ᐳᕙᓪᓗᕇᒃᑯᑎᑦᓴᖅ ᑲᐱᔭᐅᒍᑎᑦᓴᖅ (BCG)

ᐊᐱᕐᓲᑎᑦᓴᖏᑦ ᕿᑐᕐᖓᓖᑦ ᑭᐅᔭᐅᒍᑎᖏᓪᓗ

ᐳᕙᓪᓗᓇᕐᑐᖅ

ᐳᕙᓪᓗᓚᕿᔭᐅᓲᒍᕗᑦ ᖁᐱᕐᕈᒧᑦ Koch’s bacillus-ᑌᔭᐅᔪᒧᑦ. ᓱᕐᕃᕙᓪᓗᓲᒍᑦᓱᓂ ᐳᕙᓐᓂᒃ, ᓱᕐᕃᒍᓐᓇᕋᓗᐊᕐᒥᓱᓂ ᐊᓯᖏᓐᓂᒃ ᑎᒥᑦᑎᓃᑦᑐᓂᒃ ᓴᐅᓂᕐᓂᒃ, ᑕᕐᑑᓂᒃ ᖃᕆᑕᕐᒥᓘᓐᓃᑦ. ᐳᕙᓪᓗᓇᕐᑐᖅ ᑎᒥᐅᑉ ᓱᓇᒐᖏᓐᓂᒃ ᓱᕐᕃᒍᓐᓇᓲᒍᒻᒥᔪᖅ (ᐅᑦᑐᕋᐅᑎᒃᑲ ᐊᓂᕐᑎᕆᕖᑦ ᑕᕐᑑᓘᓐᓃᑦ ᓱᒃᑯᑕᐅᒍᓐᓇᑐᑦ, ᓴᐅᓃᓪᓗ ᐱᕈᑦᓯᐊᓯᒪᒍᓐᓀᕈᓐᓇᓱᑎᒃ, ᑐᖁᒍᑕᐅᒍᓐᓇᓱᓂᓗ).

ᐳᕙᓪᓗᑐᖃᓕᕋᒥ, ᑕᖅᑮᑦ ᐊᒥᓱᑦ ᐊᕐᕌᒍᐃᓪᓘᓃᑦ ᐊᒥᓱᑦ ᓈᒻᒪᑕ ᑭᓯᐊᓂ ᒪᓗᓐᓇᐅᑏᑦ ᓄᐃᓲᑦ ᐁᑦᑐᑑᑕᐅᓚᕿᒍᓐᓇᓱᓂᓗ (ᐳᕙᓪᓗᓂᕋᕐᑕᐅᓯᒍᓐᓇᑐᖅ ᑌᒣᒍᓂ). ᐳᕙᓪᓗᑐᒧᑦ ᒪᓗᓐᓇᐅᑎᐅᓲᑦ ᖁᐃᕐᑐᓂᖅ, ᐆᓇᕐᓂᖅ, ᐅᕿᓕᐅᒥᓂᖅ ᐅᓐᓄᐊᑯᓪᓗ ᐊᐅᒃᑲᓂᖓᖃᑦᑕᓂᖅ.

ᐳᕙᓪᓗᓇᕐᑐᖅ ᐁᑦᑐᑑᑕᐅᓲᖅ ᐊᓂᕐᑎᕆᔭᑦᑎᓂᑦ ᐳᕙᓪᓗᑐᖅ ᐃᑲᐅᕐᓂᓂ ᐊᒥᓱᓂ ᑕᕝᕙᓂᑦᓭᓈᖃᑎᖃᕐᓂᐸᑦ ᐃᓄᓐᓂᒃ ᐊᒥᓱᓂᒃ ᐅᒃᑯᐊᓯᒪᔪᒦᓪᓗᑎᒃ. ᖁᐃᕐᑐᖃᑦᑕᑐᖅ ᐁᑦᑐᐃᓂᐅᔭᕐᓂᓴᐅᒍᓐᓇᑐᖅ.

