ᑌᔭᐅᖃᑦᑕᓚᖓᕗᖅ ᓀᓪᓕᑎᕐᓯᒪᐅᑎᖓᑎᒍᑦ, ᐱᖁᔭᒻᒪᕆ ᐅᖄᔪᖅ ᐸᐸᑕᐅᑦᓯᐊᕆᐊᖃᕐᓂᖏᓐᓂᒃ ᐃᓄᐃᑦ ᐃᓗᒃᑰᑐᑦ ᐃᓱᒪᒥᒍᑦ ᐃᓱᕐᕆᓯᐊᖕᖏᒍᓖᑦ ᐃᒻᒥᓂᒃ ᐊᑦᑕᓈᕿᑎᑦᓯᑐᐃᓐᓇᕆᐊᖃᕐᓂᐸᑦ ᐅᕝᕙᓘᓐᓃᑦ ᐊᓯᒥᓂᒃ ᓚᔪᖅ ᐃᒣᓕᓗᓂ "ᐱᖁᔭᒻᒪᕆ ᐱᓪᓗᒋᑦ ᐸᐸᑕᐅᑦᓯᐊᕆᐊᖃᕐᓂᖏᑦ ᐃᓄᐃᑦ" ᐅᕝᕙᓘᓐᓃᑦ ᐃᒫᒃ "ARPP", ᐊᒻᒪᓗ ᐱᖁᔭᒻᒪᕆ ᐅᖄᔪᖅ ᐃᓗᓯᓕᕆᓂᐅᑉ ᑭᒡᒐᑑᑎᖏᑦ ᐊᒻᒪᓗ ᐃᓄᓕᕆᓂᐅᑉ ᑭᒡᒐᑑᑎᖏᑦ ᑌᔭᐅᖃᑦᑕᓚᖓᕗᖅ "ARHSSS,".
ᖃᓄᐃᓕᐅᕐᑐᖃᓕᕐᒪᑦ ᐊᑐᕆᐊᖃᓯᓲᖑᕙ ARPP?
ARPP ᐊᑐᕐᑕᐅᓯᓲᑦ ᑭᓯᐊᓂᑐᐊᑦᓯᐊᖅ ᐃᓗᓯᓕᕆᓂᕐᒥ ᐊᒻᒪᓗ ᐃᓄᓕᕆᓂᕐᒥ ᐱᔪᓐᓇᑐᓪᓚᕆᓐᓄᑦ ᐊᒻᒪᓗ ᐊᑑᑎᔭᐅᓪᓗᑯᐊᐱᒋᐊᖃᕐᑐᕆᔭᐅᓕᕋᒥ. ᐱᔪᓐᓇᑐᓪᓚᕆ ᐊᑑᑎᑎᑦᓯᒋᐊᕐᑐᖅ ᑕᒪᑐᒥᖓ ᑭᓯᐊᓂ ᐊᑦᑕᓈᕿᑎᑦᓯᑌᓕᒪᒋᐊᓯᒐᒥ ᐃᓄᒻᒥᒃ ᐃᓗᒃᑰᑐᒥᒃ ᐱᓇᓱᐊᕐᑕᒥᓂᒃ ᐊᒻᒪᓗ ᑖᒃᑯᓂᖓ ᐃᓚᖏᓐᓂᒃ ᖃᓂᑕᖏᓐᓂᒃ. ᐃᒣᓕᖓᓪᓚᕆᑦᑎᑕᐅᓲᒍᒻᒪᑕ, ᐱᓇᓱᐊᕐᑕᐅᓕᕋᒥ ᑎᒍᒥᐊᕐᑕᐅᓲᖅ ᐋᓐᓂᐊᕕᒻᒧᑦ ᐃᓄᓕᕆᔨᒃᑯᓗ ᐋᓐᓂᐊᕕᖓᓂ; ᐃᓄᒃ ᐃᓗᒃᑰᑐᖅ ᐊᓂᖁᔭᐅᒐᓂ ᐋᓐᓂᐊᕕᐅᑉ ᓯᓚᑖᓄᑦ. ᓄᓇᕕᒻᒥ, ᐋᓐᓂᐊᕕᒃ ᐋᓐᓂᐊᕕᐊᐱᐅᑐᐃᓐᓇᕆᐊᓕᒃ (ᐋᓐᓂᐊᓯᐅᑎᒃᑯᑦ) ᐅᕝᕙᓘᓐᓃᑦ ᐋᓐᓂᐊᕕᒻᒪᕆᒻᒦᑎᑕᐅᓗᓂ (ᑰᑦᔪᐊᒥ ᐳᕕᕐᓂᑐᒥᓪᓘᓃᑦ).
