ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᓴᐳᑦᔨᔭᐅᓂᖓ ᓄᓇᓕᓕᒫᓂ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ
ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᓴᐳᑦᔨᔨᒻᒪᕆᐅᓘᕗᑦ ᓂᑦᔮᕈᑕᐅᓪᓗᐊᓚᐅᕐᓯᒪᒐᑎᒃ ᐱᕕᑦᓴᖃᕈᑎᒥᓐᓂᒃ ᓄᑭᖃᕐᓂᒥᓂᓪᓗ ᓴᐳᑦᔨᓯᒪᓂᕐᒨᑎᑦᓯᓲᑦ ᖃᓄᐃᖕᖏᓯᐊᕆᐊᖃᕐᓂᖏᓐᓄᑦ ᓱᒐᓚᑐᐃᓐᓇᕆᐊᖃᕐᓱᑎᒃ ᐃᓪᓕᓇᕐᓱᑎᓗ ᓄᓇᕐᖃᑎᑦᑎᓄᑦ. ᐃᑲᔪᕐᓯᓯᒪᓲᖑᕗᑦ ᓱᕐᖁᐃᓯᒪᑎᑦᓯᓂᒃᑯᑦ ᑌᒃᑯᓄᖓ ᐱᕐᖃᔭᖕᖏᕈᑎᓕᓐᓄᑦ ᐃᒻᒥᓂᕿᕐᖃᔭᖕᖏᒍᑎᓕᓐᓄᓘᓐᓃᑦ, ᐃᓄᑐᖃᕗᑦ ᐊᒥᓱᑦ ᐃᓚᐅᑎᓪᓗᒋᑦ ᐱᖁᑎᓕᒻᒪᕇᑦ ᐊᐅᓚᔨᔭᒥᓂᒃ ᓯᓚᑐᓂᕐᒥᓗ, ᐊᓂᕐᕋᒥᓂ ᐃᓅᖏᓐᓇᕈᓐᓇᖁᓪᓗᒋᑦ. ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐱᓇᓱᓐᓂᖏᑦ ᐱᓪᓚᕆᐅᕗᑦ ᐃᓪᓕᓇᕐᓱᑎᓗ, ᐱᓪᓚᕆᐅᑦᓱᓂᓗ ᐱᕕᑦᓴᖃᕐᑎᓂᕐᒧᑦ ᐃᓱᒪᒋᐊᕐᓂᑯᑦ ᓂᑦᑕᑎᑦᓯᓂᒃᑯᓗ ᓇᑯᕐᓴᓂᑦᑎᓂᒃ ᐊᔪᐃᓐᓇᒪᕆᓐᓂᐊᓗᕆᓲᖏᓐᓄᑦ.
ᓄᓇᕕᒻᒥ ᓄᓇᓕᓕᒫᑦ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᑦᔪᔨᕕᖓᓂ, ᐃᓕᑕᕐᓯᓂᖃᕐᐳᒍᑦ ᓇᓪᓕᐅᓂᕐᓯᐅᒍᑎᒋᑦᓱᒍᓗ ᐱᓪᓚᕆᐊᓗᒃᑯᑦ ᖃᓄᐃᓘᕐᑎᐅᓂᖏᓐᓂᒃ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᓄᓇᓕᑦᑎᓂ.ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᐅᓂᖅ ᓯᕕᑐᔪᒻᒪᕆᐅᕗᖅ ᐅᐱᓐᓇᓱᓂᓗ ᑲᒪᒋᔭᑦᓴᖃᕐᓂᖓ, ᑭᓯᐊᓂᓗ ᐊᕐᓱᕈᕐᓇᓲᖑᒻᒥᓱᓂ ᑕᖃᓐᓇᓯᓲᖑᑦᓱᓂᓗ. ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᐅᕈᕕᑦ ᓄᑖᖑᑦᓱᑎᑦ ᐊᑯᓂᐅᓕᕐᑐᓘᓐᓃᑦ ᐱᓇᓱᒐᕆᓕᕐᓱᒍ, ᓴᐳᑦᔨᒍᑏᑦ ᐃᓕᓐᓄᑦ ᐊᑐᐃᓐᓇᐅᕗᑦ.
ᓱᓇᐅᕙ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎ?
ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᐅᓂᖅ ᐱᓂᐊᕐᓂᐅᕗᖅ ᐃᑲᔪᕐᓯᓂᒃᑯᑦ ᓴᐳᑦᔨᓂᒃᑯᓗ ᐃᓄᓐᓂᒃ ᐅᓪᓗᑕᒫᕐᓯᐅᑎᓂᒃ ᐊᑑᑎᖏᓐᓇᖃᔭᖕᖏᑐᓄᑦ ᑎᒥᒃᑯᑦ ᐃᓱᒪᒃᑯᓘᓐᓃᑦ ᐊᐅᓚᑕᐅᔪᓂᒃ ᐱᕐᖃᔭᖕᖏᕈᑎᓕᓐᓄᑦ. ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᑲᔪᓰᓐᓇᑐᒃᑯᑦ ᓇᓪᓕᐅᑎᑦᑕᑐᒃᑯᓘᓐᓃᑦ ᐃᑲᔪᕐᓯᒪᔨᐅᕗᖅ, ᐅᓪᓗᑕᒫᑦ ᐱᓂᐊᕐᓂᐅᒋᐊᓕᓐᓂᒃ ᐃᑲᔪᕐᓱᑎᒃ ᐆᑦᑑᑎᒋᓗᒍ ᑎᒥᒃᑯᑦ ᐊᐅᓚᓂᖃᑦᓯᐊᕆᐊᓖᑦ, ᐃᓚᖓᓂᒃ ᐋᓐᓂᐊᕕᓕᐊᕆᐊᓕᓐᓂᒃ ᒪᓕᓪᓗᑎᒃ, ᓴᐳᑦᔨᓂᒃᑯᓗ ᐃᑉᐱᓂᐊᕐᓂᑎᒍᑦ ᐁᑉᐸᕆᔭᐅᓂᑦᑎᒍᓪᓗ ᐃᓄᑑᖕᖏᑑᑎᑦᓯᓂᕐᒧᑦ.
- ᐱᐅᓯᑐᐃᓐᓇᒥᒍᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐃᓅᕗᑦ, ᑌᒪᖕᖓᒐᓚᐅᓂᕐᓴᖅ ᐃᓚᖃᕐᓱᑎᒃ ᐃᓚᓐᓈᕆᔭᐅᑦᓱᑎᓘᓐᓃᑦ ᑲᒪᒋᔭᒥᓄᑦ ᐱᕐᖃᔭᑦᓯᐊᖏᕈᑎᓕᓐᓄᑦ. ᑕᒪᓐᓇ ᐃᓚᖃᕈᓐᓇᑐᖅ ᐃᓄᑐᖃᕐᒥᒃ ᐊᖓᔪᕐᖄᕆᔭᐅᔪᒥᒃ, ᐊᑖᑕᑦᓯᐊᒥᒃ ᐊᓈᓇᑦᓯᐊᒥᓪᓘᓃᑦ ᕿᑐᕐᖃᒥᓂᒃ ᑲᒪᑦᓱᓂ ᐱᕐᖃᔭᖕᖏᕈᑎᓕᒻᒥᒃ, ᓯᓚᕐᖃᑎᒥᓂᓪᓘᓃᑦ ᐳᐊᕐᕆᔭᕈᑦᔨᓲᖑᑦᓱᓂ ᐃᓄᑐᖃᐅᑉ ᐊᑦᓴᓗᐊᓕᒃᑰᕕᖓᓂᒃ.
- ᐱᓇᓱᑦᑏᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐃᓅᕗᑦ ᑲᒪᒍᑎᖃᓲᖑᑦᓱᑎᒃ ᐊᓪᓚᓯᒪᔪᓂᒃ ᒪᓕᑦᓱᑎᒃ ᐱᓇᓱᒐᖃᕈᑎᒥᓐᓂ. ᐱᓇᓱᑦᓱᑎᒃ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᓲᖑᑦᓱᑎᒃ ᓄᓇᓕᒻᒥ ᐱᓇᓱᕝᕕᓂ, ᐃᓗᓯᓕᕆᕕᓐᓂ ᐅᕝᕙᓘᓐᓃᑦ ᑐᕃᓐᓇᕕᒋᑦᓱᒍ ᑲᒪᒋᔭᐅᒋᐊᓕᒃ. ᑖᒃᑯᐊ ᐱᓇᓱᑦᑏᑦ ᐱᒋᐅᕐᓴᓯᒪᐅᑎᙯᓐᓇᓲᖑᖕᖏᑐᑦ ᑭᓯᐊᓂ ᐊᑐᓲᖑᑦᓱᑎᒃ ᐃᓗᕐᖁᓯᑎᒍᑦ ᓄᓇᓕᒻᒥᓗ ᖃᐅᔨᒪᓂᕐᒥᒍᑦ, ᖃᓄᐃᓘᕐᑎᐅᓂᖏᑦ ᐱᓪᓚᕆᐊᓘᓚᕿᑎᓪᓗᒋᑦ ᓄᓇᓕᓕᒫᓄᑦ.
