ᑲᐴᕆᓂᖅ ᐱᐊᕋᕐᓂᒃ ᐳᕐᑐᓂᓕᓐᓂᒃ 7-ᒥᒃ

ᐳᕐᑐᓂᓖᑦ 7-ᒥᒃ, ᐱᒻᒪᕇᑦ ᑲᐴᕆᒍᑏᑦ ᐊᑐᐃᓐᓇᐅᑎᑕᐅᓛᓕᕐᒥᔪᑦ ᑲᐴᕆᓂᖃᓕᕐᐸᑦ ᐃᓕᓐᓂᐊᕕᒻᒥ:

  • HPV-ᖑᓂᕋᕐᑕᖅ ᓇᓕᒃᑳᑯᑦ ᐋᓐᓂᐊᑖᕇᒃᑯᑎᒃ (ᑐᖓᓕᐊ ᑲᐱᔭᐅᓂᐅᑉ)
  • ᖃᕆᑕᐅᑉ ᐳᓪᓕᓕᕇᒃᑯᑎᖓ
  • ᓱᕐᓗᑯᑦ ᐃᒡᒌᐊᑯᓪᓗ -ᐊᓪᓕᕉᑉ ᖁᖓᓯᐅᓪᓗ ᓄᑭᖏᒍᑦ ᐋᓐᓂᐊᑖᕇᒃᑯᑎᒃ ᐊᑕᐅᑦᓯᑰᑦ ᑲᐱᔭᐅᒍᑎᒃ

ᐋᓐᓂᐊᓯᐅᕐᑎ ᖃᐅᔨᒐᓱᐊᓕᕋᔭᕐᑐᖅ ᕿᑐᕐᙰᑦ ᑲᐱᔭᐅᓯᒪᐅᑎᖃᑦᓯᐊᒪᖔᑦ ᓱᓇᒥᑦᑐᓂᒃ ᐃᑉᐱᒋᓗᒋᑦ ᐅᑭᐅᖏᑦ.  ᕆᐊᖃᕈᓂᓗ, ᐋᓐᓂᐊᓯᐅᕐᑎ ᖃᐅᔨᑎᑦᓯᒐᔭᕐᒥᔪᖅ ᖃᓄᐃᑦᑐᓂᒃ ᑲᐱᔭᐅᒍᑎᖃᕆᐊᖃᕐᒪᖔ ᕿᑐᕐᙰᑦ ᓴᐴᓗᑕᖃᑦᓯᐊᖁᓪᓗᒍ.

ᑖᓐᓇ ᑲᐴᕆᓂᖅ ᑭᖑᓪᓕᐸᐅᓕᕐᑐᖅ ᐱᐊᕋᐅᑉ ᑲᐱᔭᐅᕙᒋᐊᖃᕈᑎᒋᕙᑦᑕᖏᓐᓂ.  ᑌᒣᒻᒪᑦ ᐊᑑᑎᒋᐊᖃᓪᓚᕆᑦᑐᖅ ᐱᐊᕋᐅᑉ ᓴᐴᓗᑕᕆᒋᐊᓕᖏᑦ ᓱᓇᒥᑦᓯᐊᖁᓪᓗᒋᑦ ᐃᓄᒻᒪᕆᕈᓚᐅᕋᓂ.

ᐅᑯᐊ ᖃᐅᔨᒪᔭᐅᒋᐊᓖᑦ ᖃᖓᐅᒐᔭᕐᒪᖔᑦ ᑲᐴᕆᓂᖅ ᐊᒻᒪᓗ ᓱᓇᓄᑦ ᐋᓐᓂᐊᖑᒍᓐᓇᑐᓄᑦ ᓴᐴᓗᑕᓕᐅᕈᑎᐅᒻᒪᖔᑕ.

ᓱᓇᐅᕙ HPV-ᖑᓂᕋᕐᑕᖅ

HPV ᖁᐱᕐᕈᑯᓗᖓ ᐃᕐᐸᕈᓐᓇᓂᕐᐸᐅᔪᖅ.  ᐁᑦᑐᑑᑎᐅᑦᓴᐅᑎᒋᐊᐱᒍᓐᓇᓱᓂ ᑲᒡᒍᑎᑖᕈᑎᐅᒍᓐᓇᑐᖅ ᐊᑦᔨᒌᖕᖏᑐᓂᒃ ᓂᕕᐊᕐᓯᐊᓂ ᓱᕈᓯᕐᓂᓗ, ᐅᑦᑑᑎᒋᓗᒍ ᓇᓕᒃᑳᑯᑦ, ᐃᒡᒋᐊᑯᑦ ᐃᑎᒃᑯᓗ.  ᑕᒪᒃᐊ  ᑲᒡᒍᑏᑦ (ᐋᓐᓂᐊᑦ) ᓄᐃᓚᕿᓲᑦ ᐊᕐᕌᒍᐃ ᐊᒥᓱᒐᓓᑦ ᐊᓂᒍᑐᐊᕐᒪᑕ ᑕᒪᑦᓱᒥᖓ ᐋᓐᓂᐊᖃᓕᕐᑐᕕᓂᐅᔪᖃᕐᑎᓗᒍ.  HPV ᐅᖕᖑᑖᕐᑎᓯᒍᓐᓇᒥᔪᖅ ᓇᓕᒃᑳᑯᑦ.