ARPP ᐊᑑᑎᑎᑕᐅᒍᓐᓇᐳᖅ ᐅᑯᐊ ᐊᑖᓂ ᐊᑐᐃᓐᓇᐅᖃᑕᐅᑦᓯᐊᐸᑕ ᑭᓯᐊᓂ:
- ᐃᓗᒃ ᐃᓗᒃᑰᑐᖅ ᓴᕐᕿᔮᕐᑎᓯᓕᕐᐸᑦ ᐱᒻᒪᕆᒍᑕᐅᓚᖓᒍᓇᕐᒥᒃ ᓱᕐᖁᐃᓚᕆᑦᑐᒥᓪᓗ ᐊᑦᑕᓈᕿᒪᖓᒍᓇᐅᓕᕐᐸᑦ ᐃᒻᒥᓂᒃ ᐊᓯᒥᓂᓗ ᐊᐅᓚᑕᐅᑦᓱᓂ ᐃᓱᒪᒥᑕ ᐃᓱᕐᕆᓯᐊᕈᓐᓀᓂᖓᓄᑦ ᐊᐅᓚᑕᐅᑦᓱᓂ;
- ᐃᓄᒃ ᐃᓕᒃᑰᑐᖅ ᐊᖏᕈᑎᖃᖕᖏᐸᑦ ᐃᑲᔪᕐᓯᔭᐅᒐᓱᐊᕈᑎᒥᓂᒃ ᐊᑦᑕᓇᕐᑐᒨᖁᓇᒍ ᐊᒻᒪᓗ ᐊᓯᒥᓂᒃ ᐊᑦᑕᓇᕐᑐᒨᕐᑎᓯᖁᓇᒍ.
ᐃᓄᒃ ᐊᑑᑎᕐᖄᕆᐊᓕᒃ ᐊᑦᑕᓈᕿᑎᑦᓯᓯᒪᓂᕐᒥᒃ ᑲᒪᒋᔭᐅᔪᖅ ARPP-ᑯᓄᑦ ᐊᒻᒪᓗ ᓱᕐᖁᐃᑕᐅᑦᓯᐊᑐᓂᒃ ᑌᒣᓕᖓᓂᕋᕐᑕᐅᒋᐊᖄᕆᐊᓕᒃ ᐊᒻᒪᓗ ᐊᑑᑎᓪᓚᕆᓕᕐᑐᓅᓕᖓᑦᓯᐊᓗᑎᒃ.
ᐅᑯᐊ ᑕᕝᕙ ᐆᑦᑑᑎᐅᕗᑦ ᐊᑕᓇᕐᑐᒦᓐᓂᕋᕐᑕᐅᒍᑕᐅᒍᓐᓇᑐᑦ ᐃᓱᒪᒥᓄᑦ ᐃᓱᕐᕆᓯᐊᕈᓐᓀᑐᒧᑦ ᐊᐅᓚᑕᐅᑦᓱᑎᒃ ᐊᑑᑎᔭᐅᓲᑦ:
- ᐃᓄᒃ ᑐᓵᖃᑦᑕᓕᕋᒥ ᓂᐱᓂᒃ (ᓂᐊᖁᖓᑕ ᐃᓗᐊᓃᑦᑐᓂᒃ) ᐱᒋᐊᕐᓂᖁᔨᔪᓂᒃ ᓇᒻᒥᓂᖅ ᐃᓚᒥᓂᒃ;
- ᐃᓄᒃ ᐃᕐᖃᒐᕐᑐᓗᐊᕐᓯᒪᓕᕋᒥ ᐅᕝᕙᓘᓐᓃᑦ ᐱᓯᒪᓗᐊᓕᕋᒥ ᐃᓱᒣᕈᓐᓇᑐᓂᒃ ᐃᒻᒥᓂᐊᕈᑎᒋᒐᓱᑦᓱᒋᑦ;
- ᐃᓄᒃ ᓯᓂᔪᐃᑦᑑᓕᕐᓂᕋᒥ ᐅᓪᓗᒥ ᐊᒥᓱᓂ, ᑕᑯᓐᓇᒐᖃᖕᖏᓱᓕᕋᑕᕐᓱᓂ ᑐᖁᖓᔪᓂᒃ ᐃᓄᓐᓂᒃ ᐊᓪᓛᑦ ᐁᕕᒋᒍᒪᖃᑦᑕᓕᕋᑕᕐᓱᒋᑦ (ᐃᓱᒪᒍᑎᒋᓕᕐᓱᒋᐊᓪᓛᑦ ᐃᒻᒥᓂᐊᕈᒪᓕᕐᓂᒥᒃ).
