ᑎᑭᐅᑎᒍᓐᓇᐸᑕ ᐊᑕᐅᓯᕐᒥᓘᓐᓃᑦ ᒪᕐᕉᓂᓪᓘᓃᑦ ᐅᕝᕙᓗ ᐃᓘᓐᓇᑎᓪᓘᓃᑦ ᐅᑯᓂᖓ ᐱᖓᓱᓂᑦ ᑎᑭᐅᑏᐅᔪᓂᑦ :
 

  1. ᐱᐅᓯᒋᐊᑦᓯᐊᕈᓐᓇᐸᑦ ᖃᐅᔨᒪᔭᕐᓂᑦ ᐊᒻᒪᓗ ᐱᒍᓐᓇᓯᐊᕐᓂᓂᑦ ᐱᕈᕐᓴᑎᑦᓯᒐᓱᓯᐊᕐᓂᒧᑦ, ᓄᓂᕙᓐᓂᒧᑦ, ᓴᐳᒻᒥᓯᐊᕐᓂᒧᑦ, ᓂᕈᐊᕐᓂᒧᑦ ᐅᕝᕙᓗ ᓂᕿᓂᑦ ᓂᕿᓕᐅᕐᓂᒧᑦ
    ᐅᓇ ᐆᑦᑑᑎᒋᓗᒍ, ᐃᓄᐃᑦ ᖃᐃᓗᑎᒃ ᓱᖃᑦᓯᓂᖃᕐᓗᑎᑦ ᐃᓕᓐᓂᐊᓂᕐᒥᑦ ᐃᓗᕐᖁᓯᓇᑎᒍᑦ ᐊᒻᒪᓗ ᐊᓯᖏᑦᑎᒍᑦ ᐃᓕᑦᓯᒐᓱᓂᕐᒥ ᓂᕿᓕᐅᕐᓂᑎᒍᑦ, ᐃᓕᓐᓂᐊᓂᕐᒥ ᒪᓕᒐᕐᓂᑦ ᓄᑖᓂ ᓂᕿᓕᐅᕐᓂᑎᒍᑦ ᓂᕿᑦᓯᐊᖑᔪᓂᒃ ᐅᕝᕙᓗ ᖃᓄ ᐱᕈᕐᓴᐃᓂᖃᓲᖑᒻᒪᖔᑕ ᓂᕿᑦᓴᓂᒃ ᐱᕈᓲᓂᑦ ᑕᑉᐹᓂ ᓄᓇᕕᒻᒥ. ᑖᒃᑯᐊ ᑎᑭᐅᑎᒋᔭᐅᒍᓐᓇᑐᑦ ᑖᑦᓱᒪᐅᑉ ᑎᑭᐅᑎᖓᓂ.
     
  2. ᐃᓄᓐᓂᒃ ᐃᑲᔪᕈᓐᓇᐸᑦ ᐊᑐᐃᓐᓇᒍᕐᑎᖃᕐᑎᓯᑦᓯᐊᓂᕐᒥᑦ ᓂᕿᑦᓯᐊᓂᒃ ᐱᐅᔫᔪᓂᑦ ᑎᒥᓐᓄᑦ
    ᓄᐃᑦᓯᓂᕐᒥ ᓄᓇᓕᐅᑉ ᐃᒐᕕᖓᓂ ᐃᓄᐃᑦ ᐃᒐᕈᓐᓇᑐᓂᑦ ᐊᒥᓱᓂᑦ ᓂᕿᐅᑦᓯᐊᑐᓂᑦ ᓇᒻᒥᓄᑦ ᐊᒻᒪᓗ ᐃᓚᒻᒥᓄᑦ, ᐅᕝᕙᓗ ᓂᐅᕐᖁᓯᑎᓗᒋᑦ ᐊᑭᑭᑦᑐᒥᑦ ᓄᓇᖃᑎᒻᒥᓄᑦ, ᐅᕝᕙᓗ ᓄᓇᖃᑎᖏᓐᓂᒃ ᑲᑎᖃᑎᖃᕐᓗᑎᑦ ᐃᓄᐃᓪᓘᑎᑦᓯᑕᐃᓕᓚᕿᓪᓗᑎᑦ ᐊᐃᑦᑐᑐᐃᓪᓗᑎᑦ ᓂᕿᑦᓯᐊᖑᔪᓂᒃ ᑎᒥᓐᓄᑦ ᑖᒃᑯᐊ ᐆᑦᑑᑎᒋᔭᐅᔪᑦ ᐃᑭᑦᑑᓱᑎᒃ ᖃᓄ ᑖᓐᓇ ᑎᑭᐅᑎᒃ ᑎᑭᐅᑎᒋᔭᐅᒍᓐᓇᒪᖔ.
     