ᑲᔪᓯᔪᒥᒃ ᓴᐳᑦᔨᒍᑏᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓄᑦ
ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐅᐱᒋᔭᐅᓂᖏᓐᓄᑦ ᑕᕐᕿᖁᑎᖃᕋᓗᐊᕐᑎᓗᒍ ᐊᕐᕌᒍᑕᒫᑦ ᓄᕕᐱᕆᒥ, ᓄᓇᓕᓕᒫᑦ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᑦᔪᔨᕕᖓ ᐊᖏᕐᓯᒪᐅᑎᙯᓐᓇᐳᖅ ᓴᐳᑦᔨᓯᒪᑦᓯᐊᓂᕐᒧᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ ᐊᕐᕌᒍᓕᒫᒥ. ᓄᓇᕕᒻᒥ, 140-ᒐᓚᓐᓃᓂᕋᕐᑕᐅᕗᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ. ᑖᒃᑯᐊ ᐊᕐᓱᕈᕐᓇᑐᒃᑰᒪᕆᓲᖑᕗᑦ ᐆᑦᑑᑎᒋᑦᓱᒋᑦ ᑕᖃᓪᓗᖂᒻᒥᓯᒪᓂᖅ, ᐃᓄᑑᑎᓐᓂᒃ ᑮᓇᐅᔭᖃᑦᓯᐊᖏᓐᓂᓗ, ᐱᓪᓚᕆᐊᓘᓚᕿᑎᓪᓗᒍ ᑲᔪᓯᑦᓯᐊᑐᒃᑯᑦ ᓴᐳᑦᔨᔭᐅᒋᐊᖃᕐᓂᖏᑦ. ᓄᓇᓕᓕᒫᑦ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᑦᔪᔨᕕᖓ ᐱᓇᓱᐊᕈᑎᖃᕐᐳᖅ ᐊᕐᕌᒎᓐᓅᖓᔪᒥᒃ ᒪᕐᕉᓄᑦ ᐸᕐᓇᓯᒪᐅᑎᒥᒃ (2024-2026) ᐃᓚᒋᔭᐅᑎᓪᓗᒍ ᑲᓇᑕᒥ ᒪᓕᒐᕐᒧᑦ ᐃᓕᑕᕐᓯᓯᐊᕐᓂᓴᐅᓂᕐᒧᑦ ᓴᐳᑦᔨᔭᐅᒋᐊᖃᕐᓂᖏᓐᓂᒃ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᑐᓂᓯᒪᓂᖏᓐᓄᑦ. ᑕᒪᓐᓇ ᐸᕐᓇᓯᒪᐅᑎ ᐃᓚᓕᒃ ᐱᒋᐊᕐᑎᓯᒍᑎᓂᒃ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐱᒋᐅᕐᓴᔭᐅᓲᖕᖑᑎᓪᓗᒋᑦ, ᑕᙯᕐᓯᖃᑦᑕᕆᐊᖃᕐᑎᓗᒋᑦ, ᑮᓇᐅᔭᑎᒍᑦ ᐃᑲᔪᕐᓯᔭᐅᓗᑎᒃ ᐃᓱᒪᓕᕆᓂᒃᑯᓗ ᓴᐳᑦᔨᔭᐅᓗᑎᒃ. ᐃᓚᒋᐊᕈᑎᒋᑦᓱᒍ, ᓄᓇᓕᓕᒫᑦ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᑦᔪᔨᕕᖓ ᐱᓇᓱᒍᑎᖃᕆᕗᖅ ᐃᓄᑐᖃᕐᓄᑦ ᐃᑲᔪᕐᑕᐅᒋᐊᓕᓐᓂᓗ ᐃᑲᔪᕐᑏᑦ ᒪᓕᒐᑦᓴᖏᓐᓂᒃ ᐱᓇᓱᖃᑎᒋᑦᓱᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ. ᑭᓇᓕᒫᒃᑯᓄᑦ ᑐᓴᐅᒪᖃᑎᒌᓐᓂᓕᕆᓂᖅ ᓄᐃᑦᓯᒍᑕᐅᒐᔭᕐᑐᖅ 2025-ᒥ ᒪᓕᒐᑦᓴᖏᓪᓗ ᑐᑭᒧᐊᑦᑎᓯᓂᖃᒻᒪᕆᓪᓗᑎᒃ ᐱᑦᓴᑖᕐᕕᓴᖃᕐᓂᓴᐅᓕᕐᓗᓂᓗ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ.
