ᓱᓕᔪᑦ ᓱᓕᖕᖏᑐᐃᓗ ᐳᕙᓪᓗᓇᕐᒧᓕᖓᔪᑦ

Fact and myths about TB

ᐱᒻᒪᕆᐅᕗᖅ ᖃᐅᔨᒪᓂᖅ ᓱᓕᔪᓂᑦ ᓱᓕᖕᖏᑐᑦ ᖃᐅᔨᔭᐅᑦᓯᐊᓂᐊᕐᒪᑕ ᐃᓱᒪᒋᔭᐅᓲᑦ ᐳᕙᓪᓗᓂᕐᒧᓕᖓᔪᑦ, ᓄᓇᓖᑦ ᐊᓂᒎᑎᒍᓐᓇᓯᓂᐊᕐᐸᑕ ᑲᑉᐱᐊᒋᔭᒥᓂᑦ ᐋᓐᓂᐊᒧᓕᖓᔪᓂᑦ:

ᓱᓕᖕᖏᑐᑦ: ᐳᕙᓪᓗᓇᖅ ᐁᑦᑐᑑᑎᐅᒍᓐᓇᑐᖅ ᐃᓄᒻᒥᒃ ᐃᓄᒻᒧᑦ ᓭᒧᕐᓂᑎᒍᑦ, ᓂᕆᒍᑎᓂᑦ ᐊᑐᖃᑎᒌᓐᓂᑎᒍᑦ, ᐃᕿᑦᓯᓂᑎᒍᑦ, ᐊᑦᑐᐃᓂᑎᒍᑦ, ᑯᓂᓐᓂᑎᒍᑦ ᐊᒻᒪᓗ ᐃᒥᕐᑕᒥᒃ ᐃᒥᕐᓂᑎᒍᑦ ᐊᑦᑐᐃᓂᑎᒍᓗᓐᓃᑦ ᐅᒃᑯᐊᕈᑎᒥᒃ ᐅᕝᕙᓗᓐᓃᑦ ᐊᓯᖏᓐᓂᑦ ᐊᑦᑐᑕᕕᓂᕐᓄᑦ ᐃᓄᒻᒧᑦ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᒧᑦ.

ᓱᓕᔪᑦ: ᐳᕙᓪᓗᓇᖅ ᐁᑦᑐᑑᑎᐅᒍᓐᓇᖏᓪᓚᖅ ᐊᑦᑐᐃᓂᑐᐃᓐᓇᑎᒍᑦ. ᐃᕐᐸᓲᖑᕗᖅ ᐊᓂᕐᑎᕆᔭᑎᒍᑦ ᓱᐴᓪᓛᑎᑐᑦ. ᐃᕐᐸᓲᖑᕗᖅ ᐃᓄᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᖅ ᖁᐃᕐᑐᐸᑦ ᑕᒋᐅᓐᓂᑎᒍᓗᓐᓃᑦ. ᐃᕐᐸᒍᓐᓇᒥᔪᖅ ᐃᔪᕐᓂᑎᒍᑦ, ᙯᒐᓪᓛᓂᑎᒍᑦ, ᐅᖄᓂᑎᒍᑦ, ᐃᖕᖏᓂᑎᒍᑦ ᐊᓂᕐᑎᕆᓂᑎᒍᑐᐃᓐᓇᓗᓐᓃᑦ. ᐳᕙᒻᒥ ᐱᔪᐊᐲᑦ ᐊᓂᕐᑎᕆᓂᑎᒍᑦ ᐊᓂᐊᒧᑦ ᖁᐱᕐᕈᐊᕈᓯᖏᑦ ᐳᕙᓪᓗᓇᐅᑉ ᐊᓂᕐᑎᕆᔭᒦᒍᓐᓇᖁᑦ ᐊᒥᓱᓂᑦ ᑫᕙᓪᓚᒍᓯᓂᑦ. ᓇᔪᕐᑕᖓᓃᒍᕕᑦ ᐊᒥᓱᒐᓚᓐᓂᑦ ᑫᕙᓪᓚᒍᓯᕐᓂᑦ ᐊᓂᕐᑎᕆᓗᑎᑦ ᒥᑭᔪᐊᐱᓐᓂᑦ ᓄᐃᑕᖕᖏᑐᓂᑦ ᖁᐱᕐᕈᐊᕈᓯᕐᓂᑦ ᐁᑦᑐᑑᑎᐅᒍᓐᓇᖏᑦᑐᒥᒃ ᐳᕙᓪᓗᓇᕐᑖᕈᓐᓇᖁᑎᑦ ᐅᕝᕙᓗᓐᓃᑦ ᐱᐅᖕᖏᓗᐊᕐᒥᔪᒥᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᓕᕈᓐᓇᖁᑎᑦ.