  3. ᐃᑲᔪᕈᓐᓇᐸᑦ ᖁᕝᕙᑎᑦᓯᒋᐊᕐᓗᓂ ᐋᕐᕿᓱᕐᓯᒪᐅᑎᐅᔪᓂᒃ ᓂᕿᓅᓕᖓᔪᓂᒃ ᓄᓇᓕᓐᓂ
    ᐅᑯᐊ ᐆᑦᑑᑏᑦ ᖃᐅᔨᑎᑦᓯᒍᓐᓇᑐᑦ ᖃᓄ ᖁᕝᕙᑎᑦᓯᒍᓐᓇᕋᔭᕐᒪᖔᑕ ᓂᕿᓂᒃ ᓄᓇᓕᓐᓂᑦ ᖃᓄᐃᓕᖓᐅᑎᖏᓐᓂᒃ : ᓄᐃᑦᓯᓗᑎᑦ ᐱᓇᓱᒐᕐᓂᑦ ᓄᑖᓂᒃ ᐅᕝᕙᓗ ᐃᑲᔪᒍᒪᔪᑦ ᐊᑭᓕᕐᑐᑕᐅᖕᖏᓗᑎᑦ ᐱᓇᓱᐊᕐᑕᐅᒥᔪᑦ ᓂᕿᓅᓕᖓᔪᓄᑦ, ᓄᐃᑦᓯᒋᐊᕐᓗᑎᑦ/ᐱᐅᓯᐅᒥᑎᑦᓯᓗᑎᑦ ᖃᓄᐃᓕᖓᐅᑎᒋᕐᖄᑕᖏᓐᓂᒃ ᓂᕿᖃᑦᓯᐊᑎᑦᓯᓂᕐᒥᑦ ᓂᕿᑦᓯᐊᓂᒃ ᑎᒥᒻᒧᑦ ᓄᓇᓕᒻᒥ, ᓂᕿᓂᒃ ᐃᒋᑦᓯᑕᐅᓕᓗᑎᑦ (ᐅᓇ ᐆᑦᑑᑎᒋᓗᒍ, ᓂᖀᑦ ᓂᕆᔭᐅᖕᖏᑐᑦ ᓴᓂᖃᐅᑎᒨᒍᓐᓇᐃᓗᒋᑦ ᐊᓯᖓᓅᕐᓗᒋᑦ, ᐊᑐᕐᓗᑎᑦ ᓂᕿᓂᒃ ᐊᐃᑦᑑᑎᒋᔭᐅᔪᓂᑦ ᓂᐅᕕᕐᓂᐊᕕᒻᒥ, ᓂᕿᓕᐅᕐᓗᑎᑦ ᐆᒪᔫᑉ ᑎᒥᓕᒫᖓᓂᒃ) ᐊᒻᒪᓗ ᓄᐃᑦᓯᓂᕐᒥ ᐱᓇᓱᖃᑎᖃᑦᓯᐊᓂᕐᒥᒃ ᓂᕿᓕᐅᓲᓂᑦ ᓄᓇᓕᒻᒥ ᐊᒻᒪᓗ ᓄᓂᕙᓲᓂᒃ, ᐊᒻᒪᓗ ᑎᒥᐅᔪᓂᒃ ᐊᓯᖏᓐᓂᒃ ᐱᓇᓱᐊᕐᑐᓂᒃ ᓂᕿᓂᒃ ᐱᓇᓱᐊᕐᑕᐅᔪᓂᒃ.


