ᐱᑦᔪᔨᕖᑦ

ᓄᓇᕕᒻᒥ ᒪᕐᕉᓂᒃ ᐱᑦᔪᔨᕕᖃᕐᐳᖅ: ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒻᒪᕆᖓᑦ, ᑰᔾᔪᐊᒥ, ᐊᒻᒪᓗ ᐃᓅᓕᑦᓯᕕᒃ ᐋᓐᓂᐊᕕᒻᒪᕆᖓᑦ, ᐳᕕᕐᓂᑐᒥ.

ᑕᒪᖏᒃ ᐋᓐᓂᐊᕕᒻᒪᕇᒃ ᐊᒥᓱᒐᓚᓐᓂᒃ ᐱᔭᑦᓴᓂᒃ ᐱᓇᓱᐊᒐᖃᓲᖑᕗᑦ. ᐱᒍᑦᔨᓂᖃᓲᑦ ᓄᓇᓖᑦ ᐋᓐᓂᐊᕕᖏᓐᓄᑦ ᐱᑦᔪᔨᒍᑎᐅᓲᓂᒃ, ᐱᐊᕋᕐᓂᓗ ᐅᕕᒃᑲᓂᓗ ᓴᐳᑦᔨᓂᕐᒥᒃ ᐊᒻᒪᓗ ᐋᓐᓂᐊᓕᕐᓯᒪᔪᓂᒃ ᐱᒍᑦᔨᕕᓐᓂᒃ, ᐋᓐᓂᐊᕕᒻᒥᐅᖑᒋᐊᓕᓐᓂᓗ ᐱᒍᑦᔨᔨᐅᑦᓱᑎᒃ ᐊᒻᒪᓗ ᒪᒥᓴᕐᕕᖃᕐᓱᑎᒃ ᐅᕕᒃᑲᓄᑦ ᐱᓂᕐᓗᑲᑦᑕᓲᓄᑦ.

ᐱᒍᑦᔨᒍᑏᑦ ᐊᑐᐃᓐᓇᐅᑎᑕᐅᔪᑦ ᓄᓇᓕᓐᓄᑦ ᐃᓚᐅᔪᓕᒫᓄᐊᖓᑦᓱᑎᒃ, ᖃᖓᑐᐃᓐᓇᓕᒫᒃᑯᑦ ᐊᒻᒪᓗ ᓇᒻᒥᓂᖅ ᓄᓇᓕᖏᓐᓂ ᐱᕕᖃᓕᑐᐊᕐᒪᑦ. ᐃᓄᑑᓈᕐᑎᑐᐃᑦ ᑲᒪᑦᓯᐊᖁᔭᐅᓲᑦ ᐃᓗᓐᓈᒍᑦ ᖃᓄᐃᖏᓯᐊᕐᓂᒥᓂᒃ ᓇᐅᒃᑯᑐᐃᓐᓇᖅ ᒪᓕᓪᓗᑎᒃ ᐃᓗᓐᓀᑕ ᐃᓪᓕᕆᔭᖏᓐᓂᒃ (ᐃᓗᕐᕈᓯᕐᑎᒍᑦ ᐱᐅᓯᕐᑎᒍᓪᓗ) ᐊᑐᓂᑦ ᓄᓇᓕᓐᓂ. 

ᐅᖓᕙᒥ ᑐᓚᑦᑕᕕᒃ ᓐᓂᐊᕕᒻᒪᕆᖓᑦ
ᐃᓅᓕᑦᓯᕕᒃ ᓐᓂᐊᕕᒻᒪᕆᖓᑦ
ᑐᕌᒐᖏᑦ
ᓐᓂᐊᖃᒻᒪᕆᑦᑐᐃᑦ ᑲᒪᒋᔭᐅᕕᖏᑦ
ᓄᓇᓖᑦ ᐊᓐᓂᐊᕕᖏᑦ
ᐱᐊᕋᕐᓂᒃ ᐅᕕᒃᑲᓂᓪᓗ ᓴᐳᒻᒥᕖᑦ
ᓐᓂᐊᕕᒻᒥᐅᖑᒋᐊᓕᓐᓂᒃ ᑲᒪᕖᑦ
ᒪᒥᓴᕐᕖᑦ ᐅᕕᒃᑲᓄᑦ ᐱᓂᕐᓗᑲᑦᑕᓲᓄᑦ
ᓄᓇᓕᓐᓂ ᐱᒍᑦᔨᒍᑏᑦ
ᐱᒍᑦᔨᒍᑏᑦ ᐊᑐᐃᓐᓇᐅᑎᑕᐅᔪᑦ ᓐᓂᐊᕕᓐᓂ

ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒻᒪᕆᖓᑦ

ᑰᔾᔪᐊᒦᑦᓱᓂ, ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒻᒪᕆᖓᑦ ᑲᒪᒋᔭᖃᓲᖑᕗᖅ ᓯᑕᒪᐅᔪᖕᖏᒐᕐᑐᓂᒃ ᓄᓇᓕᓐᓂᒃ ᐅᖓᕙᐅᑉ ᓯᑦᔭᖓᓃᑦᑐᓂᒃ ᐅᑯᓂᖓ: ᐊᐅᐸᓗᒃ, ᑕᓯᐅᔭᖅ, ᑲᖏᕐᓱᒃ, ᑲᖏᕐᓱᐊᓗᔾᔪᐊᖅ, ᑲᖏᕐᓱᔪᐊᖅ, ᑰᔾᔪᐊᖅ ᐊᒻᒪᓗ ᖁᐊᕐᑕᖅ.

ᐃᓅᓕᑦᓯᕕᒃ ᐋᓐᓂᐊᕕᒻᒪᕆᖓᑦ

ᐳᕕᕐᓂᑐᒦᑦᓱᓂ, ᐃᓅᓕᑦᓯᕕᒃ ᐋᓐᓂᐊᕕᒻᒪᕆᖓᑦ ᑲᒪᒋᔭᖃᓲᖑᕗᖅ ᓯᑕᒪᐅᔪᖕᖏᒐᕐᑐᓂᒃ ᓄᓇᓕᓐᓂᒃ ᑕᓯᐅᔭᕐᔪᐊᒦᑦᑐᓂᒃ: ᐊᑯᓕᕕᒃ, ᐃᓄᑦᔪᐊᒃ, ᐃᕗᔨᕕᒃ, ᑰᔾᔪᐊᕌᐱᒃ, ᐳᕕᕐᓂᑐᖅ, ᓴᓪᓗᐃᑦ ᐊᒻᒪᓗ ᐅᒥᐅᔭᖅ.

ᑐᕌᒐᖏᑦ

ᐋᓐᓂᐊᕕᒻᒪᕇᑦ ᑐᕌᒐᖃᕐᐳᑦ ᐅᖃᕐᑕᐅᒪᔪᑦ ᐅᑯᓇᓂ ᐱᖁᔦᑦ ᐱᑦᔪᑎᒋᑦᓱᒋᑦ ᓐᓂᐊᓂᓕᕆᓂᕐᒧᑦ ᐱᒍᑦᔨᒍᑏᑦ ᐊᒻᒪᓗ ᐃᓄᓕᕆᓂᕐᒧᑦ ᐱᒍᑦᔨᒍᑏᑦ ᐊᒻᒪᓗ ᐃᑲᔪᕐᓯᓗᑎᒃ ᓄᓇᓕᓐᓂ ᐱᕙᓪᓕᐊᑎᑦᓯᒐᓱᐊᕈᑎᓄᑦ ᐱᕕᖃᕐᑎᓯᓂᒃᑯᑦ ᑲᒪᒋᐊᑦᓴᐅᑎᒋᒍᓐᓇᓂᒃᑯᑦ ᑐᖓᓕᕆᔭᐅᔪᒃᑯᓗ ᐋᓐᓂᐊᓂᓕᕆᓂᒃᑯᓗ ᐃᓄᓕᕆᓂᒃᑯᓗ ᐱᒍᑦᔨᒍᑎᓂᒃ ᐱᐅᔫᓂᖃᕐᑐᓂᒃ ᐱᒍᑦᔨᒍᑎᐅᓂᐊᕐᑐᓂᒃ ᐃᓄᐃᑦ ᑭᖕᖒᒪᒋᔭᖏᓐᓂᒃ.