ᓱᓕᖕᖏᑐᖅ: ᐳᕙᓪᓗᓇᖅ ᐋᕐᕿᑕᐅᒍᓐᓇᑐᖅ ᐋᓐᓂᐊᕕᓕᐊᕐᑎᑕᐅᓗᓂ ᑭᓯᐊᓂ ᓄᓇᕕᐅᑉ ᓯᓚᑖᓂ.

ᓱᓕᔪᖅ: ᐳᕙᓪᓗᓇᖅ ᐋᕐᕿᑕᐅᒍᓐᓇᑐᖅ ᑕᒫᓂ ᓄᓇᕕᒻᒥ. ᐁᑦᑐᑑᑎᐅᒍᓐᓇᑐᓂᑦ ᐳᕙᓪᓗᑐᑦ ᐱᓪᓗᑯᒋᐊᓕᑎᒍᑦ ᐋᓐᓂᐊᓯᐅᕐᑕᐅᒋᐊᓖᑦ ᐊᐅᓪᓚᑎᑕᐅᑐᐃᓐᓇᕆᐊᓖᑦ ᐋᓐᓂᐊᕕᒻᒧᑦ ᒪᓐᑐᕆᐊᓪᒥ. ᑭᓯᐊᓂ ᐊᒥᓲᓪᓗᐊᓲᖑᖕᖏᑐᑦ. ᐊᒥᓲᓂᕐᓴᑎᒍᓪᓕ ᐋᓐᓂᐊᕕᒻᒦᒋᐊᖃᕐᖁᑦ ᐃᓅᓕᑦᓯᕕᒃ ᐋᓐᓂᐊᕕᖓᓂ ᐳᕕᕐᓂᑐᒥ ᐅᕝᕙᓗᓐᓃᑦ ᑐᓚᑦᑕᕕᒃ ᐋᓐᓂᐊᕕᖓᓂ ᑰᑦᔪᐊᒥ ᐊᒻᒪᓗ ᐃᓄᑑᒃᑯᕕᒻᒦᓗᓂ ᒪᕐᕉᓂᒃ ᐱᓇᓱᐊᕈᓰᓐᓂᒃ. ᐃᓄᒃ ᐋᓐᓂᐊᓂᕐᓴᐅᒍᓂ, ᐁᑦᑐᑑᑎᖃᕐᓂᓴᐅᒍᓐᓇᕈᓂ ᐊᑯᓃᕐᓂᓴᒥᒃ ᐋᓐᓂᐊᕕᒻᒦᒋᐊᓕᒃ. ᐃᓄᒃ ᐳᕙᓪᓗᑐᖅ ᐁᑦᑐᑑᐃᒍᓐᓇᕈᓐᓀᓴᑐᐊᕈᓂ ᐋᓐᓂᐊᕕᒻᒦᒍᓐᓀᓂᐊᕐᑐᖅ. ᑭᓯᐊᓂ ᐃᓄᒃ ᐄᕐᖃᖏᓐᓇᕆᐊᖃᓂᐊᕐᑐᖅ ᐊᒥᓱᒐᓚᓐᓂᑦ ᑕᕐᖁᓂᑦ ᐋᕐᕿᑕᐅᓂᐊᕈᓂ.

