ᐳᕙᓪᓗᓇᖅ ᐁᑦᑐᑑᑎᐅᒍᓐᓇᑐᖅ ᐋᓐᓂᐊᖑᑦᓱᓂ ᓄᐃᓚᕿᓱᖑᔪᖅ ᖁᐱᕐᕈᐊᕈᓯᒻᒧᑦ ᑌᔭᐅᔪᒧᑦ Mycobacterium tuberculosis, ᑕᑯᒍᓐᓇᖏᑦᑕᕗᑦ ᐃᔩᑦᑎᓄᒃ ᐳᕙᓐᓂᕙᓪᓗᓱᖑᑦᓱᓂᓗ.
ᐳᕙᓪᓗᓇᖅ ᐋᓐᓂᐊᒍᑎᒻᒪᕆᐅᓕᒍᓐᓇᖁᖅ ᐋᓐᓂᐊᓯᐅᕐᑕᐅᑲᐱᒍᑎᐅᖕᖏᑯᓂ. ᐋᓐᓂᐊᓯᐅᕐᑕᐅᒍᑎᐅᒍᓐᓇᖁᖅ ᐄᕐᖃᒐᑎᒍᑦ.
ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᓇᖅ ᐁᑦᑐᑑᑎᐅᒻᒪᕆᒍᓐᓇᑐᖅ.
ᐃᓄᒃ ᐳᕙᒻᒥᒍᑦ ᐋᓐᓂᐊᖃᕈᓂ ᐳᕙᓪᓗᓇᕐᒥᒃ ᖁᐃᕐᑐᒍᓂ ᑕᒋᐅᒍᓂᓗᓐᓃᑦ, ᒥᑭᔪᒻᒪᕇᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ ᐊᓂᕐᑎᕆᔭᒧᕐᓱᑎᑦ ᐊᒥᓱᓂᓗ ᑫᕙᓪᓚᒍᓯᕐᓂᑦ ᐊᓂᕐᑎᕆᔭᒥᒍᓐᓇᓱᑎᑦ. ᐱᓗᐊᕐᑐᒥ ᐅᒃᑯᐊᓯᒪᔪᓂ ᐃᓂᓂᑦ.
ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ ᐃᕐᐸᕈᓐᓇᒥᔪᑦ ᐊᓂᕐᑎᕆᔭᑎᒍᑦ ᐃᓄᒃ ᕿᐊᑉᐸᑦ, ᙯᒐᓕᔭᕐᐸᑦ, ᐃᔪᕐᐸᑦ, ᐅᖄᑉᐸᑦ ᐊᓂᕐᑎᕆᑐᐃᓐᓇᑎᒍᓗᓐᓃᑦ. ᐳᕙᓪᓗᓇᖅ ᐃᕐᐸᓲᖑᖕᖏᑐᖅ ᓭᒧᕐᓂᑎᒍᑦ ᐊᑦᑐᐃᓂᑐᐃᓐᓇᑎᒍᓗᓐᓃᑦ.
ᐊᓪᓕᖏᓐᓂ ᐊᓪᓚᓯᒪᔪᑦ ᐊᑑᑎᔭᐅᓲᖑᕗᑦ ᐃᓄᒃ ᐊᓂᕐᑎᕆᑐᐊᕐᒪᑦ ᒥᑭᔪᐊᐱᓐᓂᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᓐᓂᑦ:
- ᓱᓂᐊᖕᖏᓚᖅ ᐃᓄᒃ ᐊᑯᓂᐅᖕᖏᑐᖅ ᖃᕆᐊᒥᖃᑎᖃᕈᓂ ᐃᓄᒻᒥᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᒥᒃ;
