ᖃᓂᒪᓇᕐᑐᑖᕆᒃᑯᑎᒥᒃ ᑰᕕᑦ-19ᒥᒃ ᑲᐱᓯᖃᑦᑕᓃᑦ COVID-19

ᑲᐱᔭᐅᒍᑏᑦ ᓄᕙᓐᓇᔪᐊᕇᒃᑯᑏᑦ ᖃᓂᒻᒪᓯᕐᒧᓗ Covid-19-ᒧᑦ ᐊᑐᐃᓐᓇᐅᓕᕆᕗᑦ ᓄᓇᓕᓕᒫᓂ ᐊᑭᖃᕋᑎᒃ.

ᓄᓇᓕᑦᓯᓂ ᐋᓐᓂᐊᕕᓯ ᑐᓴᐅᒪᑎᑦᓯᒍᑎᖏᑦ ᖃᐅᔨᒪᒐᓱᐊᕐᓗᒋᑦ ᑐᓴᐅᒪᑦᓯᐊᑎᑕᐅᓚᖓᔪᑎᑦ ᖃᖓ ᑲᐴᕆᓂᖅ ᐱᒋᐊᓛᓕᕐᒥᒪᖔᑦ

 

ᖃᓂᒪᓐᓇᖅ 19 ᑲᐴᑎᖓ

ᓱᒧᑦ ᐱᒻᒪᕆᐅᕙ ᑲᐱᔭᐅᓂᖅ?

ᑲᐱᔭᐅᓂᖅ ᐱᐅᓂᕐᐸᐅᕗᖅ ᖃᓂᒪᓐᓇᒥᒃ ᐱᓀᓗᑕᕆᒍᓐᓇᑕᖏᓐᓂᓗ ᐹᒍᑎᐅᒐᒥ .  ᖃᓂᒪᓐᓇᑖᓪᓗᐊᕇᒃᑯᑎᐅᑦᓱᓂ ᐃᕐᐸᑎᕆᓂᕐᒥᓗ ᐃᑯᓪᓚᑎᑦᓯᒍᑎᐅᔪᖅ, ᖃᓂᒪᓐᓇᐅᓗ 19 ᐱᔮᓄᑦ ᐋᓐᓂᐊᕕᒻᒦᓚᕿᒌᒃᑯᑎᐅᑦᓱᓂ  ᑐᖁᓚᕿᒌᒃᑯᑎᐅᑦᓱᓂᓗ.

ᖃᑦᓯᕕᓪᓗᓂ ᑲᐱᔭᐅᓯᒪᒋᐊᖃᕐᖃ?

ᑲᐱᔭᐅᒋᐊᖕᖓᑐᕕᓂᐅᓗᓂ ᖃᓂᒪᓐᓇᖅ 19-ᒥᒃ ᐹᒍᑎᒧᑦ ᓱᖑᓭᒋᐊᓪᓚᕈᑎᓂᒃ ᑲᐱᔭᐅᖃᑦᑕᕆᐊᓕᒃ.  ᐊᑦᔨᒌᖕᖏᑐᐃᑦ ᐱᑦᔪᑏᑦ ᖃᐅᔨᒪᒍᑎᐅᓲᑦ ᖃᑦᓯᕕᓪᓗᓂ ᑲᐱᔭᐅᔪᑦᓴᐅᒪᖔᑦ ᐃᓄᒃ, ᐅᑦᑑᑎᒋᓗᒍ ᐅᑭᐅᖏᑦ ᐃᓗᓯᕐᓗᓂᖓᓗ ᒪᓕᓪᓗᒋᑦ.

ᐃᓗᓐᓈᒍᑦ, ᐱᐊᕋᖅ ᐱᖓᓲᔪᕐᑐᓂᒃ ᑕᕐᕿᓕᒃ ᐊᖓᔪᑦᓯᓗᓐᓃᑦ ᒪᕐᕈᕕᓪᓗᓂ ᑲᐱᔭᐅᒪᒋᐊᓕᒃ.

ᑲᐱᔭᐅᒋᐊᖓᑎᑕᐅᒍᓐᓇᓕᕐᑐᑦ ᐱᐊᕃᑦ ᑕᓪᓕᒪᓂᒃ ᐅᑭᐅᓖᑦ ᐊᖓᔪᑦᓰᓗ.

