ᓄᓇᕕᒻᒥ, ᐱᖓᓱᐃᓂᒃ ᐱᒍᑦᔨᖃᓲᖑᕗᖅ ᐃᓚᒌᑦᑐᓂᒃ ᐅᖁᒣᓪᓕᐅᓂᖃᕐᑐᓂᒃ
ᐃᓗᓯᓕᕆᓂᕐᒥᒃ ᓄᓇᓕᓐᓂᓗ ᐱᒍᑦᔨᒍᑎᓂᒃ
ᐅᕕᒃᑲᓂᒃ ᓴᐳᑦᔨᓂᕐᒧᑦ ᐱᒍᑦᔨᒍᑎᓂᒃ
ᒪᒥᓭᓂᕐᒧᑦ ᐱᒍᑦᔨᒍᑎᓂᒃ
ᐃᓗᓯᓕᕆᓂᕐᒥᒃ ᓄᓇᓕᓐᓂᓗ ᐱᒍᑦᔨᒍᑎᓄᑦ
ᐃᓗᓯᓕᕆᓂᕐᒧᑦ ᓄᓇᓕᓐᓂᓗ ᐱᒍᑦᔨᒍᑏᑦ ᐊᑐᐃᓐᓇᐅᑎᑕᐅᔪᑦ ᐃᓄᓐᓄᑦ (0-ᒥᑦ 100-ᓄᑦ ᑎᑭᑦᑐᓂᒃ ᐅᑭᐅᓕᓐᓄᑦ) ᐊᑖᒍᕐᑐᓂᒃ ᐅᑯᐊ ᐱᖁᔦᑦ ᐱᑦᔪᑎᒋᑦᓱᒋᑦ ᐃᓗᓯᓕᕆᓂᕐᒧᑦ ᐱᒍᑦᔨᒍᑏᑦ. ᑖᒃᑯᐊ ᐃᑎᕐᕕᒋᔭᐅᓗᐊᖑᐊᑎᑕᐅᔪᑦ ᑲᒪᒋᐊᑦᓴᐅᑎᒋᓲᓄᑦ ᐃᓄᓕᕆᓂᕐᒧᑦ ᐱᒍᑦᔨᓂᕐᒥᒃ. ᑕᒪᒃᑯᐊ ᐱᒍᑦᔨᒍᑏᑦ ᐱᕕᖃᕐᑎᑕᐅᒍᓐᓇᑐᑦ ᐃᑲᔪᕋᓱᐊᕈᑎᐅᓂᖃᕐᓱᑎᒃ ᑭᓯᐊᓂ.
ᐱᒍᑦᔨᒍᑏᑦ ᐃᓚᒌᓂᒃ ᐃᓱᐃᓪᓕᐅᑐᓂᒃ ᓇᒻᒪᓈᕐᑎᑕᐅᒋᐊᕐᓯᒪᔪᑦ ᒪᓕᑦᓱᒋᑦ ᐃᓚᒌᓄᑦ ᑭᖕᖒᒪᒋᔭᐅᔪᓂᒃ; ᐊᑦᔨᒋᖏᑑᓂᖃᕐᓱᑎᒃ ᓴᐳᒻᒥᒍᑎᐅᓯᑐᐃᓐᓇᕆᐊᓕᓐᓂᒃ ᐊᑯᓃᕐᑐᒥᓗ ᑲᒪᒋᐊᓪᓚᓯᒪᐅᑎᑦᓴᓂᒃ. ᐅᑦᑐᕋᐅᑎᐅᑎᓪᓗᒋᑦ ᒪᑯᐊ:
- ᑮᓇᐅᔭᑎᒍᑦ ᓱᓇᒐᓚᑦᑎᒍᓪᓘᓃᑦ ᓴᐳᒻᒥᒍᑎᑦᓴᓂᒃ ᐱᑦᔪᔨᒍᑎᑦᓴᒧᑦ ᓂᕿᖃᕐᓂᑯᑦ ᐊᓐᓄᕌᖃᕐᓂᑯᓪᓘᓃᑦ ᑭᖕᖒᒪᒋᔭᐅᔪᓂᒃ ᐃᓚᒌᖑᔪᕐᓄᑦ ᐅᖁᒣᑦᑐᑯᕐᓂᖃᕐᑐᓄᑦ;
- ᑲᑎᒪᓂᐊᕈᓯᕐᓂᒃ ᐱᕙᓪᓕᐊᑎᑦᓯᒐᓱᐊᕐᓂᒧᑦ ᐱᐊᕋᕐᓄᑦ ᐊᖓᔪᕐᖄᕆᔭᐅᑦᓯᐊᕈᓯᕐᒧᑦ;
- ᐃᓄᑑᓇᕐᑎᑐᓂᒃ ᐃᓚᒌᓂᓪᓘᓃᑦ ᑲᒪᒋᐊᓪᓚᓯᒪᒍᑎᑦᓴᓂᒃ.