- ᐁᑦᑐᑑᑎᐅᒍᓐᓇᑐᖅ ᐳᕙᓪᓗᓇᖅ ᐆᒻᒪᕈᓐᓇᖁᖅ ᐊᒻᒪᓗ, ᑭᖑᓂᐊᒍᑦ, ᐃᓄᒃ ᖃᓂᒻᒪᓱᓂ, ᖁᐃᕐᑐᖏᓐᓇᓕᒫᓯᓗᓂ ᐁᑦᑐᑐᐃᒍᓐᓇᓯᓂᐊᓕᕋᒥ. ᑖᓐᓇ ᐋᓐᓂᐊᓯᐅᕐᑕᐅᑲᐱᒋᐊᖃᕐᖁᖅ;
- ᐃᓄᒃ ᐁᑦᑐᑕᐅᒍᓐᓇᒥᔪᖅ ᑌᔭᐅᔪᒥᒃ ᐁᑦᑐᑑᑎᐅᒍᓐᓇᖏᑦᑐᖅ ᐅᕝᕙᓗᓐᓃᑦ ᓯᓂᑦᑐᖅ) ᐳᕙᓪᓗᓇᕐᒥᒃ. ᐁᑦᑐᑑᑎᐅᒍᓐᓇᖏᑦᑐᖅ ᐳᕙᓪᓗᓇᖅ ᐳᕙᓂᓱᖑᕗᖅ ᐅᒻᒪᓚᐅᕐᓯᒪᖕᖏᑐᒍᓐᓇᓱᓂ ᐃᓅᑉ ᐃᓅᓯᓕᒫᖓᓂ ᓄᐃᓚᐅᕐᓯᒪᖕᖏᓗᓂ. ᐃᓄᒻᒥᒃ ᖃᓂᒻᒪᑎᑦᓯᓱᖑᖕᖏᑐᖅ ᐊᓯᖏᓐᓄᓗ ᐁᑦᑐᑐᑎᐅᓱᖑᒐᓂ. ᖃᓄᐃᖕᖏᓯᐊᕐᑐᑦ ᑎᒥᐅᑉ ᓴᐴᓗᑕᖏᑦ ᐊᕙᓗᓕᒍᓐᓇᓱᖑᕗᑦ ᖁᐱᕐᕈᐊᕈᓯᕐᓂᑦ ᐃᕐᐸᑎᑦᓯᖏᓚᕿᑦᓱᓂ. ᐊᑦᑕᓇᕋᑎᒃ ᐳᕙᓐᓂᓂᐊᓕᕐᒪᑕ. ᑭᓯᐊᓂ ᐃᑉᐱᒍᓱᑦᓯᐊᕆᑦ! ᐋᓐᓂᐊᒃ ᐊᓯᑦᔨᒍᓐᓇᖁᖅ ᖃᖓᑐᐃᓐᓇᖅ, ᐱᓗᐊᕐᑐᒥᒃ ᐊᕐᕌᒍᓐᓂ ᒪᕐᕉᓂᒃ ᐋᓐᓂᐊᑖᕐᑐᕕᓂᐅᓗᓂ. ᐋᓐᓂᐊᓯᐅᕐᑕᐅᖏᒃᑯᑎᑦ 1 ᐃᓄᒃ 10ᖑᑦᓴᐸᑕ ᐃᓄᐃᑦ ᐋᓐᓂᐊᓖᑦ ᐁᑦᑐᑑᑎᐅᒍᓐᓇᖏᑦᑐᒥᒃ ᐳᕙᓪᓗᓇᕐᒥᒃ ᐋᓐᓂᐊᓕᕈᑎᖃᓂᐊᕐᖁᑦ ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᓇᕐᒥᒃ ᐃᓅᓯᕐᒥᓂ. ᑖᓐᓇ ᐱᑦᔪᑎᒋᑦᓱᒍ ᐁᑦᑐᑑᑎᐅᒍᓐᓇᖏᑦᑐᖅ ᐳᕙᓪᓗᓇᖅ ᐋᓐᓂᐊᓯᐅᕐᑕᐅᒋᐊᖃᕐᖁᖅ ᓄᖑᑕᐅᓗᓂᓗ ᑎᒥᒥ. ᐋᓐᓂᐊᓯᐅᕐᑕᐅᒋᐊᖃᕐᖁᖅ ᐃᑉᐱᒋᔭᐅᑦᓯᐊᓗᓂ ᓄᖑᑕᐅᒍᓐᓇᓯᐊᓂᐊᕐᒪᑦ.
ᐋᓐᓂᐊᓯᐅᑎᓄᑦ ᐋᓐᓂᐊᓯᐅᕐᑕᐅᖏᒃᑯᓂ, ᐳᕙᓪᓗᓇᖅ ᐃᓅᒍᓐᓀᒍᑎᐅᒍᓐᓇᖁᖅ.
ᐊᕐᕌᒍᓕᕐᑐᑦ ᐊᒥᓱᓪᓗᐊᖏᑦᑐᑦ ᓄᓇᕕᒻᒥ, ᐊᑕᐅᓯᖅ ᐃᓅᒍᓐᓀᓂᕐᖁᖅ ᐳᕙᓪᓗᓂᕐᒥᓄᑦ.