ᐱᓇᓱᐊᕈᒪᔭᐃᑦ ᓯᕗᓪᓕᐅᑎᑦᓯᒋᐊᓕᒃ ᐊᑕᐅᓯᕐᒥᓘᓐᓃᒃ ᐅᕝᕙᓗ ᐊᒥᓲᓂᕐᓴᓂᓘᓐᓃᒃ ᐅᑯᓂᖓ ᑎᑭᐅᑎᐅᔪᓂᒃ. ᑌᒣᒐᓗᐊᕐᑎᓗᒍ, ᐊᓯᖏᓐᓂᒃ ᑎᑭᐅᑎᐅᔪᓂᒃ ᐊᒻᒪᓗ ᐊᑑᑎᖃᕐᑎᓯᒋᐊᓕᑦ ᓱᖃᑦᓯᓂᕐᒥ ᐃᓗᓯᓕᕆᓂᕐᒧᑦ ᐊᒻᒪᓗ ᖃᓄᐃᖕᖏᓯᐊᕐᓂᒧᑦ ᐱᓇᓱᐊᕈᑎᒋᑦᓯᐊᕈᓐᓇᑕᐃᑦ ᐊᐱᕐᓲᑎᓂᒃ.

ᐱᓇᓱᐊᕈᑎᒋᔭᐃᑦ ᒪᖃᐃᕝᕕᒦᑐᐊᕐᐸᑦ, ᓲᓱᒋᒍᓐᓇᖃᒋᑦ ᐊᐱᕐᓲᑎᓂᒃ ᑕᑕᕐᓴᐃᖔᕐᓗᑎᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᓄᓇᓕᒻᒥ ᑕᑕᕐᓴᐃᒍᑎᖏᓐᓂᒃ: ᓄᓇᒥ

 

 

ᑐᓂᔭᐅᒍᑏᑦ ᖃᓄᐃᓕᖓᓂᖏᑦ

ᖃᑦᓰᑦ ᐱᔭᐅᒍᓐᓇᑐᑦ

ᐅᓄᕐᓂᐹᖏᑦ ᐊᑕᐅᓯᕐᒧᑦ ᐱᓇᓱᐊᕐᑕᐅᔪᒧᑦ 2021-2022 ᐊᕐᕌᒍᖓᓂ : $ 50,000/ᐊᕐᕌᒍᑕᒫᑦ

ᐱᓇᓱᐊᕐᑕᐅᔪᑦ ᐊᐱᕐᓲᑏᑦ $ 30,000ᓂᒃ ᐅᕝᕙᓘᓐᓃᑦ ᐊᒥᓲᓂᕐᓴᓂᒃ ᑎᑭᐅᑎᖃᕐᑎᓯᒋᐊᓖᑦ  ᑎᑭᐅᑎᓕᒫᑦᓯᐊᖑᔪᓂᒃ ᐱᖓᓲᑦᓱᑎᑦ (ᐱᔭᐅᒍᓐᓇᓂᒃᑯᑦ ᐊᒻᒪᓗ ᓴᓇᒋᐊ ᖃᐅᔨᒪᔭᐅᔪᑎᒍᑦ, ᐊᑐᐃᓐᓇᕈᕐᑎᓯᑦᓯᐊᓂᒃᑯᑦ ᓂᕿᐅᑦᓯᐊᑐᓂᒃ ᐊᒻᒪᓗ ᐱᐅᓯᐅᒥᓂᒃᑯᑦ ᓂᖀᑦ ᓄᓇᓕᓐᓂ ᐋᕐᕿᓱᕐᓯᒪᐅᑎᖏᓐᓂᒃ, ᑕᑯᓴᒋᐊᕐᓗᑎᒃ ᐊᓪᓚᕕᑦᓴᒥᒃ ᓯᕗᓪᓕᐹᒦᑦᑐᒥᑦ)

 

