ᖃᐅᔨᒪᒋᐊᓕᑎᑦ
ᑕᒪᒃᑯᐊ ᐋᖓᔮᓐᓇᑐᐃᑦ ᒥᑦᓵᓄᑦ
- Crack ᐊᒻᒪᓗ Crystal meth ᓲᖑᔫᑦᓱᑎᑦ ᐋᖓᔮᓐᓇᑐᑦ.
- ᐃᓄᓐᓂᒃ ᐃᑉᐱᓂᐊᒋᔭᖃᕐᑎᓯᓲᑦ ᐆᒪᓂᕐᒥᒃ, ᕿᑦᑌᖓᓂᕐᒥᒃ, ᐊᒻᒪᓗ ᐱᒍᓐᓇᓂᕐᒥᒃ ᐊᑯᓂᐅᖕᖏᑐᖅ.
ᑭᓯᐊᓂ “ᐳᕐᑐᔪᒦᓐᓂᖅ” ᐊᑯᓂᐅᖕᖏᑐᖅ ᐃᑉᐱᓂᐊᕆᔭᐅᓲᖅ, ᐊᒻᒪᓗ “ᓴᖕᖐᓕᓂᖓ” ᑭᖑᓂᐊᒍᑦ ᐊᕐᓱᕈᕐᓇᕈᓐᓇᑐᖅ.
- ᐋᖓᔮᓐᓇᑐᐃᑦ ᐅᐊᕈᑦᔨᑐᕐᑕᐅᕙᓪᓗᓲᑦ ᐊᓯᖏᓐᓄᑦ ᖃᐅᔨᒪᔭᐅᖕᖏᑐᓄᑦ ᐊᒻᒪᓗ ᐊᑦᑕᓇᕐᑐᓄᑦ ᐅᐊᕈᑦᔨᑐᕐᑕᐅᒪᑦᓱᑎᒃ, ᐱᔭᐅᑐᐊᕋᒥᓗ ᐊᑦᑕᓇᓚᕿᕈᓐᓇᓱᓂ ᐱᓗᐊᕐᓯᒪᓗᓂ.
ᓱᕐᕋᑕᐅᓐᓇᑐᑦ ᐊᒻᒪᓗ ᐱᐅᓯᐅᒍᓐᓇᑐᑦ ᐱᕇᕐᓯᒪᒍᓂ
ᑎᒥᒃᑯᑦ ᐃᓱᒪᒃᑯᓗᕻ
- ᑯᑮᖓᓂᖅ, ᑲᑕᖓᓂᖅ ᐊᒻᒪᓗ/ᐅᕝᕙᓘᓐᓃᑦ ᐃᓱᒪᔮᕐᓂᖅ
- ᓯᓂᕐᖃᔦᒪᓂᖅ ᓂᕆᑦᓯᐊᖃᔦᕐᓂᓗ
- ᑭᒍᑎᕐᓗᓂᖅ ᐅᕕᓂᕐᓗᓂᕐᓘᓃᑦ
- ᒥᕆᐊᖕᖑᓂᖅ / ᒥᕆᐊᑎᕆᓂᖅ
- ᓴᕝᕕᓕᕆᓂᖅ / ᐆᒻᒪᓰᕐᓯᒪᓂᖅ
- ᐆᒻᒪᑎᕐᓗᓂᖅ ᐊᒻᒪᓗ ᖀᕐᓱᓂᖅ
- ᐆᒻᒪᑎᒃᑯᑦ ᖃᕆᑕᒃᑯᓗ ᓱᕐᕋᑕᐅᒪᓂᖅ
- ᐅᐃᕆᒪᓚᕿᕈᓐᓇᑐᖅ
- ᐃᒻᒪᓚᕿᕈᓐᓇᑐᖅ ᐆᑦᑑᑎᒋᓗᒍ Hepatitis C-ᒧᑦ ᐱᓗᐊᕐᑐᒥᒃ ᐱᑑᒪᖃᑎᖃᕈᓂ
- ᐊᑦᑕᓇᕐᑐᖅ ᐱᓗᐊᕐᓯᒪᒍᓂ ᐃᓅᒍᓐᓀᕈᓐᓇᓱᓂᓗ
