ᓱᓀᓐᓈ ᓯᕕᓕᔅ?
ᓯᕕᓕᔅ ᖁᐱᕐᕈᐊᓯᖃᕐᓂᐅᓱᓂ ᐋᓐᓂᐊᒃ ᐃᕐᐸᓲᖑᕐᓱᓂ ᑯᔭᓐᓂᑎᒍᑦ/ᓄᓕᐊᕐᓂᑎᒍᑦ ᐋᕐᕿᑕᐅᖕᖏᑯᓂᓗ ᓱᒐᓗᑦᑐᒥ ᐋᓐᓂᐊᓚᖀᒍᓐᓇᓱᓂ. ᐊᒥᓱᐃᑦ ᓯᕕᓕᔅᑖᕐᓯᒪᔪᑦ ᓯᕕᓕᔅᑖᓯᒪᔪᕆᓲᖑᖕᖏᑐᐃᓪᓘᓃᑦ ᓲᕐᓗ ᒪᓗᓐᓇᖏᓪᓚᕆᑐᐃᓐᓇᒋᐊᓕᒃ. ᒪᓗᓐᓇᑐᓕᓲᒍᒐᓗᐊᑦ ᐃᒫᒃ:
- ᐅᕐᓱᕆᐊᓕᓂᑖᓲᖅ ᐅᑦᓱᒥᑎᒍᑦ/ᐅᓱᒻᒥᑎᒍᑦ, ᖃᓂᕐᒥᑎᒍᑦ ᐅᖃᕐᒥᑎᒍᓪᓘᓃᑦ ᒣᓪᓘᓇᖕᖏᑐᒥᒃ ᒪᓗᓐᓇᖏᑦᑑᓗᓂᓘᓐᓃᑦ;
- ᐸᕐᑎᓚᕿᔪᖅ;
- ᕿᓂᕐᓯᖏᑦ ᐳᓪᓕᑐᑦ
- ᐆᓇᕿᔪᖅ ᐃᓱᕐᕆᔭᒐᓂᓘᓐᓃᑦ
ᒪᓗᓐᓇᐅᑎᐅᒋᐊᖕᖓᑐᑦ ᐊᓯᐅᑐᐃᓐᓇᓲᑦ ᐋᓐᓂᐊᓯᐅᕐᑕᐅᖏᑉᐸᑦ, ᑭᓯᐊᓂᓕ ᓯᕕᓕᔅ ᓱᓇᐅᕝᕙ ᕿᑲᑐᐃᓐᓇᑐᖅ ᑎᒥᒻᒥᒃ. ᑌᒣᓐᓂᑯᖓᓄᑦ ᐱᒻᒪᕆᓚᕆᐊᓘᕗᖅ ᐋᓐᓂᐊᓯᐅᕐᑕᐅᒋᐊᖃᒋᐊᖅ. ᐃᒻᒥᒎᓈᕐᑎᑐᐃᑦ ᓯᕕᓕᔅᖃᕐᓱᑎᒃ ᐋᓐᓂᐊᓯᐅᕐᑕᐅᒪᖕᖏᑐᐃᑦ ᑕᒪᓀᑦᑐᒪᕆᓐᓂ ᐋᓐᓂᐊᑖᓚᕿᕈᓐᓇᒪᑕ ᓯᕗᓂᕐᒥᓂ (ᑕᐅᑐᖕᖏᓕᕐᓂᖅ ᓄᑮᕈᕐᓂᖅ, ᐆᒻᒪᑎᓕᕆᓃᑦ ᑐᖁᓂᐊᓪᓛᑦ).
ᓯᕕᓕᔅ ᐊᑦᑕᓇᓗᐊᖕᖑᑐᖅ ᐃᓅᓕᕋᑕᖕᖏᑐᓄᑦ, ᐊᕐᓇᒃ ᐱᐊᕋᑦᓴᖃᕐᓱᓂ ᓯᕕᓕᔅᑖᕐᓂᐸᑦ. ᓯᕕᓕᔅ ᐱᕈᓗᑲᑦᑎᓯᓲᖅ ᐊᓪᓛᑦ ᐱᐅᓯᕐᓗᓂᓕᒻᒥᒃ (ᐃᓱᒪᑎᒍᑦ ᑎᒥᒥᑎᒍᓪᓘᓃᑦ) ᐃᓅᓕᔨᐊᖃᑐᐃᓐᓇᒋᐊᓖᑦ ᑐᖁᓗᓂᓘᓐᓃᑦ.
ᖃᓄᐃᓐᓈ ᓯᕕᓕᔅᑖᕈᓐᓇᐱᑦ?
ᓯᕕᓕᔅ ᐃᕐᐸᓲᖅ ᐅᑦᓱᑎᒍᑦ, ᐃᑎᒃᑯᑦ, ᖃᓂᑎᒍᓘᓐᓃᑦ ᓯᕕᓕᔅᓕᒻᒧᑦ. ᓯᕕᓕᔅ ᐃᕐᐸᕈᓐᓇᒥᔪᖅ ᐱᐊᕋᑦᓴᓕᒻᒥᒃ ᐃᓅᓕᕋᑕᖕᖏᑐᒧᑦ.
ᒪᒥᕐᓴᑕᐅᕈᓐᓇᓂᓖᒃ ᓯᕕᓕᔅ?
ᐊᐊ, ᓯᕕᓕᔅ ᐋᕐᕿᑕᐅᒍᓐᓇᑐᖅ ᐋᓐᓂᐊᓯᐅᑎᓄᑦ (ᑲᐳᕐᑕᐅᓗᓂ ᐊᑕᐅᓯᕕᓗᓂ ᒪᕐᕈᕕᓗᓂᓘᓐᓃᑦ ᑲᐳᕐᑕᐅᓂᑎᒍᑦ). ᑭᓯᐊᓂ, ᐋᓐᓂᐊᓯᐅᕐᑕᐅᔪᖃᕋᓗᐊᕈᓂ ᐱᐊᕋᑦᓴᖃᕇᕐᓂᕈᓂ ᐃᓅᓕᕐᐸᓘᓐᓃᑦ ᑭᖑᓂᖓᓂ ᓱᕐᕋᑕᐅᓂᖃᓲᑦ ᖃᕆᑕᖏᑦ ᐆᒻᒪᑎᖓᓘᓐᓃᑦ. ᓯᕕᓕᔅ ᐊᓯᐅᓯᖏᓐᓇᑐᐃᓐᓇᓲᖑᖕᖏᑐᔭᖅ ᓲᕐᓗ ᑲᐳᕐᑕᐅᒍᑎᐅᓗᓂ/ᐄᕐᖃᒐᕐᑐᒍᑎᐅᓪᓗᓂ ᑭᓯᐊᓂ.