ᐱᔭᐅᒍᓐᓇᑐᑦ

ᐅᑯᐊ ᐱᔭᐅᒍᓐᓇᑐᑦ :

  • ᑮᓇᐅᑦᔭᓵᑦ ᐊᐅᓚᑦᓯᔨᓄᑦ ᓄᓇᓕᓐᓂ, ᓄᓇᓕᓐᓂ ᐱᓇᓱᐊᕐᑕᐅᔪᓄᑦ ᑲᒪᔨᓄᑦ, ᐃᒐᔨᓄᑦ, ᐸᐃᕐᓯᔨᓄᑦ, ᐊᓯᖏᓐᓄᓪᓗ. (ᐊᑭᓕᕐᑐᐃᔨᓄᑦ ᑎᒥᐅᔪᓄᑦ ᓄᓇᓕᓐᓄᑦ)
  • ᖃᑦᓯᓂᒃ ᐊᑭᖃᕐᑎᓯᓂᕐᒥ ᐅᖄᔨᒥᒃ ᖃᐅᔨᒪᑦᓯᐊᑐᒥᑦ
  • ᓂᕿᑦᓯᐊᖑᔪᑦ ᓂᐅᕕᕐᓂᐊᕕᒻᒥ ᐊᒻᒪᓗ ᐃᓄᑐᐃᓐᓇᐃᑦ ᓂᕿᖏᑦ
  • ᐃᒐᕈᑏᑦ ᐊᒻᒪᓗ ᐊᐃᑦᑐᐃᓂᕐᒥ ᐊᑑᑎᒋᔭᐅᓲᖑᔪᓂᒃ (ᐴᒍᑕᐃᑦ, ᐅᕐᕕᐅᔭᐃᑦ, ᐊᓯᖏᓪᓗ.)
  • ᓂᕆᕝᕕᒥ ᐊᑑᑎᒋᔭᐅᓲᑦ ᑲᐳᓯᒪᒋᐊᓖᑦ (ᑭᐊᑦᓴᐅᑎᒃ, ᖁᐊᖃᐅᑎᒃ, ᐊᓯᖏᓪᓗ)
  • ᐱᕈᕐᓰᕕᒻᒨᓕᖓᔪᐃᑦ ᐱᐅᒃᑯᑎᖏᑦ ᐊᒻᒪᓗ ᓄᓇᑦᓴᔭᖓᓗ, ᓴᐃᒍᑦᓴᖏᓐᓂᓗ ᓴᓇᒐᑦᓴᓂᒃ ᓴᐃᒍᕐᒧᑦ
  • ᑮᑖᐱᒃ ᐱᒍᕐᐸᓕᐊᑎᑦᓯᓂᖅ ᐋᕐᕿᓯᒪᐅᑎᐅᔪᓂᒃ
  • ᐅᕐᓱᐋᓗᒃ (ᐆᑦᑑᑎᒋᑦᓱᒍ, ᓂᕿᓂᒃ ᐸᔪᐃᒍᑎᐅᒍᓐᓇᑐᖅ)
  • ᐊᑦᑕᑐᕐᑕᐅᓲᖅ ᐊᑭᓕᕐᑐᓱᒍ (ᐆᑦᑑᑎᒋᑦᓱᒍ, ᓄᓇᒃᑰᔫᖅ, ᐱᐅᒃᑯᑏᒃ, ᖃᕆᐊᕐᒥᒃ ᑐᖃᑦᓯᒍᑎᒃ)

ᐊᓯᖏᓪᓗ ᐱᔭᐅᒍᓐᓇᖂᕐᒥᔪᑦ. ᐅᐸᑦᑕᐅᒍᓐᓇᒥᔪᖅ ᑲᒪᔨᒃ ᖃᐅᔨᒋᐊᑦᓯᐊᕈᒪᑐᐊᒍᕕᑦ ᐊᓯᖏᓐᓂᒃ.

