ᑕᓐᓇ ᓄᑖᖅ ᖃᐅᔨᓴᕐᓂᖅ, ᐊᑑᑎᔭᐅᔪᖅ ᓯᑕᒪᓂ ᐃᓄᐃᑦ ᓄᓇᖏᓐᓂ, ᓄᐊᑦᓯᓂᐅᓚᖓᔪᖅ ᑐᑭᓯᒪᐅᑎᑦᓴᐅᔪᓂᒃ ᐅᓪᓗᒥᐅᓕᕐᑐᖅ ᐃᓄᐃᑦ ᖃᓄᐃᑦᑐᑐᐃᓐᓇᓂᒃ ᐅᑭᐅᓕᑦ ᓇᓂᓕᒫᕐᓗ ᓄᓇᓕᓐᓂᑦ ᐱᓯᒪᔪᐃᑦ ᖃᓄᐃᓕᕐᒪᖔᑕ.
ᐃᑲᔪᕐᑕᐅᓱᓂ ᐃᓄᐃᑦ ᑖᐱᕆᒃᑯᓄᑦ, ᑲᓇᑕᓕᒫᒥ ᐃᓄᓐᓂᒃ ᑭᒡᒐᑐᕐᑎᐅᔪᒧᑦ, ᓄᓇᕕᒻᒥ ᐃᓗᓯᓕᕆᔨᒃᑯᑦ ᐱᓇᓱᐊᖃᑎᖃᕐᓱᑎᒃ ᒪᑭᕝᕕᒥ, ᐸᕐᓇᐸᓪᓕᐊᓕᕐᖁᑦ ᐱᒋᐊᕐᑕᐅᓛᓕᕐᓂᖓᓂᒃ ᑲᔪᓯᑎᑕᐅᓛᓕᕐᓂᖓᓂᓪᓗ ᖃᐅᔨᓴᕐᓂᐅᑉ, 2023-ᒥ ᐅᑭᐊᖑᓕᕐᐸᑦ ᐱᒋᐊᓛᕐᑐᓴᐅᔪᖅ.
ᑖᓐᓇ ᖃᐅᔨᓴᕐᓂᖅ ᓯᕗᓂᖃᕋᓱᐊᕐᑐᖅ ᐃᓗᓐᓈᒍᑦ ᐃᓄᐃᑦ ᖃᓄᐃᒻᒪᖔᑕ ᑐᑭᓯᒪᒍᒪᓂᕐᒥᒃ ᐃᓚᖃᕐᓗᓂ ᐱᒻᒪᕆᖁᑕᐅᔪᓂᒃ ᐃᓄᐃᑦ ᖃᓄᐃᖕᖏᓯᐊᕆᐊᖃᕐᓂᖓᓂᒃ ᓱᕃᒍᑎᐅᒍᓐᓇᑐᓂᒃ ᐅᑦᑑᑎᒋᓗᒋᑦ ᐃᓪᓗᖃᕐᓂᖅ, ᓂᕿᖃᑦᓯᐊᓂᖅ, ᐃᓱᒪᒃᑯᑦ ᖃᓄᐃᖕᖏᓯᐊᕐᓂᖅ, ᐊᓐᓂᐊᓯᐅᑕᐅᓂᒃᑯᑦ ᐱᑦᔪᔭᐅᓂᖅ, ᐊᑦᑕᓇᖕᖏᑐᒦᒋᐊᖃᕐᓂᖅ, ᐃᓕᓐᓂᐊᓯᒪᓂᖅ, ᑮᓇᐅᑦᔭᓴᕐᓂᖅ, ᐱᓇᓱᒐᖃᕐᓂᖅ, ᐃᓕᕐᕈᓯᖅ ᐅᖃᐅᓯᕐᓗ.
ᑲᑐᑦᔨᖃᑎᒌᓐᓂᕗᑦ
- ᓯᑕᒣᑦ ᐃᓄᐃᑦ ᓄᓇᑖᕋᓱᐊᕐᓂᒧᑦ ᐱᓇᓱᕝᕕᖏᑦ, ᑎᓕᓯᒪᔭᖏᓪᓘᓃᑦ, ᑲᑐᑦᔨᖃᑎᒋᔭᐅᑎᓪᓗᒋᑦ ᐃᓄᐃᑦ ᑕᐱᕇᑦ ᑲᓇᑕᒥ ᑭᒡᒐᑐᕐᑎᖏᑦ, ᐱᓇᓱᖃᑎᒌᒍᑎᓖᑦ ᓄᐃᑦᓯᖃᑎᒌᑦᓱᑎᒃ ᑲᔪᓯᑎᑦᓯᖃᑎᒌᑦᓱᑎᓪᓗ ᑲᓇᑕᒥᐅᑦ ᐃᓄᐃᑦ ᖃᓄᐃᒻᒪᖔᑕ ᖃᐅᔨᓴᕐᓂᒥᒃ.
- ᑲᓇᑕᓕᒫᒥ ᐃᓄᐃᑦ ᖃᓄᐃᒻᒪᖔᑕ ᖃᐅᔨᓴᕐᓂᒥᒃ ᐱᓇᓱᖃᑎᒌᒍᑎᓖᑦ (NIHSWG), ᐱᓇᓱᖃᑎᖃᕐᓱᑎᒃ ᐸᕐᓀᑎᐅᓂᕐᒧᑦ ᑲᑎᒪᔨᓂᒃ ᐱᓯᒪᔪᓂᒃ ᓯᑕᒣᓂᑦ ᐃᓄᐃᑦ ᓄᓇᖏᓐᓂᑦ, ᓯᕗᓕᕐᐳᑦ ᖃᐅᔨᓴᕐᓂᐅᑉ ᐱᕙᓪᓕᐊᔭᐅᓂᓕᒫᖓᓂᒃ, ᑲᔪᓯᑎᑕᐅᓂᖓᓂᒃ, ᑐᓴᕐᑎᓯᒍᑕᐅᓂᖏᓐᓂᓗ ᖃᐅᔨᓴᐅᑎᕕᓃᑦ.