ᓱᓀᑦ ᓴᕐᕿᔮᕐᑎᓯᒍᑕᐅᒍᓐᓇᐸᑦ ᐊᑦᑕᓇᕐᑐᒦᓪᓚᕆᓕᕐᓂᖓᓂᒃ ᒫᓐᓇᓴᐅᑎᒋᓗ ᐊᑦᑕᓇᕐᑐᒨᑐᐃᓐᓇᕆᐊᖃᓕᕐᓂᖓᓂᒃ?
ᐊᑦᑕᓇᕐᑐᒦᓐᓂᖅ ᓴᕐᕿᑎᑦᓯᒍᑕᐅᓲᖅ ᐊᑑᑎᓕᕐᑕᖓᓂᑦ. ᒐᓗᐊᕐᑎᓗᒍ, ᐊᑦᑕᓇᕐᑐᒦᒍᓐᓇᕆᕗᑦᑕᐅᖅ ᐊᑑᑎᓪᓚᕆᖕᖏᑲᓗᐊᕋᒥ, ᐃᒫᒃ, ᐊᑑᑎᒍᒪᔭᒥᓂᒃ ᐅᓂᑦᓯᒪᐅᑎᖃᕐᓱᓂ. ᒪᑯᐊ ᐆᑦᑑᑎᐅᒍᓐᓇᐳᑦ ᓱᓇᒥᖕᖏᒪᕆᑦᑑᒐᓗᐊᑦ ᐊᑑᑎᔭᐅᒍᓐᓇᑐᓕᒫᓄᑦ, ᐊᑦᑕᓇᕐᑐᒪᕆᒻᒦᒍᓇᐅᒍᓐᓇᑐᑦ ᐊᑑᑎᑦᓴᐅᑎᒋᑐᐃᓐᓇᕆᐊᖃᓲᖑᑦᓱᑎᓪᓗ; ᑐᑭᓯᕚᓪᓕᕈᑎᑦᓴᓕᐊᖑᓯᒪᑐᐃᓐᓇᑐᑦ ᑲᖐᑦᓴᑎᑦᓯᒐᓱᐊᕈᑎᑐᐃᓐᓀᑦ ᐱᖁᔭᕐᑎᒍᑦ ᐃᓕᑕᕆᔭᐅᒪᓕᕐᓱᑎᒃ ᐊᐅᓚᑦᔭᕆᐊᕈᑕᐅᖑᓐᓇᑐᓂᒃ:
- ᐃᒻᒥᓂᒃ ᐱᔮᕐᓲᑕᐅᒍᓐᓇᑐᑦ: ᑎᒥᒥᓂᒃ ᓂᖔᓕᕈᓂ (ᐆᑦᑑᑎᒋᓗᒍ ᑎᒥᒥᒃ ᑭᓕᐊᑎᖃᑦᑕᓕᕈᓂ ᐊᐅᓈᒻᒪᕆᑦᑎᓯᓗᓂ), ᐃᒻᒥᓂᐊᕈᒪᓂᕐᒥᒃ ᐱᐅᓯᖃᕐᓃᑦ, ᐃᒻᒥᓂᐊᕋᓱᐊᖃᑦᑕᓃᓪᓘᓃᑦ, ᐊᓯᖏᓪᓗ;
- ᐊᑦᑕᓇᕐᑐᒦᑦᑎᓯᓃᑦ ᐊᓯᒥᓂᒃ: ᑐᖁᑦᓯᒍᒪᓃᑦ, ᐱᒋᐊᕐᓂᖃᑦᑕᓃᑦ (ᐆᑦᑑᑎᒍᓗᒍ ᒥᖏᑏᖃᑦᑕᓃᑦ ᐊᓯᒥᓂᒃ), ᐊᓯᖏᓪᓗ;