ᐊᑑᑎᔭᐅᖕᖏᑐᑦ :

  • ᐊᑭᖃᕐᓗᑎᒃ ᑭᓯᐊᓂ (ᐃᓪᓘᑉ ᓴᓇᔭᐅᓂᖓᓂᒃ ᐅᕝᕙᓘᓐᓃᑦ ᓴᓇᑦᓯᒪᑦᓯᐊᖏᓐᓇᓕᒫᕐᒪᖔ ᖃᐅᔨᒐᓱᐊᕐᓂᖅ, ᓄᓇᒃᑰᔫᖅ, ᐊᓯᖏᓪᓗ)
  • ᓂᕿᐅᑦᓯᐊᖏᑦᑐᑦ, ᓱᐴᕈᑏᑦ, ᐃᒥᐊᓗᐃᑦ
  • ᐊᑭᓖᑦ ᑮᓇᐅᔭᑎᒍᑦ
  • ᑮᓇᐅᑦᔭᓴᕆᔭᐅᔪᑦ ᐱᓇᓱᑦᑎᒧᑦ ᑲᒪᔨᒧᑦ ᐊᑐᐃᓐᓇᒍᕐᑎᓯᕆᐊᓕᒃ ᐅᕝᕙᓗ ᐃᓚᐅᖃᑕᐅᓗᓂ ᓱᒐᓚᑦᑐᓕᖃᑐᐊᕐᐸᑦ ᐱᓇᓱᒋᐊᓕᖏᑦ
 