ᖃᓄᖅ HPV ᐃᕐᐸᓲᖑᕙ?

HPV ᐃᕐᐸᓲᖅ ᓄᓕᐊᕐᓂᑯᑦ, ᓄᕙᕈᔪᕐᑎᒍᑦ ᐊᑑᔭᑯᑖᑦᑐᖃᑐᐊᕐᒪᑦ ᐅᕕᓂᒻᒥᒃ ᐅᑦᑑᑎᒋᓗᒍ, ᖃᓂᒃᑯᑦ, ᐅᑦᓱᑯᑦ ᐃᑎᒃᑯᓗᓐᓃᑦ ᑌᒣᑦᑐᒥᒃ ᐋᓐᓂᐊᓕᒻᒧᑦ.  ᑖᓐᓇ ᖁᐱᕐᕈᖅ ᐁᑦᑐᑎᐅᓲᖅ ᐃᑦᓯᒍᓂᐅᒍᓐᓇᑐᑎᒍᑦ, ᐅᓱᒃ ᐅᑦᓱᒧᑦ ᑐᕐᖁᖏᒃᑲᓗᐊᕐᐸᑦ.

ᑌᒪᖕᖓᓕᒫᒐᓚᒃ, ᐃᓄᒃ ᖃᐅᔨᒪᓲᖑᖕᖏᑐᖅ HPV ᖃᕐᒪᖔᒻᒥ ᒪᓗᓐᓇᐅᑎᖃᓲᖑᖕᖏᒪᑦ.  ᐃᓄᒃ ᑌᒣᑦᑐᒥᒃ ᐋᓐᓂᐊᓕᒃ ᐁᑦᑐᑑᑎᖃᕈᓐᓇᑐᖅ ᖃᐅᔨᒪᖕᖏᓗᓂ.

ᖃᓄᖅ ᓴᐳᑦᔨᓯᒪᒍᓐᓇᖁᖓ ᕿᑐᕐᖓᕋᓂᒃ HPV-ᒥᒃ ᐋᓐᓂᐊᑖᖁᓇᒍ?

ᑲᐱᔭᐅᓂᖅ ᐱᐅᓂᕐᐸᐅᕗᖅ ᕿᑐᕐᙰᑦ HPV-ᒥᒃ ᐋᒻᓂᐊᑖᓚᕿᖁᓇᒍ ᐱᔭᕆᐊᑦᑐᕈᑎᒋᒍᓐᓇᑕᖏᓐᓄᓗ ᓱᕐᕋᑕᐅᖁᓇᒍ.

ᓱᒨᑦ ᐱᐊᕃᑦ ᑲᐱᔭᐅᒋᐊᖃᑦᓴᕆᕙᑦ HPV-ᑖᕆᒃᑯᑎᒧᑦ ᐅᑭᐅᑭᑦᑐᐊᐱᐅᖏᓐᓇᓗᑎᒃ?

ᐱᐅᓂᕐᐸᐅᕗᖅ ᐱᐊᕃᑦ ᑲᐱᔭᐅᓯᒪᑲᐱᑐᐊᕐᐸᑕ ᑕᑦᓱᒧᖓ ᖁᐱᕐᕈᒧᑦ ᐊᑦᑐᑕᐅᓯᒪᖕᖏᓂᖏᓐᓂ, ᓄᓕᐊᕆᐅᕐᓂᐅᓚᐅᕐᑎᓇᒋᑦ.  ᑲᐱᔭᐅᒪᑦᓯᐊᕈᑎᒃ ᓴᐳᑎᓯᒪᔭᐅᑦᓯᐊᕈᓐᓇᓂᐊᕐᑐᑦ ᐃᓅᓯᓕᒫᒥᓂ.

ᑭᓯᐊᓂ, ᖃᐅᔨᒪᒋᑦ ᑖᓐᓇ ᑲᐴᑎᒃᕐ ᐃᓗᓐᓀᓂᒃ HPV-ᑦᓴᔭᕐᓂᒃ ᐅᖑᒪᒍᓐᓇᖏᒻᒥᒪᑦ (ᐊᒥᓱᐊᓘᒻᒪᑕ 100 ᐅᖓᑖᓃᑦᑐᑦ) ᐅᕝᕙᓗᓐᓃ ᐊᓯᖏᓐᓂ ᓄᓕᐊᕐᓂᑯᑦ ᐋᓐᓂᐊᑖᖑᓲᓂᒃ ᐅᖑᒪᒍᑎᐅᒐᓂ.  ᐅᓲᑉ ᐳᖓ ᐊᑐᕐᑕᐅᓯᐊᖃᑦᑕᕆᐊᓕᒃ.