ᐋᓐᓂᐊᕕᒻᒥᐅᑕᕐᓂᒃ ᑲᒪᒋᔭᖃᕐᓂᒧᑦ

ᑕᒪᖏᓐᓂ ᐋᓐᓂᐊᕕᒻᒪᕆᐅᔪᕐᓂ ᐃᓪᓕᖃᕐᑎᑕᐅᓲᖑᕗᑦ ᐋᓐᓂᐊᕕᒻᒦᖏᓐᓇᕆᖃᓲᓄᑦ. ᑕᒪᓐᓇᐅᓂᖓᒍᑦ, ᖃᐅᔨᓴᕐᓂᖃᓲᑦ ᐊᓐᓂᐊᕆᔭᐅᓕᕐᑐᓂᒃ ᐊᒻᒪᓗ ᐊᑦᔨᒋᔭᐅᖏᑐᓂᒃ ᑲᒪᒋᔭᖃᕆᐊᖃᓲᖑᑦᓱᑎᒃ ᐋᓐᓂᐊᖃᕐᑐᓂᒃ. ᑕᒪᓐᓇ ᐱᑦᔪᑎᒋᑦᓱᒍ, ᑖᒃᑯᐊ ᐱᑦᔪᔨᕖᑦ ᐃᑉᐱᒋᔭᖃᓲᑦ ᑕᒪᒃᑯᐊ ᐃᓄᑑᓈᕐᑎᑐᐃᑦ ᑌᒣᑦᑐᓄᑦ ᐱᒍᑦᔭᐅᒋᐊᓖᑦ ᐱᑎᑕᐅᑦᓯᐊᕋᓗᐊᕐᒪᖔᑕ, ᐃᓚᖃᕐᑐᒥᒃ ᐊᑦᔨᒋᔭᐅᖏᑐᒥᒃ ᐋᓐᓂᐊᓯᐅᕐᑎᓕᕆᔭᐅᒍᑎᓂᒃ ᐃᓄᓕᕆᔭᐅᒋᐊᖃᕐᑐᓂᓪᓗ.

ᓄᓇᓖᑦ ᐋᓐᓂᐊᕕᖏᑦ

ᓄᓇᓖᑦ ᐋᓐᓂᐊᕕᖏᑦ ᐱᒍᑦᔨᓂᖃᓲᑦ ᑲᒪᒋᐊᑦᓴᐅᑎᒋᒍᓐᓇᓲᒥᓂᒃ ᐋᓐᓂᐊᓂᓕᕆᓂᒃᑯᓗ ᐃᓄᓕᕆᓂᒃᑯᓗ ᐱᒍᑦᔨᒍᑎᓂᒃ, ᑕᒪᖏᑦᑎᒍᑦ ᐱᒪᑎᑦᓯᑌᓕᓂᒃᑯᓗ ᒪᒥᓭᓂᒃᑯᓗ, ᐊᒻᒪᓗᑦᑕᐅᖅ ᑎᒥᖏᓐᓂᒃ ᒪᒥᓭᑎᑦᓯᓂᖃᓲᖑᑦᓱᑎᒃ ᐃᓅᓯᓕᓐᓄᓗ ᐅᑎᕐᐸᓕᐊᑎᑦᓯᓂᕐᒥᒃ. ᑕᒪᓐᓇ ᐱᓪᓗᒍ, ᑕᒪᒃᑯᐊ ᐱᑦᔪᔨᕖᑦ ᐃᑉᐱᒋᔭᖃᕆᐊᓖᑦ ᑕᒪᒃᑯᐊ ᐊᑐᓲᑦ ᑭᖕᖒᒪᒋᔭᖏᑦ ᓇᐅᑦᓯᑐᕐᑕᐅᓯᐊᕋᓗᐊᕐᒪᖔᑕ ᐊᒻᒪᓗ ᐱᒍᑦᔨᒍᑎᐅᒋᐊᓕᓐᓂᒃ ᐱᑎᑕᐅᑦᓯᐊᕋᓗᐊᕐᒪᖔᑕ. ᓄᓇᓖᑦ ᐊᓐᓂᐊᕕᖏᑦ ᐃᓚᐅᖃᑕᐅᓲᖑᒻᒥᔪᑦ ᐃᓄᓕᒫᑦ ᐋᓐᓂᐊᓂᓕᕆᔭᐅᓂᒃᑯᑦ ᐱᒍᑦᔭᐅᓂᖏᓐᓄᑦ. ᓄᓇᓖᑦ ᐋᓐᓂᐊᕕᖏᑦ ᐱᒍᑦᔨᕕᖃᓲᖑᕗᑦ ᐊᑐᓂᑦ ᓄᓇᓕᓐᓂ.

