ᖃᓄᐃᓕᕙᓪᓕᐊᕈᑕᐅᓲᖑᕙᑦ ᐊᑐᓕᕐᑎᑕᐅᕙᓪᓕᐊᕆᐊᖃᓕᕐᒪᑦ AARP-ᑯᑦ ᐱᓇᓱᐊᕆᐊᓕᖏᑦ?
ᐊᒥᓲᓂᕐᓭ ᐱᓇᓱᐊᕐᑕᑎᓐᓂ, ᐱᓇᓱᐊᕐᓂᕗᑦ ᐱᒋᐊᓲᖅ ᓄᓇᕐᖃᑎᒌᓂ ᓱᒃᑯᐊᕿᓯᒪᔪᖃᓕᑐᐊᕐᒪᑦ. ᐆᑦᑑᑎᒋᓗᒍ: ᖁᖁᐊᕋᐅᑎᔪᑦ, ᓂᖓᕐᓂᒥᓂᒃ ᓴᕐᕿᔮᕐᑎᓯᔪᑦ, ᓴᐱᕐᓵᕆᖃᑦᑕᐅᑎᔪᑦ, ᐊᓯᖏᓪᓗ. ᑕᑯᓐᓇᑐᕕᓃᑦ, ᐃᓚᒋᒐᓗᐊᕈᓂᐅᒃ ᐱᖁᕐᓈᕆᒐᓗᐊᕈᓂᐅᓪᓘᓃᑦ, ᐃᓘᓐᓈᒍᑦᒧᓄ ᖃᐅᔨᑎᑦᓯᓲᑦ ᑲᑎᕕᒃ ᓄᓇᓕᓕᒪᑦ ᐳᓖᓯᒃᑯᖏᓐᓂᒃ (KRPF) ᐅᕗᖓ ᓯᕙᓂᕐᓱᑎᒃ 819-XXX-9111.
ᑐᖓᓕᐊ:
- ᐳᓖᓯᒃᑯᑦ ᐁᓲᑦ ᑌᒣᓕᐅᕐᕕᐅᔪᓄᑦ ᐃᓪᓗᒧᑦ ᐊᑦᑕᓇᕐᓯᓯᒪᔪᖃᕐᒪᖔᑦ ᑕᑯᓂᐊᕐᓱᑎᒃ ᐃᓄᓐᓂᒃ ᑌᒣᓕᐅᕐᑕᐅᔪᓂᒃ;
- ᐳᓖᓯᒃᑯᑦ ᖃᐅᔨᑎᑦᓯᓲᑦ ᐃᓄᓕᕆᔨᒃᑯᓂᒃ ᐅᐃᒪᓇᕐᓯᓯᒪᓕᕐᑐᕐᒥᒃ ᑲᒪᖁᓕᕐᓱᒋᑦ ᐊᓂᕐᕋᐅᔪᒥ ᐃᓅᑉ ᐊᑦᑕᓇᕐᑐᒦᑦᑑᑉ ᓇᔪᕐᑕᖓᓄᑦ;
- ᐃᓄᓕᕆᔨᒃᑯᑦ ᑲᑎᓯᓲᑦ ᐃᓄᒻᒥᒃ ᓂᖓᖃᑎᖏᓐᓂᓗ ᐃᒣᓕᓚᕿᒐᓱᐊᕐᓱᒋᑦ:
- ᓄᕐᖃᑎᒐᓱᐊᕐᓱᒍ ᐅᐃᒪᓇᕐᓯᒍᑕᐅᔪᖅ;
- ᐱᕕᒋᒐᓱᐊᕐᓱᒍ ᐃᓄᒃ ᐊᖏᕈᑎᖓᓂᒃ;
- ᖃᐅᔨᓴᓕᕐᓱᑎᒃ ᖃᓄᓪᓗᐊᖅ ᐊᑦᑕᓇᕐᑑᒪᖔᑦ ᑕᒪᓐᓇ ᐃᓱᒪᒥᒍᑦ ᓱᕐᕋᑕᐅᓯᒪᓂᖓ;
- ᐃᓂᓪᓓᖃᑎᒋᒐᓱᐊᓯᑦᓱᒍ ᖃᓄᐃᓕᐅᕐᓗᑎᒃ ᐃᓱᕐᕆᓯᐅᑎᒐᔭᕐᒪᖔᑕ ᐃᓄᓪᓗ ᓂᖓᖃᑎᖏᓪᓗ, ᐊᖏᕈᑎᒋᑉᐸᐅᒃ.
