ᓄᓇᕕᒃ ᓄᓇᖁᑎᒋᔭᐅᒻᒪᑦ ᑯᐯᒻᒧᑦ, ᐃᓗᓯᓕᕆᓂᖓ ᐃᓄᓕᕆᓂᖓᓗ ᒪᓂᒪᑎᑕᐅᔪᑦ ᓄᓇᕕᒻᒥᐅᓄᑦ, ᑲᒪᒋᔭᐅᒋᐊᖃᓲᑦ ᑯᐯᒃ ᑲᕙᒪᖓᓄᑦ. The ministère de la Santé et des Services sociaux (ᑐᕐᖃᑕᕐᕕᒃ) ᐊᐅᓚᑦᓯᕕᒻᒪᕆᐅᕗᖅ ᑲᕙᒪᒧᑦ ᑎᒥᖁᑎᒋᔭᐅᑦᓱᓂ ᑕᒪᒃᑯᓂᖓ ᐊᐅᓚᑦᓯᔪᖅ. ᐃᓂᓪᓚᖓᐅᓯᖓ ᐃᓗᓯᓕᕆᓂᐅᑉ ᐃᓄᓕᕆᓂᐅᓪᓗ ᑭᒡᒐᑑᑏᖏᑦᑕ ᑯᐯᒻᒥ ᐊᐅᓚᑕᐅᒐᔪᓲᖅ ᐱᖁᔭᒻᒪᕆᐅᑉ ᐊᑖᓃᑦᓱᓂ ᐆᒪ, ᐱᖁᔭᒻᒪᕆᒃ ᐱᓪᓗᒋᑦ ᐃᓗᓯᓕᕆᓂᕐᒥ ᑭᒡᒐᑑᑏᑦ ᐊᒻᒪᓗ ᐃᓄᓕᕆᓂᕐᒥ ᑭᒡᒐᑑᑏᑦ. ᓄᓇᕕᒃ ᐊᑦᔨᐅᖏᑦᑐᒥᒃ ᐃᓕᑕᕆᔭᐅᓂᖃᕐᓱᓂ ᓄᓇᖁᑎᒋᔭᐅᒐᒥ, ᐊᓯᓂᕐᕿᐅᑕᐅᓯᒪᔪᓂᓗ ᐱᖁᔭᖃᕐᑎᑕᐅᒻᒪᑦ ᑕᒪᒃᑯᐊ ᐃᓚᒋᓕᐅᑎᒋᐊᖃᓚᖓᒻᒥᔪᑦ ᑐᑭᓯᒪᔭᐅᑦᓯᐊᓚᖓᖁᓪᓗᒋᑦ ᑭᒡᒐᑑᑕᐅᔪᑦ ᐃᓂᓪᓚᖓᐅᓯᖏᓐᓂᒃ ᐊᒻᒪᓗ ᑭᒡᒐᑑᑕᐅᔪᑦ ᖃᓄᐃᓕᖓᓂᐊᕐᒪᖔᑕ ᓄᓇᕕᒻᒥᐅᓄᑦ.