ᐅᕕᒃᑲᓂᒃ ᓴᐳᑦᔨᓂᕐᒧᑦ ᐱᒍᑦᔨᒍᑏᑦ
ᐅᕕᒃᑲᓂᒃ ᓴᐳᑦᔨᔩᑦ ᑐᕌᒐᖃᕐᐳᑦ ᐱᒍᑦᔨᒍᓐᓇᓲᖑᓚᖓᓗᑎᒃ ᐅᕕᒃᑲᓂᒃ ᐃᓄᖏᓐᓂᒃ ᐅᑭᐅᓕᓐᓂᒃ 0;ᒥᑦ 18ᔾᓄᑦ ᑖᒃᑯᐊᓗ ᐃᓚᖏᓐᓂᒃ ᐊᑦᑕᓇᕐᑑᒥᖁᓇᒋᑦ ᐱᕙᓪᓕᐊᓂᖃᖁᒧᓪᓗ, ᐊᑖᒍᕐᓱᑎᒃ ᐅᕕᒃᑲᓂᒃ ᓴᐳᑦᔨᔨᐅᓂᕐᒧᑦ ᐱᖁᔦᑦ ᐊᒻᒪᓗ ᐅᕕᒃᑲᓂᒃ ᐱᓗᑲᑦᑐᕕᓂᕐᓂᒃ ᐃᕐᖃᑐᐃᔨᑎᒍᕐᑎᓯᓂᕐᒧᑦ ᐱᖁᔦᑦ.
ᐅᕕᒃᑲᓂᒃ ᓴᐳᑦᔨᔩᑦ ᐱᒍᑦᔨᒍᑎᖃᓲᑦ ᐃᑲᔪᕐᓯᑐᐃᓐᓇᓂᒃᑯᓘᓐᓃᑦ ᑎᓕᔭᐅᒪᓂᒃᑯᓘᓐᓃᑦ, ᒪᑯᓂᖓ ᐱᔪᖃᑐᐊᕐᒪᑦ:
- ᐃᐱᕃᓐᓇᑕᐅᒪᔪᖃᓕᑐᐊᕐᒪᑦ
- ᐃᑉᐱᒋᔭᐅᖕᖏᑑᔪᖃᓕᑐᐊᕐᒪᑦ
- ᐃᓱᒪᖏᑦᑎᒍᑦ ᐊᑐᓗᑲᑦᑕᐅᔪᖃᓕᑐᐊᕐᒪᑦ
- ᓄᓕᐊᕐᓂᓗᑕᐅᔪᖃᓕᑐᐊᕐᒪᑦ
- ᑎᒥᒃᑯᑦ ᐊᑐᓗᑲᑦᑕᐅᔪᖃᓕᑐᐊᕐᒪᑦ
- ᐱᐅᓯᕐᓱᓯᐊᕐᑐᖃᕈᓐᓀᑐᐊᕐᒪᑦ
ᐅᕕᒃᑲᓂᒃ ᓴᐳᑦᔨᔩᑦ ᐅᖄᓚᕕᐅᓲᖑᓂᕐᒥᒍᑦ ᑐᓴᕐᑎᑕᐅᒍᑎᓂᒃ, ᓇᓗᓀᔭᓲᕐᒥᓂᒃ ᐊᒻᒪᓗ ᔭᕆᐊᖃᑐᐊᕐᒪᑦ, ᑲᒪᒋᐊᓪᓚᕈᑎᒋᓯᑦᓱᒍᑦ ᐃᓚᒌᖑᔪᓂᒃ. ᑖᒃᑯᐊ ᑲᒪᒋᔭᖃᓲᖑᒻᒥᔪᑦ ᐱᐊᕋᕐᒥᒃ ᑲᒪᒍᒪᔪᕐᓯᐅᓱᑎᒃ ᑐᔪᕐᒥᐅᕕᐅᓯᒪᒍᓐᓇᑐᓂᒃ. ᑕᒪᒃᑯᐊᓕ ᐅᕕᒃᑫᑦ ᐱᓗᑲᑦᓯᒪᔪᑦ ᐱᑦᔪᑎᒋᓗᒋᑦ, ᐅᕕᒃᑲᓂᒃ ᓴᐳᑦᔨᔨᒃᑯᑦ ᓇᓗᓀᔦᓯᓲᑦ ᑖᑦᓱᒥᖓ ᐅᕕᒃᑲᒥᒃ ᐱᓗᑲᑦᑕᕕᓂᖓᓂᓗ, ᔭᕆᐊᖃᕈᓂᓗ, ᐃᒣᓕᒋᐊᖁᔨᒐᓱᐊᕐᓗᒋᑦ ᑖᑦᓱᒪᐅᑉ ᓱᒋᐊᕐᑕᐅᒍᑎᖏᓐᓄᑦ ᑲᒪᒋᒋᐊᓪᓚᓂᐊᓕᕐᒥᓗᒍᓗ.