HPV-ᖑᓂᕋᕐᑕᐅᑉ ᓇᓕᒃᑳᑯᑦ ᐋᓐᓂᐊᑖᕈᑎᐅᓲᑉ ᑲᐴᑎᑦᓴᔭᖓ ᐃᒣᒃᑐᖅ:

HPV-ᑖᕆᒃᑯᑎᒃ ᑲᐴᑎᒃ ᐊᑑᑎᖃᑦᓯᐊᑐᖅ.  ᓴᐳᓗᑕᕆᔭᐅᒍᓐᓇᓯᓲᖑᒐᒥ ᐋᓐᓂᐊᑖᕆᒃᑯᑎᐅᑦᓱᓂ ᐅᑯᓂᖓ 16 ᐊᒻᒪᓗ 18 HPV, ᑖᒃᑯᐊ ᑲᒡᒍᑎᑖᕐᑎᓯᓂᕐᐸᐅᒍᓐᓇᒪᑕ.  ᐅᖑᒪᒍᑎᐅᑦᓯᐊᓱᓂᓗ ᓇᓕᒃᑳᑯᑦ ᐅᖕᖑᑖᕆᔭᐅᒍᓐᓇᑐᓂᒃ.

ᒪᕐᕉᓂᒃ ᑲᐱᔭᐅᓯᒪᒍᑎᖃᕆᐊᓕᒃ ᓴᐴᓗᑕᖃᑦᓯᐊᕈᒪᒍᓂ.  ᐁᑉᐸᖓᓂ ᑲᐱᔭᐅᓂᖃᕆᐊᓪᓚᕋᔭᕐᑐᖅ ᐳᕐᑐᓂᖃᓕᕈᓂ 7-ᒥᒃ.

ᖃᐅᔨᓴᕈᑕᐅᓯᒪᔪᑦ ᑐᑭᓯᒍᑕᐅᒪᕗᑦ HPV-ᑖᕇᒃᑯᑎᒧᑦ ᑲᐱᔭᐅᒪᔪᐃᑦ ᓴᐴᓗᑕᖃᕈᓐᓇᓯᐊᕆᐊᖏᑦ ᐊᕐᕌᒍᓄᑦ ᐊᒥᓱᓄᑦ.  ᓱᖑᓯᒋᐊᕐᑕᐅᒋᐊᑐᕋᔭᖕᖏᑐᖅ ᑲᐱᔭᐅᒪᓂᖓ ᐃᓄᒻᒪᕆᐅᓕᕋᓗᐊᕈᓂ.

ᓱᓀᑦ ᓱᕐᕋᓗᑲᒍᑎᐅᑐᐃᓐᓇᕆᐊᖃᕐᖃᑦ ᑲᐱᔭᐅᔪᖃᕈᓂ HPV-ᑖᕆᒃᑯᑎᒧᑦ ?

ᑖᒃᑯᐊ ᑲᐴᑏᑦ  ᐹᒍᑎᐅᔪᑦ HPV-ᒥᒃ ᐊᑦᑕᓇᖕᖏᑐᑦ.  ᒪᓗᓐᓇᐅᑎᐅᒍᓐᓇᑐᑦ ᐃᑉᐱᓂᐊᕈᑕᐅᒍᓐᓇᑐᓪᓗ ᑲᐱᔭᐅᔪᕕᓂᐅᓗᓂ ᐃᓱᒫᓗᓐᓇᖏᑦᑐᑦ ᐊᓂᒍᑦᓴᐅᑎᖏᓲᖑᑦᓱᑎᓪᓗ.

ᖃᐅᔨᒪᔭᐅᔪᑦ ᑲᐳᑎᐅᑉ ᓱᕐᕃᓂᕆᓲᖏᑦ:

  • ᐊᒥᓲᓂᕐᓴᓂ (ᐅᓄᕐᓂᓭᑦ 50%-ᖏᑦ ᐃᓄᐃᑦ): ᒣᓪᓘᓕᓲᑦ ᑲᑉᐳᒥᒍᑦ;
  • ᑌᒪᖕᖓᓕᒫᖅ (ᐃᑭᓐᓂᓭᑦ  50%-ᖏᑦ ᐃᓄᐃᑦ): ᐊᐅᐸᓗᑦᓯᓲᑦ, ᐳᓪᓕᓕᕐᓱᑎᓪᓗ ᑲᑉᐳᒥᒍᑦ;
  • ᑌᒪᖕᖓᑦ(ᐃᑭᓐᓂᓭᑦ 10%-ᖏᑦ ᐃᓄᐃᑦ):ᑲᑉᐱᒥᒍᑦ ᐅᖏᓚᓐᓂᖅ, ᐆᓇᕿᓂᖅ
  • ᑲᐴᑎᒧᑦ ᓱᒃᑯᐊᕿᓂᖅ ᑲᐱᔭᐅᒌᕐᓱᓂ ᓄᐃᓪᓗᐊᓲᖑᖕᖏᑐᑦ ᕈᓐᓇᕋᓗᐊᕐᒥᓱᑎᒃ.ᓱᒃᑯᐊᕿᔪᖃᕐᐸᑦ, ᓄᐃᑦᓴᐅᑎᒋᒍᓐᓇᑐᑦ ᑲᐱᔭᐅᒌᑦᓴᑐᐊᕈᓂ.ᑲᐱᓯᔪᕕᓂᖅ ᑲᒪᑦᓴᐅᑎᒋᐊᐱᒍᓐᓇᑐᖅ ᑌᒣᓕᔪᒥᒃ.
ᓱᓇᐅᕙ ᑎᖑᓪᓗᓂᖅ B?