ᐃᓄᒻᒪᕇᑦ, ᐱᐊᕋᑦᓴᓖᓪᓗ ᐊᕐᓀᑦ ᑎᒥᒥᒍᓪᓗ ᖃᓂᒪᒥᒃ ᐹᒍᑎᖃᑦᓯᐊᖏᑦᑐᑦ ᖁᓕᓪᓗ ᒪᕐᕈᓗᓂᒃ ᐅᑭᐅᓖᑦ ᐊᖓᔪᑦᓰᓗ ᑲᐱᔭᕕᓂᐅᓗᑎᒃ ᑕᓪᓕᒣᑦ ᑕᖀᑦ ᓈᑉᐸᑕ ᓱᖑᓭᒍᑎᒥᒃ ᑲᐱᔭᐅᒋᐊᓪᓚᕆᐊᓖᑦ, ᐊᒥᓱᕕᓪᓗᓂ ᑲᐱᔭᐅᒋᕐᓯᒪᒐᓗᐊᕈᓂ.

ᖃᓂᒪᓐᓇᓕᕕᓂᖅ ᐅᑕᕐᕿᕆᐊᓕᒃ ᐱᖓᓱᓂᒃ ᑕᕐᕿᓂᒃ ᑲᐱᔭᐅᒋᐊᓪᓚᓚᐅᕋᓂ.

ᑎᒥᒥᒍᑦ ᖃᓂᒪᒥᒃ ᐹᒍᑎᖃᑦᓯᐊᖏᑦᑐᑦ ᐅᕝᕙᓗᓐᓃᑦ ᑕᕐᑐᒥᒍᑦ ᓴᓗᒻᒪᓴᕐᑕᐅᔭᕆᐊᓖᑦ, ᑲᐱᔭᐅᖃᑦᑕᓂᖓ ᐊᑦᔨᐅᖏᑦᑑᒥᔪᖅ.  ᐱᖓᓱᕕᑦᓯᒪᒋᐊᓖᑦ, ᓱᖑᓭᒋᐊᓪᓚᕈᑎᓂᓪᓗ ᑲᐱᔭᐅᖃᑦᑕᒥᓗᑎᒃ.  ᐱᑦᒪᕆᐊᓘᕗᖅ ᑖᒃᖁᖓ ᑌᒣᑦᑐᒦᑦᑐᑦ ᑲᐱᔭᐅᓯᒪᑦᓯᐊᕆᐊᖃᕐᓂᖓ ᖃᓂᒪᓐᓇᑖᕆᒃᑯᑎᒥᒃ ᐃᒫᙰᕈᑎᐅᓯᒪᔪᑦ ᒪᓕᓪᓗᒋᑦ, ᐅᐱᓐᓇᕋᓂ ᐊᑦᑕᓇᕐᑐᒦᓚᕆᒍᓐᓇᒪᑕ ᖃᓂᒪᓐᓇᖅ 19-ᒧᑦ ᖃᓂᒻᒪᕈᑎᒃ.  ᑎᒥᒥᒍᑦ ᖃᓂᒪᒥᒃ ᐹᒍᑎᖃᑦᓯᐊᖏᑦᑐᑦ ᐅᖃᓚᕕᖃᕈᓐᓇᑐᑦ ᐊᓐᓂᐊᕕᒻᒥᓂᒃ ᖃᐅᔨᒐᓱᐊᕐᕕᖃᕐᓗᑎᒃ ᑲᐴᑎᒥᒃ ᓴᐳᑎᓯᒪᔭᐅᒍᑎᖃᑦᓯᐊᕋᓗᐊᕐᒪᖔᒻᒥᒃ.

ᓱᒧᑦ ᑲᐱᔭᐅᒋᐊᓪᓚᓂᖃᕆᐊᖃᑦᓴᕆᕙ ᓱᖑᓯᓭᒍᑎᒧᑦ?