1975-ᒥ, ᔩᒥᓯ ᐯ ᑯᐯᒃ ᑕᕐᕋᖓᑕᓗ ᐊᖏᖃᑎᒌᓐᓂᖓ (ᐊᖏᖃᑎᒌᓐᓂᖅ) ᐃᖏᕐᕋᓯᑎᑕᐅᓯᒪᒻᒪᑦ. ᐱᓇᓱᐊᕐᑕᐅᒋᐊᓯᓚᐅᔪᕗᑦ ᐃᓂᓪᓚᑎᕐᑕᐅᒋᐊᓯᑦᓱᑎᒃ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᑭᒡᒐᑑᑏᑦ ᓄᓇᕕᒻᒥᐅᓄᑦ. ᓄᓇᕕᒻᒥ ᐃᓗᓯᓕᕆᓂᖅ ᐃᓄᓕᕆᓂᕐᓗ ᑭᒡᒐᑑᑎᖏᑦ ᐱᑐᑦᓯᒪᐅᑎᓂᖏᑦ ᐃᒣᓕᖓᔪᒥᒃ ᐃᖏᕐᕋᓂᖃᓲᖅ:
- ᐃᓗᓯᓕᕆᔨᒃᑯᑦ, ᓴᕐᕿᑎᑕᐅᔪᕕᓂᖅ 1995-ᒥ, ᐱᓇᓱᐊᓲᖅ ᑖᒃᑯᓇᓂ 14-ᓂ ᓄᓇᓕᓐᓂ;
- ᐋᓐᓂᐊᕕᒻᒪᕇᒃ ᒪᕐᕉᒃ ᑭᒡᒐᑐᕐᑎᒋᔭᐅᕘᒃ ᐃᓄᓕᒫᓂᒃ:
- ᐃᓅᓕᑦᓯᕕᒃ ᐋᓐᓂᐊᕕᒃ (IHC) ᑭᒡᒐᑐᕐᑐᑦ ᓯᑕᒪᐅᔪᖕᖏᒐᕐᑐᓂᒃ ᓄᓇᓕᓐᓂᒃ ᑕᓯᐅᔭᕐᔪᐊᒥᐅᓂᒃ;
- ᐅᖓᕙᒃ ᑐᓚᑦᑐᕕᒃ ᐋᓐᓂᐊᕕᒃ (UTHC) ᑭᒡᒐᑐᕐᑐᖅ ᓯᑕᒪᐅᔪᖕᖏᒐᕐᑐᓂᒃ ᓄᓇᓕᓐᓂᒃ ᐅᖓᕙᒻᒥᐅᓂᒃ.
ᑖᒃᑯᐊ ᑎᓕᔭᐅᒪᐅᑎᒋᒃ ᐃᑲᔪᕐᓯᒪᓂᖃᕋᓱᐊᕐᑑᒃ ᐱᐅᓯᐅᒥᕙᓪᓕᐊᕆᐊᖃᕐᓂᖏᓐᓄᑦ ᓄᓇᓐᓂ ᐃᓘᓐᓈᒍᑦ ᐃᓗᓯᓕᕆᔭᐅᓂᖏᑦᑕ, ᖃᓄᐃᖕᖏᓯᐊᕆᐊᖃᕐᓂᖅ ᐊᒻᒪᓗ ᐃᓅᑦᔪᖏᑦᑕ ᐊᑑᑎᔭᖏᓐᓂ ᑭᒡᒐᑑᑏᑦ ᐊᑐᓐᓇᓕᐊᕆᔭᐅᓯᒪᔪᑦ ᑖᒃᑯᓄᖓ, ᐅᐊᕈᑦᓯᐅᑎᓯᒪᑦᓯᐊᓗᑎᒃ ᐊᒻᒪᓗ ᐱᓯᐊᓯᒪᓂᕐᐸᐅᒐᓱᐊᕐᓗᑎᒃ ᑭᒡᒐᑑᑏᑦ. ᑕᒪᒃᑯᐊ ᑭᒡᒐᑑᑏᑦ ᓄᐃᑦᓯᓚᕿᐅᑕᐅᕙᑦᑐᑦ ᐊᐅᓚᑦᔭᕆᐊᕈᑎᓂᒃ ᐊᑑᑎᑎᑦᓯᑌᓕᒪᑦᔪᑎᓕᕆᓂᕐᒥ ᐊᒻᒪᓗ ᑐᑭᓯᕚᓪᓕᕈᑎᑦᓴᓕᕆᓂᕐᒥ ᐃᓚᖃᕐᒥᓱᑎᒃ ᐃᓄᐃᑦ ᐊᑑᑎᓪᓚᕆᑦᑕᖏᓐᓄᑦ ᑭᒡᒐᑑᑎᑕᖃᕐᒥᓱᑎᒃ ᐃᓄᐃᑦ ᑭᒡᒎᒪᒋᔭᖏᑦ ᒪᓕᑦᓱᒋᑦ, ᑲᑐᑦᔨᖃᑎᒌᒍᑕᐅᑦᓱᑎᒃ ᓄᓇᓕᒻᒥᐅᓄᑦ. ᐊᑦᔨᒌᓪᓗᑐᐊᐱᖕᖏᑲᓗᐊᕐᓱᑎᒃ ᐱᓇᓱᒍᓯᖏᑦᑕ ᑖᒃᑯᐊ ᐋᓐᓂᐊᕕᒃ ᐱᕐᕈᓯᒋᒃ, ᑭᓯᐊᓂ ᐊᑦᔨᐸᓱᒌᑐᐃᓐᓇᐅᒐᓗᐊᑦ ᑭᒡᒐᑑᑏᑦ ᒪᓂᒪᑎᑕᖏᑦ.
