ᑲᖏᕐᓱᐊᓗᑦᔪᐊᖅ ᐅᐱᒍᓱᓐᓂᖅ ᑲᑉᐱᐊᓱᓐᓂᒥᒃ ᐊᓂᒍᑎᓂᕐᒧᑦ

Pride beyond fearᒪᕐᕉᓂ ᐅᓄᕐᑐᒪᕆᓐᓂᑦ ᐳᕙᓪᓗᓕᕐᑐᖃᖃᑦᑕᑎᓪᓗᒍ ᐊᒥᓱᓂᑦ ᐊᕐᕌᒍᓂᑦ, ᑲᖏᕐᓱᐊᓗᑦᔪᐊᒥᐅᑦ ᖃᐅᔨᓐᓂᖁᑦ ᐅᖁᒣᑦᑐᓂᖓᓂ ᐋᓐᓂᐊᖑᔪᖅ ᐋᓐᓂᐊᓇᒻᒪᕆᑦᑐᒥᒃ ᓄᓇᓕᒻᒧᑦ. ᑭᓯᐊᓂᓕ ᑐᑭᓯᒪᓂᕐᑖᕆᓯᒪᔭᕗᑦ ᖃᐅᔨᒪᓕᕐᑕᕗᓪᓗ ᑖᒃᑯᓇᓂ ᐅᖁᒣᑦᑐᑯᕐᓂᑎᓐᓂᑦ ᓄᐃᑦᓯᒍᑎᐅᓯᒪᕗᑦ ᐱᐅᓯᕐᓂᑦ ᖃᓄᐃᓗᕈᓯᕐᓂᓗ ᐃᑲᔪᕐᓯᓂᐊᕐᑐᓂᑦ ᐃᑦᔭᕋᑦᓴᓯᐊᖑᔪᓂᓗ ᓄᓇᓕᓕᒫᓄᑦ ᓄᓇᕕᒻᒥ ᑲᒪᒋᔭᖃᕋᓱᐊᕐᑎᓗᒋᑦ ᐋᓐᓂᐊᖑᔪᒥᒃ.

ᓯᕗᓪᓕᐹᒥ ᐅᓄᕐᑐᒪᕇᑦ ᐳᕙᓪᓗᓕᕐᑎᓗᒋᑦ ᓄᕕᒻᐱᕆ 2011ᒥ 2012 ᐊᕐᕌᒍᖓᓂ ᓈᓂᖓᓄᑦ 69 ᐃᓄᐃᑦ ᐳᕙᓪᓗᑐᑦ ᖃᐅᔨᔭᐅᓯᒪᔪᑦ ᓄᓇᓕᖓᓂ 900ᒐᓚᓐᓂ ᐃᓄᖁᑎᓕᒻᒥ. ᐱᔭᕆᐊᑐᔪᑲᓪᓛᓗᓯᒪᔪᖅ ᑐᖓᓕᖓᓂ ᐅᓄᕐᑐᕇᑦ ᐳᕙᓪᓗᓕᕐᒥᑎᓪᓗᒋᑦ 21 ᐳᕙᓪᓗᑐᑦ ᖃᐅᔨᔭᐅᒻᒥᓱᑎᑦ 2014ᒥ. ᓱᑭᐊᒻᒪᕆᐊᓗᒐᓗᐊᖅ, ᐊᕐᕌᓂ ᐃᓚᖓ ᓄᓇᓕᒻᒥᐅᒃ ᐃᓅᒍᓐᓀᓚᐅᔪᖅ ᐳᕙᓪᓗᓂᑯᒥᓄᑦ, ᓯᕗᓪᓕᐹᖑᑦᓱᓂ ᐃᓅᒍᓐᓀᑐᖅ ᐳᕙᓪᓗᓂᕐᒧᑦ ᓄᓇᕕᒻᒥ ᐊᕐᕌᒍᓂᑦ ᐊᒥᓱᓂᓂ.

ᓵᖓᓯᑦᓱᑎᑦ ᐳᕙᓪᓗᓇᕐᒥᒃ, ᓄᓇᓕᒃ ᐊᒥᓱᓂᑦ ᐱᓀᓗᑕᖃᕐᓯᒪᔪᖅ ᐃᓚᖃᕐᒥᓱᑎᑦ ᐃᓅᖃᑎᒌᖑᔪᓄᑦ ᐃᓱᒪᓂᕐᓗᒍᑎᐅᓲᓂᑦ ᐳᕙᓪᓗᓇᕐᒥ ᐋᓐᓂᐊᒥᒃ.

