ᓱᓇᐅᕙᑦ ᐱᔪᓐᓇᐅᑎᒃᑲ ᐊᑐᕐᑎᐅᓂᕋ ᒪᓕᓪᓗᒍ?
ᐊᑐᕐᑏᑦ ᐱᔪᓐᓇᐅᑎᖃᕐᐳᑦ ᐃᑲᔪᕐᓯᒋᐊᕐᑕᐅᕕᖃᕐᓱᑎᓪᓗ ᐃᓗᐊᒍᑦ ARPP-ᑯᑦ.
ᐊᑐᕐᑎ ᐱᔪᓐᓇᑎᖃᖕᖏᑐᐃᓐᓇᑐᖅ ᐃᒣᓕᐅᕆᐊ:
- ᐊᓂᒋᐊᖃᕋᓂ ᐋᓐᓂᐊᕕᒻᒥ ᐊᐅᓚᑦᔭᕆᐊᕈᑕᐅᓯᒪᔪᒦᑦᑎᑕᐅᒍᓂ ᐋᓐᓂᐊᕕᐅᑉ ᑎᒍᒥᐊᕐᕕᖓᓃᓕᕈᓂ.
ᐊᑐᕐᑎ ᐱᔪᓐᓇᐅᑎᖃᕐᐳᑦ ᐃᒣᓕᐅᕈᓐᓇᓱᓂ:
- ᐱᓯᒪᒋᐊᓕᒃ ᐋᓐᓂᐊᕕᒻᒥᑦ ᐱᓇᓱᐊᕐᑕᐅᒍᑎᖏᓐᓅᓕᖓᓚᖓᔪᓕᒫᓂᒃ ᓯᑯᑦᓴᔭᓂᒃ ᖃᐅᔨᑎᑦᓯᐅᑎᓂᒃ ᒪᓕᒐᕆᓂᐊᕐᑕᒥᑕ, ᐊᑦᔨᒌᖕᖏᑑᒻᒪᑕ ᑎᒍᒥᐊᕐᑕᐅᒍᓯᑦᓴᔦᑦ, ᐱᔪᓐᓇᐅᑎᖏᑦ ᐊᒻᒪᓗ ᖃᓄᐃᓕᐅᕈᑦᔭᐅᒋᐊᓪᓚᕈᓐᓇᐅᑎᖏᑦ.
ᐊᑐᕐᑎ ᑐᑭᓯᐊᕐᖃᔭᖕᖏᐸᑦ ᑕᒪᒃᑯᓂᖓ ᐃᓱᒪᖓᑕ ᓱᕐᕋᓯᒪᓂᖓᓄᑦ, ᑕᒪᒃᑯᐊ ᖃᐅᔨᒪᔭᐅᒋᐊᓕᓕᒫᑦ ᑐᓂᔭᐅᓂᐊᕐᑐᑦ ᖃᓂᒋᓂᕐᐹᖓᓄᑦ ᐃᓚᖓᓄᑦ ᐅᕝᕙᓘᓐᓃᑦ ᐊᓯᐊᓄᑦ ᑖᑦᓱᒥᖓ ᐃᓄᒻᒥᒃ ᐃᓱᒫᓗᒋᔭᖃᕋᓱᐊᕐᓱᑎᒃ ᑲᒪᖃᑕᐅᕙᑦᑐᓄᑦ. ᑐᑭᓯᒍᓐᓇᓯᓯᒪᓕᑐᐊᕐᐸᑦ, ᑕᒪᒃᑯᐊ ᑐᑭᓯᒪᒋᐊᓕᓕᒫᖏᑦ ᖃᐅᔨᑎᑕᐅᒍᑎᒋᒋᐊᓕᖏᑦ;