- NIHSWG ᐱᓯᒪᕗᑦ ᓯᑕᒣᓂᑦ ᐃᓄᐃᑦ ᓄᓇᓕᓕᒫᓂ ᐱᓇᓱᕝᕕᖏᓐᓂᑦ, ᐅᑯᓇᖕᖓᓗ ᐃᓄᐃᑦ ᑕᐱᕇᑦ ᑲᓇᑕᒥ, ᑯᐯᒃᑯᑦ ᖃᓄᐃᖕᖏᓯᐊᕐᑐᓴᐅᓂᕐᒧᑦ ᐊᓪᓚᕕᖓᓂᑦ/ᓄᓇᖃᕐᕕᐅᔪᓪᓗ ᖃᓄᐃᖕᖏᓯᐊᕐᑐᓴᐅᓂᕐᒧᑦ ᐊᓪᓚᕕᖓᓂᑦ, ᐸᐅᒃᑑᑏᑦ ᐃᓄᐃᑦ ᐊᕐᓀᑦ ᑲᓇᑕᒥᐅᑦ, ᐃᓄᐃᑦ ᐅᑭᐅᕐᑕᑐᕐᒥᐅᒍᖃᑎᒌᑦ ᑲᑎᒪᔨᖏᓐᓂᑦ ᐊᒻᒪᓗ ᑲᓇᑕᒥᐅᑦ ᐃᓄᐃᑦ ᐅᕕᒐᕐᑐᐃᑦ ᑲᑎᒪᔨᖏᓐᓂᑦ.
ᓱᒧᑦ ᓄᑖᒥᒃ ᖃᐅᔨᓴᕐᓂᖃᓯᒋᕚ?
ᖃᓄᐃᑉᐱᑖ? ᑲᓇᑕᒥ ᐃᓄᓐᓂᒃ ᖃᓄᐃᒻᒪᖔᑕ ᖃᐅᔨᓴᕐᓂᖅ ᐊᑦᔨᒋᔭᐅᖕᖏᑐᖅ ᖃᐅᔨᓴᕐᓂᐅᒌᖃᑦᑕᓯᒪᔪᓄᑦ ᓄᓇᕕᒻᒥ, ᓄᐃᑕᐅᓯᒪᒐᒥ ᐃᓄᓐᓄᑦ ᑲᓇᑕᒦᐅᖑᖃᑎᒌᓄᑦ.
ᐊᑑᑎᕙᓐᓂᐊᑐᑦᓴᓕᐊᖑᒪᔪᖅ ᐊᕐᕌᒍᐃᑦ ᑕᓪᓕᒪᑕᒫᑦ ᖃᐅᔨᒪᒍᑎᐅᕙᓐᓂᐊᓗᓂ ᓄᑕᐅᓯᓕᑎᕐᓯᒪᑦᓯᐊᑐᑎᒍᑦ ᖃᓄᐃᓘᕐᑎᐅᔪᑦ ᑐᑭᓯᒪᑦᓯᐊᖁᓪᓗᒋᑦ ᖃᓄᐃᒻᒪᖔᑕ ᓄᓇᕕᒻᒥᐅᑦ, ᑐᑭᑕᕈᓐᓇᓯᐊᖃᑦᑕᖁᓪᓗᒋᓪᓗ ᖃᓄᐃᖏᑑᒍᑎᐅᒍᓐᓇᑐᐃᑦ ᒥᑦᓵᓄᑦ ᒪᓕᒐᐅᒍᓐᓇᐸᓐᓂᐊᑐᓂᓪᓗ ᐅᖄᒍᑎᖃᖃᑦᑕᓗᑎᒃ. ᖃᐅᔨᓴᕐᓂᒧᑦ ᓄᐊᑕᐅᒪᔪᑦ ᓇᐅᓕᒫᓄᑦ ᐃᕐᐸᑐᑦᓴᔭᐅᖕᖏᑐᑦ, ᓇᐅᑐᐃᓐᓇᓗ ᖃᐅᔨᓴᕈᑎᕕᓂᐅᔪᓂᒃ ᐊᑐᕈᒪᑐᐊᕈᓂ ᖃᐅᔨᓴᕆᐊᓪᓚᕈᑎᒋᒍᒪᓗᒋᑦ ᐅᕝᕙᓗᓐᓃᑦ ᓱᑯᐃᔦᓂᕐᒨᓕᖓᑎᑦᓯᒍᒪᔪᖅ ᐊᖏᕐᑕᐅᓯᒪᕐᖄᕆᐊᓕᒃ ᑲᒪᔨᐅᑎᑕᐅᑦᓱᑎᒃ ᑲᑎᒪᔨᐅᔪᓄᑦ.
ᑕᑯᒋᐊᕐᓗᑎᑦ ᖃᕆᑕᐅᔭᒃᑯᑦ ᐅᕗᖓ https://nationalinuithealthsurvey.ca/about/ ᑐᑭᓯᒋᐊᑦᓯᐊᕈᒪᒍᕕᑦ ᖃᓄᐃᑉᐱᑖ 2023-ᒥ ᖃᐅᔨᓴᕐᓃᑦ ᐱᓪᓗᒋᑦ.
* ᐃᓄᕕᐊᓗᐃᑦ , ᓄᓇᕕᒃ, ᓄᓇᕗᑦ, ᓄᓇᑦᓯᐊᕗᑦ