ᐱᐊᕋᕐᓂᒃ ᐅᕕᒃᑲᓂᓪᓗ ᓴᐳᑦᔨᕖᑦ

ᑖᒃᑯᐊ ᐱᐊᕋᕐᓂᒃ ᐅᕕᒃᑲᓂᓪᓗ ᓴᐳᑦᔨᔩᑦ ᐱᒍᑦᔨᓂᖃᓲᖑᕗᑦ ᐅᕕᒃᑲᓂᒃ ᒪᓕᑦᓱᒋᑦ ᐅᑯᐊ ᐅᕕᒃᑲᓂᒃ ᓴᐳᑦᔨᒍᑎᓄᑦ ᐱᖁᔦᑦ ᐊᒻᒪᓗ ᐅᑯᐊ ᐅᕕᒃᑫᑦ ᐱᓗᑲᓐᓂᒧᑦ ᐃᕐᖃᑐᕐᑕᐅᒋᐊᖃᕐᓂᖏᓐᓄᑦ ᐱᖁᔦᑦ. ᐊᒻᒪᓗ, ᑖᒃᑯᐊ ᐱᒍᑦᔨᓲᖑᒻᒥᔪᑦ ᐱᐊᕋᕐᓂᒃ ᐊᖏᕐᕋᑖᕐᑎᓯᒐᓱᐊᕐᓂᒥᒃ ᑎᒍᐊᕐᑕᐅᑎᑦᓯᓂᕐᒥᓗ. ᑌᒣᑦᑐᓂᒃ ᐱᒍᑦᔨᒍᑎᓂᒃ ᐱᕕᖃᕐᑎᑕᐅᔪᖃᓲᖑᕗᖅ ᐅᕕᒃᑲᓂᒃ ᓴᐳᑦᔨᔨᒋᔭᐅᔪᓄᑦ ᐃᓅᓕᑦᓯᕕᐅᑉ ᐋᓐᓂᐊᕕᒻᒪᕆᖓᓄᑦ ᐊᒻᒪᓗ ᐅᖓᕙᒥ ᑐᓚᑦᑕᕕᐅᑉ ᐋᓐᓂᐊᕕᒻᒪᕆᖓᓄᓪᓗ. ᑖᒃᑯᐊ ᐊᓐᓂᐊᕕᒻᒪᕇᒃ ᐃᑉᐱᒋᔭᖃᕆᐊᖃᓲᑦ ᑕᒪᒃᑯᐊ ᐃᓄᐃᑦ ᑌᒣᑦᑐᓄᑦ ᐱᒍᑦᔭᐅᒋᐊᓖᑦ ᐊᒻᒪᓗᑦᑕᐅᖅ ᑖᒃᑯᐊ ᐃᓚᖏᑦ ᐱᑎᑕᐅᑦᓯᐊᕋᓗᐊᕐᒪᖔᑕ.