- ᐊᖏᖕᖏᑕᖃᕈᓐᓇᑐᖅ ᖃᐅᔨᓴᕐᑕᐅᒍᒪᐅᑎᒥᓂᒃ, ᑲᒪᒋᔭᐅᒍᒪᐅᑎᒥᓂᒃ, ᐋᓐᓂᐊᓯᐅᕐᑕᐅᒍᒪᐅᑎᒥᓂᓘᓐᓃᑦ, ᕿᐱᓗᒐᓗᐊᕐᐸᑦ ᐊᐅᓚᑦᔭᕆᐊᕈᓐᓇᑐᑑᓂᐊᕐᑎᓗᒋᑦ ᐃᕐᖃᑐᐃᕕᒃᑯᑦ ᐊᑑᑎᔭᐅᖁᓯᒪᔭᖏᑦ (ᐊᑑᑎᔪᕕᓂᐅᔪᖃᕐᐸᑦ ᑎᒍᓂᐊᕐᑕᐅᑫᓐᓇᖁᔭᐅᓯᒪᓚᕿᑦᓱᓂ, ᐆᑦᑑᑎᒋᓗᒍ) ᐅᕝᕙᓘᓐᓃᑦ ᐅᐃᒪᓇᕐᓯᓯᒪᔪᒦᑉᐸᑦ ᑲᒪᒋᔭᐅᒋᐊᖃᓕᓂᖓ (ᐊᕕᑦᑐᓯᒪᓂᖓ 13 ᐃᓄᓕᒫᓅᓕᖓᑦᓱᑎᒃ ᓯᓚᕐᖁᕇᒃᑯᑏᑦ ᑯᐯᒻᒥ);
- ᐅᖃᕈᑎᖃᕆᐊᓕᒃ, ᓂᐱᒥᒍᑦ ᐅᕝᕙᓘᓐᓃᑦ ᐊᓪᓚᓯᒪᔪᕐᑎᒍᑦ ᐃᕐᐸᑎᐅᓂᐊᕐᑎᓇᒍᑦ ᑕᒪᒃᑯᐊ ᐅᖄᔭᖏᑦ, ᑖᒃᑯᓄᖓ ᐃᓄᓐᓄᑦ ᓇᓪᓕᑳᕐᓯᒪᔭᒥᓄᑦ, ᐃᓂᕐᑎᑕᐅᕐᖃᔭᖕᖏᑐᑑᑎᓪᓗᒍ ᑐᓴᐅᒪᖃᑕᐅᒋᐊᖃᕐᓂᖓ ᐋᓐᓂᐊᓯᐅᕐᑎᒪᕆᐅᑉ. ᑌᒣᓕᖓᑉᐸᑦ, ᖃᐅᔨᒪᑎᑕᐅᑦᓯᐊᕆᐊᓕᒃ ᑕᒪᑐᒥᖓ ᐊᓪᓚᓯᒪᔪᕐᑎᒍᑦ. ᐅᓂᑦᓯᒪᐅᑎᖃᕐᑎᑕᐅᒋᐊᖃᖕᖏᑐᖅ ᐅᖄᖃᑎᖃᕈᒪᓐᓂᐊᑦ ᐱᖁᔭᕐᑎᒍᑦ ᑭᒡᒐᑐᕐᑎᒥᓂᒃ, ᐱᖁᔭᓕᕆᔨᒥᓂᒃ ᐊᒻᒪᓗ ᐊᐅᓚᑦᓯᕕᖓᓂᒃ ᐃᕐᖃᑐᐃᕕᒃᑰᑎᑦ ᑯᐯᒻᒥ;
- ᑭᓪᓕᒋᑦᓴᑎᑦᓯᒋᐊᓕᒃ ᑐᓵᔭᐅᓗᓂ ᐃᕐᖃᑐᐃᕕᒻᒥ. ᐱᔪᓐᓇᐅᑎᓕᒃ ᒪᓕᑦᑕᐅᓂᕐᒧᑦ ᐱᖁᔭᓕᕆᔨᒥᓄᑦ. ᐃᓚᖓ ᖃᓂᒋᓂᕐᐹᖓ ᑐᑭᓯᒪᖃᑕᐅᑦᓯᐊᕈᓂ ᐊᑑᑎᔪᓂᒃ ᐁᓯᒪᖃᑕᐅᒍᓐᓇᑐᖅ. ᐅᓇ ᐃᓱᒪᒋᔭᐅᒻᒥᑎᓪᓗᒍ, ᐋᓐᓂᐊᓯᐅᕐᑎᒪᕆ ᐊᑦᑕᓇᓚᖓᔪᒻᒪᕆᐅᓂᖓᓂᒃ ᖃᐅᔨᒪᒍᓂ ᐊᑐᕐᑎ ᐃᕐᖃᑐᐃᕕᒻᒥ ᐅᖄᒋᐊᕐᑐᓯᒪᓕᕈᓂ ᓱᕐᕋᑕᐅᓚᖓᔪᕆᒍᓂᐅᒃ ᑎᒥᖓ, ᑌᒣᖁᔨᖕᖏᓂᕐᒧᑦ ᐃᓂᕐᑎᕆᐅᑎᒃ ᕿᓄᒍᑕᐅᒍᓐᓇᐳᖅ ᐃᕐᖃᑐᐃᕕᒻᒥᑦ ᐱᓗᒍ;
- ᐊᖏᕐᓯᒪᖕᖏᑯᓂ ᐃᕐᖃᑐᐃᕕᒻᒧᑦ-ᐊᑑᑎᖁᔭᐅᓯᒪᔪᒥᒃ ᑎᒍᓂᐊᕐᑕᐅᕕᒻᒦᓚᖓᓂᕐᒥᓄᑦ ᐊᓯᐊᓄᑦ ᐃᕐᖃᑐᐃᕕᓕᐊᕈᓐᓇᑐᖅ, ᐆᑦᑑᑎᒋᓗᒍ: ᐊᐅᓚᑦᓯᕕᖓᓄᑦ ᐃᕐᖃᑐᐃᕕᒃᑰᑎᑦ ᑯᐯᒻᒥ;
- ᐃᑲᔪᕐᑕᐅᒍᑎᑦᓴᒥᓂᒃ ᐱᓯᒪᓗᓂ ᐊᑐᓕᕐᑎᓯᒐᓱᐊᓕᕈᓂ ᐱᔪᓐᓇᐅᑎᒥᓂᒃ.
ᐃᒣᒋᐊᓕᒃ:
- ᒪᓂᔨᓗᓂ ᐃᕐᖃᑐᐃᕕᒧᑦ ᑐᑭᑖᕐᓯᒪᒍᑦᔭᐅᒍᑎᒥᓂᒃ ᓯᑯᑦᓴᔭᓂᒃ.
ᐋᓐᓂᐊᕕᒃ ᐃᒣᒋᐊᓕᒃ:
- ᖃᐅᔨᑎᑦᓯᒋᐊᓕᒃ ᐃᓚᖓᓂᒃ ᐅᕝᕙᓘᓐᓃᑦ ᐊᓯᐊᓂᒃ ᑲᒪᖃᑕᐅᓲᒥᒃ ᐊᑐᕐᑎᐅᑉ ᑎᒍᒥᐊᕐᑕᐅᕕᒻᒦᓚᖓᓂᖓᑕ ᒥᑦᓵᓄᑦ. ᑭᖑᓪᓕᖅ ᑕᒪᓐᓇ ᓇᓗᓀᕐᓯᓯᒪᒍᓐᓇᒥᔫᒐᓗᐊᖅ ᐱᐅᓂᕐᓴᐅᒐᔭᕐᑐᕆᔭᐅᒥᓂᒃ ᐊᐅᓚᑦᔭᕆᐊᕈᑕᐅᔪᑦᓴᖁᑎᒥᓂᒃ, ᑭᓯᐊᓂ ᑐᑭᑖᕈᑎᖃᓪᓚᕆᑦᑐᑑᒍᓐᓇᕆᐊᓕᒃ ᐋᓐᓂᐊᓯᐅᕐᑎᒪᕆᖓ ᑲᒪᔪᖅ ᑖᑦᓱᒥᖓ ᐊᒻᒪᓗ ᐋᓐᓂᐊᕕᐅᑉ ᐱᖁᔭᓕᕆᔨᖓ. ᑐᕌᕐᑕᐅᒐᓱᐊᕐᒪᑦ ᐃᑉᐱᒋᔭᐅᑦᓯᐊᕆᐊᖃᕐᓂᖏᑦ ᐊᑐᕐᑎᐅᑉ ᐃᓚᖏᑦᑕ ᖃᐅᔨᒪᖃᑕᐅᒋᐊᖃᕐᓂᖏᓐᓄᑦ ᓇᓃᑦᑎᑕᐅᓕᕐᒪᖔᑦ ᐊᒻᒪᓗ ᐃᑲᔪᕐᓯᒪᖃᑕᐅᒍᓐᓇᓱᑎᒃ ᑭᖕᖒᒪᒋᔭᐅᑐᐊᕈᑎᒃ ᐊᑐᕐᑎᐅᑉ ᐊᖏᕐᓯᒪᔭᖏᑦ ᒪᓕᓪᓗᒋᑦ;
- ᐱᑖᕐᑎᖃᑦᑕᓗᒍ ᐊᑐᕐᑎ ᖃᐅᔨᒪᒋᐊᓕᓕᒫᑦᓯᐊᖏᓐᓂᒃ ᑐᑭᓯᒪᐅᑎᖃᑦᓯᐊᓂᐊᕐᒪᑦ ᖃᓄᐃᓕᐅᕈᑕᐅᓕᕐᒪᖔᕐᒥ ᓱᒧᓪᓗ ᑎᒍᒥᐊᑦᑕᐅᕕᒻᒦᒪᖔᕐᒥ ᖃᐅᔨᒪᒡᒐᑕᕋᓱᐊᓚᕿᓂᐊᖁᓇᒍ ᖃᓄᐃᓕᖓᒍᑕᐅᓕᕐᒪᖔᕐᒥ ᖃᐅᔨᒪᑦᓴᐅᑎᒋᒋᐊᓕᕕᓂᕐᒥᓂᒃ ᐱᓯᒪᑦᓴᐅᑎᒋᑎᑕᐅᖕᖏᒧᑦ;
- ᖃᐅᔨᒪᑎᑕᐅᒋᐊᓕᒃ ᐊᑐᕐᑎ, ᐋᓐᓂᐊᖓ ᐱᒻᒪᕆᓐᓂᑯᖓᓄᑦ, ᐱᔪᓐᓇᐅᑎᖏᑦᑕ ᐃᓚᖏᑦ ᐅᓂᑦᓯᒪᑎᑕᐅᑫᓐᓇᓚᐅᕐᑐᒪᖔᑦ ᓱᒧᑦ (ᐆᑦᑑᑎᒋᓗᒍ, ᐅᖃᖃᑎᖃᕐᖃᔦᕐᓯᒪᑎᑕᐅᑫᓐᓇᓂᖓ);
- ᖃᐅᔨᒪᑎᑕᐅᓗᓂ ᐊᑐᕐᑎ ᐊᑐᐃᓐᓇᖃᕐᑎᑕᐅᑦᓯᐊᓂᖓᓂᒃ ᐃᑲᔪᕐᓯᒪᔭᐅᒍᑎᑦᓴᖏᓐᓂᒃ ᐊᒻᒪᓗ ᐃᑲᔪᕐᓗᒍ ᐱᔪᓐᓇᐅᑎᖏᑦᑕ ᐊᑑᑎᑦᓯᐊᕆᐊᖃᕐᓂᖏᓐᓂᒃ.
ᐅᑯᐊᓕ ᖃᓄᐃᓕᖓᓂᐊᕐᒪᑕ ᐃᕐᐸᑎᑕᐅᑦᑌᓕᒪᓂᕐᒨᓕᖓᔪᑦ ᐊᒻᒪᓗ ᐱᔪᓐᓇᑐᓪᓚᕆᐅᑉ ᖃᐅᔨᒪᔭᒥᓂᒃ ᐃᔨᕐᑐᐊᖃᕆᐊᖃᕐᓂᖓ?