ᑕᕝᕙᓃᓐᓂᒥᓂᓗ, ᐳᓖᓯᒃᑯᑦ ᓇᔪᖏᓐᓇᑐᑦ ᐱᓇᓱᐊᕐᕕᐅᔪᒥ ᑖᕙᓃᑦᑐᓕᒫᑦ ᐊᑦᑕᓈᕿᑎᑕᐅᖁᓇᒋᑦ.
- ᓱᓇᓕᒫᑦ ᐃᓱᒫᓘᑕᐅᔪᑦ ᐃᓱᒫᓗᐃᑦᓯᐊᐸᑕ (ᐱᒻᒪᕆᑦᑐᖅ ᐊᒻᒪᓗ ᐊᑦᑕᓇᕐᑐᒦᑦᓱᓂ + ᐊᖏᕈᑎᖃᕈᓐᓇᖏᐅᒪᔪᖅ ᑲᒪᒋᔭᐅᒍᒪᑦᓱᓂ), ᐃᓄᓕᕆᔨᒃᑯᑦ ᑕᒐ ᐃᓄᒻᒥᒃ ᑎᒍᔭᐅᖁᔨᓕᕋᔭᕐᖁᑦ ᖁᓄᒍᓗᐊᕐᐸᑦ ᐋᓐᓂᐊᓯᐅᕐᑎᑯᓐᓅᓗᒍ ᐅᕝᕙᓘᓐᓃᑦ ᓄᓇᓖᑦ ᐋᓐᓂᐊᕕᖓᓄᑦ (ᐊᑑᑎᔭᐅᒋᐊᖃᓲᖅ ᐊᕕᑦᑐᓯᒪᓂᖓᓂ 8-ᒦᑦᑐᖅ ᒪᓕᒐᖓᓂ ARPP-ᑯᑦ);
- ᐋᓐᓂᐊᕕᐅᕐᕕᐊᐱᒻᒨᕋᒥ, ᐋᓐᓂᐊᕕᒻᒧᓘᓐᓃᑦ, ᐋᓐᓂᐊᓯᐅᕐᑎ ᐱᓴᓱᐊᕐᑐᖅ ᐃᑎᕐᑎᑕᐅᒍᑎᖏᓐᓂᒃ ᐊᓪᓚᑐᖅ ᐃᓅᑉ ᐊᒻᒪᓗ ᑖᒃᑯᐊ ᑲᒪᑫᓐᓇᑐᑦ (ᐳᓖᓯᒃᑯᑦ ᐃᓄᓕᕆᔩᓪᓗ) ᕿᒥᒃᕈᐳᑦ ᖃᐅᔨᓴᕐᑕᐅᒍᑎᖏᓐᓂᒃ ᐃᓅᑉ ᑎᒥᒥᒍᑦ ᖃᓄᐃᓕᖕᖓᓯᒪᖕᖏᑲᓗᐊᕐᒪᖔᑦ, ᐊᖏᑐᐊᕐᐸᑦ;
- ᐋᓐᓂᐊᓯᐅᕐᑎ, ᑲᒪᔪᕐᓗ ᐃᓄᓕᕆᔨᒃᑯᒥᐅᖅ ᐊᒻᒪᓗ ᐳᓖᓰᑦ ᐅᓂᒃᑳᐳᑦ ᖃᐅᔨᒪᔭᐅᒋᐊᓕᓕᒫᓂᒃ ᖃᓄᐃᓕᖓᔪᒥᒃ ᐅᐃᒪᓇᕐᓯᓯᒪᓂᖃᙯᓐᓇᒪᖔᑕ ᐋᓐᓂᐊᓯᐅᕐᑎᒪᕆᒻᒥᓗ ᖃᐅᔨᑎᑦᓯᓱᑎᒃ ᐱᓇᓱᐊᕐᑐᒥᒃ ᐅᓂᒃᑳᕕᒋᑦᓱᒍ ᖃᓄᐃᓕᕙᓪᓕᐊᓂᕐᒪᖔᑕ. ᑖᓐᓇᑐᐊᖅ ᐋᓐᓂᐊᓯᐅᕐᑎᒪᕆ ᐊᖏᕈᓐᓇᐅᑎᓕᑐᐊᖅ ᐋᓐᓂᐊᕕᐅᑉ ᐃᓗᐊᓂ ᑎᒍᒥᐊᕐᑕᐅᒋᐊᖃᓕᕐᒪᖔᑦ;