ᖁᓛᓂ ᐅᖃᕐᑕᐅᔪᑦ ᐱᖁᔭᒻᒪᕇᑦ (ᐊᖏᖃᑎᒌᓐᓂᐅᑉ ᐱᖁᔭᒻᒪᕆᖓ ᐱᓪᓗᒋᑦ ᐃᓗᓯᓕᕆᓃᑦ ᑭᒡᒐᑑᑎᖏᓐᓂ ᐊᒻᒪᓗ ᐃᓄᓕᕆᓃᑦ ᑭᒡᒐᑑᑎᖏᓐᓂ) ᐅᖃᓪᓚᕆᒍᓗᑐᐃᓐᓇᓗᑳᑦᓯᒪᔪᑦ ᐱᖁᔭᐅᑦᓱᑎᒃ ᐃᓄᓐᓄᑦ ᐃᓕᒃᑰᑐᓄᑦ ᐊᖏᕐᓯᒪᕐᖄᓯᐊᕋᓗᐊᕐᒪᖔᑕ ᐋᓐᓂᐊᓯᐅᕐᑕᐅᓂᐊᕐᓂᒥᓂᒃ ᐊᒻᒪᓗ ᑭᒡᒐᑑᑎᓂᒃ ᒪᓂᔨᕕᐅᓂᕐᒥᓂᒃ. ᐃᓱᒪᒋᒻᒥᓗᒋᑦ ᐱᒻᒪᕆᐅᓂᖏᑦ ᐊᓂᕐᑎᕆᔪᓕᒫᓂᒃ ᓯᕐᓈᑎᒃᑯᑦ ᐱᔪᓐᓇᐅᑎᒋᔭᐅᑎᑕᖏᑦ, ᐊᓯᓗᑳᖏᑦ ᐱᖁᔦᑦ ᐱᖁᔭᕆᔭᐅᒻᒪᑕᐅᓐᓃᑦ ᑯᐯᒻᒧᑦ ᑲᓇᑕᒧᓪᓗ ᐸᐸᑕᐅᑦᓯᐊᕆᐊᖃᕐᓂᖏᓐᓅᓕᖓᔪᑦ ᐊᑐᕐᑏᑦ: ᑯᐯᒃ ᐅᖃᕐᓯᒪᐅᑎᖓ ᐊᓂᕐᑎᕆᔪᓕᒫᓂᒃ ᓯᕐᓈᑏᑦ ᐱᔪᓐᓇᐅᑎᖃᕐᑎᓯᓂᖓᑕ, ᐃᓱᒪᕐᓱᓯᐊᕆᐊᖃᕐᓂᖏᑦᑕᓗ, ᑲᓇᑕᒥᐅᑦ ᐱᖁᔭᖓ ᐱᔪᓐᓇᐅᑎᖃᕐᑎᓯᓂᖓᑕ, ᐃᓱᒪᕐᓱᓯᐊᕆᐊᖃᕐᓂᖏᑦᑕᓗ ᐊᑦᔨᒌᖕᖏᑐᑦ ᓯᓚᕐᖁᕇᒃᑯᑎᖏᑦ ᐱᔪᓐᓇᑐᓪᓚᕇᑦ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᑭᒡᒐᑑᑎᓂ, ᐊᓯᖏᓪᓗ. ᑐᑭᓯᓴᕐᑕᐅᒋᐊᓪᓚᕈᓐᓇᑐᑦ ᑕᒪᒃᑯᐊ ᐱᖁᔦᑦ ᐊᑐᐃᓐᓇᐅᒪᑕ ᖃᕆᑕᐅᔭᒥ ᐅᓂᒃᖄᓯᐅᕋᑦᓭᑦ educaloi.qc.ca.
