ᖃᓄᖅ ᖃᐅᔨᔭᐅᓱᖑᓂᖓ ᐳᕙᓪᓗᓇᖅ?
ᐃᓕᑕᕐᓇᐅᑎᖏᑦ ᐳᕙᓪᓗᓂᐅᑉ ᐊᑯᓂ ᓄᐃᒐᓱᒍᓐᓇᖁᑦ.
ᓄᐃᑉᐸᑕ, ᑎᒥᒃ ᐃᑲᔪᕐᑕᐅᓗᑐᒋᐊᓕᒃ. ᓯᕗᓪᓕᒥ, ᖁᐃᕐᑐᑐᐃᓐᓇᒍᓐᓇᑐᖅ ᐊᑯᓂ. ᐱᕙᓪᓕᐊᓂᖓᓂ, ᐊᓯᖏᑦ ᐃᓕᑕᕐᓇᐅᑏᑦ ᓄᐃᓂᐊᓕᕐᒪᑕ:
Articles
ᖃᓄᖅ ᐋᓐᓂᐊᓯᐅᕐᑕᐅᒍᑎᐅᓲᖑᕙ?
ᐳᕙᓪᓗᓇᖅ ᐋᕐᕿᑕᐅᒍᓐᓇᖁᖅ. ᐊᒥᓲᓂᕐᓴᓂ ᐃᓄᓐᓂᑦ ᐋᓐᓂᐊᔪᓂ, ᐳᕙᓪᓗᓇᖅ ᐋᕐᕿᑕᐅᒍᓐᓇᖁᖅ ᑕᒫᓂ ᓄᓇᕕᒻᒥ.
ᖃᐅᔨᒪᔭᐅᔪᑦ ᖁᐊᕐᓵᓇᕐᑐᑯᕐᓂᐅᖃᑦᑕᓯᒪᔪᑦ ᓄᓇᕕᒻᒥᐅᓄᑦ ᐳᕙᓪᓗᓕᖃᑦᑕᑐᕕᓂᐅᑎᓪᓗᒋᑦ ᐊᕐᕌᒍᖏᓐᓂ 1950ᓂᑦ 1970ᓄᑦ ᐅᖁᒣᓪᓕᐅᕈᑎᐅᖏᓐᓇᖁᖅ ᓄᓇᕕᒻᒥᐅᓄᑦ. ᐳᕙᓪᓗᓇᐅᑉ ᐋᓐᓂᐊᓯᐅᕐᑕᐅᒍᑎᖏᑦ ᐊᑦᔨᐅᖏᑦᑐᒪᕆᐅᓕᕐᖁᑦ ᐅᓪᓗᒥ; ᐋᓐᓂᐊᔪᑦ ᖃᓪᓗᓈᓄᑦ ᐊᐅᓪᓚᑎᑕᐅᖏᓐᓇᓕᒫᓱᖑᒍᓐᓀᖁᑦ. ᐋᓐᓂᐊᕕᒻᒥᒋᐊᖃᕈᑎᒃ ᐋᓐᓂᐊᔪᑦ, ᐊᒥᓲᓂᕐᓴᑎᒍᑦ ᐳᕕᕐᓂᑐᒥ ᑰᑦᔪᐊᒥᓗᓐᓃᑦ ᐋᓐᓂᐊᕕᒻᒦᓱᖑᕗᑦ. ᐋᓐᓂᐊᕕᒻᒥᒋᐊᖃᕈᑎᒃ ᒪᓐᑐᕆᐊᓪᒥ ᐋᓐᓂᐊᓂᕐᓴᐅᔪᓄᑦ, ᐊᑯᓃᓱᖑᖕᖏᓚᑦ.