ᑎᖑᒃᑯᑦ ᐋᓐᓂᐊᑖᖑᓲᖅ, ᐊᒥᓱᒐᓓᑦ ᐊᑦᔨᒌᖕᖏᑐᑦ ᑎᖑᓪᓗᓕᕐᓂᐅᒍᓐᓇᑐᑦ, ᑖᓐᓇ B-ᖑᓂᕋᕐᑕᖅ ᐃᓚᒋᔭᐅᑎᓪᓗᒍ, ᖁᐱᕐᕈᑯᓗᒻᒧᑦ ᑌᒣᓚᕿᔭᐅᓲᖅ,  ᑖᓐᓇ ᐋᓐᓂᐊᑖᕆᔭᐅᒍᓂ ᐊᑦᑕᓇᕐᑑᓚᕿᒍᓐᓇᑐᖅ, ᑎᖑᒻᒥᒃ ᓄᖑᓭᓯᓗᓂ ᑲᒡᒍᑎᑖᕈᑕᐅᓗᓂᓗᓐᓃᑦ ᑎᖑᒃᑯᑦ.

ᖃᓄᖅ ᑎᖑᓪᓗᓕᕐᓂᖅ B ᐃᕐᐸᓲᖑᕙ?

ᑎᖑᓪᓗᓕᕐᓂᖅ B ᐃᕐᐸᓲᖅ ᓄᓕᐊᕐᓂᑯᑦ ᐅᕝᕙᓗᓐᓃᑦ ᐊᐅᒃᑯᑦ, ᐅᑦᑑᑎᒋᓗᒍ :

  • ᐅᓲᑉ ᐳᖓᓂᒃ ᐊᑐᖕᖏᓗᓂ ᓄᓕᐊᓂᑯᑦ;
  • ᐊᑐᖃᑎᒌᓐᓂᑯᑦ ᑖᑦᓱᒥᖓᑦᓭᓇᖅ ᐋᖓᔮᓐᓇᑐᕐᑐᕈᑎᓂᒃ ᑲᐳᑎᓂᒃ ᓂᐅᕐᖃᐅᑎᓂᓪᓘᓃᑦ;
  • ᑐᓐᓂᓕᐅᕐᑕᐅᓂᒃᑯᑦ ᐳᑐᔭᐅᓂᒃᑯᓗᓐᓃᑦ ᑖᒃᑯᐊ ᐱᓇᓱᐊᕈᑕᐅᔪᑦ ᖁᐱᕐᕈᑯᓗᐃᔭᕐᑕᐅᓯᒪᑦᓯᐊᖏᑉᐸᑕ;
  • ᑌᒣᑦᑐᒥᒃ ᐋᓐᓂᐊᓕᐅᑉ ᐊᐅᓇᕐᓂᖓ, ᑭᓪᓕᖓᓗᓐᓃᑦ ᐊᑦᑐᑕᐅᔪᕕᓂᐅᑉᐸᑦ ᑭᓪᓕᒋᔭᐅᒻᒥᔪᒧᑦᓄᕙᕈᔪᒃᑯᕕᐅᔪᒧᓪᓘᓃᑦ;
  • ᐊᓈᓇᐅᔪᖅ ᑌᒣᑦᑐᒥᒃ ᐋᓐᓂᐊᓕᒃ ᐁᑦᑐᐃᒍᓐᓇᒥᔪᖅ ᐱᐊᕋᑦᓴᒥᓂᒃ ᐅᕝᕙᓗᓐᓃᑦ ᐃᓅᓕᕋᓱᐊᕐᑎᓗᒍ.

ᐃᓚᖏᑦ ᑌᒣᑦᑐᒥᒃ ᐋᓂᐊᖃᓕᕋᓗᐊᕐᓱᑎᒃ ᒪᓗᓐᓇᐅᑎᖃᓲᖑᖕᖏᑐᑦ.  ᖃᐅᔨᒪᓲᖑᖕᖏᑐᑦ ᑎᖑᓪᓗᓇᕐᒥᒃ ᖃᓂᒪᖃᕆᐊᖅ ᐃᕐᐸᑎᕆᓚᕿᒍᓐᓇᓱᑎᒃ.  ᐃᓚᖏᑦ ᐁᑦᑐᑑᑎᖃᕈᓐᓇᓲᑦ ᐃᓅᓯᓕᒫᒥᓂ.

ᖃᓄᖅ ᐅᖑᒪᔭᐅᒍᓐᓇᖃ ᑎᖑᓪᓗᓇᖅ B?

ᑲᐱᔭᐅᒪᓂᖅ ᓴᐴᓗᑕᑦᓯᐊᖑᓂᕐᐹᖅ ᑕᑦᓱᒥᖓ ᖃᓂᒪᑖᕆᒃᑯᑎᐅᓗᓂ.

ᑎᖑᓪᓗᓕᕇᒃᑯᑎᒃ B-ᒥᒃ ᑲᐴᑎᒃ

ᑎᖑᓪᓗᓕᕇᒃᑯᑎᒃ B-ᒥᒃ ᐊᑑᑎᖃᑦᓯᐊᑐᖅ.  ᑯᐯᒻᒥ, ᑖᓐᓇ ᑎᖑᓪᓗᓕᕈᑎᐅᓲᖅ ᐊᓯᐅᓯᒪᑲᓴᑦᓯᐊᓕᕐᑐᖅ ᐃᓅᓱᑦᑐᓂ ᑲᐱᔭᐅᒪᔪᓂ.