"ᐊᐅᓪᓚᕋᑦᑕ, ᐃᓄᐃᑦ ᓭᒧᕈᒪᖃᑦᑕᓯᒪᖕᖏᑐᑦ. ᑐᑭᓯᒪᑦᓯᐊᖏᑦᓱᑎᑦ. ᐳᕙᓪᓗᓕᕈᓐᓇᑐᕆᑦᓱᑎᑦ ᑌᒫᒍᓗᑐᐃᓐᓇᖅ. ᐃᓄᐃᑦ ᑲᑉᐱᐊᒋᔭᖃᕐᓯᒪᔪᑦ ᐅᕙᑦᑎᓂᑦ, " ᐃᕐᖃᐅᒪᔪᖅ ᐃᓕᓐᓂᐊᕕᒻᒥ ᐃᓕᓐᓂᐊᑎᑦᓯᔩᑦ ᐊᖓᔪᕐᖃᖓᓂ ᐃᑲᔪᕐᑎᒃ ᓈᓐᓯ ᐃᑦᑐᒃ.

ᑭᓯᐊᓂ ᓄᓇᓕᒃ ᓄᕐᖃᖓᒍᒪᑐᐃᓐᓇᓯᒪᖕᖏᑐᖅ ᐅᖁᒣᑦᑐᑯᒻᒪᕆᑦᓱᑎᑦ.

"ᑲᖏᕐᓱᐊᓗᑦᔪᐊᒥ ᐊᒥᓱᓂᑦ ᐳᕙᓪᓗᔨᐊᖃᓯᒪᔪᒍᑦ ᑭᓯᐊᓂ ᓄᕐᖃᑎᑦᓯᒋᐊᒥᒃ ᑐᑭᑖᕐᓯᒪᔪᒍᑦ... ᓱᓇᑐᐃᓐᓇᒥᒃ ᐱᓇᓱᐊᓂᐊᕈᑦᑕ ᐱᓇᓱᖃᑎᒌᓪᓗᑕ ᑭᓯᐊᓂᐅᓲᖑᕗᖅ" ᐅᖃᕐᑐᕕᓂᖅ ᓯᕗᓕᕐᑎᖓ ᑲᖏᕐᓱᐊᓗᑦᔪᐊᒥ, ᕿᐊᓪᑕ ᓯᓄᐹᓪ. ᐳᕙᓪᓗᓇᖅ ᐃᕐᐸᑎᓪᓗᒍ ᐱᓇᓱᖃᑎᖃᕐᓯᒪᕗᒍᑦ ᐋᓐᓂᐊᕕᐊᐱᕗᓐᓂᑦ, ᓄᓇᓕᐅᑉ ᑲᑎᖕᖓᔨᖏᑦ ᓄᓇᓕᒻᒥᓗ ᑎᒥᐅᔪᑦᓂᑦ. ᑌᒫᒃ ᐱᓇᓱᐊᕐᓯᒪᔭᕗᑦ."


 ᑲᑉᐱᐊᒋᔭᐅᒍᑎᖏᑦ ᑐᑭᓯᒪᔭᐅᑦᓯᐊᖏᑦᑐᒍᑎᖏᓪᓗ ᐳᕙᓪᓗᓇᐅᑉ ᐱᑦᔪᑎᒻᒪᕆᐅᓯᒪᕗᑦ ᐃᓱᒪᓂᕐᓗᒍᑎᐅᔪᓂᑦ ᓄᓇᓕᕗᓐᓄᑦ. ᓱᕐᕃᓗᑐᕐᓯᒪᕗᖅ ᖃᐅᔨᒍᑎᐅᒍᓐᓇᑐᓂᑦ ᐋᓐᓂᐊᓯᐅᕐᑕᐅᒍᓐᓇᓂᖓᓗ ᐋᓐᓂᐊᖑᔪᖅ. ᐃᓄᐃᑦ ᖃᐅᔨᓴᑕᐅᑲᐱᖕᖏᒍᑎᒋᑦᓱᒍ ᐋᓐᓂᐊᓯᐅᕐᑕᐅᑲᐱᖕᖏᒍᑎᒋᑦᓱᒍᓗ ᐋᓐᓂᐊᒥᓄᑦ. ᐃᓄᐃᑦ ᑕᑯᔭᐅᒍᒪᒐᑎᒃ ᐋᓐᓂᐊᕕᓕᐊᕐᓂᒥᓂᒃ ᐄᕐᖃᒐᕐᑐᕆᐊᕐᑐᓕᕋᒥᒃ ᐄᕐᖃᑕᐅᖁᔭᐅᔪᓂᑦ.