ᑫᓪᓗᑐᐃᕗᒍᑦ ᑌᒃᑯᓂᖓ ᓴᐳᑦᔨᒋᐊᓪᓛᕈᑎᖃᕈᒪᔪᓂᒃ ᐃᓱᒪᒍᑎᖃᕐᒥᔪᑦ ᐃᓚᒌᓂ ᐃᑲᔪᕐᑎᐅᓂᕐᒧᑦ ᐅᖄᓚᕕᖃᕐᓗᑎᒃ ᓄᓇᓕᒻᒥᓂ ᐊᓂᕐᕋᒥ ᐃᑲᔪᕐᑎᓄᑦ ᐱᓇᓱᖃᑎᒌᑦᑐᓄᑦ. ᑲᑐᑦᔨᓗᑕ, ᐃᓱᐊᕐᓴᖃᑎᒌᒍᓐᓇᖁᒍᑦ ᓴᐳᑦᔨᓗᑕᓗ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ ᐱᓪᓚᕆᐊᓗᓐᓂᒃ ᖃᓄᐃᓘᕐᑎᐅᓂᓖᑦ ᐃᓗᓯᕐᓱᓯᐊᖏᓐᓇᓂᕐᒧᑦ ᖃᓄᐃᖕᖏᓯᐊᕐᓂᖏᓐᓄᓗ ᓄᓇᓕᑦᑕ.
ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ, ᑲᖐᓱᑉᐳᒍᑦ ᐃᓕᑦᓯᓂᖅ.
ᖁᕝᕙᕆᐊᕐᓯᒪᑎᑦᓯᓂᐅᓯᒪᔪᑦ:
ᖃᐅᔨᑦᓴᕈᕆᐊᕐᓯᒪᑎᑦᓯᓱᑎᒃ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐅᐱᒋᔭᐅᓂᖏᑦᑕ ᐱᓇᓱᐊᕈᓯᖓᓂᒃ
ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐅᐱᒋᔭᐅᓂᖏᑦᑕ ᐱᓇᓱᐊᕈᓯᖓ (CAW) ᐊᕐᕌᒍᑕᒫᑦ ᖁᕝᕙᕆᐊᕐᓯᒪᑎᑦᓯᒍᑎ ᐱᒋᐊᕐᑎᑕᐅᓯᒪᔪᖅ ᓄᓇᓕᓕᒫᑦ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᑦᔪᔨᕕᖓᓄᑦ ᐅᐱᒍᓱᓐᓂᒧᑦ ᓄᓇᕕᒻᒥ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ. ᖁᕝᕙᕆᐊᕐᓯᒪᑎᑦᓯᓂᖅ ᐱᒋᐊᕐᑎᑕᐅᓯᒪᕗᖅ 2022-ᒥ ᑌᒪᖕᖓᓂᓪᓗ ᓂᑦᑕᓲᖑᓕᕐᓱᓂ ᐃᓕᑕᕐᓯᔭᖃᕐᓂᒧᑦ ᑐᓂᓯᒪᓂᐊᓗᖏᓐᓂᒃ ᐱᐅᓯᑐᐃᓐᓇᒥᒍᑦ ᐱᓇᓱᑦᑎᐅᓱᑎᓗ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ.