ᐃᓅᓯᕐᓂᒃ:
- ᐱᓀᓗᑕᖃᕈᓐᓇᑐᖅ ᐱᖃᓐᓈᖏᓪᓗ, ᐃᓚᖏᓪᓗ ᕿᑐᕐᖓᖏᓪᓗ
- ᖃᓂᑕᒥᓄᑦ ᐱᓀᓗᑕᖃᕈᓐᓇᑐᖅ
- ᐃᓄᑑᑎᓂᖅ ᐅᕝᕙᓘᓐᓃᑦ ᐊᓯᒥᓂᒃ ᓲᓱᒋᔭᖃᕈᓐᓀᓂᖅ
- ᐱᓇᓱᕝᕕᒥᒃ ᐃᓕᓐᓂᐊᕕᒻᒥᓘᓐᓃᑦ ᐱᓀᓗᑕᖃᕐᓂᖅ
- ᑮᓇᐅᔭᑎᒍᑦ ᐱᖁᔭᑎᒍᓪᓘᓃᑦ ᐱᓀᓗᑕᖃᕐᓂᖅ
- ᐃᓱᒪᒥᒍᓐᓀᓂᖅ
ᐱᐊᕋᑦᓴᓕᒻᒧᑦ ᐊᒻᒪᓗ ᐱᐊᕋᑦᓴᖓᓄᑦ (ᐱᐊᕋᑦᓴᖅ):
- ᐱᐊᕋᑦᓭᓕᑐᐃᓐᓇᕆᐊᖃᕐᓂᖅ ᐊᒻᒪᓗ ᐱᐊᕋᑦᓴᐅᑉ ᑐᖁᑐᐃᓐᓇᕆᐊᖃᕐᓂᖓ
- ᐱᐊᕋᑦᓴᐅᑉ ᐃᓅᓕᕐᕕᒋᒋᐊᓕᖓ ᑎᑭᓚᐅᕐᑎᓇᒍ ᐱᐊᕋᕐᑖᑐᐃᓐᓇᕆᐊᖃᕐᓂᖅ
- ᐊᐅᓈᕖᖕᖓᑐᐃᓐᓇᕆᐊᖃᕐᓂᖅ ᐱᐊᕋᑦᓴᖃᕐᓗᓂ ᐅᕝᕙᓘᓐᓃᑦ ᐱᐊᕋᕐᑖᕋᓱᓪᓗᓂ (ᐃᓅᒍᓐᓀᕈᑎᐅᒍᓐᓇᑐᖅ ᑕᒪᖏᓐᓄᑦ ᐊᓈᓇᖓᓄᑦ ᐊᒻᒪᓗ ᐱᐊᕋᑦᓴᖓᓄᑦ)
- ᒥᑭᓗᐊᕐᑐᒥᒃ ᐱᐊᕋᕐᑖᑐᐃᓐᓇᕆᐊᖃᕐᓂᖅ (ᐊᖏᓕᕙᓪᓕᐊᓯᐊᖕᖏᑐᖅ)
ᐊᒥᓱᕕᖕᖏᓱᑎᑦ ᐱᑑᒪᓯᒪᓕᕈᕕᑦ, ᑕᒪᒃᑯᐊ ᐋᖓᔮᓐᓇᑐᐃᑦ ᐊᖏᔪᒥᒃ ᐊᑯᓃᕐᑐᒥᓪᓗ ᓱᕐᕃᒍᓐᓇᑐᑦ ᐃᓅᓯᕐᓂ ᐃᓗᓯᕐᓂᓗ.
ᐃᒻᒥᓂᒃ ᑲᒪᑦᓯᐊᓂᖅ ᐊᕐᓱᕈᕐᓇᑐᒃᑰᓕᕈᕕᑦ
ᐃᓱᒪᔮᓗᐊᓕᕈᕕᑦ, ᑯᑮᖓᓕᕈᕕᑦ ᐅᕝᕙᓘᓐᓃᑦ ᐋᖓᔮᓐᓇᑐᕐᑐᕈᒪᓕᕈᕕᑦ, ᐃᑲᔪᕈᓐᓇᖁᑎᑦ ᑎᒥᓐᓂᒃ ᐃᓱᒪᓐᓂᓗ ᓄᓪᓚᕆᐊᖁᓪᓗᑎᑦ ᐊᑦᑕᓇᕐᑐᒦᕈᓐᓀᓗᑎᓪᓘᓃᑦ.