- ᐃᓱᒪᓐᓂᐊᑎᒧᑦ ᖃᐅᔨᓴᕐᑕᐅᒋᐊᑐᖕᖏᑐᖅ ᐅᕝᕙᓘᓐᓃᑦ ᐃᕐᖃᑐᐃᕕᒻᒧ ᐊᖏᕐᑕᐅᓯᒪᕐᖄᕆᐊᖃᖕᖏᑐᖅ ᑲᔪᓯᑎᑕᐅᓚᖓᓂᖓ ᐊᑦᑕᓇᕐᑐᒦᑦᑎᓯᑦᑌᓕᒪᓂᐊᕐᓂᐅᑉ ᑎᒍᒥᐊᕐᑕᐅᓗᓂ, ᑕᒪᓐᓇᓗ ᐅᓄᕐᓂᐹᖃᕆᐊᓕᒃ 72-ᓂᒃ ᐃᑲᐅᕐᓂᓂᒃ ᑎᒍᒥᐊᕐᑕᐅᓂᖓ;
- ᐋᓐᓂᐊᓯᐅᕐᑎᒪᕆ ᐊᑑᑎᔭᐅᔪᒥᒃ ᑎᒍᒥᐊᕐᑕᐅᒍᑎᐅᒋᐊᖃᕐᑐᕆᑦᓯᖏᑉᐸᑦ ᖃᓄᐃᓗᐊᖕᖏᓂᑯᖓᓄᑦ, ᐃᓄᒃ ᐊᓂᑎᑕᐅᑦᓴᐅᑎᒋᒋᐊᓕᒃ ᐊᓯᐊᒍᑦ ᑲᒪᒋᔭᐅᒍᑎᖃᕐᓂᐊᕈᓐᓀᓗᓂ ᑕᒪᑐᒧᖓ.
ᖃᓄ ᑕᒪᒃᑯᐊᖅ ᐊᐅᓚᑦᔭᕆᐊᕈᑎᒋᔭᐅᓲᑦ ᑐᑭᓕᐅᕐᑕᐅᓂᕐᖃᑦ?
ᐊᒥᓲᒐᓓᑦ ᐱᖁᔭᐅᒻᒪᑕ ᐱᐅᓯᕐᓲᑕᐅᔭᕆᐊᓖᓪᓗ ᐊᐅᓚᑦᓯᔪᑦ ᑕᒪᑐᒥᖓ ᑲᒪᒋᔭᐅᒍᑎᐅᒋᐊᖃᓯᓲᒥᒃ;
- ᐱᖁᔭᒻᒪᕆᖃᕐᒪᑦ ᐸᐸᑕᐅᑦᓯᐊᕆᐊᖃᕐᓂᖏᓐᓄᑦ ᐃᓄᐃᑦ ᐃᓱᒪᒥᒍᑦ ᐃᓱᕐᕆᓯᐊᖕᖏᒍᑎᖃᓕᕐᑐᑦ ᐃᒻᒪᓄᑦ ᐊᑦᑕᓈᕿᑐᐃᓐᓇᕆᐊᖃᒍᑎᒋᑉᐸᐅᒃ ᐅᕝᕙᓘᓐᓃᑦ ᐊᓯᒥᓂᒃ ᐊᑦᑕᓈᕿᑎᑦᓯᑐᐃᓐᓇᕆᐊᖃᕈᑎᒋᑉᐸᐅᒃ;
- ᐊᕕᑦᑐᓯᒪᓂᖓ 8 ᒪᓕᒐᖏᑦᑕ ARHSSS-ᑯᑦ;
- ᐊᕕᑦᑐᓯᒪᓂᖓ 26 ᐊᒻᒪᓗ 31 ᓄᓇᕐᖃᑎᒌᑦᑐᑦ ᓯᓚᕐᖁᕇᒃᑯᑎᖏᑦᑕ ᑯᐯᒻᒥᐅᑦ;
- ᐊᑦᔨᒌᖕᖏᑐᑦ ᐱᑦᓯᐊᖃᑦᑕᐅᑎᒐᓱᐊᕐᓂᑐᐃᓐᓇᒨᓕᖓᔪᑦ ᒪᓕᖓᖏᑦ MSSS-ᑯᑦ (ᑐᕐᖃᑕᕐᕕᑯᑦ);
- ᐊᑦᔨᒌᖕᖏᑐᑦ ᐱᐅᓯᕐᓲᑎᑦᓴᔭᖁᑎᖏᑦ ᐋᓐᓂᐊᕖᑦ (ᐱᐅᓯᕐᓲᑎᑦᓴᔭᖓ ᐋᓐᓂᐊᕕᒻᒦᑎᑦᓯᓂᐅᑉ ᑎᒍᒥᐊᕐᑕᐅᔪᒥᒃ, ᐱᐅᓯᕐᓲᑎᑦᓴᔭᖓ ᐊᐅᓚᑕᐅᑦᓯᐊᕆᐊᖃᕐᓂᖏᑦᑕ ᐱᓂᐊᕐᓂᐅᒋᐊᓖᑦ, ᐅᖓᕙᒻᒥ ᐋᓐᓂᐊᕕᒃ ᑕᓚᑦᑕᕕᐅᑉ ᐱᐅᓯᕐᓲᑎᑦᓴᔭᖏᑦ ᑲᒪᒋᐊᓯᓂᕐᒧᑦ ᐅᐃᒪᓇᕐᓯᓯᒪᑦᓱᑎᒃ ᐊᑑᑎᔭᐅᔪᓂ, ᐊᓯᖏᓪᓕ);
- ᓄᓇᓕᓕᒫᓂ ᐃᓕᓐᓂᐊᑎᑦᓯᓃᑦ ᐱᐅᓯᕐᓲᑎᑦᓴᔭᑦᓯᐊᖑᓂᕐᐹᑦ ᖃᓄᐃᑦᑑᒋᐊᖃᕐᒪᖔᑕ ᐃᒻᒥᓂᐊᑐᐃᓐᓇᕆᐊᖃᓕᕐᑐᓅᓕᖓᔪᓂ ᓄᓇᕕᒻᒥ;
- ᐊᓯᖏᓪᓗ ᐊᒥᓱᑦ.
2018-ᒥ, ᐊᕕᑦᑐᓯᒪᓂᖓ 118.2 ᐃᓚᒋᐊᕈᑕᐅᓚᐅᔪᕗᖅ ARHSSS-ᑯᓐᓂ. ᑖᓐᓇᓗ ᐊᕕᑦᑐᓯᒪᓂᖅ ᐱᕕᑦᑖᑎᑦᓯᓯᒪᕗᖅ ᐋᓐᓂᐊᕕᓕᒫᓂᒃ ᐃᓄᓕᕆᔨᒃᑯᓕᒫᓂᓪᓗ ᑯᐯᓕᒫᒦᑦᑐᓂᒃ ᐃᓂᖃᕐᑎᓯᒋᐊᖃᓕᕐᓂᖏᓐᓂᒃ ᑲᔪᓯᑎᑕᐅᓂᑦᓴᖓᓄᑦ ᐋᓐᓂᐊᕕᒻᒥ ᑎᒍᒥᐊᕐᑕᐅᑎᑦᓯᕕᑦᓴᒥᒃ (ᐊᕕᑦᑐᓯᒪᓂᖓ 6 ARPP-ᑯᓂ) ᐃᒦᓕᐅᕐᐸᓂᐊᓕᕐᑎᓗᒋᑦ:
- ᑲᔪᓯᑎᑦᓯᓯᓗᑎᒃ ᐱᐅᓯᕐᓲᑕᐅᕙᓐᓂᐊᓕᕐᑐᓂᒃ ᐋᓐᓂᐊᕕᒻᒥ ᑎᒍᒥᐊᕐᑕᐅᕕᐅᕙᓐᓂᐊᑐᒥᒃ;
- ᑐᓴᕐᑕᐅᑎᑦᓯᓗᑎᒃ ᑐᑭᓯᔭᐅᑎᓗᒍ ᐱᐅᓯᕐᓲᑎᑦᓴᔭᖓ ᐱᓇᓱᑦᑎᓄᑦ, ᐱᓇᓱᐊᖃᑕᐅᔪᓄᑦ, ᐊᑐᕐᑎᓄᑦ ᐊᒻᒪᓗ ᐃᓚᖏᓐᓄᑦ, ᐊᒻᒪᓗ ᐃᓄᓕᒫᓄᑦ;
- ᐃᓕᓐᓂᐊᕈᑕᐅᖃᑦᑕᓗᓂ, ᐃᑲᔪᕐᓯᔭᐅᒍᑕᐅᖃᑦᑕᓗᓂᓗ ᐱᓇᓱᑦᑎᓂᒃ ᑲᔪᓯᑎᑦᓯᒋᐊᖃᖃᑦᑕᓚᖓᔪᑦ ᑕᒪᑐᒥᖓ ᐱᐅᓯᕐᓲᑎᐅᓕᕐᑐᒥᒃ;
- ᑐᓴᕐᑕᐅᑎᕙᓪᓗᒋᑦ ᑲᑎᒪᔨᓄᑦ ᐊᑐᕐᑐᕕᓃᑦ ᐋᓐᓂᐊᕕᒻᒥ ᑎᒍᒥᐊᕐᑕᐅᕕᒻᒦᑐᕕᓃᑦ ᐋᓐᓂᐊᕕᖁᑎᖓᓂ.