ᖃᐅᔨᒪᔭᐅᒋᐊᓕᒃ: ᐱᔮᕐᓱᑐᖅ ᐃᓅᖃᑎᒥᓂᒃ ᐊᐅᓚᑕᐅᖕᖏᐸᑦ ᐃᓱᒪᒥᑕ ᐃᓱᕐᕆᓯᐊᖕᖏᓂᖓᓄᑦ, ᐱᖁᔭᕐᑎᒍᑦ ᓵᑦᓯᒍᑕᐅᒍᓐᓇᖁᖅ ᐸᐸᑦᓯᒍᑎᑦᓴᔭᐅᒻᒪᑦ ᐱᔮᕐᓱᑕᐅᔪᒥᒃ ᐅᕝᕙᓘᓐᓃᑦ ᐱᒋᐊᕐᑕᐅᑌᓕᒍᑕᐅᑦᓱᓂ. ᑌᒣᒻᒪᑦ ᐳᓖᓯᒃᑯᑦ ᑕᒪᒃᑯᑎᒎᓈᕐᑐᖃᓕᕐᒪᑦ ᑲᒪᒋᐊᖔᕆᐊᖃᓲᑦ.
- ᐊᑦᑕᓇᕐᑐᒦᓐᓂᐅᒥᔪᖅ ᐊᑑᑎᔭᐅᑦᓯᐊᑐᖃᖕᖏᐸᑦ: ᐊᓂᔪᖃᕐᐸᑦ -40°C-ᖑᑎᓪᓗᒍ ᓯᓚᐅᑉ ᓂᓪᓕᒪᓂᖓ ᐅᓕᑲᑦᑕᓯᒪᒍᓐᓀᓗᓂ, ᓂᕆᒍᒣᕐᓯᒪᓕᕈᓂ ᐊᑯᓂᖕᖑᕋᑕᕐᓱᒍ ᐅᑉᐱᕆᔭᖃᓕᕋᒥ ᑐᖁᓐᓇᑐᕐᑕᓕᒻᒥᒃ ᓂᕆᑎᑕᐅᓂᐊᖕᖒᒧᑦ, ᐊᓯᖏᓪᓗ.
ᐅᖃᕈᓯᐅᖃᑦᑕᑐᑦ "ᐱᒻᒪᕆᑦᑐᖅ" ᐊᒻᒪᓕ "ᐊᑑᑎᓚᖓᕙᓗᓕᕐᑐᖅ":
- ᐱᒻᒪᕆᑦᑐᖅ: ᐊᑑᑎᓚᕿᑐᐃᓐᓇᕆᐊᖃᕐᑐᕆᔭᐅᒍᓐᓇᐳᑦ ᐱᒻᒪᕆᑦᑐᖃᓕᕐᒪᑦ ᑭᓯᐊᓂ, ᑐᖁᓚᕿᐅᑕᐅᑐᐃᓐᓇᕆᐊᖃᕐᑐᕆᔭᐅᓕᕋᒥ ᐱᒻᒪᕆᑦᑐᒦᓐᓂᕋᕐᑕᐅᓲᖅ;
- ᐊᑑᑎᓚᖓᕙᓗᓕᕐᑐᖅ: ᐊᑦᑕᓇᕐᑐᒦᓐᓂᖅ ᐊᑑᑎᓪᓚᕆᓕᕋᒥ ᒫᓐᓇᓗᑐᖅ. ᐊᑦᑕᓇᕐᑐᒦᓪᓚᕆᑦᑐᕆᔭᐅᑉᐸᑦ, ᐊᑑᑎᑦᓴᐅᑎᒋᓂᐊᕐᑐᕆᔭᐅᓕᕐᓱᓂᓗ, ᐅᐃᒪᓇᕐᓯᓲᖅ ᑲᒪᒋᔭᐅᑦᓴᐅᑎᒋᒋᐊᖃᓕᕐᓱᓂᓗ. ᐃᑲᐅᕐᓃᑦ 24-ᒦᑦ 48-ᒧᑦ ᐃᓗᐊᓂ ᐊᑑᑎᔪᑦ ᐊᑑᑎᓚᖓᕙᓗᓕᕐᑑᓂᕋᕐᑕᐅᓲᑦ.