- 2022-ᒥ ᖁᕝᕙᕆᐊᕐᓯᒪᑎᑦᓯᒍᑎ: ᐱᒋᐊᕐᑎᑕᐅᓂᖓ ᐃᑲᔪᕐᑕᐅᒍᑎᖃᕆᐊᓕᓐᓂᒃ ᐃᑲᔪᕐᑏᑦ ᐅᐱᒋᔭᐅᕕᖓᑕ ᐊᖏᔪᒻᒪᕆᒻᒥᒃ ᑕᑯᓚᐅᔪᕗᖅ ᓴᐳᑦᔨᓯᒪᓂᒻᒪᕆᐊᓗᖓᓂᒃ ᓄᓇᓕᐅᑉ, ᐃᓚᐅᑎᓪᓗᒋᑦ ᐁᑦᑐᑑᑕᐅᓂᖏᑦ ᓇᑯᕐᒦᒍᑏᑦ ᓂᐅᕕᕈᑏᓪᓗ ᑯᐊᐸᒃᑯᓂ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓄᑦ. ᓄᓇᓕᒻᒥ ᐱᓂᐊᕐᓂᖃᕐᑎᓯᓚᐅᔪᑦ ᐃᓄᒃᔪᐊᒥ, ᐳᕕᕐᓂᑐᒥ, ᑰᑦᔪᐊᕌᐱᒻᒥ, ᑰᑦᔪᐊᒥ ᑲᖏᕐᓱᐊᓗᒃᔪᐊᒥᓪᓗ ᓇᓪᓕᐅᓂᕐᓯᐅᓂᕐᒧᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ ᐃᓪᓕᓇᕐᑐᑯᓪᓗ ᖃᓄᐃᓘᕐᑎᐅᓂᖏᓐᓄᑦ.
- 2023-ᒥ ᖁᕝᕙᕆᐊᕐᓯᒪᑎᑦᓯᒍᑎ: ᐱᕙᓪᓕᐊᕈᑎᖃᕐᓂᖅ ᐊᓂᒎᑎᔭᖃᕐᓯᒪᓂᖏᓐᓄᑦ ᐊᕐᕌᒎᓚᐅᕐᑐᒥ, ᐃᑲᔪᕐᑕᐅᒍᑎᖃᕆᐊᓕᓐᓂᒃ ᐃᑲᔪᕐᑏᑦ ᐅᐱᒋᔭᐅᕕᖓ 2023-ᒥ ᓄᓇᓖᓐᓂ ᒪᕐᕉᓂ ᐱᓂᐊᕐᓂᖃᕐᑎᓯᓚᐅᔪᕗᑦ ᐁᑦᑑᓯᐊᕐᑕᐅᓱᑎᒃ ᓇᑯᕐᒦᑕᐅᒍᑎᑖᕐᓱᑎᓗ ᓄᓇᕕᓕᒫᒥ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ. ᐱᓇᓱᑦᓯᐊᓯᑎ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎ ᐱᒋᐊᕐᑎᑕᐅᓚᐅᔪᖅ ᐊᖏᓕᒋᐊᕐᑎᓯᓂᕐᒧᑦ ᖁᕝᕙᕆᐊᕐᓯᒪᐅᑎᒥᒃ, ᓄᓇᓕᒻᒥᐅᓂᒃ ᑎᒃᑯᐊᓯᒍᓐᓇᑎᑦᓯᓱᑎᒃ ᐱᓇᓱᑦᓯᐊᓯᑎᒻᒪᕆᓐᓂᒃ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ ᓄᓇᓕᓕᒫᑎᒍᑦ ᐃᓕᑕᕆᔭᐅᓕᕐᑎᓯᓂᕐᒧᑦ ᓵᓚᖃᐅᑎᖃᕐᑎᓯᓂᕐᒧᓗ.
2024-ᒥ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐅᐱᒋᔭᐅᓂᖓᓄᑦ ᑕᕐᕿᖃᕐᓂᖅ: ᓱᓇᓂᒃ ᓂᕆᐅᕐᑐᓴᐅᓂᕗᑦ
2024-ᒥ ᖁᕝᕙᕆᐊᕐᓯᒪᑎᑦᓯᓂᖅ ᓄᐃᑦᓯᕙᓪᓕᐊᓂᐅᓚᖓᕗᖅ ᐊᓂᒎᑎᔭᖃᕐᓯᒪᓂᕐᓂᒃ ᓯᕗᓪᓕᒥ ᐊᑑᑎᔪᕕᓂᕐᓄᑦ, ᒪᓂᔨᓯᒪᓗᑎᒃ ᐊᒥᓱᑎᒍᑦ ᖃᐅᔨᔭᐅᒋᐊᕐᑎᓯᒍᑎᓄᑦ ᓵᓚᖃᐅᑎᑖᕐᑎᓗᒋᓪᓗ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ:
- ᐱᓇᓱᑦᓯᐊᓯᑎ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎ: ᐱᓇᓱᑦᓯᐊᓯᑎ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎ ᐱᒋᐊᕐᑎᑕᐅᓂᖓ ᓄᓇᓕᒻᒥ ᐋᓐᓂᐊᕕᒻᒥ ᐱᓇᓱᑦᑎᓂᒃ ᑎᒃᑯᐊᓯᒍᓐᓇᕕᖃᕐᑎᓯᕗᖅ ᓄᓇᓕᒻᒥᓂ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ ᐱᓇᓱᐊᒻᒪᕆᐅᑎᒋᓲᖏᓐᓄᑦ. ᑎᒃᑯᐊᓯᒍᑏᑦ ᑐᓂᔭᐅᒍᓐᓇᑐᑦ ᖃᕆᑕᐅᔭᒃᑯᑦ ᓄᕕᐱᕆ 25, 2024-ᖑᓚᐅᕐᑎᓇᒍ. ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᑎᒃᑯᐊᑕᐅᔪᑦ ᑭᓇᓕᒫᒃᑯᓄᑦ ᑐᓴᕐᓴᒥᒃ ᐃᓕᑕᕆᔭᐅᓂᖃᕈᓐᓇᑐᑦ ᐱᓇᓱᐊᕐᓂᕆᓲᒥᓐᓄᑦ ᐃᓚᐅᒍᓐᓇᓗᑎᓗ ᓄᓇᓕᓕᒫᓂ ᐊᒧᔭᑦᓴᓄᑦ ᓵᓚᖃᐅᑎᓄᑦ.