ᐃᑲᔪᕐᓯᒪᒐᓱᐊᒧᑦ ᑯᐯᓕᒫᒥᒃ ᐋᓐᓂᐊᕕᓐᓂᒃ, MSSS (ᑐᕐᖃᑕᕐᕕᒃ) ᐊᑐᐊᕋᑦᓴᓂᒃ ᓴᕐᕿᑎᑦᓯᓯᒪᓕᕐᑐᖅ ᒪᕐᕈᐃᓂᒃ ᐃᓂᓪᓚᑎᕆᐅᑎᑦᓴᓂᒃ ᐃᒫᙰᕐᑐᓂᒃ ᐊᐅᓚᑕᐅᒍᓯᖓ ᖃᓄᐃᓕᖓᓗᓂ ᐃᓂᓪᓚᖓᐅᓯᖃᕐᓂᐊᒪᖔᑦ (ᐱᐅᓂᕐᐹᑯᑦ ᐋᓐᓂᐊᓯᐅᕐᑕᐅᓃᑦ ᒪᓕᒐᖏᑦ) ᐋᓐᓂᐊᕕᓐᓂ ᑎᒍᒥᐊᕐᑕᐅᕕᓐᓅᓕᖓᔪᑦ ᐊᒻᒪᓗ ᐱᐅᓯᕐᓲᑎᑦᓴᕆᒋᐊᓕᖏᑦᑕ ᖃᓄᐃᓕᖓᒋᐊᖃᕐᓂᖏᑦᑕ ᐃᓕᓴᐅᑎᖏᑦ ᐋᓐᓂᐊᕕᓐᓂ.
ᐁᕆᓕ 2019-ᒥ, ᑲᑎᒪᔨᖏᑦ ᐃᓅᓕᑦᓯᕕᒃ ᐋᓐᓂᐊᕕᐅᑉ ᐊᒻᒪᓗ ᐅᖓᕙᒻᒥ ᑐᓚᑦᑕᕕᒃ ᐋᓐᓂᐊᕕᐅᑉ ᐊᖏᓚᐅᔫᑦ ᐱᐅᓯᕐᓲᑎᑦᓴᔭᐅᒋᐊᓕᓐᓂᒃ ᑎᒍᒥᐊᕐᓂᒧᑦ. ᑭᓪᓕᒋᑦᓱᒍ ᔫᓓ 2019, ᐱᓇᓱᑦᑏᑦ ᐃᓕᓐᓂᐊᑎᕐᑕᐅᖃᑦᑕᑐᑦ ᐃᑲᔪᕐᓯᒪᔭᐅᖃᑦᑕᓱᑎᓪᓗ. ᑖᓐᓇ ᒫᓐᓇᐅᔪᖅ ᐃᓕᓴᐅᑎᑦᓴᖅ ᖃᐅᔨᑎᑦᓯᐅᑎᓕᐊᕆᔭᐅᓯᒪᕗᖅ ᐃᓄᓕᒫᓄᑦ ᑕᒪᑐᒧᖓ ᐊᑦᑐᐊᔭᐅᔪᓕᒫᓄᑦ ᐱᓪᓗᒋᑦ ᐱᖁᔭᒻᒪᕆᖏᑦ ᐊᒻᒪᓗ ᐱᐅᓯᕐᓲᑎᑦᓴᔭᕆᒋᐊᓕᖏᑦ. ᒫᓐᓇ ᐱᓇᓱᐊᕐᑕᐅᕗᑦ ᓴᕐᕿᑎᑕᐅᒐᓱᐊᕐᓱᑎᒃ ᑐᑭᓯᒪᖃᑎᒌᑦᓯᐊᕋᓱᐊᕐᓂᒧᑦ ᐃᕐᙯᑎᑦᓯᐅᑎᑦᓭᑦ ᐃᓘᓐᓀᓅᓕᖓᔪᑦ ᐱᓇᓱᐊᖃᑕᐅᓚᖓᔪᓕᒫᓂ ᐱᓇᓱᖃᑎᒌᑦᓯᐊᕈᑎᑦᓭᑦ ᐃᓚᒋᔭᐅᒻᒥᑎᓪᓗᒋᑦ ᑲᑎᕕᒃ ᓄᓇᓕᓕᒫᑦ ᐳᓖᓯᖏᑦ ᐊᒻᒪᓗ ᓄᓇᓕᓐᓂ ᐊᐅᓚᑕᐅᔪᓕᒫᑦ (ᐃᕐᖃᑐᐃᕕᖓ ᐊᐱᑎᐱ-ᑕᒥᔅᑲᒦᓐ ᐊᒻᒪᓗ ᑯᐯᒃ ᑕᕐᕋᖓᓂᒥᐅᑦ).