ᓴᐴᓗᑕᖓ ᐊᑯᓂ ᐊᕐᕌᒍᓂ ᐊᒥᓱᓂ ᑎᒥᒦᓲᖅ.  ᑲᐱᔭᐅᒋᐊᓪᓚᕆᐊᑐᖏᑐᖅ ᐃᓅᒻᒪᕆᕈᕈᓂ.

ᓱᓀᑦ ᓱᕐᕋᓗᑲᒍᑎᐅᑐᐃᓐᓇᕆᐊᖃᕐᖃᑦ ᑲᐱᔭᐅᔪᖃᕈᓂ ᑎᖑᓪᓗᕇᒃᑯᑎᒧᑦ?

ᑎᖑᓪᓗᕇᒃᑯᑎᒃ B-ᒥᒃ ᐊᑦᑕᓇᖕᖏᑐᖅ.  ᒪᓗᓐᓇᐅᑎᐅᒍᓐᓇᑐᑦ ᐃᑉᐱᓂᐊᕈᑕᐅᒍᓐᓇᑐᓪᓗ ᑲᐱᔭᐅᔪᕕᓂᐅᓗᓂ ᐃᓱᒫᓗᓐᓇᖏᑦᑐᑦ ᐊᓂᒍᑦᓴᐅᑎᖏᓲᖑᑦᓱᑎᓪᓗ.

  • ᑌᒪᖕᖓᑦ (ᐃᑭᓐᓂᓭᑦ 10%-ᖏᑦ ᐃᓄᐃᑦ): ᒣᓪᓘᓕᓲᑦ, ᐊᐅᐸᓗᑦᓯᓱᑎᓪᓗ, ᐳᓪᓕᓕᕐᓱᑎᓪᓗ ᑲᑉᐳᒥᒍᑦ, ᓂᐊᖁᖕᖑᓕᕐᓱᑎᒃ, ᐃᓗᕐᓗᓕᓚᐅᕐᑐᓱᑎᒃ, ᐅᐃᑦᔭᖑᑦᓱᑎᒃ, ᑕᖃᑦᓱᑎᓪᓗ.

ᑲᐴᑎᒧᑦ ᓱᒃᑯᐊᕿᓂᖅ ᑲᐱᔭᐅᒌᕐᓱᓂ ᓄᐃᓪᓗᐊᓲᖑᖕᖏᑐᑦ ᕈᓐᓇᕋᓗᐊᕐᒥᓱᑎᒃ.  ᓱᒃᑯᐊᕿᔪᖃᕐᐸᑦ, ᓄᐃᑦᓴᐅᑎᒋᒍᓐᓇᑐᑦ ᑲᐱᔭᐅᒌᑦᓴᑐᐊᕈᓂ.  ᑲᐱᓯᔪᕕᓂᖅ ᑲᒪᑦᓴᐅᑎᒋᐊᐱᒍᓐᓇᑐᖅ ᑌᒣᓕᔪᒥᒃ.

ᓱᓇᐅᕙᑦ ᖃᕆᑕᐅᑉ ᐳᓪᓕᓕᕈᑎᖏᑦ ᐃᕐᐸᕈᓐᓇᐸᓪᓗ?

ᖃᕆᑕᐅᑉ ᐳᓪᓕᓕᕈᑎᖓ ᖁᐱᕐᕈᖅ.  ᐊᑦᔨᒌᖕᖏᑐᐃᑦ ᖃᕆᑕᕐᒥᒃ ᐳᓪᓕᓕᕈᑎᐅᓲᑦ ᓄᐃᕙᑦᑐᑦ ᑯᐯᒻᒥ, ᐃᓚᖃᕐᓱᑎᒃ ᐅᑯᓂᖓ ᓇᓗᓀᒃᑯᑕᓕᓐᓂᒃ B,C,W ᐊᒻᒪᓗ Y. ᖃᕆᑕᐅᑉ ᐳᓪᓕᓕᕐᓂᖓ ᖃᓂᒻᒪᓚᕆᒍᑎᐅᒍᓐᓇᑐᖅ, ᖃᕆᑕᐅᑉ ᐊᒥᕋᖓᓂᒃ ᐊᐅᒻᒥᓗ ᓱᕐᕃᒍᓐᓇᓱᑎᒃ .  ᖃᕆᑕᕐᒥᒃ ᐳᓪᓕᓕᕐᑎᓯᒍᑏᑦ ᐁᑦᑑᑎᐅᒍᓐᓇᑐᑦ  ᕿᖓᐅᑉ ᑲᒃᑭᓕᓂᖓᒍᑦ ᐃᒡᒋᐊᓕᕆᓂᒃᑯᓗ, ᑖᒃᑯᐊ ᒪᓗᓐᓇᐅᑎᖃᖕᖏᑲᓗᐊᕈᑎᒃ ᐁᑦᑐᐃᒍᓐᓇᑐᑦ ᐊᓯᒥᓂᒃ.

ᖃᓄᖅ ᐅᖑᒪᔭᐅᒍᓐᓇᖃ ᖃᕆᑕᒃᑯᑦ ᐳᓪᓕᓕᕐᓂᖅ?