ᒥᑭᔪᖕᖑᐊᑦ ᐱᐊᕃᑦ ᐊᑦᑕᓇᕐᓯᒪᕆᑐᐃᓐᓇᕆᐊᖃᕐᓂᓴᐅᕗᑦ ᐳᕙᓪᓗᓕᕈᑎᒃ (ᖃᕆᑕᒃᑯᑦ ᐃᒻᒪᕈᑎᒋᒍᓐᓇᓱᒍ ᑎᒥᖓᓄᓪᓘᓃᑦ ᐃᕐᐸᕈᓐᓇᒪᑦ).

ᓱᓇᐅᕙ BCG ᑲᐱᔭᐅᒍᑎᑦᓴᖅ ?

ᑲᐱᔭᐅᒍᑎᑦᓴᖅ BCG  ᒥᑭᔪᖕᖑᐊᓄᑦ ᐱᐊᕋᕐᓄᑦ ᐳᕙᓪᓗᕇᒃᑯᑎᑦᓯᐊᒍᕗᖅ ᐱᔭᕆᐊᑦᑐᕈᑕᐅᒍᓐᓇᑐᓂᒃ.

ᑲᐱᔭᐅᒍᑎᑦᓴᐅᑉ BCG  ᐃᒪᖓ ᐅᐊᕈᑦᓯᔭᐅᓯᒪᕗᖅ ᖁᐱᕐᕈᓂᒃ ᓴᖕᖏᓕᑎᕐᑕᐅᓯᒪᔪᓂᒃ (ᐆᒪᔪᓂᒃ). ᐳᕙᓪᓗᓚᕿᒍᑕᐅᓲᒍᒐᓂ ᑭᓯᐊᓂᓕ, ᑲᐱᔭᐅᓯᒪᔫᑉ ᑎᒥᖓᑕ ᓴᐴᓗᑕᑦᓴᑖᕆᓲᕆᕙᐅᒃ ᐳᕙᓪᓗᕇᒃᑯᑎᑦᓴᕆᓚᖓᓕᕐᓱᒍ.

ᑲᐱᔭᐅᒍᑎᑦᓴᖅ BCG ᖃᑦᓯᓂᒃ ᐅᑭᐅᓖᑦ ᐱᒋᐊᕐᓗᒋᑦ ᑲᐱᓯᒍᑎᐅᒍᓐᓇᐸ ?

ᓄᓇᕕᒻᒥ, BCG-ᒥᒃ ᑲᐱᔭᐅᒍᑎᖃᓲᒍᕗᑦ ᓄᑕᕋᓕᒫᑦ ᑕᖅᑭᓖᑦ ᐊᑕᐅᓯᕐᒥᒃ.

ᓄᑕᕃᑦ ᐳᕙᓪᓗᓯᑐᐊᕋᒥᒃ ᐊᑦᑕᓇᕐᓯᓚᕆᑐᐃᓐᓇᕆᐊᖃᓲᒍᕗᑦ. ᑌᒣᒻᒪᑦ ᓴᐴᓗᑦᓯᔭᐅᓯᒪᒋᐊᖃᓲᒍᕗᑦ ᐳᕙᓪᓗᖏᓐᓂᖏᓐᓂ.

ᐃᑉᐱᒋᔭᐅᑦᓯᐊᕆᐊᓕᒃ: BCG-ᒧᑦ ᑲᐱᔭᐅᖁᔭᐅᓲᒍᖕᖏᓚᑦ ᐱᐊᕃᑦ ᐃᓚᖏᑦ ᑎᒥᒻᒥᒍᑦ ᓴᐴᓗᑕᖃᑦᓯᐊᖏᓪᓚᕆᑦᑐᑦ (ᐅᑦᑐᕋᐅᑎᒐ, ᑎᒥᒻᒥᒍᑦ ᓴᐴᓗᑕᖃᑦᓯᐊᖏᑦᑐᑦ)

ᖃᓄᖅ ᖃᐅᔨᒪᒐᔭᕐᖁᖓ ᐱᐊᕋᖅ ᑲᐱᔭᐅᒍᓐᓇᕋᔭᓕᕐᒪᖔᑦ BCG-ᒧᑦ ᑲᐱᔭᐅᒍᑎᑦᓴᒧᑦ ?