ᐃᒪᐃᓕᖓᐅᑏᑦ 2021-2022 ᐊᕌᒍᖏᓐᓂᒃ
  • ᑎᒥᐅᔪᑦ ᑮᓇᐅᑦᔭᓴᕋᓪᓗᐊᖏᑐᑦ, ᐃᓚᒌᓐᑯᑦ ᐃᓪᓗᐃᑦ, ᓄᓇᐅᔪᑦ ᐊᒻᒪᓗ ᐃᓗᓯᓕᕆᓂᒃᑯᑦ ᐊᐱᕐᓱᒍᓐᓇᑐᑦ ᐃᓚᐅᑎᑕᐅᒍᓐᓇᒪᖔᑕ. ᑭᓇᑐᐃᓐᓇ ᐃᓄᑑᒐᓗᐊᕈᓂ ᐅᕝᕙᓗ ᐊᒥᓲᓪᓗᑎᓪᓘᓃᑦ ᐊᐱᕐᓱᒍᒪᑉᐸᑕ ᐃᓚᐅᒍᓐᓇᓯᐊᕐᒪᖔᑕ ᕿᓂᕆᐊᓖᑦ ᑎᒥᐅᔪᒥᒃ ᓄᓇᓕᒻᒥᑦ ᐊᖏᒍᓐᓇᓛᕐᑐᒥᑦ ᐊᐃᑦᑐᑐᐃᓂᕐᒥᒃ ᑮᓇᐅᑦᔭᓴᕐᓂᒃ.
  • ᐃᓕᓐᓂᐊᕕᐅᔪᐃᑦ ᐊᐱᕐᓱᖄᒋᐊᓖᑦ ᐃᓚᐅᖃᑕᐅᒍᓐᓇᒪᖔᑕ ᐃᓕᓐᓂᐊᕕᖓᑕ ᐃᓗᕐᖁᓯᓕᕆᔨᖏᓐᓄᑦ ᑐᔪᐃᓗᑎᑦ ᐊᐱᕐᓲᑎᖏᓐᓂᒃ ᐃᓕᓐᓂᐊᕕᐅᑉ ᐃᓗᓯᓕᕆᔨᖏᑦ ᑲᒪᔨᖓᓄᑦ. ᐊᓯᖏᑦ ᑮᓇᐅᑦᔭᕋᑦᓴᐃᑦ ᑭᖕᖒᒪᒋᔭᐅᑉᐸᑕ, ᐃᓕᓐᓂᐊᕕᐅᑉ ᐃᓗᓯᓕᕆᔨᖏᑦ ᑲᒪᔨᖓ (ᑲᑎᕕᒃ ᐃᓕᓴᕐᓂᓕᕆᓂᒃᑯᑦ) ᐋᑦᓯᒍᓐᓇᑐᑦ ᐊᐱᕐᓲᑎᒥᒃ ᑮᓇᐅᑦᔭᓴᕈᑎᑦᓴᓂᒃ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔨᖏᓐᓄᑦ.
  • ᑮᓇᐅᑦᔭᓕᐅᕐᓂᑯᑦ ᓂᐅᕐᖁᓯᒍᓐᓇᖏᑦᑐᑦ ᐅᕝᕙᓘᓐᓃᑦ ᐱᒍᑦᔨᒍᑎᓂᑯᑦ. ᓂᕿᓪᓘᓃᑦ ᓂᕿᓕᐅᕐᑕᕕᓃᓪᓘᓃᑦ ᓂᐅᕐᕈᓯᕐᑕᐅᒐᔭᕐᐸᑕ, ᑮᓇᐅᔭᓕᐅᕐᑕᕕᓃᑦ ᐱᓇᓱᐊᕐᑕᐅᔪᓄᑦ ᑭᓯᐊᓂ ᐊᑐᕐᑕᐅᒋᐊᓖᑦ.
  • ᐊᒥᓱᓂᑦ ᐱᓇᓱᐊᕐᑕᐅᔪᖃᕈᓐᓇᑐᖅ ᓂᓄᓕᓐᓂ ᐊᑦᔨᒌᖕᖏᑐᓂᒃ ᑎᑭᐅᑎᖃᕐᐸᑕ ᐅᕝᕙᓗ ᐊᓯᖏᑦ ᐱᒍᑦᔨᑕᐅᔪᑦ ᓂᕈᐊᕐᑕᐅᖔᕐᓗᑎᑦ.
  • ᑮᓇᐅᑦᔭᓴᕈᑎᒃᑯᑦ ᐊᕐᕌᒍᑕᒫᑦ ᐊᖏᕐᑕᐅᓛᕐᑐᑦ ᐊᒻᒪᓗ ᓇᓪᓕᑳᕐᑕᐅᓂᕐᒧᑦ ᑕᑕᕐᓴᐃᒍᑏᑦ ᓄᑕᐅᓯᓕᕐᑕᐅᒋᐊᓖᑦ ᐊᕐᕌᒍᑕᒫᑦ.
  • ᑮᓇᐅᑦᔭᓵᑦ ᓂᕿᓄᑦ ᓄᓇᓕᓐᓂ ᐱᓇᓱᐊᕐᑕᐅᔪᓄᑦ ᐊᕐᕌᒍᓂ ᑕᓪᓕᒪᓂ ᐊᑐᐃᓐᓇᐅᓚᖓᔪᑦ.
  • ᓱᖃᑦᓯᓂᕐᒧᑦ ᑮᓇᐅᔭᐃᑦ ᖃᐅᔨᓴᕐᑕᐅᓂᖏᑎᒍᑦ ᐊᕐᕌᒍᑦ ᒪᕐᕈᕕᓪᓗᑎᑦ ᐊᐃᑦᑐᑕᐅᒋᐊᓖᑦ (ᐊᕐᕌᒎᑉ ᕿᑎᖓᓂ ᐊᒻᒪᓗ ᓈᓂᖓᓂ). ᑕᑕᕐᓴᐃᒍᑎᒥᒃ ᐊᐃᑦᑐᑕᐅᓛᕐᑐᒃ.
  • ᑎᒥᐅᔪᑦ ᐊᐱᕐᓱᒍᓐᓇᑐᑦ ᐃᓚᐅᖃᑕᐅᒍᓐᓇᒪᖔᑕ ᖃᖓᑐᐃᓐᓇ ᐊᕐᕌᒍᒥ, ᑭᓯᐊᓂ ᓲᓱᑦᓴᖁᒍᑦ ᐃᓄᓐᓂ ᐊᐱᕐᓱᖔᕈᓐᓇᒪᖔᑕ ᑮᓇᐅᔭᓕᕆᐅᑏᑦ ᐊᕐᕌᒍᖓᓂ (ᐊᐃᕆᓕᒥᒃ ᔫᓂᒧᑦ).
  • ᑖᑯᐊ ᐃᒪᐃᓕᖓᐅᑏᑦ ᐊᓯᑦᔨᑕᐅᖕᖑᓱᓛᕐᑐᑦ ᐊᕐᕌᒎᓛᓯᔪᓂᒃ ᐋᕐᕿᒋᐊᕋᓱᓪᓗᑎᑦ ᖃᑦᓯᐅᓂᖏᓐᓂᒃ ᑐᑦᓯᕋᐅᑎᓂᑦ ᒪᓕᑦᓯᐊᕋᓱᓪᓗᑎᑦ ᐊᐱᕆᔭᐅᓛᕐᒥᒪᑕ.