ᓱᓕᖕᖏᑐᖅ: ᐃᓄᐃᑦ ᐁᑦᑐᑑᑎᐅᒍᓐᓇᑐᓂᑦ ᐳᕙᓪᓗᑐᑦ ᖃᓂᑕᕆᔭᐅᑦᑌᓕᓗᑐᒋᐊᓖᑦ.

ᓱᓕᔪᖅ: ᑭᓇᑐᐃᓐᓇᖅ ᐳᕙᓪᓗᓕᕈᓐᓇᑐᖅ ᐅᕝᕙᓗᓐᓃᑦ ᐳᕙᓪᓗᓕᑐᐃᓐᓇᕆᐊᖃᕐᓱᓂ. ᑌᒃᑯᐊ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᑦ ᐃᑲᔪᕐᓯᔭᐅᒋᐊᖃᕐᖁᑦ ᐃᓚᒥᓄᑦ, ᐃᓚᓐᓈᑯᒥᓄᑦ ᓄᓇᓕᒻᒥᐅᓕᒫᓄᓗ. ᐱᒻᒪᕆᐅᕗᖅ ᖃᐅᔨᒪᓗᓂ ᐃᓄᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᕕᓂᖅ ᐋᓐᓂᐊᕕᒻᒥᒍᓐᓀᐸᑦ ᐄᕐᖃᖏᓐᓇᓯᐊᕐᑐᖅ ᐃᓄᒃ ᐁᑦᑐᑑᑎᖃᕈᓐᓇᕈᓐᓀᒪᑦ ᐊᒻᒪᓗ ᐊᑦᑕᓇᕐᑐᒦᑎᑦᓯᒐᓂ ᐊᓯᒥᓂᒃ. ᑫᓪᓗᑐᕐᑕᐅᒋᐊᓖᑦ ᐄᕐᖃᓯᐊᖁᔭᐅᓗᑎᑦ ᑕᕐᕿᓂᑦ 6ᓂᑦ 9ᓄᑦ ᐋᕐᕿᑕᐅᓗᓂ ᐋᓐᓂᐊᖓ. ᐃᓚᖏᑎᒍᑦ ᐋᓐᓂᐊᓯᐅᕐᑕᐅᑐᐃᓐᓇᕆᐊᓕᒃ 12ᓂᑦ ᑕᕐᕿᓄᑦ ᑎᑭᑦᑐᓂᑦ. ᐃᓱᐃᒍᑎᒋᒍᓐᓇᑕᖓ ᐃᓱᒪᓂᕐᓗᕕᐅᑐᐃᓐᓇᕆᐊᖃᕐᒪᑕ ᐳᕙᓪᓗᓂᕐᒥᓄ ᐃᓄᓐᓄᑦ ᖃᓂᑕᒥᓄ. ᐸᓯᔭᐅᔪᑦᓴᐅᖏᓪᒪᑦ ᐋᓐᓂᐊᖃᕐᓂᒥᓄᑦ. ᐱᔪᕆᒍᑦᔭᐅᖔᕐᑐᓴᐅᕗᑦ ᐋᓐᓂᐊᓯᐅᕐᑕᐅᓕᕐᓂᓗᑦ ᐊᒻᒪᓗ ᐱᕕᓕᒫᒥᒍᑦ ᐋᕐᕿᒐᓱᓐᓂᒥᓄᑦ ᐃᕐᐸᑎᑦᓯᑌᓕᒐᓱᑦᓱᑎᑦ ᐳᕙᓪᓗᓇᕐᒥ ᐊᓯᒥᓄᑦ.

ᓱᓕᖕᖏᑐᖅ: ᐳᕙᓪᓗᓇᖅ ᐋᕐᕿᑕᐅᓚᐅᕐᓯᒪᓂᐊᖕᖏᑐᖅ ᐅᑭᐅᕐᑕᑐᒥ ᐊᒻᒪᓗ ᖃᓄᐃᓗᕈᑕᐅᒍᓐᓇᕋᓂ ᓄᖑᑎᓗᒍ.