ᐋᓐᓂᐊᕕᒻᒥᐅᖑᒋᐊᓕᓐᓂᒃ ᑲᒪᒋᔭᖃᕐᓂᒧᑦ

ᐋᓐᓂᐊᕕᒻᒥᐅᖑᒋᐊᓕᓐᓂᒃ ᑲᒪᒍᑏᑦ ᐃᓪᓕᖃᕐᑎᓯᓲᖑᑦᓱᑎᒃ ᑕᒪᖏᓐᓂ ᐋᓐᓂᐊᕕᒻᒪᕆᓐᓂ. ᑖᒃᑯᐊ ᐃᓂᖃᕐᑎᑦᓯᕕᐅᓚᐅᕐᑐᓲᑦ ᑌᒪᖓᓕᒫᕐᑐᓂᓪᓘᓃᑦ, ᐃᑲᔪᕐᓱᑎᓪᓗ ᓴᐳᒻᒥᓱᑎᓪᓗ ᐃᓄᒻᒪᕆᓐᓂᒃ, ᐃᒻᒥᓂᕿᕐᖃᔦᕐᓯᒪᓂᑯᒥᓄᑦ ᐃᓅᕕᒋᓲᑐᖃᕐᒥᓂᕐᖃᔦᕐᓯᒪᔪᓄᑦ.

ᒪᒥᓭᕖᑦ ᐅᕕᒃᑲᓂᒃ ᐱᓂᕐᓗᑲᑦᑕᓲᓂᒃ

ᓄᓇᓕᓕᒫᑦ ᒪᒥᓭᓂᒃᑯᑦ ᐱᒍᑦᔨᒍᑏᑦ ᐊᐅᓚᑕᐅᓂᖃᓲᖑᕗᑦ ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒻᒪᕆᖓᓄᑦ.

ᑕᒪᒃᑯᐊ (ᐊᓇᕐᕌᐲᑦ, ᐊᑐᕐᑕᐅᕙᑦᑐᑦ ᑭᒡᒐᑐᕐᑕᐅᔪᓄᑦ ᐅᑭᐅᖃᕐᓱᑎᒃ 6-ᒥᑦ 12-ᒧᑦ. ᐊᒻᒪᓗ ᐃᕕᕐᑎᓯᕕᒃ ᐃᓪᓗᖅ) ᒪᒥᓭᕖᑦ ᐅᕝᕙᓘᓐᓃᑦ ᑲᑎᒪᐅᑎᔪᓂᒃ ᐊᖏᕐᕋᖃᕐᑎᓯᒍᑏᑦ ᐱᕕᖃᕐᑎᓯᓲᖑᕗᑦ ᐃᓅᓯᕐᑎᒍᑦ ᒪᒥᓭᓂᕐᒥᒃ ᐊᒻᒪᓗ ᐅᑎᕐᐸᓕᐊᑎᑦᓯᓂᕐᒥᒃ ᐃᓅᓯᓕᓐᓄᑦ ᐅᕕᒃᑲᓂᒃ ᐱᐅᓯᕐᓱᓯᐊᕐᖃᔦᕐᓯᒪᔪᓄᑦ ᐅᕝᕙᓘᓐᓃᑦ ᐃᓚᒌᑎᒍᑦ ᐅᖁᒣᓪᓕᐅᕈᑎᓕᓐᓄᑦ. ᑕᒪᓐᓇ ᐱᑦᔪᑎᒋᑦᓱᒍ, ᑕᒪᒃᑯᐊ ᐱᕕᑦᓴᖃᕐᑎᓯᒍᓐᓇᓲᑦ ᑎᒍᓯᓯᓲᑦ ᐅᕕᒃᑲᓂᒃ ᖁᔭᐅᓕᑐᐊᕋᒥᒃ. ᒪᕐᕉᓂᒃ ᐊᖏᕐᕋᖃᕐᑎᓯᕕᖃᕐᐳᖅ ᑰᔾᔪᐊᒦᑦᑐᒥᓪᓗ (ᓴᑐᕐᕕᒥᒃ) ᐊᒻᒪᓗ ᐳᕕᕐᓂᑐᒦᑦᑐᒥᒃ, ᐃᑲᔪᕐᓯᔭᐅᒋᐊᕐᑐᕕᒃ ᓇᓪᓕᐊᑐᐃᓐᓇᓄᑦ ᐅᑭᐅᓕᓐᓄᑦ 6-ᒥᑦ 12-ᒧᑦ, ᑰᑦᔪᐊᒦᑦᑐᖅ, ᑰᑦᔪᐊᕌᐱᒻᒦᑐᓪᓗ