ᑲᐱᔭᐅᓯᒪᓂᖅ ᖃᕆᑕᕐᒥᒃ ᐳᓪᓕᓕᕇᒃᑯᑎᒧᑦ ᐱᐅᓂᕐᐹᓯᐊᖅ ᖃᓂᒻᒪᕇᒃᑯᑎᐅᒍᓐᓇᕋᒥ ᐱᔭᕆᐊᑦᑐᕈᑎᒋᒍᓐᓇᑕᖏᓐᓂᓗ ᖃᓂᒪᐅᑉ ᐃᑯᓪᓚᑎᑦᓯᒍᑎᐅᒍᓐᓇᓱᓂ.

ᑲᐴᑏᑦ ᖃᕆᑕᕐᒧᑦ ᐳᓪᓕᓕᕇᒃᑯᑏᑦ

ᐊᒥᓱᒐᓚᐅᕗᑦ ᑲᐴᑎᑦᓴᔦᑦ ᖃᕆᑕᕐᒧᑦ ᐳᓪᓕᓕᕇᒃᑯᑏᑦ.  ᐃᓚᖏᑦ ᐊᑕᐅᓯᑐᐃᓐᓇᒧᑦ ᖃᕆᑕᕐᓗᓯᓂᕐᒧᑦ ᐃᓕᖓᔪᑦ, ᐃᓚᖏᓪᓗ ᐊᓯᖏᓐᓂᒃ ᖃᕆᑕᕐᓗᓂᐅᒍᓐᓇᑐᓂᒃ ᐅᖑᒪᒍᑎᐅᒍᓐᓇᑐᑦ ᐊᑕᐅᑦᓯᑯᑦ.  ᐃᓕᓐᓂᐊᑏᑦ ᐳᕐᑐᓂᓖᑦ 7-ᒥᒃ ᑲᐱᔭᐅᓂᖃᓲᑦ ᓴᐴᓗᑕᐅᒍᓐᓇᓯᐊᕐᑐᒧᑦ ᓯᑕᒪᓄᑦ ᖃᕆᑕᐅᑉ ᐳᓪᓕᓕᕈᑎᑦᓴᔭᖏᓐᓄᑦ:  A, C. W ᐊᒻᒪᓗ Y,

ᓱᓇᐅᕙᑦ ᐃᑉᐱᓂᐊᓚᕿᔭᐅᒍᓐᓇᑐᑦ ᑲᐱᔭᕕᓂᐅᔪᖃᕈᓂ ᖃᕆᑕᕐᒥᒃ ᐳᓪᓕᓕᕇᒃᑯᑎᓄᑦ ᐅᑯᓄᖓ A, C, W ᐊᒻᒪᓗ Y?

ᑲᐴᑎᑦᓴᔭᖅ ᖃᕆᑕᕐᒧᑦ  ᐳᓪᓕᓕᕇᒃᑯᑎᒃ A,C,W ᐊᒻᒪᓗ Y ᐊᑦᑕᓇᖕᖏᑐᖅ.  ᒪᓗᓐᓇᐅᑎᐅᒍᓐᓇᑐᑦ ᐃᑉᐱᓂᐊᕐᑕᐅᔪᑦ ᑲᐱᔭᕕᓂᐅᓗᓂ ᐃᓱᒫᓗᓐᓇᖏᑦᑐᐃᑦ ᐊᓂᒍᑦᓴᐅᑎᒋᓲᖑᑦᓱᑎᓪᓗ.

  • ᐊᒥᓲᓂᕐᓴᓂ (ᐅᓄᕐᓂᓭᑦ 50%-ᖏᑦ ᐃᓄᐃᑦ): ᒣᓪᓘᓕᓲᑦ ᑲᑉᐳᒥᒍᑦ;
  • ᑌᒪᖕᖓᓕᒫᖅ (ᐃᑭᓐᓂᓭᑦ  50%-ᖏᑦ ᐃᓄᐃᑦ): ᐊᐅᐸᓗᑦᓯᓲᑦ, ᐳᓪᓕᓕᕐᓱᑎᓪᓗ ᑲᑉᐳᒥᒍᑦ, ᓂᐊᖁᖕᖑᓕᕐᓱᑎᒃ, ᓄᑭᓕᕆᑦᓱᑎᒃ, ᒣᓪᓘᓱᑎᒃ,ᑕᖃᑦᓱᑎᒃ, ᐃᓱᕐᕆᕈᓐᓀᓱᑎᒃ, ᒥᕆᐊᖕᖑᓕᕐᓱᑎᒃ, ᓇᒡᒍᐊᓕᕆᑦᓱᑎᒃ, ᐃᑎᑦᑕᓕᕐᓱᑎᒃ, ᓂᕆᒍᒣᕐᓯᒪᑦᓱᑎᒃ, ᐸᕝᕕᓕᕐᑕᓱᑎᒃ, ᓯᓂᒍᓱᑦᓱᑎᓪᓗ;
  • ᑌᒪᖕᖓᑦ(ᐃᑭᓐᓂᓭᑦ 10%-ᖏᑦ ᐃᓄᐃᑦ):ᐅᓇᕿᓂᖅ

ᑲᐴᑎᒧᑦ ᓱᒃᑯᐊᕿᓂᖅ ᑲᐱᔭᐅᒌᕐᓱᓂ ᓄᐃᓪᓗᐊᓲᖑᖕᖏᑐᑦ ᕈᓐᓇᕋᓗᐊᕐᒥᓱᑎᒃ.  ᓱᒃᑯᐊᕿᔪᖃᕐᐸᑦ, ᓄᐃᑦᓴᐅᑎᒋᒍᓐᓇᑐᑦ ᑲᐱᔭᐅᒌᑦᓴᑐᐊᕈᓂ.  ᑲᐱᓯᔪᕕᓂᖅ ᑲᒪᑦᓴᐅᑎᒋᐊᐱᒍᓐᓇᑐᖅ ᑌᒣᓕᔪᒥᒃ.