ᓄᓪᓚᑎᑦᓯᒍᑏᑦ ᐃᑲᔪᕐᓯᐅᑏᑦ ᐱᐅᓯᐅᒍᓐᓇᑐᑦ:
- ᐊᓂᕐᓵᓗᑎᑦ ᓱᒃᑫᑐᒥᒃ — ᕿᖓᒃᑯᑦ ᐊᓂᕐᓵᓗᑎᑦ ᐊᓂᑎᓗᒍ ᖃᓂᒃᑯᑦ
- ᕿᒥᕐᕈᓗᑎᑦ ᐊᕙᑎᓐᓂ — ᑕᑯᔭᑎᑦ ᓱᓇᑐᐃᓐᓀᑦ ᐱᖓᓱᐃᑦ ᑌᓗᒋᑦ, ᒪᕐᕉᒃ ᐊᑦᑐᕈᓐᓇᑖᒃᑭᒃ, ᐊᑕᐅᓯᕐᓗ ᑐᓵᕈᓐᓇᑌᑦ
- ᐊᓂᓗᑎᑦ ᐱᓱᕋᔮᓪᓗᑎᑦ ᐅᕝᕙᓘᓐᓃᑦ ᓯᓚᓕᐊᕐᓗᑎᑦ ᐊᓂᕐᓂᓯᐊᒥᒃ ᐊᓂᕐᓵᕆᐊᕐᑐᓗᑎᑦ
- ᓄᓪᓚᖓᓇᕐᑐᒥᒃ ᓂᑦᔭᓗᑦᑖᓗᑎᑦ ᐅᕝᕙᓘᓐᓃᑦ ᐃᓱᐊᕐᑐᒥᒃ ᑎᒍᒥᐊᕐᓗᑎᑦ ᓱᓇᑐᐃᓐᓇᒥᒃ (ᐅᔭᕋᕐᒥᒃ, ᕿᐱᒻᒥᒃ, ᐊᓯᖏᓪᓘᓃᑦ)
- ᐅᖄᖃᑎᖃᕐᓗᑎᑦ ᑭᓇᑐᐃᓐᓇᒥᒃ ᐅᑉᐱᒋᔭᓐᓂᑦ
ᑕᒪᒃᑯᐊ ᐊᑑᑎᑦᓱᒋᑦ ᐃᑲᔪᕐᓯᒍᓐᓇᑐᑦ ᐃᓕᓐᓂᒃ ᐱᑐᑦᓯᒪᖁᓪᓗᑎᑦ ᓄᓪᓚᖓᖁᓪᓗᑎᓪᓗ.
ᐊᑐᓲᕆᒍᕕᐅᒃ, ᐊᑦᑕᓀᑦᑐᒥᖔᖅ ᐊᑐᖃᑦᑕᓗᒍ
- ᐃᓄᑑᕈᓐᓀᓗᑎᑦ ᐊᑐᓯᒍᕕᑦ; ᐱᓀᓗᑦᓯᑲᓪᓚᒍᕕᑦ, ᐃᒻᒥᓃᕐᓱᕈᓐᓇᕋᔭᖕᖏᑐᑎᑦ ᐃᓄᑑᒍᕕᑦ.
- ᒥᑭᔪᒥᒃ ᐱᒋᐊᕐᖄᓗᑎᑦ, ᓱᒃᑫᑐᒥᓪᓗ; ᐱᓗᐊᖁᖕᖏᓗᑎᑦ, ᐱᓗᐊᕐᑐᒥᒃ ᓄᑖᖑᑉᐸᑦ ᐱᓚᖓᔦᑦ, ᓄᑖᒥᓪᓘᓃᑦ ᓂᐅᕕᕐᕕᖃᕐᑐᕕᓂᐅᒍᕕᑦ ᐅᕝᕙᓘᓐᓃᑦ ᐊᑯᓂᐅᓕᕐᑐᖅ ᐱᓚᐅᕐᓯᒪᒍᓐᓀᕈᕕᑦ.
- ᐱᑑᒪᖃᑎᖃᕈᕕᑦ ᐱᖃᓐᓈᑎᓪᓗ ᐊᓯᐊᓂᓘᓐᓃᑦ, ᐊᑕᐅᑦᓯᑯᑦ ᐱᖃᑎᖃᑎᒌᑦᑌᓕᓗᓯ “ᑲᒪᔪᖃᕐᑎᓗᒍ” ᐱᓗᐊᕐᑐᖃᑲᓪᓚᖁᖕᖏᓗᒍ.
- ᐅᐊᕈᑦᔨᑐᐃᑦᑌᓕᓗᓯ ᐃᒥᐊᓗᒻᒥᒃ ᐋᖓᔮᓐᓇᑐᓂᓪᓗ.