ᐃᓄᒻᒪᕇᑦ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᑦ ᐃᓄᑑᒃᑯᕕᒻᒥᒋᐊᖃᓲᖑᕗᑦ ᐄᕐᖃᒋᐊᖃᓪᓗᑐᕐᓱᑎᓗ. ᑭᓯᐊᓂ ᐋᓐᓂᐊᖓ ᐃᑯᓪᓚᐅᒥᒻᒪᑦ ᐋᓐᓂᐊᓯᐅᕐᑕᐅᔪᕐᓗ ᐁᑦᑐᑑᑎᖃᕈᓐᓇᕈᓐᓀᒪᑦ, ᐊᓂᑎᑕᐅᓲᖑᕗᑦ ᐋᓐᓂᐊᕕᒻᒥ. ᑭᓯᐊᓂ, ᐄᕐᖃᑕᒥᓂᒃ ᐱᔭᕆᑦᓯᐊᕆᐊᖃᕐᖁᑦ ᐋᓐᓂᐊᒍᓐᓀᓂᐊᕈᑎᒃ.
ᓱᓇᐅᕙ ᐳᕙᓪᓗᓇᖅ?
ᐳᕙᓪᓗᓇᖅ ᐁᑦᑐᑑᑎᐅᒍᓐᓇᑐᖅ ᐋᓐᓂᐊᖑᑦᓱᓂ ᓄᐃᓚᕿᓱᖑᔪᖅ ᖁᐱᕐᕈᐊᕈᓯᒻᒧᑦ ᑌᔭᐅᔪᒧᑦ Mycobacterium tuberculosis, ᑕᑯᒍᓐᓇᖏᑦᑕᕗᑦ ᐃᔩᑦᑎᓄᒃ ᐳᕙᓐᓂᕙᓪᓗᓱᖑᑦᓱᓂᓗ.
ᐳᕙᓪᓗᓇᖅ ᐋᓐᓂᐊᒍᑎᒻᒪᕆᐅᓕᒍᓐᓇᖁᖅ ᐋᓐᓂᐊᓯᐅᕐᑕᐅᑲᐱᒍᑎᐅᖕᖏᑯᓂ. ᐋᓐᓂᐊᓯᐅᕐᑕᐅᒍᑎᐅᒍᓐᓇᖁᖅ ᐄᕐᖃᒐᑎᒍᑦ.
ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᓇᖅ ᐁᑦᑐᑑᑎᐅᒻᒪᕆᒍᓐᓇᑐᖅ.
ᐃᓄᒃ ᐳᕙᒻᒥᒍᑦ ᐋᓐᓂᐊᖃᕈᓂ ᐳᕙᓪᓗᓇᕐᒥᒃ ᖁᐃᕐᑐᒍᓂ ᑕᒋᐅᒍᓂᓗᓐᓃᑦ, ᒥᑭᔪᒻᒪᕇᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ ᐊᓂᕐᑎᕆᔭᒧᕐᓱᑎᑦ ᐊᒥᓱᓂᓗ ᑫᕙᓪᓚᒍᓯᕐᓂᑦ ᐊᓂᕐᑎᕆᔭᒥᒍᓐᓇᓱᑎᑦ. ᐱᓗᐊᕐᑐᒥ ᐅᒃᑯᐊᓯᒪᔪᓂ ᐃᓂᓂᑦ.
ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ ᐃᕐᐸᕈᓐᓇᒥᔪᑦ ᐊᓂᕐᑎᕆᔭᑎᒍᑦ ᐃᓄᒃ ᕿᐊᑉᐸᑦ, ᙯᒐᓕᔭᕐᐸᑦ, ᐃᔪᕐᐸᑦ, ᐅᖄᑉᐸᑦ ᐊᓂᕐᑎᕆᑐᐃᓐᓇᑎᒍᓗᓐᓃᑦ. ᐳᕙᓪᓗᓇᖅ ᐃᕐᐸᓲᖑᖕᖏᑐᖅ ᓭᒧᕐᓂᑎᒍᑦ ᐊᑦᑐᐃᓂᑐᐃᓐᓇᑎᒍᓗᓐᓃᑦ.