ᒪᒥᓭᕕᖃᓲᖑᒻᒥᔪᖅ ᓴᓪᓗᓂ ᐱᒍᑦᔨᓲᒥᒃ ᓄᓇᕕᒻᒥᐅᓕᒫᓂᒃ ᓱᕈᓯᕐᓂᒃ ᐅᑭᐅᓕᓐᓄᑦ 12-ᒥᑦ 18-ᓄᑦ ᐊᒻᒪᓗ ᐱᑕᖃᕐᒥᓱᓂ ᐃᓄᑦᔪᐊᒥ ᑌᒪᑦᓭᓇᖅ ᐱᒍᑦᔨᓲᖑᒻᒥᔪᕐᓂᒃ ᐊᕐᓇᓂᒃ ᐅᑭᐅᓕᓐᓄᑦ 12-ᒥᑦ 18-ᓄᑦ. ᑖᒃᑯᐊ ᑕᒪᖏᒃ ᐊᖏᕐᕋᖃᕐᕕᐅᓲᒃ ᐅᕕᒃᑲᓄᑦ ᑖᕙᓂᑦᑎᑕᐅᔪᓄᑦ ᒪᓕᑦᓱᒋᑦ ᐅᕕᒃᑲᓂᒃ ᓴᐳᑦᔨᒍᑏᑦ ᐱᖁᔭᖏᑦ. ᑖᒃᑯᐊ ᐱᕕᖃᕐᑎᓯᓲᑦ ᐊᖏᕐᕋᖃᕐᑎᓯᑦᓱᑎᒃ ᒪᓕᓐᓂᖃᕐᑐᓂᒃ ᐃᓄᐃᑦ ᐃᓗᕐᕈᓯᖓᓂᒃ ᓴᐳᒻᒥᓂᖃᕐᓱᑎᓪᓗ ᐅᕕᒃᑫᑦ ᐃᓄᖁᑎᖏᓐᓂᒃ ᓄᓇᓕᓐᓄᑦ ᐅᑎᕐᐸᓕᐊᓂᖃᕐᑎᓗᒋᑦ ᐊᒻᒪᓗ ᐱᓀᓗᑕᖏᑦ ᑐᑭᑖᕐᑕᐅᒐᓱᐊᕐᑎᓗᒋᑦ. ᓄᓇᕕᒻᒥᐅᑦ ᐃᓂᖃᕐᑎᑕᐅᓱᖑᒻᒥᔪᑦ ᓯᓂᑦᑕᕋᕐᕕᐅᒍᓐᓇᓱᓂ ᐃᑲᔪᕐᓯᒪᔭᐅᒋᐊᕐᑐᕕᒻᒥᒃ ᐅᕕᒃᑲᓄᑦ ᐱᕋᔭᕐᑎᓅᓕᖓᔪᒥ ᒪᓐᑐᔨᐊᓪᒥ (YCJA).