- ᓇᒻᒥᓂᓯᓐᓂᒃ ᐱᕈᑎᖃᕐᓗᓯ; ᐊᑦᑕᑐᕈᑦᓯ ᒥᓗᑦᓯᒍᑎᓂᒃ ᐊᓯᖏᓐᓂᓗ ᐱᒍᑎᓂᒃ ᐱᓗᐊᑲᓪᓚᑐᐃᓐᓇᕆᐊᖃᕐᑐᓯ ᐁᑦᑐᑑᑎᓗᓯᓘᓐᓃᑦ ᐋᓐᓂᐊᓂᑦ ᐆᑦᑑᑎᒋᓗᒍ Hepatitis C. ᐋᖓᔮᓐᓇᑐᕐᑐᓗᐊᕐᑐᒧᑦ ᐅᑎᕐᑎᓯᒍᑎ ᐊᑐᐃᓐᓇᐅᖏᑐᐃᓐᓇᕆᐊᓕᒃ ᐋᓐᓂᐊᓯᐅᕐᕕᓂ, ᐊᒻᒪᓗ ᑌᒣᑉᐸᑦ, ᐊᑐᐃᓐᓇᐅᓴᐅᑎᒋᓛᓕᕐᑐᖅ ᐅᑭᐅᖅ 2026-ᒥ — ᐊᐱᕆᓗᑎᑦ ᐋᓐᓂᐊᓯᐅᕐᑎᒥᒃ ᐃᓄᓕᕆᔨᒥᓪᓘᓃᑦ.
- ᐃᒥᑐᐃᓐᓇᑑᒪᑦᓯᐊᓗᓯ ᐃᒥᕋᑦᓴᔭᒥᓪᓘᓃᑦ ᓂᕆᑦᓯᐊᖃᑦᑕᓗᓯᓗ.
- ᓯᓚᒥᒃ ᖃᐅᔨᓴᑦᓯᐊᓗᓯ: ᐅᕐᖂᔫᑉᐸᑦ ᕿᐅᔭᓇᕐᐸᓘᓐᓃᑦ, ᓯᓚᖅ ᐱᓗᐊᕐᐸᑦ ᑎᒥᒻᒥᒃ ᓱᑲᑦᑐᒥᒃ ᓱᒃᑯᐃᒍᓐᓇᒪᑦ ᐱᑑᒪᓗᐊᕐᓯᒪᓗᓯ ᓱᒃᑯᓚᕿᒍᓐᓇᒪᑦ.
- ᑎᒍᒥᐊᕐᓗᓯ Naloxone-ᒥᒃ; ᐃᓅᓯᕐᒥᒃ ᐊᓐᓀᒍᓐᓇᑐᖅ — Naloxone ᕿᖓᒃᑯᑦ ᓂᐅᕐᓯᒍᑎ ᐋᓐᓂᐊᓯᐅᑎᐅᑦᓱᓂ ᐋᖓᔮᓐᓇᑐᕐᑐᓯᒪᔪᓂᒃ ᐋᕐᖀᒍᓐᓇᑐᖅ ᐱᓗᐊᕐᓯᒪᔪᖃᕐᑎᓗᒍ. ᐋᖓᔮᓐᓇᑐᕐᑐᓗᐊᕐᑐᒧᑦ ᐅᑎᕐᑎᓯᒍᑎ ᓇᓗᒃᓲᓐ ᐋᓐᓂᐊᕕᒻᒦᑐᖅ ᐅᕝᕙᓘᓐᓃᑦ ᐄᒐᕐᑖᕕᒻᒥ.
- ᐸᕐᓇᓯᒪᑦᓯᐊᓗᓯ ᐱᓗᐊᕐᓯᒪᔪᖃᕐᐸᑦ: Naloxone ᐊᑐᐃᓐᓇᐅᑎᓗᒍ, ᑭᓇᒧᑦ ᐃᑲᔪᕐᑕᐅᒍᒪᒍᓐᓇᕿᑦ?
ᐃᑲᔪᕐᑕᐅᒋᑦ
ᐃᓄᑑᖕᖏᓚᑎᑦ.
ᐃᑲᔪᕐᑕᐅᕕᒃ ᐊᑐᐃᓐᓇᖅ, ᐋᖓᔮᓐᓇᑐᕐᑑᒪᓲᖑᒍᑦ ᑮᑖᐱᒃ, ᐃᓚᖓᓂ, ᐅᕝᕙᓘᓐᓃᑦ ᖃᐅᔨᒪᒍᕕᒃ ᐃᓄᒻᒥᒃ ᐱᓲᒥᒃ. ᐊᒥᓱᐃᑦ ᐃᓄᐃᑦ ᓄᓇᕕᒻᒥ ᐱᓇᓱᐊᖃᑎᒌᓲᑦ ᓄᓇᓕᕗᑦ ᐊᑦᑕᓇᖕᖏᑑᑦᓯᐊᖁᓪᓗᒋᑦ ᓲᖑᔫᑦᓯᐊᖁᓪᓗᒋᓪᓗ.