ᑯᐯᒃᒥ, ᑐᖕᖓᕕᓪᓚᕆᖓ ᐃᕐᐸᑎᑦᓯᑌᓕᒪᓂᐅᑉ ᒪᓕᓲᖅ ᐃᓅᑉ ᐱᔪᓐᓇᐅᑎᖓᓂᒃ ᐃᓕᕋᓇᕐᑑᑎᑕᐅᒋᐊᖃᕐᓂᖓᓄᑦ ᐱᒻᒪᕆᐅᑎᑕᐅᑦᓯᐊᓗᓂ ᓇᒻᒥᓂᖅ ᐃᓅᖓ ᑕᒪᓪᓛᑎᑦᑌᓕᓗᒍ (ᐊᕕᑦᑐᓯᒪᓂᖓ 3 ᓄᓇᕐᖃᑎᒌᑦ ᓯᓚᕐᖁᕇᒃᑯᑎᖓᓂ). ᑌᒣᒻᒪᓗ, ᐃᓄᒃ ᐊᖏᕈᑎᖃᓚᐅᕐᖄᑎᓐᓇᒍ, ᐋᓐᓂᐊᕕᒃ ᐅᓂᒃᑳᕈᑎᖃᑲᑦᑕᕆᐊᖃᖕᖏᓚᖅ ᐃᕐᐸᑎᑕᐅᑦᑌᓕᒪᒋᐊᓕᓐᓂᒃ ᐊᓪᓚᓯᒪᔪᖁᑎᒥᓂᒃ ᑖᓐᓇ ᐃᓄᒃ ᐱᓪᓗᒍ. ᒪᓐᓇᓕ ᐱᔪᓐᓇᑐᓪᓚᕇᑦ ᐃᔨᕐᑐᐊᖃᕆᐊᖃᓲᒍᓂᕋᕐᑕᐅᓂᖓ ᐱᓪᓗᒍ, ᐱᔪᓐᓇᑐᓪᓚᕆᓕᒫᑦ ᐃᓚᐅᒍᑎᖃᖃᑕᐅᔪᑦ ᐱᔪᓐᓇᑐᓪᓚᕇᑦ ᑲᑐᑦᔨᖃᑎᒌᓐᓂᖓᓄᑦ ᐃᓂᕐᑎᑕᐅᒍᑎᖃᕐᑎᑕᐅᕗᑦ ᐅᓂᒃᑳᕆᐊᖃᕋᑎᒃ ᐃᓅᑉ ᓇᒻᒥᓂᖓᑕ ᒥᑦᓵᓅᓕᖓᔪᓕᒫᓂᒃ ᐊᓪᓚᓯᒪᔭᒥᓂᒃ ᐊᑐᕐᑎᒨᓕᖓᔪᓂᒃ, ᑖᓐᓇ ᐊᑐᕐᑎ ᐊᖏᕈᑎᖃᕐᖄᓚᐅᕐᑎᓇᒍ.
ᑕᒐᓕ ᐱᓇᓱᐊᕆᐊᖃᓲᖏᑦ ᒪᓕᓪᓗᒋᑦ ARPP-ᑯᑦ ᑐᕌᕐᑕᖃᕐᒪᑕ ᐃᓅᑉ ᐃᓅᓯᖓᓂᒃ ᐸᐸᑦᓯᒋᐊᖃᕐᓂᒧᑦ, ᖃᓄᐃᑦᑐᓅᓕᖓᓪᓗᑯᑦᑐᑦ ᒪᓕᒌᑦ ᐃᕐᐸᑎᑦᓯᑌᓕᒪᓂᕐᒨᓕᖓᔪᑦ ᐃᓚᖓᓂ ᐊᑐᕐᑕᐅᖏᑫᓐᓇᕆᐊᖃᓲᖑᕗᑦ:
- ᐳᓖᓯᒃᑯᑦ, ᐃᓄᓕᕆᔨᒃᑯᑦ, ᐋᓐᓂᐊᓯᐅᕐᑏᓗ ᐱᔪᓐᓇᐅᑎᖃᕐᒥᒪᑕ ᐅᖄᖃᑎᒌᒍᑎᖃᖃᑦᑕᕆᐊᖃᕐᓱᑎᒃ ᖃᐅᔨᒪᔭᐅᒋᐊᓕᓐᓂᒃ ᐅᐃᒪᓇᕐᓯᓯᒪᔪᖃᕐᐸᑦ, ᖃᐅᔨᒪᑎᑦᓯᒍᑎᒋᒋᐊᓕᓕᒫᒥᓂᒃ ᐋᓐᓂᐊᓯᐅᕐᑎᒪᕆᒻᒥᒃ ᑕᒪᒃᑯᐊ ᒥᑦᓵᓄᑦ ᑐᑭᑖᕐᑎᐅᒋᐊᖃᓚᖓᒻᒪᑦ;
- ᐃᓚᖓ ᖃᓂᒋᓂᕐᐹᖓ ᐅᕝᕙᓘᓐᓃᑦ ᑲᒪᖃᑕᐅᓲᖅ ᑲᖐᓱᖃᑕᐅᒐᓱᐊᕐᑐᖅ ᖃᐅᔨᒪᑎᑕᐅᓚᖓᒻᒥᔪᑦ ᐱᖁᔭᕐᑎᒍᑦ ᐱᐅᓯᕐᓲᑕᐅᔭᕆᐊᖃᓚᖓᔪᓂᒃ;
- ᐃᓄᒃ ᐅᑭᐅᑭᓗᐊᕐᐸᑦ ᓱᓕ, ᐱᖁᔭᕐᑎᒍᑦ ᑭᒡᒐᑐᕐᑎᖓ ᖃᐅᔨᒪᑎᑕᐅᓚᖓᒻᒥᔪᖅ ᑎᒍᒥᐊᕐᑕᐅᕕᒻᒦᑎᑕᐅᓚᖓᓂᖓᓂᒃ ᐊᒻᒪᓗ ᐊᓯᐊᒍᑦ ᐅᖓᓕᐊᕇᑦᑎᑕᐅᒋᐊᖃᓚᖓᔪᓂᒃ ᐱᓇᓱᐊᕐᑕᐅᒍᑎᒋᒋᐊᖃᓚᖓᔭᖏᑦᑕ ᐱᐅᓯᕐᓱᑎᒋᓂᐊᕐᑕᖏᓐᓂᒃ.