ᑲᐴᑎ ᖃᓂᒪᓐᓇᖅ 19-ᒥ ᐹᒍᑎᑦᓯᐊᖑᒋᐊᖓ ᑐᑭᓯᔭᐅᓯᒪᓕᕐᑐᖅ.  ᑭᓯᐊᓂ, ᖃᐅᔨᔭᐅᓯᒪᔪᑦ ᑐᑭᓯᒍᑎᐅᓯᒪᕗᑦ ᓴᐳᓗᑕᓕᐊᖑᓯᒪᔪᑦ ᑎᒥᒥ ᓄᖑᑉᐸᓕᐊᓲᖑᒋᐊᖏᑦ ᑕᖀᑦ ᐊᒥᓱᒐᓓᑦ ᐊᓂᒍᑐᐊᕐᒪᑕ ᑲᐱᔭᐅᓱᖓᕐᕕᕕᓂᖓᓂᑦ. ᓱᖑᓯᓭᒍᑎᒃ ᑲᐴᑎᒃ ᓴᐳᓗᑕᕆᓕᕐᑕᖏᓐᓂᒃ ᑎᒥᐅᑉ ᓱᖑᓯᑎᑦᓯᒋᐊᓲᖅ ᐹᓐᓂᒍᓐᓇᓯᐊᕐᓂᐊᒪᑦ ᖁᐱᕐᕈᑯᓗᒻᒥᒃ ᐊᓯᑦᔨᑕᓂᕆᓲᖏᓐᓂᓗ.

ᓱᓇᐅᕚᑦ ᓱᕐᕋᑕᐅᒍᑎᐅᒍᓐᓇᑐᑦ??

ᑲᐱᔭᐅᒋᕐᑐᖃᒥ, ᓱᕐᕋᑕᐅᒐᓛᐱᖕᖏᓂᐊᖏᑐᖅ.  ᑕᒃᑯᐊ ᓱᕐᕋᑕᐅᒍᑎᖏᑦ ᑎᒥᐅᑉ ᐅᓪᓗᓂ ᐃᑭᑦᑐᐊᐱᓐᓂ ᓄᐃᑕᓲᑦ, ᐃᓱᕐᕆᕈᓐᓀᑎᑦᓯᒍᓐᓇᓱᑎᓪᓗ, ᑭᓯᐊᓂ ᐊᑦᑕᓇᖕᖏᑐᑦ.  ᑎᒥᑦᑕ ᐃᓕᑕᕐᓯᒍᑎᑐᐃᓐᓇᖏᑦ ᖃᓂᒪᒥᒃ ᐹᒍᑎᓕᐅᕆᐊᖃᕐᒥᒃ.  ᐅᑯᐊᓗᐊᖕᖑᐊᑦ ᓱᕐᕋᑕᐅᒍᑎᐅᓲᑦ:

  • ᑲᑉᐳᓕᕆᓂᖅ ,
  • ᓂᐊᖁᖕᖑᓂᖅ ,
  • ᓄᑭᓕᕆᓂᖅ ᓇᒡᒍᐊᓕᕆᓂᕐᓘᓃᑦ,
  • ᑕᖃᒪᕙᕐᔪᐊᓂᖅ ,
  • ᐃᑎᑦᑕᓂᖅ ,
  • ᒥᕆᐊᑎᕆᓂᖅ ,
  • ᐅᓂᕐᒥ ᕿᓂᕐᓰᑦ ᐳᓪᓕᓕᕐᓂᖓ ,
  • ᐆᓇᕿᓂᖅ ᐆᓕᖃᑦᑕᓂᕐᓗ.

ᑲᑉᐳᖅ ᐳᓪᓕᓕᕈᓐᓇᒥᔪᖅ ᐊᐅᐸᓗᑦᓯᓗᓂᓗ, ᐱᓇᓱᐊᕈᓯᓕᒫᒥᐊᓪᓚᑦ ᑲᐱᔭᐅᒋᕐᓯᒪᓕᕐᓗᓂ ᑌᒣᓕᖓᒍᓐᓇᑐᖅ

ᑲᐴᑏᒃ ᐊᑦᑕᓇᕐᖃ?