ᑭᐳᓪᓗᐊᖓ ᑕᒪᓐᓇ, ᐆᑦᑑᑎᒋᓗᒍ, ᐃᒣᑉᐸᑦ ᐃᓄᒃ ᐅᖃᐅᔨᖃᑐᐃᓐᓇᕈᓂ ᐱᒋᐊᕈᒪᓛᕐᖂᓂᕋᕐᓗᓂ ᓄᓇᒃᒥᓂᒃ ᐃᓪᓘᒧᑦ ᑕᕐᖀᑦ ᐱᖓᓲᔪᕐᑐᑦ ᓈᑉᐸᑕ, ᐊᑑᑎᔪᖅ ᓱᓕᓪᓚᕆᑦᑐᑕᖃᕐᐸᓗ ᐊᑦᑕᓈᕿᑐᐃᓐᓇᕆᐊᖃᕐᓂᖓᓗ ᓱᓕᓪᓗᐊᖏᑉᐸᑦ (ᒥᑦᓯᖃᓗᐊᖕᖏᐸᑦ ᓱᓕᒐᓱᐊᕐᓂᖓ) ᒫᓐᓇᓗᑐᕐᓗ ᐊᑑᑎᓂᐊᕈᓇᐅᖕᖏᐸᑦ (ᑕᕐᕿᓂ ᐱᖓᓲᔪᕐᑐᓂᒃ ᐊᑑᑎᕋᑕᕐᓂᐊᖏᒻᒪᑦ ᓱᓕ). ᒫᓐᓇ ᐊᐅᓚᑦᔭᕆᐊᕈᑕᐅᓗᓂ ᓈᒻᒪᓈᕋᔭᕐᑐᖅ ARPP-ᑯᓄᑦ ᑲᒪᒋᔭᐅᖕᖏᖔᕐᓗᓂ ᐊᑦᑕᓈᕿᖕᖏᓂᖓᓂ.
ᐃᕐᙯᑎᑦᓯᐅᑎᒃ: ᐃᓄᒃ ᐊᑑᑎᓕᕋᓗᐊᕐᐸᑦ ᐱᒻᒪᕆᓪᓗᓂ ᐊᒻᒪᓗ ᐊᑦᑕᓇᕐᓯᑐᐃᓐᓇᕆᐊᖃᕐᓕᓗᓂ ᐃᒻᒥᓄᑦ ᐊᓯᒥᓄᓘᓐᓃᑦ ᐃᓱᒪᒥᒍᑦ ᐃᓱᕐᕆᓯᐊᕈᓐᓀᓂᑯᒥᓄᑦ, ᐊᖏᕐᓯᒪᓚᐅᕈᓂ ᐃᑉᐱᒋᔭᐅᑦᓯᐊᓚᖓᓂᕐᒥᓂᒃ, ARPP-ᑯᓄᑦ ᑲᒪᒋᔭᐅᒋᐊᑐᕋᔭᖕᖏᒥᔪᖅ.
ᖃᓄᐃᑦᑑᕙᑦ ᐊᑦᔨᒌᖕᖏᑐᐃᑦ ᑎᒍᒥᐊᕐᓂᕆᓲᖏᑦ ᐃᓄᒻᒥᒃ AARP-ᑯᑦ?