ᐅᖄᕕᖃᒍᓐᓇᑐᑎᑦ ᒪᑯᓂᖓ:
- ᓲᓱᒋᓐᓇᑐᒥᒃ ᐃᓄᒻᒪᕆᒻᒥᒃ, ᐱᖃᓐᓈᒥᒃ, ᐃᓚᑎᓐᓂᓗᓐᓃᑦ
- ᖃᓄᐃᖕᖏᓯᐊᕐᓂᓕᕆᔨᒥᒃ ᐱᓇᓱᑦᑎᒥᒃ ᐃᓄᓕᕆᔨᒻᒥᓘᓐᓃᑦ
- ᐋᓐᓂᐊᕕᒃ ᓄᓇᓕᐅᑉ ᐃᓗᐊᓂ ᐃᑲᔪᕐᑕᐅᒍᒪᓗᑎᑦ ᐅᓐᓂᑑᑦᔭᐅᒍᒪᒍᕕᓪᓘᓃᑦ
- ᐊᑦᑕᓇᕐᑐᒦᒍᕕᒃ ᐃᑲᔪᕐᑕᐅᒋᐊᖃᕈᕕᓪᓘᓃᑦ ᑕᒉᓐᓇᓭᓐᓇᖅ, ᐅᖄᓚᕕᒋᓗᒍ 9090
ᐅᖄᕕᖃᕈᓐᓇᕆᕗᑎᑦ ᒪᑯᓄᖓ:
- ᐃᓱᐊᕐᓯᕕᒃ ᓄᓇᓕᓕᒫᑦ ᒪᒥᓴᕐᕕᖓ: 1-819-964-5646 (intake@isuarsivik.ca)
- Info-Santé / Info-Social 811 (ᓃᓂᕐᓗᒍ 2 ᖃᓪᓗᓈᑎᑐᑦ ᐅᖄᕈᒪᒍᕕᑦ) – ᐊᑐᐃᓐᓇᖅ 24/7
- , ᐃᑲᔪᕐᑕᐅᒍᒪᓂᕐᒧᑦ ᐅᓐᓂᑑᑦᔭᐅᒍᒪᓂᕐᒧᓘᓐᓃᑦ: 1-800-265-2626 (aidedrogue.ca)
- ᖃᕆᑕᐅᔭᑎᒍᑦ ᓴᐳᒻᒥᕕᒃ A.A. ᑲᑎᒪᓂᕐᓄᑦ: AA-intergroup.org
- ᐋᕐᕿᑕᐅᕕᒃ ᒪᒥᓴᕐᕕᒃ: (aaqitauvik.ca) (ᖁᐊᕐᑕᖅ)
ᐃᑲᔪᕐᑕᐅᒍᒪᓂᖅ ᐅᖃᓕᑭᑕᒍᑎᐅᓲᖑᖕᖏᑐᖅ ᐊᑭᖃᕋᓂᓪᓗ. ᐅᖄᕈᑎᖃᕈᓐᓇᑐᑎᑦ ᓱᓕᕋᓗᐊᕈᕕᑦ ᐃᕐᖃᑐᕐᑕᐅᖏᓪᓗᑎᑦ.
ᐊᐅᓚᔨᒋᑦ
ᓇᐅᓕᒫᒃ ᐊᕐᓱᕉᓴᕈᓐᓇᑐᖅ. ᖃᐅᔨᒪᒋᑦ ᐃᑲᔪᕐᑕᐅᒍᒪᓂᖅ ᓲᖑᓂᖃᕐᓂᒥᒃ ᐱᐅᓯᖃᕐᖁᖅ.
ᒪᒥᓴᕐᓂᖅ ᐊᑯᓃᕐᓇᑐᖅ — ᑭᓯᐊᓂ ᐃᓄᑑᕆᐊᑐᖕᖏᑐᑎᑦ.
ᑲᒪᒋᔭᐅᑦᓯᐊᕆᐊᖃᕐᖁᑎᑦ, ᓲᓱᒋᔭᑦᓯᐊᓗᑎᑦ, ᓴᐳᒻᒥᔭᐅᑦᓯᐊᓗᑎᓗ — ᖃᓄᐃᑦᑐᑰᓕᕋᓗᐊᕈᕕᑦ ᐃᓅᓯᕐᓂ. ᓄᓇᓕᒻᒧᑦ ᐃᓚᒋᔭᐅᕗᑎᑦ ᐃᓕᓐᓂᓗ ᓲᓱᒋᔭᖃᑦᓯᐊᓱᓂ.