 

ᐱᒋᐅᕐᓴᑎᑦᓯᓂᖅ, ᓴᐳᒻᒥᓂᖅ ᐊᒻᒪᓗ ᐱᒍᑦᔨᒍᑎᒋᐊᓪᓚᓂᖅ

ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᐱᓇᓱᑦᑎᖏᑦ ᓱᒃᑯᑌᓕᑎᑦᓯᓱᑎᒃ ᓯᕗᓪᓕᐅᑎᑦᓯᓯᐊᕐᓱᑎᒃ ᐊᒻᒪᓗ ᖃᓄᐃᖕᖏᓯᐊᕐᓂᒧᑦ ᖁᕝᕙᑎᑦᓯᒐᓱᑦᓱᑎᑦ ᐅᑯᓂᖓ ᐊᐃᑦᑐᑐᐃᒍᓐᓇᒥᔪᑦ :

  • ᐃᑲᔪᕐᓗᑎᑦ ᖃᓄᐃᓕᖓᐅᑎᒍᑦ ᐸᕐᓇᐃᑎᖁᑎᓐᓂᒃ ᐸᕐᓇᐃᑎᑦᓯᖃᕐᓗᑎᑦ ᐊᒻᒪᓗ ᐊᑑᑎᖃᕐᑎᓯᒍᓐᓇᓯᐊᕐᓗᑎᑦ ᐆᒥᖓ ᐱᓇᓱᐊᕐᑕᐅᔪᒥᒃ : ᓄᐃᑦᓯᓂᕐᒥᒃ ᐱᓇᓱᐊᕐᑕᐅᒪᔫᑉ ᑎᑭᐅᑎᖏᓐᓂᒃ ᐊᒻᒪᓗ ᑮᓇᐅᑦᔭᖁᑎᒍᑦ, ᑐᓴᐅᒪᑎᑦᓯᓂᒃᑯᑦ ᐊᓯᖏᓐᓂᒃ ᑮᓇᐅᑦᔭᓴᒍᓐᓇᑐᓂᑦ, ᐃᑲᔪᕐᓂᑯᓪᓗ ᑮᓇᐅᔭᓕᕆᓂᒃᑯᑦ ᐊᒻᒪᓗ ᑲᒪᓐᓂᑯᑦ ᑐᓴᕐᑎᓯᒍᑎᐅᔪᓂᑦ.
  • ᐃᑲᔪᕐᓗᑎᒃ ᖃᓄᐃᓕᖓᐅᑎᑎᒍᑦ ᖃᐅᔨᓴᕋᓱᐊᕐᓂᑯᑦ ᖃᓄ ᐊᑑᑎᖃᑦᓯᐊᒪᖔᑕ ᐱᓇᓱᐊᕐᑕᑎᑦ.
  • ᐊᕐᕌᒍᑕᒫᑦ ᓄᓂᕙᓐᓂᖅ ᐊᒻᒪᓗ ᐱᒋᐅᕐᓴᑎᑦᓯᓂᖅ ᐱᓇᓱᐊᕐᑕᐅᓂᖏᓄᑦ ᓄᓇᓕᓐᓂ ᐃᑲᔪᕐᑐᑦ ᓴᐳᒻᒥᖃᑦᓯᐊᓂᒃᑯᑦ ᓂᕿᖃᕐᑎᓯᑦᓯᐊᓂᕐᒥᑦ, ᐃᓗᓯᖃᑦᓯᐊᓂᕐᒧᑦ ᐊᒻᒪᓗ ᖃᓄᐃᖕᖏᓯᐊᕐᓂᒧᑦ.
  • ᐱᓇᓱᓐᓂᒥ ᐱᒋᐅᕐᓴᓂᒃᑯᑦ ᐊᒻᒪᓗ ᐱᓇᓱᑦᑕᐅᔪᑦ ᐱᓇᓱᕝᕖᑦ ᐱᓇᓱᑦᑎᓄᑦ ᐊᑑᑎᖃᑦᓯᐊᑐᓄᑦ ᐱᓇᓱᐊᕐᑕᐅᔪᓂᑦ (ᓂᕿᓕᐅᕐᓂᒥᑦ, ᓂᕿᓂᖅ ᓴᓗᒪᑎᑦᓯᓯᐊᕐᓂᒥᑦ ᐊᒻᒪᓗ ᖃᓄᐃᖕᖏᓯᐊᕐᓂᒥᑦ ᒪᐹᕐᒥᓗ “MAPAQ”ᐊᐃᑦᑐᑐᐃᔩᑦ ᐊᓪᓚᕕᑦᓴᓂᒃ ᐅᖃᑦᓯᐊᑐᓕᓐᓂᑦ ᓂᕿᓂᒃ ᑲᒪᑦᓯᐊᒍᓐᓇᓂᕋᐃᔪᓂᑦ, ᖃᐅᔨᒋᐊᑦᓯᐊᓂᖅ ᓂᕿᐅᑦᓯᐊᑐᓂᒃ, ᐱᕈᕐᓰᕕᒻᒨᓕᖓᔪᑦ).
  • ᐱᐅᒃᑯᑏᒃ ᐊᒻᒪᓗ ᐱᒍᑦᔨᒍᑎᕐᓂᒃ : ᒪᓕᒐᕐᓂᑦ ᓂᕿᓕᐅᕐᓂᒥᑦ, ᐃᓕᑦᓯᒍᑎᕐᓂᓗ ᓂᕿᑦᓯᐊᓂᑦ, ᖃᓄ ᓄᐃᑦᓯᒍᓐᓇᕋᔭᕐᒪᖔ ᓄᓇᓕᐅᑉ ᐃᒐᕕᖓᓂ.