ᑕᒪᒃᑯᐊᓕᒫᑦ ᑕᐱᑦᓱᒋᑦ ᐊᒻᒪᓗ ᑌᒪᖕᖓᓕᒫᑦᓯᐊᖅ, ᒪᑯᐊ ᐊᑑᑎᒐᔭᕐᑐᑦ ᐃᓱᒪᒍᑎᒋᔭᐅᓂᐊᖕᖕᑐᑦ ᓯᖁᒥᑦᓯᓂᕋᕐᑕᐅᒍᓐᓇᕈᓐᓀᓗᓪᓗ ᐱᖁᔭᖓᓂᒃ ᐃᕐᐸᑎᑦᓯᑌᓕᒪᓂᐅᑉ:
- ᐋᓐᓂᐊᕕᐅᑉ ᐱᓇᓱᑦᑎᖏᑦ ᐃᓘᓐᓈᒍᑦ ᐱᓇᓲᑕᐅᒋᐊᓕᓕᒫᒍᑦᓱᑎᒃ ᖃᐅᔨᒪᔭᐅᒋᐊᓕᓐᓂᒃ ᐃᓚᖏᓐᓄᑦ ᖃᓂᑕᖏᓐᓄᑦ (ᐱᓪᓗᒍ ᐃᓱᒪᒥᒍᑦ ᐃᓱᕐᕆᓯᐊᕈᓐᓃᓂᖓ, ᐋᓐᓂᐊᕕᐅᑉ ᑭᒡᒐᑑᑎᒋᓂᐊᕐᑕᖏᑦ, ᖃᓄᕐᓗ ᑎᒥᖓᑕ ᓴᕐᕿᔮᕐᑎᓕᕐᑕᖏᑦᑕ ᖃᓄᐃᓕᐅᕈᑕᐅᒋᐊᖃᓕᕐᓂᖏᓐᓂᒃ, ᐊᓯᖏᓐᓂᓗ);
- ᐋᓐᓂᐊᕕᐅᑉ ᐱᓇᓱᑦᑎᖏᑦ ᒪᓂᔨᒍᑎᖃᕈᓐᓇᖁᑦ ᐃᑲᔪᕐᓯᒪᔭᐅᕕᑦᓴᖓᓂᒃ ᑭᒡᒐᑑᑎᒥᑎᒍᑦ ᐃᓚᖏᓐᓄᑦ ᖃᓂᑕᖏᓐᓄᑦ ᐅᖄᒍᑎᖃᖕᖏᑲᓗᐊᕈᑎᒃ ᐃᕐᐸᑎᑕᐅᑦᑌᓕᒪᒋᐊᓖᑦ ᖃᐅᔨᒪᔭᐅᒋᐊᖃᕐᓂᖏᓐᓂᒃ;
- ᐊᑐᕐᑎᐅᑉ ᖃᓂᑕᖏᑦ ᐃᓚᖏᑦ ᑌᒪᖕᖓᓕᒫᑦᓯᐊᖅ ᐱᔪᓐᓇᐅᑎᓖᑦ ᐅᓂᒃᑳᕈᓐᓇᓂᕐᒥᓄᑦ ᖃᐅᔨᒪᔭᐅᔪᑦᓴᓂᒃ ᐋᓐᓂᐊᕕᐅᑉ ᐱᓇᓱᑦᑎᖏᓐᓄᑦ ᐃᓱᒫᓘᑎᖃᓕᕈᑎᒃ ᖃᓄᑐᐃᓐᓇᖅ;