ᐅᓪᓗᒥᐅᔪᖅ, ᑕᒪᕐᒥᒃ ᐃᓄᓯᓕᕆᔨᒃᑯᑦ-ᑭᒡᒐᑑᑎᓕᒫᖏᑦ ᓄᓇᕕᒻᒥᐅᓄᑦ ᐃᓕᓐᓂᐊᓂᖃᕐᑎᓯᓲᑦ ᐱᐅᓯᕐᓯᐅᑎᑦᓯᐊᖑᓂᕐᐹᑯᑦ ᐃᒻᒥᓂᐊᕐᓂᓅᓕᖓᔪᓂ ᓄᓇᕕᒻᒥ. ᑖᓐᓇ ᐃᓕᓐᓂᐊᓂᖅ ᓄᓇᓕᓕᒫᓅᓕᖓᔪᖅ ᐃᓗᕐᕈᓯᑦᓴᔭᖏᓐᓄᓗ ᐃᕕᕐᑎᓯᐅᑎᐅᕙᓪᓕᐊᕋᓱᐊᕐᓱᓂ ᑯᐯᓕᒫᒥ ᐃᓕᓐᓂᐊᓂᕐᓅᓕᖓᔫᖃᑕᐅᑦᓱᓂ ᑖᑦᓱᒥᖓᑦᓭᓇᖅ ᐊᑎᖃᕐᑎᑕᐅᒐᓗᐊᕐᓱᑎᒃ. ᒪᓂᔭᐅᒪᕙᓕᕐᑐᖅ ᓄᓇᕕᒻᒥ 2016-2017-ᒥᓂᑦ. ᐅᓪᓗᑐᓲᖅ ᓯᑕᒪᓂᒃ ᒪᓂᔭᐅᒪᕙᑦᓱᓂᓗ ᐊᓯᓕᒫᖏᓐᓄᑦ ᑲᒪᕐᖄᕆᐊᖃᓲᑦᓴᔭᓕᒫᖁᑎᖏᓐᓄᑦ ᓄᓇᕕᒻᒥᐅᑦ. ᐆᑦᑑᑎᒋᓗᒍ, ᑖᒃᑯᓄᖓ ᐃᓱᐊᕐᓯᕕᒻᒥ ᐱᓇᓱᑦᑎᓄ ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐱᓇᓱᑦᑎᖏᓐᓄᑦ. ᐊᑑᑎᔭᐅᓗᓂ ᑭᓯᐊᓂᐅᒋᐊᖃᓲᖑᓕᕐᑐᖅ 2019-ᒥᓂᑦ. ᑐᕌᕐᑕᖃᕋᓱᐊᕋᒥ ᐱᕙᓪᓕᐊᑎᑦᓯᒍᒪᑦᓱᓂ ᐱᓯᐊᓯᒪᕕᓕᒫᖓᒍᑦ ᑭᒡᒐᑑᑎᐅᒋᐊᓕᓐᓂᒃ ᑲᒪᒋᔭᐅᒋᐊᖃᓯᔪᖃᕐᐸᑦ ᐱᐅᓯᐅᒋᐊᖃᓲᓂ ᑲᒪᕐᖄᕆᐊᖃᓲᓄᑦ, ᑌᒪᖕᖓᓗ ᕿᓂᕐᓗᑎᒃ ᐃᓛᕐᑐᑎᒋᕙᓪᓕᐊᓕᕐᓗᒋᓪᓗ ᐊᓯᐊᒎᕐᐸᓕᐊᕈᑕᐅᒍᓐᓇᑐᑦ ᐃᓱᐊᕐᓂᓴᒃᑯᑦ ᑲᒪᕐᖄᕆᐊᖃᓲᓄᑦ ᐊᒻᒪᓗ ᐃᓱᐊᕐᓂᓴᐅᒍᓇᐅᔪᕆᒐᔭᕐᑕᖓᒍᑦ ARPP-ᑯᑦ.
