ᐃᑉᐱᒍᓱᑦᓯᐊᓂᖅ ᐊᒻᒪᓗ ᓲᓱᑦᓴᓂᖅ ᐃᓄᑐᖃᑦᑎᓂᒃ ᑐᖕᖓᕕᓪᓚᕆᖓ ᐃᓪᓕᓇᕐᓂᖏᑦᑕ ᓲᖑᔫᑎᑦᓯᔪᖅ ᓄᓇᓕᑦᑎᓂᒃ.
ᐃᓗᕐᖁᓯᖅ ᐱᒻᒪᕆᐊᓗᒃ ᐃᓚᒋᔭᐅᑦᓱᓂ ᐃᓗᓯᕐᒧᑦ. ᐅᐱᒍᓱᓐᓂᖅ ᑭᓇᐅᓂᑦᑎᓂᒃ, ᐅᖃᐅᓯᑦᑎᓂᒃ, ᐊᒻᒪᓗ ᐱᐅᓯᑐᖃᑦᑎᓂᒃ, ᐱᑕᖃᕆᐊᖃᓪᓚᕆᑦᑐᖅ ᖃᓄᐃᖕᖏᓯᐊᕐᓂᑎᓐᓄᑦ ᐊᒻᒪᓗ ᐃᓘᓐᓈᒍᑦ ᖃᓄᐃᖕᖏᓯᐊᕐᓂᑎᓐᓄᑦ. ᐆᒪᑏᓐᓇᕆᐊᓕᕗᑦ ᐃᓗᕐᖁᓯᕗᑦ. ᐊᒻᒪᓗ ᑌᒣᒻᒪᑦ, ᑭᖕᖒᒪᑦᓯᕗᒍᑦ ᓴᐳᑦᔨᓂᖏᓐᓂᒃ ᐊᒻᒪᓗ ᖃᐅᔨᒪᓂᖏᓐᓂᒃ ᐃᓄᑐᖃᑦᑕ.
ᐃᓄᑐᙯᑦ
ᐃᓄᑐᙯᑦ ᐊᒫᕆᔭᐅᖏᓐᓇᖃᑦᑕᓯᒪᔪᑦ ᓄᓇᓕᓐᓄᑦ. ᓯᓚᑐᔪᐃᑦ ᐊᒻᒪᓗ ᐃᓅᓯᓕᒫᕐᒥᓂ ᐊᒥᓱᓂᒃ ᐊᑑᑎᓯᒪᑦᓱᑎᒃ. ᐃᑦᔭᕋᑦᓴᓯᐊᖁᑎᒋᔭᐅᔪᑦ ᐊᒻᒪᓗ ᓯᕗᓕᕐᑎᐅᓱᑎᒃ ᓄᓇᓕᒻᒧᑦ. ᑎᒍᒥᐊᕐᑏᑦ ᖃᐅᔨᒪᔭᑦᑎᓂᒃ, ᐱᐅᓯᑐᖃᑦᑎᓂᒃ, ᐊᒻᒪᓗ ᐃᓪᓕᕆᔭᑦᑎᓂᒃ. ᖃᐅᔨᒪᔪᑦ ᖃᓄᖅ ᐊᑦᑕᓇᕐᑐᒦᑦᑌᓕᓂᕐᒥᒃ ᓄᓇᒥ ᐊᒻᒪᓗ ᓯᓚ ᖃᓄᐃᓕᖓᓚᖓᒻᒪᖔᑦ. ᖃᐅᔨᒪᒻᒥᔪᑦ ᖃᓄᖅ ᒥᕐᓱᕆᐊᒥᒃ ᐅᕝᕙᓘᓐᓃᑦ ᐋᕐᖀᒋᐊᒥᒃ ᐋᓐᓂᐊᔪᒥᒃ ᐋᓐᓂᐊᓯᐅᑎᑐᖃᕐᓂᒃ ᐊᑐᕐᓱᑎᒃ. ᐃᒫᙰᕐᑎᓯᐊᕌᓗᐃᑦ ᐋᕐᖀᒐᓱᓐᓂᒧᑦ ᐃᓱᒫᓘᑎᐅᔪᒥᒃ ᐊᒻᒪᓗ ᐅᓂᒃᑲᐅᓯᑦᓴᓯᐊᕌᓗᓐᓂᒃ ᐅᓂᒃᑲᐅᓯᑦᓴᖃᕐᓱᑎᒃ ᓯᕗᓪᓕᕕᓂᑦᑕ ᒥᑦᓵᓄᑦ.