 

ᐅᑯᐊ ᐅᐸᑦᑕᐅᒍᓐᓇᑐᑦ

ᓕᐊ ᓚᕝᓛᒻ, ᔪᐊᑎᓐ ᔅᑖᕗᐊᑦ ᐊᒻᒪᓗ ᐊᒥᓕ ᐳᓵᕐ

foodsecurity.nrbhss@ssss.gouv.qc.ca

 

1ᐃᑭᑦᑑᔪᑦ ᐱᐅᓯᐅᒥᕈᓐᓇᑐᑦ ᖃᓄᐃᓕᖓᐅᑎᐅᔪᓂᒃ ᐃᑲᔪᕈᓐᓇᑐᓂᑦ  ᐱᐅᓯᒋᐊᕐᓗᑎᑦ ᐊᑐᐃᓐᓇᕈᕐᑎᓯᑦᓯᐊᓗᑎᑦ ᓂᕿᑦᓯᐊᓂᒃ ᓂᕆᔭᐅᒍᓐᓇᕋᔭᕐᑐᓂᑦ ᐱᓇᓱᐊᒍᑎᕐᓄᑦ (ᐆᑦᑑᑎᒋᓗᒍ, ᐃᓪᓗᒃ ᐱᕈᕐᓴᖁᑎᐅᑦᓱᓂ, ᒥᑭᔪᒥᒃ ᓴᓇᔭᐅᒋᐊᓖᑦ ᐃᒐᕝᕕᒥ). ᑲᒪᔨᒥ ᐅᐸᓐᓂᒍᓐᓇᖁᑎᑦ ᖃᐅᔨᒋᐊᑦᓯᐊᕈᒪᒍᕕᑦ.