- ᐊᑐᕐᑎᐅᑉ ᖃᓂᑕᖏᑦ ᐃᓚᖏᑦ ᐊᒻᒪᓗ ᐋᓐᓂᐊᕕᐅᑉ ᐱᓇᓱᑦᑎᖏᑦ ᐱᓇᓱᖃᑎᖃᕈᓐᓇᖁᑦ ᐊᑐᕐᑎᒥᒃ ᐃᑲᔪᕐᓯᒪᔭᐅᑦᓯᐊᕆᐊᖃᕐᓂᖓᓄᑦ ᐊᖏᖃᑕᐅᑦᓯᐊᑐᐃᓐᓇᖃᑦᑕᑐᐊᕈᓂ ᐃᓚᐅᑎᑦᓯᓯᐊᕆᐊᖃᕐᓂᒥᓄᑦ ᐃᓚᒥᓂᒃ ᖃᓂᑕᒥᓂᒃ ᑲᒪᒋᔭᐅᓂᕐᒥᓄᑦ ᐋᓐᓂᐊᕕᒻᒥ ᐊᑐᕐᓗᒋᑦ ᒪᓕᒐᖏᑦ ARPP-ᑯᑦ.
ᓱᓇᐅᕙᑦ ᖃᓄᐃᓕᐅᕆᐊᓪᓚᕆᓐᓇᐅᑎᒋᒐᔭᕐᑕᑲ ᖃᓄᕐᓗ ᐃᑲᔪᕐᓯᔭᐅᓚᕿᒍᓐᓇᖁᖓ?
ᐊᑐᕐᑎ ᑭᒡᒐᑐᕐᑕᐅᒍᒪᑉᐸᑦ ᐱᖁᔭᓕᕆᔨᒧᑦ. ᑐᓴᕐᑎᓯᒍᑦᔨᒍᓐᓇᑕᕗᑦ ᐱᖁᔭᓕᕆᔨᖓ ᓇᓪᓕᑳᕐᓯᒪᔭᖓ. ᐊᑐᕐᑎ ᐱᖁᔭᓕᕆᔨᖃᖕᖏᐸᑦ, ᐱᖁᔭᕐᑎᒍᑦ-ᐃᑲᔪᕐᓯᔨᒃᑯᓄᑦ ᑭᒐᑐᕐᑐᓄᑦ ᓄᓇᕕᒻᒥ ᑎᓕᔨᒍᑦᔭᐅᒍᓐᓇᑐᑦ ᑭᒡᒐᑐᕐᑎᒋᓂᐊᕐᑕᒥᓂᒃ: 1:866-624-9189.
ᐊᑐᕐᑎ ᐊᖏᖃᑎᖃᖕᖏᑯᓂ ᐱᑦᔪᑕᐅᔪᓂᒃ ᑎᒍᓂᐊᕐᑕᐅᒪᕕᒻᒦᑎᑕᐅᒍᑎᒥᑕ ᐅᕝᕙᓘᓐᓃᑦ ᑐᑭᑖᕆᔭᐅᓯᒪᔪᓂᒃ ᐱᓪᓗᒍ ᐊᑖᒍᑦ ARPP-ᑯᑦ, ᕿᓄᒍᑎᓕᐅᕈᓐᓇᖁᖅ ᐊᖏᖕᖏᐅᑎᓕᐊᑦᓴᒥᓄᑦ ᐅᕝᕙᓘᓐᓃᑦ ᕿᒥᕐᕈᔭᐅᒋᐊᓪᓚᓂᑦᓴᖓᓄᑦ ᑕᒪᑐᒪ ᐊᑑᑎᔭᖓᑕ ᐊᐅᓚᑦᓯᕕᖓᓄᑦ ᐃᕐᖃᑐᐃᕕᒃᑰᑎᑦ ᑯᐯᒻᒥ. ᐊᓪᓚᕕᖓ ᑯᐯᒃ ᓯᑎᒦᑦᑐᖅ ᑖᓐᓇ ᑭᒡᒐᑐᕐᓱᓂ ᓄᓇᕕᒻᒥᐅᓂᒃ: 1-800-567-0278.