BCG-ᒧᑦ ᑲᐱᔭᐅᒍᑎᑦᓭᑦ ᐊᑐᐃᓐᓇᐅᑎᑕᐅᓲᑦ ᓄᓇᕕᒻᒥ ᓄᑕᕃᑦ ᐃᓅᓕᕐᑐᕕᓃᑦ ᔭᓄᐊᕆ 1, 2023-ᒥ ᑭᖑᓂᖓᓂᓪᓘᓃᑦ ᑲᐱᔭᐅᒍᑎᑦᓴᖏᑦ.

ᑲᐱᔭᐅᓚᐅᕐᑎᓇᒍ ᐱᐊᕋᖅ, ᐋᓐᓂᐊᓯᐅᕐᑎᑐᐃᓐᓇᖅ ᐃᑲᔪᕈᓐᓇᑐᖅ ᕿᑐᕐᖓᓕᒻᒥᒃ/ᑲᒪᔨᖓᓂᒃ ᐱᐊᕋᐅᑉ ᐊᓪᓚᓯᒪᔪᓂᒃ ᐊᑐᐃᓐᓇᓕᐅᕐᖄᕆᐊᖃᕋᒥ ᐱᐊᕋᖅ ᓱᓇᓂᒃ ᖃᓄᐃᒍᑎᖃᕐᒪᖔᑦ ᐊᐱᕐᓲᑎᑕᓕᓐᓂᒃ ᑲᐱᔭᐅᒍᑎᒥᓄᑦ ᓱᕐᕋᑕᐅᖁᓇᒍ.

ᐱᐊᕋᖅ ᑲᐱᔭᐅᑦᓱᓂ ᖃᑦᓯᓂᒃ ᐅᑭᐅᖃᕐᒪᖔᑦ ᐃᑉᐱᒋᑦᓱᒍ ᐊᒻᒪᓗ/ᐅᕝᕙᓘᓐᓃᑦ ᐳᕙᓪᓗᑐᒥᒃ ᑲᑎᒪᑦᓯᑐᐃᓐᓇᕆᐊᖃᕐᓂᕕᓂᖓ ᐃᓱᒪᒋᑦᓱᒍ:

  • ᐃᓅᓕᕐᑎᓗᒍ ᐱᐊᕋᖅ ᖃᐅᔨᓴᕐᑕᐅᒍᓐᓇᑐᖅ ᑎᒥᒻᒥᒍᑦ ᓴᐴᓗᑕᖃᑦᓯᐊᖏᒻᒪᖔᑦ (SCID).
  • ᐅᕕᓂᒥᑕ ᐃᑭᐊᖓᒍᑦ (TST)  ᑲᐱᔭᐅᖁᔭᐅᑐᐃᓐᓇᕆᐊᓕᒃ.
     

ᓱᓇᐅᕙ ᑎᒥᒃᑯᑦ ᓴᐴᓗᑕᖃᑦᓯᐊᖏᓐᓂᖅ (SCID) ?

ᑎᒥᒃᑯᑦ ᓴᐴᓗᑕᖃᑦᓯᐊᖏᓐᓂᖅ SCID ᖃᓄᐃᒍᑎᑖᕆᔭᐅᓲᒍᕗᖅ ᐃᓛᓐᓂᓴᕋᑕᖅ ᐱᐊᕋᐅᑉ ᐊᐅᒻᒥᒍᑦ ᑭᖑᕚᑦᓴᒥᓂᒃ ᖃᐅᔨᒪᒍᑎᖓᓃᑦᑐᖅ ᓴᓇᒪᑦᓯᐊᓂᖕᖏᑐᐊᕐᒪᑦ ᑌᒪ ᐱᐊᕋᐅᑉ ᑎᒥᖓ ᐁᑦᑐᑑᑕᐅᓲᓂᒃ ᐋᓐᓂᐊᓂᒃ ᐁᑦᑐᑕᐅᑦᑎᓕᒍᑎᑦᑕᖃᑦᓯᐊᕈᓐᓀᓂᐊᓕᕐᒪᑦ.   