- ᐃᑲᔪᕐᑏᑦ ᓴᐳᑦᔨᔩᓪᓗ: ᓇᑯᕐᓴᖁᒍᑦ ᐃᑲᔪᕐᑎᑎᓐᓂᒃ ᑮᓇᐅᔭᑎᒍᑦ, ᐃᓚᐅᑎᓪᓗᒋᑦ ᐃᓪᓗᓕᕆᔨᒃᑯᑦ ᐊᓪᓚᕕᖓ (KMHB) 8-ᓂᒃ ᑕᕐᕿᓕᒫᒥ ᐊᑭᓖᒍᑎᖃᕐᑎᓯᓂᖏᓐᓄᑦ, ᑯᐊᐸᒃᑯᓂ ᓂᐅᕕᕈᑎᓄᑦ $200-ᕌᕐᑐᓂᒃ, ᐃᓄᐃᒃᑯᑦ ᖃᖓᑦᑕᐅᑎᖃᕐᑎᓯᓂᖏᓐᓄᑦ ᒪᕐᕈᓂᒃ ᐅᑎᕈᑎᓖᓐᓂᒃ. ᑕᒪᒃᑯᓄᖓ ᑐᓂᕐᕈᓯᐊᓄᑦ ᐃᑲᔪᕐᓯᔭᐅᕗᒍᑦ ᐃᓕᑕᕐᓯᔭᖃᕈᓐᓇᓯᐊᕐᓂᒧᑦ ᓴᐳᑦᔨᒍᓐᓇᓂᕐᒧᓗ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᖁᑎᑦᑎᓄᑦ.
ᖃᓄᖅ ᐃᑲᔪᕐᓯᒍᓐᓇᓃᑦ
ᓴᐳᑦᔨᒍᑎᖃᕈᒪᓐᓂᕈᕕᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᓂᒃ ᑖᒃᑯᓂᖓ ᐅᐱᒍᓱᓐᓇᐅᑉ ᑕᕐᕿᖓ ᖄᖏᕐᓯᒪᓕᕐᑎᓗᒍ, ᐊᓪᓚᕕᑦᓴᖅ Audrey.hachey.rr17@ssss.gouv.qc.ca. ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑎᐅᓂᕐᒥᒃ ᐱᓇᓱᒐᕐᑖᕈᒪᓐᓂᕈᕕᑦ, ᐅᖄᕕᒋᓗᒋᑦ ᓄᓇᓕᓐᓂ ᐋᓐᓂᐊᕕᒻᒥᐅᑦ ᐊᓪᓚᕕᒋᓗᒍᓘᓐᓃᑦ direct.allowance.rr17@ssss.gouv.qc.ca
ᑲᑐᑦᔨᓗᑕ, ᓱᕐᖁᐃᓯᓯᒪᑦᓯᐊᕈᓐᓇᖁᒍᑦ ᐃᑲᔪᕐᑕᐅᒋᐊᓕᓐᓂᒃ ᐃᑲᔪᕐᑏᑦ ᐅᐱᒍᓲᑦᔨᔭᐅᑦᓯᐊᓂᖏᓐᓂᒃ ᐃᑲᔪᕐᑕᐅᓯᐊᕐᓗᑎᓗ.