ᑲᐴᕆᓂᖅ ᐳᕙᒃᑯᑦ ᖁᐱᕐᕆᒌᒃᑯᑎᒧᑦ

ᓱᓇᐅᕚ ᐳᕙᒃᑯᑦ ᖁᐱᕐᕆᓂᖅ (RSV)-ᖑᓂᕋᕐᑕᖅ

RSV ᐳᕙᒃᑯᑦ ᖁᐱᕐᕆᓂᖅ ᓄᐃᕙᓪᓗᓲᖅ ᓂᓪᓚᓱᖃᑦᑕᓕᑐᐊᕐᒪᑦ, ᐱᓗᐊᕐᑐᒥᒃ ᐅᑭᐊᒥᑦ ᐅᐱᕐᖓᓴᒧᑦ.

RSV ᐃᕐᐸᓲᖅ ᑕᒋᐅᑦᓴᓂᖓᒍᑦ ᖁᐃᕐᑐᓂᖓᒍᓪᓘᓃᑦ ᐃᓅᑉ ᐳᕙᒻᒥᒍᑦ ᖁᐱᕐᕆᓯᒪᔫᑉ, ᐅᕝᕙᓗᓐᓃ ᐊᑦᑐᐃᓂᒃᑯᑦ ᖁᐱᕐᕈᑯᓗᑦᑕᓯᓯᒪᔪᒥᒃ. ᓄᐃᓲᑦ ᒪᓗᓐᓇᐅᑎᖏᑦ ᓄᕙᑐᐃᓐᓇᓂᐅᔮᕐᓱᑎᒃ, ᑭᓯᐊᓂ ᖃᓂᒻᒪᓚᕆᒍᑎᐅᒍᓐᓇᑐᖅ ᐳᕙᐅᑉ ᑐᕐᓱᐊᖏᓐᓂ (ᐳᓪᓕᓕᕐᓂᑯᑦ) ᐳᕙᓐᓂᓘᓃᑦ (ᐃᒻᒪᓂᒃᑯᑦ).  ᐱᔭᕆᐊᑦᑐᑐᐊᕈᓂ ᖃᓂᒻᒪᕖᖕᖓᑐᖅ ᐋᓐᓂᐊᕕᒻᒦᓚᕿᑐᐃᓐᓇᕆᐊᓕᒃ ᑐᖁᒍᓐᓇᑐᐊᓪᓛᑦ.

ᓱᒧᑦ ᕿᑐᕐᖓᕋ ᓴᐳᑎᓯᒪᒋᐊᖃᕐᐸᕋ ᑖᑦᓱᒪᖕᖓᑦ ᖁᐱᕐᕈᒥᑦ?

RSV ᐋᓐᓂᐊᕕᒻᒦᓚᕿᐅᑎᐅᓂᕐᐸᐅᓲᖅ ᓄᑕᕋᓛᓄᑦ ᐅᑭᐅᖃᕋᑕᖕᖏᑐᓄᑦ.  ᑲᐱᔭᐅᒪᓂᖅ ᐱᐅᓂᕐᐸᐅᖏᓐᓇᑐᖅ ᓴᐳᑦᔨᓯᒪᒍᑎᐅᓗᓂ ᕿᑐᕐᖓᓂᒃ ᑖᑦᓱᒪᖕᖓ ᐳᕙᒃᑯᑦ ᖁᐱᕐᕆᕈᑎᐅᒍᓐᓇᑐᒥᑦ ᐊᓯᖏᓐᓂᓗ ᐱᔭᕆᐊᑦᑐᕈᑎᐅᒍᓐᓇᑐᓂᑦ ᑖᑦᓱᒧᖓ ᖃᓂᒻᒪᑐᖃᕈᓂ.

ᑲᐱᔭᐅᓂᖅ RSV-ᑖᕆᒃᑯᑎᒧᑦ ᖃᓄᐃᓕᖓᕙ?

ᑲᐱᔭᐅᓂᖅ RSV-ᑖᕆᒃᑯᑎᒧᑦ ᖃᓂᒻᒪᕇᒃᑯᑎᓂᒃ ᑎᒥᒨᕐᓯᒍᑎᐅᔪᖅ, ᐊᑕᐅᓯᐊᕐᓗᓂ ᑲᐱᔭᐅᓂᖅ ᐱᐊᕌᕉᓂᖓᓂ ᖃᓂᒪᓐᓇᖅ ᐱᑕᖃᕉᑕᕆᖃᑦᑕᓂᖓᓂ, ᐅᑦᑑᑎᒋᓗᒍ ᐅᑭᐊᕐᖃᒥᐅᑎᓪᓗᒍ, ᖁᐱᕐᕈᖅ ᓄᐃᕙᓪᓕᐊᓯᓲᖑᒻᒪᑦ.  ᑯᐴᑎᐅᑉ ᐃᒪᖓ ᖃᓂᒪᓐᓇᒥᒃ ᐹᒍᑎᒃ Nirsevimab-ᖑᓂᕋᕐᑕᖅ, ᑎᒥᐅᑉ ᐹᒍᑎᒋᒍᓐᓇᑕᖓ RSV-ᒥᒃ ᑕᓪᓕᒪᓄᑦ ᑕᕐᕿᓄᑦ, ᑖᓐᓇ ᖁᐱᕐᕈᖅ ᓄᐃᑕᒍᓐᓇᒪᑦ ᑌᒫᒃ ᐊᑯᓂᕐᑎᒋᔪᒥᒃ.