75,000-ᒍᑉᐸᑕ 100,00-ᒍᑉᐸᑕᓘᓐᓃᑦ ᐱᐊᕃᑦ ᐃᓅᓕᕐᑐᑦ, ᐊᑕᐅᓯᖅ SCID-ᒍᓂᕋᕐᑕᒥᒃ ᖃᓄᐃᒍᑎᑖᕈᓐᓇᑐᑦ, ᖃᐅᔨᓴᐅᑎᕕᓂᑎᒍᑦ ᓄᓇᕘᕐᒥ ᖃᐅᔨᒍᑕᐅᓯᒪᕗᖅ ᑕᒪᑐᒪ ᐃᓄᓐᓄᑦ ᖃᓄᐃᒍᑎᒋᔭᐅᒍᓐᓇᓂᕐᓴᐅᑐᐃᓐᓇᕆᐊᖃᕐᓂᖓ.

ᓱᒧᑦ SCID-ᒍᓂᕋᕐᑕᒥᒃ ᖃᓄᐃᒍᑎᖃᕐᒪᖔᑕ ᐃᓅᓕᕐᖃᒦᑦ ᖃᐅᔨᓴᕐᑕᐅᓲᒍᕙᑦ ?

SCID-ᒍᓂᕋᕐᑕᒥᒃ ᖃᓄᐃᒍᑎᖃᕈᓂ ᐃᓅᓕᕐᓗᓂ ᐱᐊᕋᖅ ᓱᕐᕋᑕᐅᓪᓚᕆᑐᐃᓐᓇᕆᐊᖃᕐᒪᑦ. ᑌᒣᒻᒪᑦ ᖃᐅᔨᓴᕐᑕᐅᓴᐅᑎᒋᒋᐊᖃᓲᒍᕗᖅ ᑲᒪᒋᔭᐅᒍᑎᒋᒋᐊᓕᒥᓂᒃ ᑲᒪᒋᔭᐅᒍᑎᖃᕐᓂᐊᒪᑦ.

SCID-ᒍᓂᕋᕐᑕᒥᒃ ᖃᓄᐃᒍᑎᖃᕐᑐᖃᕐᒪᖔᑦ ᖃᐅᔨᓴᕈᑎᒃ ᓱᓇᐅᕙ ?

SCID-ᒍᓂᕋᕐᑕᒥᒃ ᖃᓄᐃᒍᑎᖃᕐᑐᖃᕐᒪᖔᑦ ᖃᐅᔨᓴᕐᑕᐅᔪᖅ, ᑭᒻᒥᒥᒍᑦ ᐊᐅᖏᕐᑕᐅᓲᒍᕗᖅ ᓄᑕᕌᐱᒃ, ᐃᓅᓕᕐᑎᓗᒍ 24-ᓂᒃ ᐃᑲᐅᕐᓂᓂᒃ 48-ᓂᓪᓘᓃᑦ ᐃᑲᐅᕐᓂᓂᒃ. 

ᑕᕐᕿᓕᒫᖅ ᓈᑐᐊᕐᒪᑦ ᖃᐅᔨᓴᕐᑕᐅᒍᑎᕕᓂᖏᑦ ᐱᔭᐅᒍᓐᓇᓲᑦ.

ᓱᒧᑦ SCID-ᒍᓂᕋᕐᑕᒥᒃ ᖃᓄᐃᒍᑎᖃᕐᑐᖃᕐᒪᖔᑦ ᖃᐅᔨᓴᕐᑕᐅᖄᕆᐊᖃᕐᐸ ᑲᐱᔭᐅᓚᖓᔪᖅ BCG ᑲᐱᔭᐅᒍᑎᑦᓴᒧᑦ ?