ᐊᑐᓂᑦ ᐋᓐᓂᐊᕖᒃ ᐅᓐᓂᓗᒐᕐᕕᖁᑎᓖᒃ ᐱᓇᓱᑦᑎᐅᖃᑕᐅᔫᓐᓂᒃ ᐋᓐᓂᐊᕕᒻᒥ. ᑖᓐᓇᓗ ᐃᑲᔪᕐᓯᒪᖃᑕᐅᒍᓐᓇᒥᔪᖅ ᐊᑐᕐᑎᒥᒃ ᐃᑲᔪᕐᓯᔭᐅᒍᒪᔪᕕᓂᐅᑉᐸᑦ.
ᐃᓅᓕᑦᓯᕕᒃ ᐋᓐᓂᐊᕕᒃ (ᐳᕕᕐᓂᑐᖅ): 1-888-988-2669
ᐅᖓᕙᒃ ᑐᓚᑦᑕᕕᒃ ᐋᓐᓂᐊᕕᒃ: 1-883-964-2905 (509)
ᐁᑉᐯᕆᔭᐅᓗᓂ, ᐱᓇᓱᒍᑦᔭᐅᒋᐊᓪᓚᕈᒪᓐᓂᐸᑦ, ᑐᓴᕋᓱᐊᕐᕕᖃᕈᓐᓇᒥᔪᖅ ᐊᑯᓐᓂᖁᑎᒦᑦᑎᒥᒃ (ᓇᓪᓕᐊᓄᑦ ᐱᓇᓱᑦᒋᔭᐅᒐᓂ ᓇᐅᑦᓯᑐᕐᑎᒥᒃ): 1 800 463-5070.
ᐊᑐᕐᑎ ᐅᓐᓂᓗᒐᐅᑎᓕᐅᕈᑎᖃᕈᓐᓇᒥᔪᖅ ᐃᑲᔪᕐᓯᒋᐊᖃᑕᐅᔪᕕᓂᕐᒥᒃ ᓇᓪᓕᐊᓂᒃ ᐃᑲᔪᕐᓯᒋᐊᕐᑎᐅᖃᑕᐅᔪᕕᓂᐅᑉ ᐱᓇᓱᕝᕕᖓᑕ ᒥᑦᓵᓄᑦ ᐅᕝᕙᓘᓐᓃᑦ ᐱᔪᓐᓇᑐᓪᓚᕇᑦ ᑲᑐᑦᔨᖃᑎᒌᓐᓂᖓᓄᑦ, ᑖᓐᓇ ᐃᑲᔪᕐᓯᒋᐊᕐᑎᐅᖃᑕᐅᔪᕕᓂᖅ ᐃᓕᑕᕆᔭᐅᓂᓕᒻᒥᒃ ᐃᓚᐅᔫᕕᖃᑐᐊᕐᐸᑦ. ᐆᑦᑑᑎᒋᓗᒍ, ᐃᓄᓕᕆᔨᒃᑯᑦ-ᑭᒡᒐᑑᑎᖏᓐᓂ ᐱᓇᓱᐊᕐᓱᓂ ᐃᑲᔪᕐᓯᒋᐊᕐᑎᐅᖃᑕᐅᔪᕕᓂᐅᑉᐸᑦ, ᐊᓪᓚᕕᐅᒋᐊᓕᒃ ᐅᓇ Ordre des travailleurs sociaux et des thérapeutes conjugaux et familiaux du Québec (OTSTCFQ) [ᑯᐯᒃᒥ ᑲᑐᑦᔨᖃᑎᒌᓐᓂᖓ ᐃᓄᓕᕆᔩᑦ ᐊᒻᒪᓗ ᐱᖁᔭᕐᑎᒍᑦ ᐱᓇᓱᐊᕐᑕᐅᔪᓂᒃ ᐃᓚᒌᓄᑦ ᐃᓱᒪᓐᓂᐊᑏᑦ]: 1 888-731-9420, ᐊᓪᓚᕕᖓ 242.