ᓱᓇᐅᕙ ᓱᕐᓗᑯᑦ ᐃᒡᒌᐊᑯᓪᓗ ᖃᓂᒻᒪᓂᖅ ᖃᓄᕐᓗ ᐃᑉᐸᓲᖑᕙ?

ᓱᕐᓗᑯᑦ ᐃᒡᒌᐊᑯᓪᓗ ᖃᓂᒻᒪᓂᖅ ᐁᑦᑐᑐᑎᐅᒍᓐᓇᑐᖅ ᖁᐱᕐᕈᒧᑦ ᑌᒣᑎᑕᐅᑦᓱᓂ.  ᐃᕐᐸᓲᖅ ᐊᑦᑐᐃᓂᒃᑯᑦ ᕿᖓᐅᑉ ᑲᒃᑭᖓᓂᒃ ᐃᒋᐊᑯᓪᓗ ᐅᕆᐊᕐᑕᖓᓂᒃ ᖃᓂᒪᔫᑉ.  ᑖᓐᓇ ᖃᓂᒪᒃ ᐱᔭᕆᐊᑦᑐᐃᒍᓐᓇᑐᒻᒪᕆᒃ ᐊᑦᑕᓇᕐᓰᓗᓂ ᓄᑭᓂᒃ ᐊᑐᕐᖃᔦᕐᑎᓯᒍᓐᓇᕋᒥ ᑐᖁᒍᑕᐅᒍᓐᓇᓱᓂᐊᓪᓛᑦ.

ᓱᓇᐅᕙ ᐊᓪᓕᕉᑉ ᖁᖓᓯᐅᓪᓗ ᓄᑭᖏᒍᑦ ᐊᓐᓂᐊᓕᕐᓂᖅ ᖃᓄᕐᓗ ᐃᕐᐸᕈᓐᓇᖃ?

ᐊᓪᓕᕈᕐᓗᓂ ᖁᖓᓯᕐᓗᓕᕐᓂᓗ ᖃᓂᒪᓐᓇᖅ  ᓄᓇᔭᐅᑉ ᐳᔪᕆᓂᐅᓪᓗ ᖁᐱᕐᕈᑯᓗᖏᓐᓂᑦ ᓄᐃᓲᖅ.  ᑖᓐᓇ ᖁᐱᕐᕈᑯᓗᒃ ᖃᓂᒻᒪᓚᖀᒍᓐᓇᑐᖅ ᐃᓄᒻᒥᒃ ᑎᒥᖓᓅᕈᓂ ᑭᓪᓕᑯᑦ, ᕿᑦᓱᓯᒪᔪᒃᑯᓗᓃᑦ.  ᑖᓐᓇ ᖃᓂᒪᓐᓇᖅ ᐱᔭᕆᐊᑦᑐᐃᒪᕆᒍᓐᓇᑐᖅ, ᑐᖁᒍᑕᐅᒍᓐᓇᓱᓂᐊᓪᓛᑦ.

ᖃᓄᖅ ᓴᐴᓗᑦᓯᓯᒪᒍᓐᓇᕿᑕ  ᓱᕐᓗᑯᑦ ᐃᒡᒌᐊᑯᓪᓗ ᐊᓪᓕᕉᑉ ᖁᖓᓯᐅᓪᓗ ᓄᑭᖏᒍᓪᓗ ᖃᓂᒪᒥᑦ?

ᑲᐱᔭᐅᓯᒪᓂᖅ ᐱᐅᓂᕐᐹᓯᐊᖅ ᓴᐳᓗᑕᖃᕈᑎᐅᒍᓐᓇᕋᒥ ᑖᒃᑯᓈᖕᖓᑦ ᖃᓂᒻᒪᕈᑕᐅᒍᓐᓇᑑᓐᓂᑦ.