ᑲᐴᑏᑦ ᐃᒪᖏᑦ ᖁᐱᕐᕈᖓᓂᒃ ᐳᕙᓪᓗᓇᕐᑑᑉ ᐅᐊᕈᑦᓯᔭᐅᓯᒪᔪᑦ (BCG ᑲᐱᔭᐅᒍᑎ ᓚᔭᐅᒻᒥᑎᓪᓗᒍ) ᐊᑦᑕᓇᕐᓯᒍᑕᐅᑐᐃᓐᓇᕆᐊᖃᓲᒍᖕᖏᓚᑦ ᐱᐊᕋᖅ ᖃᓄᐃᖕᖏᑐᑦᓯᐊᒍᑐᐊᕐᒪᑦ. ᑎᒥᒻᒥᒍᑦ ᓴᐴᓗᑕᖓ ᐱᐊᕋᐅᑉ ᖃᓄᐃᒍᑎᓕᐅᑉ SCID-ᒍᓂᕋᕐᑕᒥᒃ, ᑭᓯᐊᓂ, ᑌᒣᑦᑐᒥᒃ ᑲᐴᑎᒧᑦ ᐊᑦᑕᓇᕐᓯᓚᕿᑐᐃᓐᓇᕆᐊᖃᕐᐳᖅ. 

SCID-ᒍᓂᕋᕐᑕᒥᒃ ᖃᓄᐃᒍᑎᖃᕐᑐᖃᕐᒪᖔᑦ ᖃᐅᔨᓴᕈᑎ ᐊᑦᑕᓇᕐᓯᒍᑎᖃᑐᐃᓐᓇᕆᐊᖃᕐᑐᖃᕐᒪᖔᑦ ᐳᕙᓪᓗᕇᒃᑯᑎᒧᑦ (BCG -ᒧᑦ ᑲᐱᔭᐅᒍᑎᒧᑦ) ᑲᐱᔭᐅᔪᒥᒃ ᖃᐅᔨᒪᒍᑎᑦᓯᐊᒍᓲᒍᕗᖅ.


BCG-ᒧᑦ ᑲᐱᔭᐅᒍᑎᒃ ᐳᕙᓪᓗᕇᒃᑯᑎᑦᓴᓯᐊᒍᕙ ?

BCG-ᒧᑦ ᑲᐱᔭᐅᒍᑎᒃ ᐳᕙᓪᓗᕇᒃᑯᑎᑦᓴᓯᐊᒍᕗᖅ ᒥᑭᔪᖕᖑᐊᓄᑦ ᐱᐊᕋᕐᓄᑦ ᓱᕐᕋᑕᐅᒍᑎᐅᒍᓐᓇᑐᓂᓪᓗ ᓴᐴᓗᑕᑦᓯᐊᒍᑦᓱᓂ (ᖃᕆᑕᐅᑉ ᐊᒥᐊᖓᒍᑦ ᐃᒻᒪᓯᒪᓂᖅ, ᐃᒻᒪᓯᒪᒍᑎᐅᓲᑦ ᐃᓘᓐᓈᒎᕐᑐᑦ, ᐊᓯᖏᓪᓗ). 75-80%-ᒧᑦ ᐱᕙᓪᓕᖁᑎᑦᓴᓕᐊᒍᓯᒪᔪᖅ.

BCG-ᒧᑦ ᑲᐱᔭᐅᒍᑎᒃ ᐊᑦᑕᓇᖕᖏᓚ ?

BCG-ᒧᑦ ᑲᐱᔭᐅᒍᑎᒃ ᐊᑐᕐᑕᐅᓲᒍᓕᕐᑐᖅ ᐊᕐᕌᒍᐃᑦ 100-ᐅᖓᑖᓅᕐᑐᓂ, ᐊᕐᕌᒍᑕᒫᓪᓗ ᓯᓚᕐᔪᐊᒥᐅᑦ ᐱᐊᕃᑦ 100-ᒥᓕᐊᓐᓃᑦᑐᑦ ᑲᐱᔭᐅᒍᑎᖃᓲᒍᑦᓱᑎᒃ ᑌᒣᑦᑐᒥᒃ.