ᖃᓂᒪᓐᓇᖅ 19-ᒥᒃ ᐹᒍᑎᒃ ᑲᐴᑎᒃ ᐊᑦᑕᓇᖕᖏᑐᖅ.  ᖃᐅᔨᓴᕐᑕᐅᖃᑦᑕᓯᒪᔪᖅ ᑲᐴᑎᒃ ᑌᒪᓪᓗᐊᓭᓐᓇᑎ ᐊᓯᖏᑦ ᖃᓂᒪᑖᕆᒃᑯᑎᑦ ᑲᐴᑏᑦ ᑲᒪᒋᔭᐅᒍᓯᒋᖃᑦᑕᓯᒪᔭᖓᑎᑐᑦ ᐊᖏᕐᑕᐅᓯᒪᑦᓯᐊᓱᓂᓗ ᑲᓇᑕᐅᑉ ᐊᓐᓂᐊᓂᓕᕆᔨᖏᓐᓄᑦ.  ᐅᓪᓗᒥᒧᑦ, ᒥᓕᐊᒐᓴᕐᓃᓕᕐᑐᑦ ᑲᐱᔭᐅᓯᒪᔪᑦ ᓄᓇᕐᔪᐊᓕᒫᒥ.  ᑖᒃᑯᐊᓕᒫᑦᓯᐊᑦ ᖃᐅᔨᒪᒍᑎᐅᔪᑦ ᑲᐴᑎᐅᑉ ᐊᑦᑕᓇᖏᒋᐊᖓᓂᒃ.

ᑲᐴᑏᑦ ᐃᓚᖓᓂ ᑎᒥᒥᒃ ᓱᕐᕃᒐᓚᐱᒍᓐᓇᓂᖃᕐᒥᔪᒐᓗᐊᑦ.  ᑭᓯᐊᓂ ᒪᕐᕈᐃᓈᒃ 100,000-ᓂ ᐃᓄᓐᓂ ᑌᒣᓕᓚᕿᓲᑦ ᑲᐱᔭᐅᑐᐊᕋᒥᒃ.  ᑲᐱᔭᐅᒋᑦᓴᑐᐊᕋᒥ ᖃᐅᔨᔭᐅᓲᖅ ᓱᕐᕋᑕᐅᒋᐊᖓ ᑎᒥᒃᑯᑦ ᑲᒪᒋᔭᐅᒍᑎᑦᓴᑕᖃᕐᓱᓂᓗ ᑌᒣᓕᔪᖅ. ᑌᒣᒻᒪᑦ ᐅᑕᕐᕿᒋᐊᖃᕐᑎᑕᐅᓲᑦ 15 ᒥᓂᑦᓯᓂᒃ ᑲᐱᔭᐅᒋᑐᐊᕋᒥᒃ ᓱᕐᕋᑕᐅᓚᖓᖕᖏᑲᓗᐊᕐᒪᖔᑦ ᓇᐅᑦᓯᑐᕐᑕᐅᓱᑎᒃ.

ᐅᒻᒪᑎᐅᑉ ᓄᑭᖏᑦ ᐳᓪᓕᓕᕐᑎᑕᐅᒍᓐᓇᒥᔪᑦ ᑭᓯᐊᓂ ᑌᒣᓕᑭᑕᕐᑐᖃᕐᓯᒪᖕᖏᑐᖅ (ᒪᕐᕉᒃ ᐃᓅᒃ 100,000-ᓂ). ᐊᖑᑏᑦ ᐃᓅᓱᑦᑐᑦ 30-ᓂᒃ ᐅᑭᐅᓕᓐᓂᑦ ᓄᑲᕐᓰᑦ ᑌᒣᓕᒍᐊᕐᓂᐸᐅᓂᕋᕐᑕᐅᔪᑦ.  ᐊᑦᑕᓇᕐᓯᔪᒨᓲᖑᖕᖏᑐᑦ ᖃᓄᐃᒍᓐᓀᓴᐅᑎᒋᑦᓱᑎᓪᓗ.

ᖃᓄᖅ ᑲᐱᔭᐅᒍᓐᓇᖁᖓ?

ᓄᓇᕕᓕᒫᑦᓯᐊᒥ ᖃᓂᒪᓐᓇᖅ 19-ᒥ ᐹᒍᑏᑦ ᑲᐴᑏᑦ ᐊᑐᐃᓐᓇᐅᑎᑕᐅᑦᓯᐊᑐᑦ ᑭᓇᓕᒫᒃᑯᓄᑦ 6-ᓂᒃ ᑕᕐᕿᓖᑦ ᐱᐊᕃᑦ ᐱᒋᐊᕐᕕᖏᑦᓱᒋᑦ. ᐅᖄᓚᒍᓐᓇᑐᓯ ᐊᓐᓂᐊᕕᑦᓯᓄᑦ ᑲᐱᔭᐅᔭᕐᑐᓂᕆᒐᔭᕐᑌᑦ ᐊᕐᕿᑕᐅᖁᓪᓗᒍ. 

 

Useful link(s)