ᐊᓪᓕᕉᑉ ᖁᖓᓯᐅᓪᓗ ᓄᑭᖏᒍᑦ -ᓱᕐᓗᑯᑦ ᐃᒡᒌᐊᑯᓪᓗ ᖃᓂᒻᒪᕇᒃᑯᑎᒃ ᑲᐴᑏᒃ

ᑖᓐᓇ ᑲᐴᑎᒃ ᓱᕐᓗᑯᑦ ᐃᒡᒌᐊᑯᓪᓗ ᐊᓪᓕᕉᑉ ᖁᖓᓯᐅᓪᓗ ᓄᑭᖏᒍᑦ ᖃᓂᒪᑖᕆᒃᑯᑎᐅᓗᓂ ᓴᐳᓗᑕᐅᒍᓐᓇᓯᐊᕐᑐᖅ ᐊᑕᐅᓯᐊᑐᐃᓐᓇᑐᒥᒃ ᑲᐱᔭᐅᒪᓗᓂ.  ᑯᐯᒻᒥ ᑲᐳᕆᓂᐅᑉ ᖃᓄᐃᓕᖓᑎᑕᐅᒍᑎᖏᑦ ᑲᐱᔭᐅᒍᓐᓇᓂᕃᔪᑦ ᐃᓅᓱᑦᑐᓂᒃ ᐊᑕᐅᓯᐊᑐᐃᓐᓇᓗᑎᒃ (ᐳᕐᑐᓂᓖᑦ 7-ᒥᒃ ᓄᓇᕕᒻᒥ).  50-ᓂᒃ ᐅᑭᐅᖃᓕᕈᑎᒃ ᑲᐱᔭᐅᓯᒪᒍᑎᒥᒃ ᓱᖑᓭᒍᑎᒧᑦ ᑲᐱᔭᐅᒋᐊᓪᓚᑐᑦᓴᔭᐅᓗᑎᒃ.

ᓱᓇᐅᕙᑦ ᓱᕐᕋᑕᐅᒍᑎᐅᒍᓐᓇᑐᑦ ᐊᓪᓕᕉᑉ ᖁᖓᓯᐅᓪᓗ ᓄᑭᖏᒍᑦ -ᓱᕐᓗᑯᑦ ᐃᒡᒌᐊᑯᓪᓗ ᖃᓂᒻᒪᕇᒃᑯᑎᒧᑦ ᑲᐱᔭᐅᔪᖃᕈᓂ?
  • ᐊᒥᓲᓂᕐᓴᓂ (ᐅᓄᕐᓂᓭᑦ 50%-ᖏᑦ ᐃᓄᐃᑦ): ᒣᓪᓘᓕᓲᑦ ᑲᑉᐳᒥᒍᑦ, ᑕᖃᑦᓱᑎᓗ, ᓂᐊᖁᖕᖑᓱᑎᓪᓗ
  • ᑌᒪᖕᖓᓕᒫᖅ (ᐃᑭᓐᓂᓭᑦ  50%-ᖏᑦ ᐃᓄᐃᑦ): ᐊᐅᐸᓗᑦᓯᓲᑦ, ᐳᓪᓕᓕᕐᓱᑎᓪᓗ ᑲᑉᐳᒥᒍᑦ, ᐃᓱᕐᕆᕈᓐᓀᓱᑎᒃ, ᐅᐃᑦᔭᖑᓕᕐᓱᑎᒃ, ᒥᕆᐊᖕᖑᓱᑎᒃ, ᐃᑎᑦᑕᓱᑎᒃ, ᕿᐅᔭᒍᓱᓕᕐᓱᑎᓪᓗ;
  • ᑌᒪᖕᖓᑦ(ᐃᑭᓐᓂᓭᑦ 10%-ᖏᑦ ᐃᓄᐃᑦ):ᐅᓇᕿᓂᖅ, ᓂᕆᒍᒣᕐᓯᒪᓂᖅ, ᒥᕆᐊᑎᒋᓂᖅ, ᐸᕝᕕᒍᓱᓐᓂᖅ, ᓯᓂᒍᓱᓐᓂᖅ, ᐅᕕᓂᒃᑯᑦ ᑲᓚᐅᔭᕐᓂᖅ, ᕿᓂᕐᓯᑯᑦ ᐳᓪᓕᓕᕐᓂᖅ;
  • ᐃᓚᖓᓂ (ᐃᑭᓐᓂᓭᑦ 1%-ᖏᑦ ᐃᓄᐃᑦ):

ᐳᓪᓕᒐᓛᐱᑦᑐᖅ ᑯᑉᐳᒥᒍᑦ ᑌᒣᓚᖓᑦᓱᓂᓗ ᐱᓇᓱᐊᕈᓯᕐᓂ ᐃᑭᑦᑐᓂ;

  • ᐊᑑᑎᓪᓗᐊᓲᖑᖕᖏᑐᖅ (ᐃᑭᓐᓂᓭᑦ ᐊᑕᐅᓯᖅ 10,000-ᖑᑦᓴᐸᑕ ᐃᓄᐃᑦ):

ᒪᕐᓂᓕᓯᓲᑦ ᑲᑉᐳᒥᒍᑦ.

ᑲᐴᑎᒧᑦ ᓱᒃᑯᐊᕿᓂᖅ ᑲᐱᔭᐅᒌᕐᓱᓂ ᓄᐃᓪᓗᐊᓲᖑᖕᖏᑐᑦ ᕈᓐᓇᕋᓗᐊᕐᒥᓱᑎᒃ.  ᓱᒃᑯᐊᕿᔪᖃᕐᐸᑦ, ᓄᐃᑦᓴᐅᑎᒋᒍᓐᓇᑐᑦ ᑲᐱᔭᐅᒌᑦᓴᑐᐊᕈᓂ.  ᑲᐱᓯᔪᕕᓂᖅ ᑲᒪᑦᓴᐅᑎᒋᐊᐱᒍᓐᓇᑐᖅ ᑌᒣᓕᔪᒥᒃ.