ᑖᓐᓇ ᑲᐱᔭᐅᒍᑎᒃ ᐊᑦᑕᓇᖕᖏᑐᖅ. ᑭᓯᐊᓂ, ᑲᐱᓯᒍᑎᐅᒋᐊᖃᖕᖏᑐᖅ ᐱᐊᕋᕐᓂᒃ ᖃᓄᐃᒍᑎᓕᓐᓂᒃ ᐅᕝᕙᓘᓐᓃᑦ ᑎᒥᒻᒥᒍᑦ ᓴᐴᓗᑕᖃᑦᓯᐊᖏᑦᑐᓂᒃ (ᐆᑦᑐᕋᐅᑎᒃᑲ, ᐱᐊᕃᑦ ᐊ.ᓴ.ᐱ.-ᐅᑉ ᖁᐱᕐᕈᖓᓂᒃ ᐁᑦᑐᑕᐅᓯᒪᔪᑦ ᐅᕝᕙᓘᓐᓃᑦ ᑎᒥᒻᒥᒍᑦ ᓴᐴᓗᑕᑦᓴᖃᑦᓯᐊᖏᑦᑐᑦ [SCID]).

ᖃᓄᖅ  BCG  ᑲᐱᓯᒍᑕᐅᓲᒍᕙ ?

BCG  ᑲᐱᓯᒍᑕᐅᓲᖅ ᐅᕕᓂᐅᑉ ᐃᑭᐊᖓᒍᑦ ᑐᐃᒃᑯᑦ. ᓵᑦᑐᒪᕆᒻᒧᑦ ᑲᐴᑎᒧᑦ. ᑲᐱᔭᐅᓗᓂ ᐳᓪᓛᐱᒃ ᓄᐃᒍᓐᓇᑐᖅ ᐅᕕᓂᐅᑉ ᐃᑭᐊᖓᒍᑦ ᑕᒪᓐᓇᓗ ᐱᐅᓯᑐᐃᓐᓇᐅᓱᓂ ᑲᐱᔭᐅᔪᖃᕐᐸᑦ.

ᓱᓇᐅᕙᑦ ᓱᕐᕋᑕᐅᒍᑎᐅᒍᓐᓇᑐᑦ ᐃᓚᖏᑦ BCG-ᒧᑦ ᑲᐱᔭᐅᔪᖃᕐᐸᑦ ?

ᐊᒥᓱᑦ ᑲᐱᔭᐅᒍᑎᐅᓲᑦ ᓱᕐᕋᑕᐅᒍᑎᐅᒍᓐᓇᓲᒍᕗᑦ ᑲᑉᐱᐊᓇᕐᓯᒍᑕᐅᒍᓐᓇᕋᑎᓪᓗ.

ᓱᕐᕋᑕᐅᒍᑎᐅᑐᐃᓐᓇᕆᐊᓖᑦ BCG-ᒧᑦ ᑲᐱᔭᐅᔪᕕᓂᐅᔪᖃᕐᐸᑦ:

  • ᑲᑉᐳᓕᕆᓂᖅ, ᐊᐅᐸᕐᓯᓂᖅ ᑲᑉᐳᑯᑦ ᐳᓪᓕᐊᐱᓪᓗᓂᓘᓐᓃᑦ ᑲᑉᐳᖓ.
  • ᐳᓪᓕᓗᓂ ᐅᓂᕐᒥᑕ ᕿᓂᕐᓯᖓᒍᑦ ᖁᑐᖓᑕᓘᓐᓃᑦ ᖁᓛᒍᑦ ᑲᑉᐳᖓᑕ ᓇᓛᓃᑦᑑᑉ.
  • ᐊᐅᐸᕐᓯᓯᒪᔪᒥᒃ ᐳᓪᓕᓗᓂ ᐃᒻᒪᓯᒪᔪᒥᒃ ᑌᒣᓕᖓᑦᓭᓇᕐᑐᒥᒃ ᐱᓇᓱᐊᕈᓰᒃ ᒪᕐᕉᒃ ᓯᑕᒪᓪᓘᓃᑦ ᓈᓕᕐᑎᓗᒋᑦ ᑲᐱᔭᕕᓂᐅᓗᓂ. ᑕᕐᕐᑮᑦ ᒪᕐᕉᒃ ᑕᓪᓕᒪᓪᓘᓃᑦ ᓈᑉᐸᑕ ᐳᓪᓕᒍᓐᓀᕋᔭᕐᑐᖅ, ᕿᓕᕈᐊᐱᖃᓕᕐᓗᓂ.
  • ᐆᓇᕐᓂᖅ, ᐅᕕᓂᒃᑯᑦ ᐊᐅᐸᕐᓯᓂᖅ ᐃᔨᒃᑯᓗ ᐊᐅᐸᕐᓯᓂᖅ.
  • ᐃᓛᓐᓂᓴᕋᑕᖅ, ᓱᕐᕋᑕᐅᒍᑎᐅᓪᓚᕆᒍᓐᓇᒥᑦᓱᓂ, ᑎᒥᒃᑯᑦ ᓱᒃᑯᑕᐅᒍᑎᐅᓗᓂ ᐅᕝᕙᓘᓐᓃᑦ ᐃᓘᓐᓈᓅᓕᖓᔪᒥᒃ ᐃᒻᒪᕈᑕᐅᓗᓂ. ᑕᒪᒃᑯᐊ ᓱᕐᕋᑕᐅᒍᑎᐅᒍᓐᓇᑐᑦ ᓱᕐᕋᑕᐅᒍᑎᐅᓪᓚᕆᒍᓐᓇᓲᑦ ᐃᓛᓐᓂᓴᕋᑕᖅ ᑭᓯᐊᓂ ᑲᐴᑎᒃ ᐱᕙᓪᓕᖁᑎᐅᓂᕐᓴᐅᒍᓐᓇᑐᖅ ᐊᑦᑕᓇᕐᓯᒍᑕᐅᒍᓐᓇᖏᓐᓂᓴᐅᑦᓱᓂ.

BCG-ᒧᑦ ᑲᐱᔭᐅᓯᒪᔪᖅ ᓱᒧᑦ ᐃᓛᓐᓂ ᑲᑉᐳᒥᒍᑦ ᕿᓕᕈᕐᑖᓲᒍᕙ ?

ᐊᓯᖏᑦ ᑲᐴᑏᑦ ᑌᒣᓲᒍᑎᓐᓇᒋᑦ, BCG-ᒧᑦ ᑲᐴᑎ ᑲᐱᓯᒍᑕᐅᓲᒍᕗᖅ ᐅᕕᓂᐅᑉ ᐃᑭᐊᖓᓄᑦ, ᑎᒥᒃᑯᑦ ᓱᕐᕋᑕᐅᒍᑕᐅᓲᑦ ᑲᐱᔭᐅᔪᖃᑐᐊᕋᒥ ᐅᕕᓂᐅᑉ ᐃᑭᐊᖓᓃᕙᓪᓗᓲᒍᒻᒪᑕ.

ᑲᑉᐳᖅ, ᐳᓪᓕᐊᐱᒍᓐᓇᑐᖅ, ᐃᒻᒪᓗᓂᓘᓐᓃᑦ. ᑕᒪᓐᓇᓗ ᐱᐅᓯᑐᐃᓐᓇᐅᓱᓂ ᑲᐱᔭᐅᓯᒪᔪᒧᑦ ᐃᓱᒫᓗᓐᓇᕋᓂᓗ.