- ᐊᑑᑎᑎᑦᓯᑌᓕᒪᓂᕐᒧᑦ ᑎᒍᒥᐊᕐᓂᖅ:
- ᑲᑎᑦᓱᒋᑦ ᐃᑲᐅᕐᓂᓂ 72-ᓂ
- ᐊᑦᑕᓇᕐᑐᒨᓕᕐᒪᖔᑦ ᐃᑉᐱᒋᑦᓱᒍ ᐃᓄᒃ ᐱᒻᒪᕆᑦᑐᒦᑐᐊᕐᒪᑦ ᐊᒻᒪᓗ ᐃᒻᒥᓂᒃ ᐊᑦᑕᓈᕿᑐᐃᓐᓇᕆᐊᖃᓕᕐᒪᑦ ᐊᐅᓚᑕᐅᑦᓱᓂ ᐃᓗᐃᓪᓕᓯᒪᓂᖓᓄᑦ ᐃᓱᒪᖓᑕ ᐊᒻᒪᓗ ᐊᖏᕐᓯᒪᖕᖏᑐᐊᕐᒪᑦ ᒪᓂᔨᕕᐅᓂᕐᒥᓂᒃ ᐃᑲᔪᕐᓯᔭᐅᒍᑎᑦᓴᒥᓄᑦ.
- ᐊᑦᔨᐅᑎᑕᐅᔪᖅ ᑎᒍᒥᐊᕐᑕᐅᕕᒻᒦᓲᓂᒃ ᐋᓐᓂᐊᕕᒻᒥ (ᐋᓐᓂᐊᕕᐊᐱᒻᒥ); ᐃᓄᒃ ᐊᓂᑎᑕᐅᑦᑌᓕᑦᓱᓂ
- ᐊᓯᐊᒍᑦ ᑲᒪᒋᔭᐅᒍᑎᖃᕐᓂᐊᔭᒐᓂ (ᐋᓐᓂᐊᓯᐅᕐᑕᐅᓂᖓ ᑎᒥᖓᑕ ᐅᕝᕙᓘᓐᓃᑦ ᐃᓱᒪᓐᓂᐊᑕᐅᓂᕐᒥᒃ) ᐱᓇᓱᐊᕐᑕᐅᒍᑎᒋᒋᐊᓕᓕᒫᒥᓂᒃ ᐊᖏᖕᖏᓂᓕᒫᖓᓂ
- ᑕᒪᓐᓇ ᑲᔪᓯᑎᑕᐅᒍᓐᓇᑐᖅ ᑭᓯᐊᓂ ᐋᓐᓂᐊᓯᐅᕐᑎᒪᕆᒻᒧᑦ
- ᐊᓯᓕᒫᖏᑦ ᐋᓐᓂᐊᓯᐅᕐᑕᐅᓂᖏᑦ ᑎᒥᖓᑕ ᐃᓱᒪᓐᓂᐊᑕᐅᓂᖏᓪᓘᓃᑦ ᐊᑑᑎᔭᐅᒋᐊᑐᖕᖏᑐᑦ
- ᐃᕐᖃᑐᐃᕕᒻᒧᑦ ᐊᖏᕐᑕᐅᒍᑎᐅᕐᖄᕆᐊᑐᖕᖏᑐᖅ
- ᐃᑲᔪᕐᑕᐅᒐᓱᐊᕐᓂᒥᓂ ᑎᒍᒥᐊᕐᑕᐅᓚᐅᕐᑐᑫᓐᓇᑐᖅ:
- ᓯᕕᑐᓂᓕᖅ 48-ᒥᑦ 96-ᒧᑦ ᐃᑲᐅᕐᓂᓂᒃ
- ᓂᐳᕈᑎᒋᓂᐊᕐᑕᖓᓄᑦ ᐃᓅᑉ ᐃᓱᒪᓐᓂᐊᑎᒧᑦ ᖃᐅᔨᓴᕐᑕᐅᒍᒪᓯᒪᓂᖓᑕ (ᑖᓐᓇ ᐃᓄᒃ ᐊᖏᖕᖏᑲᓗᐊᕐᐸᑦ ᐅᕝᕙᓘᓐᓃᑦ ᓇᒻᒥᓂᖅ ᑐᑭᑖᕋᓱᐊᕆᐅᕐᓂᐅᒍᓐᓀᓯᒪᑉᐸᑦ)