ᐃᓕᓐᓂᐊᕕᓐᓂ, ᐃᓕᓐᓂᐊᑏᑦ ᐃᓕᓐᓂᐊᑎᑕᐅᓐᓂᖁᑦ ᐃᓕᑕᕐᓇᐅᑎᖏᓐᓂᑦ ᖃᐅᔨᑦᓱᑎᓗ ᖃᓄᖅ ᐳᕙᓪᓗᓇᖅ ᐃᕐᐸᒍᓐᓇᓂᖓᓂᒃ ᓄᓇᓕᒻᒥᓂ. ᓄᓇᓕᒻᒥ ᓯᕗᓕᕐᑐᑦ ᑐᓴᐅᑎᒃᑰᖃᑦᑕᓱᑎᑦ ᑐᑭᓯᑎᑦᓯᓱᑎ ᐋᓐᓂᐊᒥᒃ. ᐃᓄᖁᑎᓕᒫᖏᑦ ᐃᓕᓐᓂᖁᑦ ᐳᕙᓪᓗᓂᕐᒧᓕᖓᔪᓂᑦ ᓱᓕᔪᓂᑦ ᑐᑭᓯᒍᑎᐅᓂᐊᓕᕐᒪᑕ ᓱᓕᖕᖏᑐᓂᑦ ᐃᓱᒪᒋᔭᐅᓲᓂᓗ ᐳᕙᓪᓗᓇᕐᒧᓕᖓᔪᓂᑦ. ᑐᑭᓯᒪᔭᐅᑎᑦᓯᓂᕐᒧᑦ ᐱᓇᓱᐊᕐᑕᐅᔪᑦ ᓱᕐᕃᓴᐅᑎᒋᓐᓂᖁᑦ ᐃᓄᖁᑎᖏᓐᓂᑦ.
 
ᐃᓄᐃᑦ ᐃᓕᕋᒃᑯᔨᖕᖏᓂᕐᓴᕈᓯᒪᔪᑦ ᐊᒻᒪᓗ ᐃᑲᔪᕐᓯᖃᑦᑕᓯᑦᓱᑎᑦ ᐃᓄᓐᓂᑦ ᐳᕙᓪᓗᑐᓂᑦ ᐋᓐᓂᐊᓯᐅᕐᑕᐅᓂᖏᓐᓄᑦ. ᐅᓄᕐᓂᓴᐅᓕᕐᓂᖏᑦ ᐋᓐᓂᐊᓯᐅᕐᑕᐅᔪᑦ ᐃᑉᐱᓇᕐᓯᒪᕗᑦ. ᐳᕙᓪᓗᓇᕐᒥ ᓲᓱᑦᓴᓗᐊᖕᖏᑐᕕᓃᑦ ᐱᐅᓯᕐᒥᓂᒃ ᐊᓯᑦᔩᕙᓪᓕᐊᓯᓐᓂᖁᑦ. ᓄᓇᓕᒻᒥ ᓯᕗᓕᕐᑐᑦ ᐅᖄᒍᑎᖃᖃᑦᑕᓯᑦᓱᑎᑦ ᐃᓄᖁᑎᖏᑦ ᓈᓚᑦᓱᑎᑦᓗ. ᐳᕙᓪᓗᓂᕐᒧᑦ ᐋᓐᓂᐊᓯᐅᕐᑏᑦ ᑖᕗᖕᖓᓕᐅᒥᔮᕐᑕᓱᑎᑦ, ᑐᓵᔨᖏᑦ ᐋᓐᓂᐊᕕᒻᒥ ᐱᓇᓱᑦᑎᖏᓗ ᐅᓇᒻᒥᒋᔭᖃᑦᓯᐊᓱᑎᑦ, ᑫᓪᓗᑐᐃᑦᓯᐊᓱᑎᑦ ᐃᑲᔪᕐᓯᓱᑎᑦ ᐋᓐᓂᐊᔪᓂᑦ, ᓄᓇᓕᒃ ᐊᓂᒎᑎᒍᓐᓇᓯᓯᒪᔪᖅ ᑲᑉᐱᐊᓱᒍᑎᒥᓂᑦ, ᐱᔭᕆᐊᑭᓪᓕᑎᕆᑦᓱᓂ ᖃᐅᔨᓴᕐᑕᐅᓂᖏᓐᓂᑦ ᐋᓐᓂᐊᓯᐅᕐᑕᐅᓂᖏᓐᓂᓗ ᐊᓐᓂᐊᖅ.

"ᖃᐅᔨᒪᓂᖅ ᐱᐅᔪᓪᓚᕆᐅᕗᖅ ᑭᓯᐊᓂ ᐊᑑᑎᓪᓚᕆᓂᖅ ᐊᓂᒎᑎᒍᑎᐅᒍᓐᓇᓂᐊᕐᖁᑦ," ᒥᔅ ᓯᓄᐹᓪ ᐅᖃᕐᑐᕕᓂᖅ. ᐅᓪᓗᒥ ᑲᖏᕐᓱᐊᓗᑦᔪᐊᒥᐅᑦ ᓄᖒᑦᓯᓯᒪᓕᕐᖁᑦ ᐳᕙᓪᓗᓇᕐᒥ ᐅᖄᒍᑎᖃᕈᓐᓇᓕᕐᓱᑎᓗ ᖃᐅᔨᒪᒍᓯᕐᒥᓂᒃ ᐊᓯᒥᓂᓗ ᐃᑲᔪᕈᓐᓇᓱᑎᑦ ᓄᖒᑦᓯᒐᓱᓐᓂᒧᑦ ᐳᕙᓪᓗᓇᕐᒥ ᓄᓇᕕᒻᒥ.

Watch Pride Beyond Fear video