ᓄᓇᓕᓐᓂ ᐱᒍᑦᔨᒍᑏᑦ

ᓄᓇᓕᓐᓂ ᐱᒍᑦᔨᒍᑏᑦ ᑐᕌᒐᖃᓲᖑᕗᑦ ᐱᕕᖃᕐᑎᓯᓂᒃᑯᑦ ᐊᑦᔨᒋᖏᑐᓂᒃ ᐱᒍᑦᔨᒍᑎᓂᒃ ᐃᓚᖃᕐᑐᓂᒃ ᐱᒪᑎᑦᓯᑌᓕᓂᕐᒥᒃ ᑲᒪᒋᔭᖃᕐᓂᒥᓗ ᒪᒥᓭᓂᕐᒥᓗ, ᓄᓇᓕᓐᓄᑦ ᐅᑎᕐᐸᓕᐊᑎᑦᓯᓂᕐᒥᓗ ᐃᓄᓐᓄᑦ ᓲᓱᒋᔭᖃᕐᑎᓯᓂᒃᑯᑦ ᐃᓄᐃᑦ ᐃᓗᕐᕈᓯᖓᓂᒃ. ᓄᓇᓕᓐᓂ ᐱᒍᑦᔨᒍᑏᑦ ᐃᑉᐱᒋᔭᖃᓲᖑᕗᑦ ᑕᒪᒃᑯᐊ ᐃᓄᑑᓈᕐᑎᑐᐃᓪᓗ ᐃᓚᒌᖑᔪᐃᓪᓗ ᐱᒍᑦᔭᐅᓂᖃᕆᐊᓖᑦ ᐱᑎᑕᐅᑦᓯᐊᕋᓗᐊᕐᒪᖔᑕ, ᑭᖕᖒᒪᒋᔭᖏᓪᓗ ᓇᓗᓀᔭᕐᑕᐅᓯᐊᕋᓗᐊᕐᒪᖔᑕ ᐊᒻᒪᓗ ᐱᒍᑦᔨᒍᑏᑦ ᐱᕕᖃᕐᑎᑕᐅᔪᑦ ᐊᒥᓱᓅᓕᖓᑦᓯᐊᕋᓗᐊᕐᒪᖔᑕ, ᐱᓗᐊᕐᑐᒥᒃ ᐅᕕᒃᑲᓂᒃ ᐃᓚᒌᖑᔪᓂᒃ ᐱᐊᕋᕐᓂᓗ. ᑕᒪᒃᑯᐊ ᐱᒍᑦᔨᒍᑏᑦ ᐱᕕᖃᕐᑎᑕᐅᓲᖑᕗᑦ ᐋᓐᓂᐊᕕᒻᒪᕇᑦ ᐃᓱᐊᖁᑎᖏᓐᓂ ᐊᒻᒪᓗ ᐊᖏᕐᕋᕆᔭᐅᔪᕐᓂ, ᐃᓕᓐᓂᐊᕕᓐᓂᓗ ᐊᒻᒪᓗ ᓄᓇᓕᓐᓂ.

ᑭᖑᓪᓕᐸᐅᑎᓗᒍ, ᐋᓐᓂᐊᕕᓕᐊᕐᓯᒪᔪᓕᕆᔩᑦ ᒪᓐᑐᔨᐊᒥ, ᐊᐅᓚᑕᐅᓂᖃᕐᓱᓂ ᐃᓅᓕᑦᓯᕕᒃ ᐋᓐᓂᐊᕕᒻᒪᕆᖓᓄᑦ, ᑲᒪᒋᔭᖃᓲᖑᕗᑦ ᐃᓄᓐᓂᒃ ᐋᓐᓂᐊᕕᓕᐊᕐᓯᒪᔪᓂᒃ ᓅᑕᐅᓯᒪᔪᓂᒃ ᒪᓐᑐᔨᐊᒧᑦ ᑲᒪᒋᔭᐅᒋᐊᖃᑐᐊᕐᒪᑕ ᐱᒍᑦᔭᐅᒋᐊᖃᑐᐊᕐᒪᑕᓗ ᐱᕕᑦᓴᖃᖕᖏᑐᐊᕐᒪᑕ ᓄᓇᕕᒻᒥ ᐊᕐᖁᑎᒋᑦᓱᒋᑦ ᐅᑭᐅᕐᑕᖓᓂ ᑯᐯᒃᒥ ᐱᒍᑦᔨᕕᖓ (the Northern Québec Module - Module du Nord québécois).