ᐅᖓᕙᒃ ᑐᓚᑦᑕᕕᒃ ᐋᓐᓂᐊᕕᒃ ᐊᖏᓚᐅᔫᖅ ᐱᐅᓯᕐᓱᑎᑦᓴᔭᕆᓂᐊᓕᕐᑕᒥᓂ ᑐᕌᖓᓪᓗᑯᑦᑎᓗᒍ ᐊᕕᑦᑐᓯᒪᓂᖓᓂ 8-ᒦᑦᑐᒧᑦ ARPP-ᑯᑦ ᐱᖁᔭᖏᓐᓂ. ᑖᓐᓇ ᐱᐅᓯᕐᓲᑎᑦᓴᔭᖅ ᓇᔪᕐᑕᐅᔪᓂ ᐅᐃᒪᓇᕐᓯᓯᒪᔪᕐᓂᐊᑐᓄᑦ (ᑎᓕᔭᐅᒪᐅᑎᖓ ᐃᓄᓕᕆᔨᒃᑯᑦ) ᐊᒻᒪᓗ ᖃᐅᔨᓴᕐᑕᐅᓕᕐᐸᑦ ᖃᓄᓪᓗᐊᖅ ᐊᑦᑕᓇᕐᑐᒦᓕᕐᒪᖔᑦ ᐊᑑᑎᔭᐅᔪᖅ ᐃᓱᒪᐅᑉ ᐃᓱᕐᕆᓂᐊᖕᖏᓂᖓᓄᑦ ᐊᐅᓚᑕᐅᒻᒪᖔᑦ. ᐃᓕᓐᓂᐊᑎᑦᓯᓂᖅ ᒪᓂᒪᑎᑕᐅᕗᖅ ᐱᓇᓱᑦᑎᓕᒫᓄᑦ ᐃᓄᓕᕆᓂᐅᑉ ᑭᒡᒐᑑᑎᖏᓐᓂ ᐊᒻᒪᓗ ᐅᕕᒃᑫᑦ ᓴᐳᒻᒥᔨᒃᑯᖏᓐᓂ, ᐱᕕᓕᒫᒃᑯᑦ ᐃᖏᕐᕋᑎᑦᓯᓯᐊᖁᓪᓗᒍ ᑲᒪᒋᔭᖃᕐᑐᖃᓕᕐᐸᑦ ᐅᐃᒪᓇᕐᓯᓯᒪᔪᓂᒃ ᓇᔪᕐᑕᐅᔪᒥ.
ᐃᓅᓕᑦᓯᕕᒃ ᐋᓐᓂᐊᕕᒃ ᐊᒻᒪᓗ ᐅᖓᕙᒃ ᑐᓚᑦᑕᕕᒃ ᐋᓐᓂᐊᕕᒃ ᐃᓂᓪᓓᓯᒪᓕᕐᑑᒃ ᐱᐅᓯᕐᓲᑕᐅᔭᕆᐊᓕᓐᓂᒃ ᐃᓪᓗᒋᑦ ᐊᐅᓚᑕᐅᑦᓯᐊᕆᐊᖃᕐᓂᖏᑦᑕ ᐊᐅᓚᑦᔭᕆᐊᒍᑕᐅᒋᐊᓖᑦ. ᐊᐅᓚᑦᓯᓯᐊᕐᓂᓴᐅᒋᐊᓕᖓᓂᕐᒨᓕᖓᔪᑦ ᐊᐅᓚᑦᔭᕆᐊᕈᑏᑦ ᐃᓚᒋᓕᐅᑎᔭᐅᓯᒪᕗᑦ ᐊᑑᑎᔭᐅᓯᒋᓐᓇᕈᓐᓇᓱᑎᒃ ᑲᒪᒋᔭᐅᔪᖅ ᐃᓄᒃ ᐊᑦᑕᓈᕿᖁᓇᒍ ᐊᒻᒪᓗ ᑎᒥᒥᒍᑦ ᐃᓱᕐᕆᖏᓐᓇᓯᐊᖁᓪᓗᒍ. ᑎᒍᒥᐊᕐᑕᐅᓂᕐᒦᒐᓗᐊᕈᓂ ᐋᓐᓂᐊᕕᐅᑉ ᐃᓗᐊᓂ, ᖏᒃᑲᓗᐊᕈᓂᓘᓐᓃᑦ, ᐆᑦᑑᑎᒋᓗᒍ, ᑎᒥᒥᒍᑦ ᐊᑦᑕᓈᕿᑐᐃᓐᓇᕆᐊᖃᕐᐸᑦ ᐅᕝᕙᓘᓐᓃᑦ ᐄᔭᒐᕐᑐᑌᓕᑎᑕᐅᓂᕐᒦᐸᑦ. ᑕᒐ ᐋᓐᓂᐊᕕᒻᒥ ᑎᒍᒥᐊᕐᑕᐅᕕᐅᑉ ᐊᒻᒪᓗ ᐊᐅᓚᑦᔭᕆᐊᕈᑎᑦᓭᑦ ᑲᒪᒋᔭᐅᓂᖓᓄᑦ ᒪᕐᕈᐃᒍᒻᒪᓃᒃ ᐊᑦᔨᒌᒐᑎᒃ ᐱᓂᐊᕐᓂᓴᔮᒃ ᐊᑑᑎᔭᐅᒍᓐᓇᑑᒃ ᑕᒪᒃᑭᓗᒋᒃ, ᑭᓯᐊᓂ ᑌᒣᒋᐊᖃᓪᓗᑐᕐᑐᖃᓕᕐᐸᑦ.