ᐊᒥᓲᓂᕐᓭᑦ ᐱᐊᕃᑦ ᒪᒥᑦᓯᐊᓲᑦ ᑕᖅᑮᒃ ᒪᕐᕉᒃ ᑕᓪᓕᒪᓪᓗᓃᑦ ᓈᑐᐊᕐᒪᑕ, ᑭᓯᐊᓂ ᐱᐊᕃᑦ ᐃᓚᖏᑦ ᕿᓕᕈᐊᐱᑦᑖᕈᓐᓇᑐᑦ. ᑕᒪᓐᓇᓗ ᐅᕕᓂᐅᑉ ᒪᒥᑉᐸᓕᐊᓂᖓᓄᑦ ᑌᒣᓲᒍᑦᓱᓂ. ᖃᐅᔨᒪᔭᐅᒋᐊᖃᕐᓱᓂᓗ ᕿᓕᕈᖃᖕᖏᑐᖅ ᓱᕙᓪᓖᒍᓐᓇᖏᒻᒪᑦ ᑲᐴᑎᐅᑉ ᓱᕐᕃᓯᐊᕈᓐᓇᓂᖓᓂᒃ.

ᓱᒧᑦ BCG-ᒧᑦ ᑲᐱᔭᐅᓃᑦ ᓄᓇᕕᒻᒥ ᐊᑑᑎᔭᐅᒋᐊᓪᓚᖃᑦᑕᓕᕐᖃᑦ ?

ᐳᕙᓪᓗᑐᑦ ᐅᓄᕐᓂᖏᑦ ᓄᓇᕕᒻᒥ ᐃᑭᓕᐅᒥᓚᐅᔪᒻᒪᑕ 1980-ᓂᑦ 2003-ᒧᑦ, ᑌᒪ ᖃᐅᔨᒪᔪᓪᓚᕇᑦ ᐃᓅᓕᕐᖃᒥᓐᓂᒃ BCG-ᒧᑦ ᑲᐱᔭᐅᖃᑦᑕᕆᐊᖃᖕᖏᑑᓂᕃᓯᓚᐅᔪᕗᑦ.

2007-ᒥᓂᑦ ᑭᓯᐊᓂ, ᐅᓄᕐᓯᐅᒥᓯᒪᔪᑦ ᐳᕙᓪᓗᑐᑦ ᐊᒥᓲᓈᕐᑎᑐᐃᓪᓗ ᖃᐅᔨᔭᐅᕙᑦᓱᑎᒃ ᓄᓇᓕᓐᓂ ᐃᓚᖏᓐᓂ ᓄᓇᕕᒻᒦᑐᓂ.

ᓇᐅᓕᒫᑦ ᖃᓄᐃᖕᖏᓯᐊᕐᓂᓕᕆᕕᖏᓐᓂᒃ ᐊᐅᓚᑦᓯᔪᑦ ᕿᒥᕐᕈᓯᒪᔪᑦ ᖃᓄᐃᓕᖓᓂᖓᓂᒃ ᑕᒪᑐᒪ, ᐁᑦᑐᑑᑕᐅᒍᓐᓇᓂᖓᓂᒃ ᐳᕙᓪᓗᓇᕐᑑᑉ ᐊᑦᑕᓇᕐᓂᕃᑦᓱᑎᒃ BCG-ᒧᑦ ᑲᐱᔭᐅᖃᑦᑕᖁᔨᓯᒪᔪᑦ ᓄᓇᕕᒻᒥ ᓄᓇᓕᓕᒫᓃᑦᑐᓂᒃ.  

ᔭᓄᐊᕆ 1, 2023-ᒥᓂᑦ,  BCG ᑲᐱᔭᐅᒍᑎᑦᓴᖅ ᐊᑐᐃᓐᓇᐅᑎᑕᐅᓕᕐᑐᖅ ᓄᑕᕋᓕᒫᑦ ᑲᐱᔭᐅᒍᑎᒋᒍᓐᓇᑕᖏᑦ ᑕᖅᑭᖃᓕᕈᑎᒃ ᐊᑕᐅᓯᕐᒥᒃ.

 

Useful links


ᖃᐅᔨᒋᐊᕐᕕᐅᓯᒪᔪᖅ - Bacille Calmette-Guerin - ᓯᑯᑦᓴᔦᑦ ᓱᕐᖁᐃᑕᐅᓯᒪᔪᑦ. ᓄᓇᕘᕐᒥ. ᐅᒃᑑᐸ 2012-ᒥ.

ᑎᓯᒻᐸ 2022