ᑭᓇᒃᑰᑦ ᑲᐱᔭᐅᒍᓐᓇᐸᑦ Nirsevimab-ᒧᑦ?

ᑲᐴᕆᓂᖅ RSV-ᑖᕆᒃᑯᑎᒧᑦ ᐊᑐᐃᓐᓇᐅᓚᖓᔪᖅ ᑯᐯᒻᒥ ᑕᒡᒐᓂ ᐊᕐᕌᒍᒥ, ᖃᓂᒪᓐᓇᐅᑉ ᓄᐃᕕᒋᓲᖓ ᐊᑑᑎᓕᕐᐸᑦ, ᐃᓅᓕᕐᖃᒥᓕᒫᑦᓯᐊᖅ ᐱᐊᕌᕈᐃᓪᓗ 8-ᓂᒃ ᑕᕐᕿᖃᕋᑕᖕᖏᑐᑦ ᑲᐱᔭᐅᖃᑦᑕᓂᐊᕐᑐᑦ.  ᐱᐊᕃᑦ 19-ᓂᒃ ᑕᕐᕿᓖᑦ ᓄᑲᕐᓰᓗᓐᓃᑦ ᖃᓄᐃᒍᑎᖃᑐᐊᕈᑎᒃ ᑲᐱᔭᐅᖁᔭᐅᒻᒥᔪᑦ.

ᓱᓀᑦ ᓱᕐᕋᕈᑎᐅᒍᓐᓇᑐᑦ ᖃᐅᔨᒪᔭᐅᕙᑦ?

ᑲᐱᔭᐅᔪᕕᓂᐅᔪᖃᓕᕐᐸᑦ Nirsevimab-ᒧᑦ ᓱᕐᕋᕈᑎᐅᓂᕐᐸᐅᓲᑦ ᐅᑯᐊ, ᐱᖒᓕᕐᓂᖅ (ᐊᐅᐸᓗᑦᑕᑲᓪᓛᑦ ᓄᐃᑦᓱᑎᒃ ᐅᕕᓂᒻᒥ).  ᐃᓚᖓᓂ ᐱᐊᕃᑦ ᐆᓇᕿᓯᒍᓐᓇᒥᔪᑦ ᐅᕝᕙᓗᓐᓃᑦ ᐊᐅᐸᓗᑦᓯᓂ ᐳᓪᓕᓕᕐᓗᓂᓗᓐᓃᑦ ᑲᑉᐳᒥᒍᑦ.  ᑕᒪᒃᑯᐊ ᓱᕐᕋᕈᑕᐅᓲᑦ ᐊᑦᑕᓇᓲᖑᖕᖏᑐᑦ, ᐃᓱᕐᕆᖏᑦᑑᓚᕿᒍᑕᐅᒍᓐᓇᕋᓗᐊᕐᓱᑎᒃ.

ᑲᐴᑎᐅᑉ ᐃᒪᖓ ᐊᑦᑕᓈᖕᖏᓚ?

ᑲᐴᑎᐅᑉ ᐃᒪᖓ RSV-ᑖᕆᒃᑯᑎᒃ ᐊᑦᑕᓇᖕᖏᑐᖅ, ᖃᐅᔨᓴᕐᑕᐅᒍᑎᐅᓯᒪᔪᑦ ᐊᒥᓱᑦ ᓄᐃᑦᓯᓯᒪᔪᑦ ᐊᑦᑕᓇᖕᖏᑑᓂᖓᓂᒃ ᐊᑑᑎᖃᑦᓯᐊᓂᖓᓂᓪᓗ.

ᖃᓄᖅ Nirsevimab-ᒧᑦ ᑲᐱᔭᐅᑎᑦᓯᒍᓐᓇᖁᖓ?

Nirsevimab ᐊᑐᐃᓐᓇᑎᑕᐅᓚᖓᔪᖅ ᐃᓅᓕᕐᖃᒥᓕᒫᓄᑦ ᐃᓄᓕᑐᐊᕐᐸᑕ.  ᖃᐅᔨᒋᐊᕐᕕᖃᕈᓐᓇᒥᔪᑎᑦ ᓄᓇᓕᑦᓯ ᐋᓐᐊᕕᖓᓂᒃ ᑐᑭᓯᒋᐊᕐᕕᒋᓗᒋᑦ ᕿᑐᙰᑦ ᑲᐱᔭᐅᔪᑦᓴᐅᒪᖔᑦ ᐅᕝᕙᓗᓃᑦ ᑲᐱᔭᐅᔪᑦᓴᓕᐊᕆᓗᒍ.