ᓱᓕᔪᖅ: ᐋᓐᓂᐊᓯᐅᕐᑎᒪᕇᑦ ᐋᓐᓂᐊᓯᐅᕐᑏᓗ ᓄᓇᕕᒻᒥ ᐱᓇᓱᐊᕈᑎᖃᒻᒪᕆᑦᑐᑦ ᓄᖑᑦᓯᒐᓱᑦᓱᑎᑦ ᐳᕙᓪᓗᓇᕐᒥᒃ ᐊᒻᒪᓗ ᓄᖑᑲᐱᑐᐃᓐᓇᕆᐊᖃᕐᓱᑎᑦ ᓂᕆᐅᒋᔭᐅᔪᒥᑦ. ᑕᒐᓕ ᐱᓇᓱᐊᓯᒋᕗᒍᑦ ᓄᑖᒥ ᓄᖒᑦᓯᒐᓱᓐᓂᒧᑦ ᐳᕙᓪᓗᓇᕐᒥᒃ ᐱᒋᐊᕐᖃᒥᐅᑦᓱᓂᓗ. ᓄᓇᕕᒃ ᐸᕐᓀᕈᑎᖃᕐᖁᖅ ᓂᖏᕐᓯᖃᑕᐅᓂᐊᕐᓂᒥᓂᒃ ᐅᖃᕐᑕᐅᒪᔪᓂᑦ $27.5 ᒥᓕᐊᓐᓂᑦ ᑲᕙᒪᑐᖃᒃᑯᓄᑦ ᓄᖒᑦᓯᒐᓱᓐᓂᒧᑦ ᐳᕙᓪᓗᓇᕐᒥ ᓄᓇᖁᑎᑦᑎᓂ. ᐃᑲᔪᕐᓯᔭᐅᑦᓱᑎᑦ ᑯᐯᒃ ᑲᕙᒪᖓᓄᑦ, ᓄᓇᕕᒻᒥ ᖃᓄᐃᓗᕈᑎᑦᓴᓂᑦ ᐸᕐᓀᓯᒪᓕᕐᖁᑦ ᐃᕐᐸᖏᑦᑐᒍᑎᑦᓴᖓᓂ ᐳᕙᓪᓗᓇᖅ ᐊᒻᒪᓗ ᓄᖑᑎᓪᓚᕆᓗᒍ.

ᑮᓇᐅᔭᖃᕐᑎᓯᒍᑎᐅᒋᐊᓪᓚᓛᕐᑐᑦ ᐱᒋᐊᕐᑎᓯᒍᑎᐅᓂᐊᕐᖁᑦ ᓄᓇᓕᓐᓂᑦ ᐋᓐᓂᐊᓯᐅᕆᒍᑎᑖᕐᑎᓯᒍᑎᐅᓗᑎᑦ ᖃᐅᔨᒪᔪᒻᒪᕆᑖᕐᑎᓯᓗᑎᓗ ᓄᖒᑦᓯᒍᑎᐅᒍᓐᓇᓂᐊᕐᑐᓂᑦ ᐁᑦᑐᑑᑎᐅᒍᓐᓇᑐᓂᑦ ᐳᕙᓪᓗᑐᓂᑦ ᐊᕐᕌᒍᐃᑦ ᖁᓖᑦ ᓈᓚᐅᕐᑎᓇᒋᑦ. ᐊᔪᐃᓐᓇᕈᑎᐅᒋᐊᓪᓚᕆᐊᖃᓂᐊᕐᖁᑦ ᐃᓅᖃᑎᒌᖑᔪᓄᑦ ᐱᓀᓗᑕᐅᔪᓂᑦ ᐳᕙᓪᓗᓂᕐᒥ ᐃᕐᐸᑎᑦᓯᒍᑎᐅᓲᓂᑦ ᓄᓇᕕᒻᒥ ᐅᑦᑑᑎᒋᓗᒋᑦ ᐃᓪᓗᐃᓂᐊᕐᓂᖅ, ᓂᕿᖃᑦᓯᐊᖏᓐᓂᖅ ᓱᐴᕈᓯᔭᕐᓂᓗ.

 

Facts and myths about TB