ᐃᓱᒪᒋᒐᓗᐊᕐᒥᓗᒋᑦ ᐱᒻᒪᕆᐅᑎᐅᓂᖏᑦ ᐱᔪᓐᓇᐅᑏᑦ ᐃᓱᒪᕐᓱᓯᐊᕆᐊᖃᕐᓃᓗ, ᐊᓯᖏᓐᓂᒃ ᐱᖁᔭᖃᕐᒥᔪᖅ ᐊᑦᑕᓀᑦᑐᓯᐊᒦᑦᑎᓯᒐᓱᐊᕈᑎᓂᒃ ᐊᒻᒪᓗ ᖃᓄᐃᖕᖏᓯᐊᕆᐊᖃᕐᓂᖏᓐᓄᑦ ᐃᓄᐃᑦ ᐃᓗᒃᑰᑎᑦ ᐊᑦᑕᓈᕿᓇᕐᑐᒨᑐᐃᓐᓇᕆᐊᓖᑦ, ᐊᖏᖕᖏᑐᐊᕈᑎᒃ ᐋᓐᓂᐊᓯᐅᕐᑕᐅᒋᐊᖃᓕᕐᓂᒥᓂᒃ ᑭᒡᒐᑐᕐᑕᐅᒍᑎᑦᓴᒥᓂᓗ ᒪᓂᒪᑎᑦᓯᕕᐅᔪᑦ. ᒪᑯᐊ ᑐᖕᖓᕕᓪᓚᕆᐅᓲᒍᒻᒪᑕ ᐅᖃᕐᑕᕗᑦ:
- ᐅᕕᒃᑫᑦ ᓴᐳᒻᒥᔨᒃᑯᖏᑦᑕ ᐱᖁᔭᒻᒪᕆᖓ;
- ᐃᓄᓕᒫᓅᓕᖓᔪᓂᒃ ᐃᑉᐱᒍᓱᑦᑎᒪᕇᑦ ᐱᖁᔭᒻᒪᕆᖓ;
- ᐊᕕᑦᑐᓯᒪᓂᖓ 13 ᐃᓄᓕᒫᓅᓕᖓᑦᓱᑎᒃ ᓯᓚᕐᖁᕇᒃᑯᑏᑦ ᑯᐯᒻᒥ ᐱᓪᓗᒋᑦ ᐅᐃᒪᓇᕐᓯᓯᒪᔪᖃᕐᐸᑦ ᐋᓐᓂᐊᓯᐅᕐᑕᐅᒋᐊᓕᒻᒥᒃ;
- ᐱᖁᔭᒻᒪᕆ ᐱᓪᓗᒋᑦ ᐸᐸᑕᐅᑦᓯᐊᕆᐊᖃᕐᓂᖏᑦ ᐃᓄᐃᑦ ᐃᓱᒪᒥᒍᑦ ᐃᓱᕐᕆᓯᐊᖕᖏᒍᑎᓖᑦ ᐃᒻᒥᓂᒃ ᐊᑦᑕᓈᕿᑎᑦᓯᑐᐃᓐᓇᕆᐊᖃᕐᓂᐸᑦ ᐅᕙᓗᓐᓃᑦ ᐊᓯᒥᓂᒃ.