ᐃᓚᒋᔭᐅᒻᒥᔪᑦ ᐱᒻᒪᕆᐅᑦᓱᑎᒃ ᑐᑭᓯᒪᔭᐅᒋᐊᓖᑦ:
ᐅᓂᑦᓯᒪᑎᓯᒐᓱᐊᕐᓂᖅ: ᐊᐅᓚᑦᔭᕆᐊᕈᑏᑦ ᑲᒪᒍᓯᐅᓂᐊᕐᑐᖅ ᐃᓗᓕᖃᕐᓂᐊᐸᑕ ᐊᑑᑎᑎᑦᓯᑌᓕᒪᓂᕐᒧᑦ ᐅᕝᕙᓘᓐᓃᑦ ᐃᑯᓪᓚᑎᑦᓯᒐᓱᐊᕐᓂᒧᑦ ᐃᓅᑉ ᐃᓱᒪᕐᓱᓗᓂ ᓂᒪᔭᕆᐊᖃᕐᓂᖓᓂᒃ ᐊᔭᐅᕐᑕᐅᒋᐊᖃᕐᓂᐊᕋᓗᐊᕈᓂ, ᐊᐅᓚᒍᑎᓄᑦ ᓂᒪᔭᕐᑎᑕᐅᒋᐊᖃᕐᓂᐊᕋᓗᐊᕈᓂ ᐅᕝᕙᓘᓐᓃᑦ ᑯᑯᔭᕐᓗᓂ ᓂᒪᔭᕆᐊᖃᓚᖓᑉᐸᑦ ᐃᓱᕐᕉᑎᖃᓲᖑᓂᑯᒥᓄᑦ ᑎᒥᖓᑕ ᐃᑲᔪᕐᑎᖏᓐᓂᒃ ᐱᐅᓯᕐᓗᑑᓂᑯᒥᓄᑦ
ᐃᓄᑐᐊᒃᑯᕕᒻᒦᑎᑦᓯᓂᖅ: ᐊᐅᓚᑦᔭᕆᐊᕈᑏᑦ ᑲᒪᒍᓯᐅᓂᐊᕐᑐᖅ ᐃᓗᓕᖃᕐᓂᐊᐸᑕ ᐃᓄᑑᑎᑕᐅᕕᒻᒦᒋᐊᖃᓚᖓᑉᐸᑦ ᐃᓄᒃ ᐅᓪᓗᐃᑦ ᖃᑦᓰᑦ ᐅᖃᕐᑕᐅᓯᒪᔪᑦ ᒪᓕᓪᓗᒋᑦ, ᐊᓂᕐᖃᔭᕐᓂᐊᕈᓐᓀᑎᓪᓗᒍ ᖃᕆᐊᒥᑦ ᐃᓱᒪᕐᓱᓗᓂ.
ᐁᔭᒐᕐᑐᑎᑦᓯᑌᓕᒪᓂᖅ: ᐊᐅᓚᑦᔭᕆᐊᕈᑏᑦ ᑲᒪᒍᓯᐅᓂᐊᕐᑐᖅ ᐃᓗᓕᖃᕐᓂᐊᐸᑕ ᐅᓂᑦᓯᒪᓂᕐᒦᑎᑕᐅᓂᖓᓂᒃ ᐃᓅᑉ ᐃᓱᒪᕐᓱᖃᔦᕐᑎᑕᐅᓯᒪᓗᓂ ᐄᔭᒐᕐᑐᕈᒪᓂᖓ.