- ᐃᕐᖃᑐᐃᕕᒻᒧᑦ ᐊᖏᕐᑕᐅᒍᑎᑖᕐᓯᒪᕐᖄᕆᐊᓕᒃ
- ᐃᓄᒃ ᒪᓂᒋᐊᓕᒃ ᒪᕐᕉᐃᓄᑦ ᐃᓕᒃᑰᑎᕐᑑᓄᑦ ᐃᓱᒪᓐᓂᐊᑕᐅᕕᒻᒥ ᖃᐅᔨᓴᕐᑕᐅᒍᑎᑦᓴᒥᓄᑦ, ᒪᕐᕉᓄᑦ ᐊᑦᔨᒌᖕᖏᑑᓐᓄᑦ ᐋᓐᓂᐊᓯᐅᕐᑎᒪᕇᓐᓄᑦ ᖃᐅᔨᓴᕐᑕᐅᓗᓂ
- ᖃᐅᔨᓴᕐᑕᐅᓂᖓ ᑐᑭᑖᕈᑕᐅᒐᓱᐊᕐᓱᓂ ᐃᓄᒃ ᓱᓕ ᐊᑦᑕᓇᕐᑐᒨᕆᐊᖃᑐᐃᓐᓇᖏᓐᓈᒪᖔᑦ ᐊᒻᒪᓗ ᓱᓕ ᑎᒍᒥᐊᕐᑕᐅᕕᒻᒦᖏᓐᓇᑐᑦᓴᐅᒪᖔᑦ
- ᑭᒡᒐᑑᑎᓂᒃ ᐊᑐᕆᐊᓪᓚᑎᑕᐅᓚᖓᖕᖏᑐᖅ ᐃᓄᒃ ᐊᖏᕐᓯᒪᕐᖄᓚᐅᕐᑎᓇᒍ ᖃᓄᐃᓕᐅᕐᑕᐅᒍᒪᐅᑎᒥᓂᒃ
- ᑌᒣᖁᔭᐅᓂᖓ ᐊᖏᕐᑕᐅᒍᑎᖃᕐᖄᑎᓪᓗᒍ ᑎᒍᒥᐊᕐᓂᖅ:
- ᓯᕕᑐᓂᖓ (ᐊᑦᔨᒌᓲᒍᖕᖏᑐᖅ) ᑐᑭᑖᕐᑕᐅᓯᒪᒋᐊᖃᓲᖑᒐᒥ ᐃᕐᖃᑐᐃᕕᒻᒧᑦ
- ᑭᖑᓂᐊᒍᑦ ᑎᒍᒥᐊᕐᑕᐅᓚᐅᕐᑐᓂᖓᓂ ᐊᒻᒪᓗ ᑖᒃᑯᐊ ᒪᕐᕉᒃ ᐃᓱᒪᓐᓂᐊᑏᒃ ᖃᐅᔨᓴᕆᕐᓯᒪᓕᕐᓂᖓᑕ ᑭᖓᓂᐊᒍᑦ, ᑕᒪᒋᒃ ᐃᓱᒪᓐᓂᐊᑏᒃ ᑐᑭᑖᕐᓯᒪᑉᐸᑎᒃ ᓱᓕ ᑖᑦᓱᒪ ᐃᓅᑉ ᐊᑦᑕᓇᖏᓐᓈᓂᖓᓂᒃ ᐊᒻᒪᓗ ᑎᒍᒥᐊᕐᑕᐅᒋᐊᙯᓐᓈᓂᖓᓂ, ᑎᒍᒥᐊᕐᑕᐅᓂᐊᕐᓂᖓᓄᑦ ᓯᑯᑦᓴᔭᖁᑎᖏᑦ ᒪᓂᔭᐅᒋᐊᖁᕐᐳᑦ ᐃᕐᖃᑐᐃᕕᒻᒧᑦ ᐊᑯᓂᐅᓂᕐᓴᖅ ᑎᒍᒥᐊᕐᑕᐅᒍᑎᒋᓂᐊᕐᑕᖓᓄᑦ