ᒪᒥᓴᕐᕖᑦ ᐱᒍᑦᔨᒍᑎᓄᑦ
ᒪᒥᓭᓂᕐᒥᒃ ᐱᒍᑦᔭᐅᔪᖃᓲᖑᕗᖅ ᐃᓅᓯᕐᒥᓂᒃ ᐊᕐᕿᒋᐊᕆᒐᓱᐊᕐᑐᖃᓕᑐᐊᕐᒪᑦ ᒪᒥᓴᕋᓱᐊᕐᑐᖃᓕᕐᒪᓘᓐᓃᑦ ᐅᕕᒃᑫᑦ ᐃᓄᖁᑎᖏᓐᓂᒃ ᐅᑭᐅᓕᓐᓄᑦ 0-ᒥᑦ 18-ᒧᑦ, ᐱᐅᓯᕐᓱᓯᐊᖏᓂᕐᒥᒃ, ᐃᓱᒪᑦᓯᐊᖏᓐᓂᑯᓪᓘᓃᑦ ᐃᓚᒌᑎᒍᓪᓘᓃᑦ ᐱᓀᓗᑕᖃᕐᓂᑯᖏᓐᓄᑦ, ᑐᑭᒧᐊᑦᑎᑕᐅᒋᐊᖃᓕᑐᐊᕐᒪᑕ ᓴᐳᒻᒥᔭᐅᓗᑎᓪᓗ, ᒪᒥᓭᓂᕐᒧ ᐱᒍᑦᔨᒍᑏᑦ ᐃᓚᖃᓲᑦ ᒪᑯᓂᖓ:
- ᓯᓚᑖᓂᒥᐅᒧᑦ ᐃᓕᓭᔨᒧᑦ ᐱᒍᑦᔭᐅᔪᖃᕈᓐᓇᓱᓂ 14-ᓂᒃ ᓄᓇᓕᓐᓂᒃ. ᑖᒃᑯᐊ ᐃᓕᓭᔩᑦ ᐱᓇᓱᐊᖃᑎᖃᓪᓚᕆᓲᑦ ᐃᓚᒌᖑᔪᕐᓂᒃ ᐊᕐᓵᑕᐅᑦᑌᓕᒍᑎᑦᓴᖏᓐᓄᑦ ᐅᕝᕙᓘᓐᓃᑦ ᐅᕕᒃᑲᒥᒃ ᐃᓚᒥᓅᕐᑎᓯᕙᓪᓕᐊᓂᕐᒧᑦ;
- ᒪᕐᕉᓂᒃ ᒪᒥᓭᕕᖃᕐᓱᓂ ᐊᖑᑎᓄᓪᓗ ᐊᕐᓇᓄᓪᓗ ᐱᒍᑦᔨᕕᒻᒥᒃ ᐅᑭᐅᓕᓐᓄᑦ 6-ᒥᑦ 12-ᒧᑦ;
- ᒪᕐᕉᓂᒃ ᑲᑎᒪᐅᑎᔪᓄᑦ ᐊᖏᕐᕋᖃᕐᑎᑕᐅᔪᖃᕐᓱᓂ ᐊᖑᑎᓄᓪᓗ ᐊᕐᓇᓄᓪᓗ ᐅᑭᐅᓕᓐᓄᑦ 12-ᒥᑦ 18-ᒧᑦ;
- ᒪᒥᓭᕕᖃᕐᓱᓂ ᐊᖑᑎᓅᓕᖓᔪᒥᒃ ᐅᑭᐅᓕᓐᓄᑦ 12-ᒥᑦ 18-ᒧᑦ;
- ᒪᒥᓭᕕᖃᕐᓱᓂ ᐊᕐᓇᓅᓕᖓᔪᒥᒃ ᐅᑭᐅᓕᓐᓄᑦ 12-ᒥᑦ 18-ᒧᑦ;
- ᑎᒍᒥᐊᕐᕕᐅᒍᓐᓇᑐᒥᒃ ᓱᕈᓯᕐᓂᒃ ᓱᒋᐊᕐᑕᐅᓯᒪᓂᑯᕐᓂᒃ ᐊᑖᒍᑦ ᐱᓗᑲᑦᑐᒧᑦ ᐅᕕᒃᑲᓅᓕᖓᔪᐃᑦ.
ᑕᒪᒃᑯᐊ ᐱᒍᑦᔨᒍᑎᐅᒍᓐᓇᑐᑦ ᐅᕕᒃᑲᓂᒃ ᓴᐳᑦᔨᔨᖏᓐᓄᑦ ᑲᔪᓯᑎᑕᐅᒍᓐᓇᓲᑦ ᐊᒻᒪᓗᑦᑕᐅᖅ ᐃᓄᓕᕆᓂᕐᒥᖅ, ᑭᓯᐊᓂ ᑎᒍᔭᐅᒪᔪᕐᓂᐅᖏᑦᑐᖅ ᑕᒪᓐᓇ ᑲᒪᒋᔭᐅᓲᖑᖏᒪᑦ ᐅᕕᒃᑲᓂᒃ ᓴᐳᑦᔨᔨᓄᑦ.