- ᐱᖁᔭᕐᑎᒍᑦ ᐃᓕᑕᕆᔭᐅᔪᑦ ᐊᐅᓚᑦᔭᕆᐊᕈᑕᐅᒋᐊᓖᑦ ᑎᓕᔨᒍᑕᐅᕗᑦ ᐃᕐᖃᑐᐃᔨᖓᓄᑦ ᑯᐯᑉ, ᑖᑦᓱᒪ ᐃᓅᑉ ᓱᓕ ᐋᓐᓂᐊᕕᒻᒦᖏᓐᓇᕆᐊᖃᕐᓂᖓᓄᑦ
- ᐃᕐᖃᑐᐃᕕᒃ ᑎᒥᐅᔫᑦᓱᓂ ᐱᔪᓐᓇᐅᑎᓕᑑᕗᖅ ᑌᒣᓕᖓᔪᒥᒃ ᑐᑭᑖᕆᐊᖃᕐᓂᒧᑦ, ᐅᑉᐱᒋᔭᖃᓪᓚᕆᑐᐊᕈᓂ ᑭᓯᐊᓂᑦᓯᐊᖅ ᑖᓐᓇ ᐃᓄᒃ ᓱᓕ ᐊᑦᑕᓇᕐᑑᖏᓐᓈᓂᕋᕈᓂᐅᒃ ᑎᒍᒥᐊᕐᑕᒋᐊᖃᕐᓂᕋᕋᕐᑕᖓ
ᑎᒍᒥᐊᕐᓂᖅ ᐃᓄᒻᒥᒃ ᐃᓱᓕᓚᖓᕗᖅ ᑕᕝᕙᓭᓐᓇᖅ ᐃᒣᓕᖓᔪᖃᕐᐸᑦ:
- ᐋᓐᓂᐊᓯᐅᕐᑎᒪᕆ ᐃᓕᑕᕆᔭᐅᔪᒥᒃ ᓯᑯᑦᓴᔭᒥᒃ ᓴᕐᕿᑎᑦᓯᐸᑦ ᑖᑦᓱᒪ ᑎᒍᒥᐊᕐᑕᐅᓂᖓ ᐊᑑᑎᒋᐊᑐᕈᓐᓀᓂᕋᕐᓗᒍ;
- ᐃᓱᒪᓐᓂᐊᑎᒧᑦ-ᖃᐅᔨᓴᕐᑕᐅᒍᑎᕕᓂᖏᑦᑕ ᑐᓴᕐᑎᓯᐅᑎᖓ ᓴᕐᕿᑎᑕᐅᖕᖏᐸᑦ ᐅᓪᓗᐃᑦ ᖃᑦᓯ ᐊᓂᒍᓚᐅᕐᑎᓇᒋᑦ ᓴᕐᕿᒋᐊᓕᕕᓂᐅᓂᖏᑦ ᐊᑑᑎᔭᐅᓐᓂᖏᑉᐸᑦ;
- ᐅᓪᓗᐃᑦ ᐃᓂᓪᓚᑕᐅᓯᒪᔪᑦ ᑎᒍᒥᐊᕐᑕᐅᖁᔭᐅᓯᒪᓂᖓ ᐃᕐᖃᑐᐃᕕᒻᒧᑦ ᐃᓱᓕᑉᐸᑕ;
- ᐊᐅᓚᑦᓯᕕᖓ ᐃᕐᖃᑐᐃᔨᖁᑎᖏᑦᑕ ᑯᐯᑉ ᑐᑭᑖᕐᐸᑕ ᐃᓱᓕᑎᑦᓯᓂᐊᕐᓱᑎᒃ ᑎᒍᒥᐊᕐᓂᒥᒃ;
- ᑐᑭᑖᖓ ᐱᖁᔭᓕᕆᔩᑦ ᐃᕐᖃᑐᐃᕕᖓᑕ ᐃᓱᓕᑎᑕᐅᖁᔨᓕᕐᐸᑦ ᑎᒍᒥᐊᕐᑕᐅᓂᖓᓂᒃ.
ᐋᓐᓂᐊᕕᒃ ᐊᓱᐃᓛᒃ ᖃᐅᔨᑎᑦᓯᒋᐊᖃᓕᕐᖁᖅ ᐊᑐᕐᑎᒥᒃ ᑕᕝᕙᓭᓐᓇᖅ ᐃᓱᓕᑎᑕᐅᓂᖓᓂᒃ ᑎᒍᒥᐊᕐᑕᐅᓂᖓᑕ.