ᐃᓄᑐᙯᑦ ᑐᓂᒪᑦᓯᐊᑐᑦ ᐃᓕᓐᓂᐊᑎᑦᓯᓂᕐᒧᑦ ᖃᐅᔨᒪᔭᒥᓂᒃ, ᐅᓂᒃᑳᑐᐊᕐᓂᑯᑦ, ᐱᒋᐅᕐᓴᑎᑦᓯᓂᒃᑯᑦ ᓄᑲᕐᓯᓄᑦ ᑭᖑᕚᖑᔪᓄᑦ, ᐅᕝᕙᓘᓐᓃᑦ ᐃᓄᑦᑎᑐᑦ ᐅᖄᑐᐃᓐᓇᓂᒃᑯᑦ. ᖃᐅᔨᕙᓪᓕᐊᓲᖑᒐᑦᑕ ᐃᑲᐅᕐᓂᑎᒍᑦ ᐊᒻᒪᓗ ᐊᑑᑎᓯᒪᓂᕐᑎᒍᑦ, ᓈᓚᖃᑦᑕᕆᐊᓕᕗᑦ, ᐊᒻᒪᓗ ᑕᑯᓐᓇᓗᒋᑦ, ᐃᓕᓐᓂᐊᓗᑕ. ᑖᓐᓇ ᖃᐅᔨᒪᓂᖓ ᐁᑦᑑᑎᐅᒋᐊᓕᒃ ᓯᕗᓂᕐᒥ ᑭᖑᕚᖑᓚᖓᔪᓄᑦ ᐊᑦᑕᓇᕐᑐᒦᖁᓇᒋᑦ, ᖃᓄᐃᖁᓇᒋᑦ, ᐊᒻᒪᓗ ᐃᓗᓯᕐᓱᓯᐊᖁᓗᒋᑦ, ᐊᒻᒪᓗ ᐃᓄᑐᐃᓐᓀᑦ ᐃᓗᕐᖁᓯᖓ ᓲᖑᔫᖏᓐᓇᓚᖓᒻᒪᑦ.
ᐃᓄᑐᙯᑦ ᓴᐳᑦᔨᔨᐅᒻᒥᔪᑦ ᐃᓚᒌᑦ ᐱᐅᓯᑐᖃᖏᓐᓂᒃ ᑲᔪᓯᔪᓂᒃ. ᓄᐃᑕᑎᑦᓯᔪᑦ ᐱᒻᒪᕆᒻᒥᒃ ᐱᕕᑦᓴᑖᕐᕕᐅᒍᓐᓇᑐᒥᒃ ᐃᓚᒌᓄᑦ ᐊᒻᒪᓗ ᐱᒻᒪᕆᒻᒥᒃ ᐱᔭᑦᓴᙯᓐᓇᓲᖑᑦᓱᑎᒃ ᐱᕈᕐᓴᑕᐅᓂᖏᓐᓂ ᐃᕐᖑᑕᖏᑦᑕ. ᓇᓪᓕᓂᖃᕐᑎᓯᓲᑦ ᐊᒻᒪᓗ ᐊᑦᑕᓇᖕᖏᑐᒦᕝᕕᐅᓱᑎᒃ, ᐊᒻᒪᓗ ᓴᐳᑦᔨᔨᓪᓚᕆᐅᒍᓐᓇᓱᑎᒃ ᐊᖓᔪᕐᖄᕆᔭᐅᔪᓄᑦ.
ᐃᓅᖃᑎᒌᑦᑐᖁᑎᕗᑦ ᐊᒥᓱᑎᒍᑦ ᖁᐊᕐᓵᓇᕐᑐᑰᕐᓯᒪᒻᒪᑕ ᓄᓀᕐᑕᐅᓂᒃᑯᑦ, ᑲᑎᓯᒃᑲᓂᕐᓂᖅ ᐃᓄᑐᖃᑦᑎᓂᒃ ᐱᒻᒪᕆᐊᓗᒃ. ᐃᓄᑐᙯᑦ ᐃᑲᔪᕈᓐᓇᑐᑦ ᐅᑎᕐᑎᓯᓂᕐᒥᒃ ᐃᓅᖃᑎᒌᑦᓯᐊᓂᕐᒥᒃ ᐊᒻᒪᓗ ᐃᓱᒪᒃᑯᑦ ᖃᓄᐃᖕᖏᓯᐊᕐᓂᒥᒃ ᓄᓇᓕᒻᒥ, ᐊᒻᒪᓗ ᐃᓱᒪᒋᔭᖏᑦ ᐱᒻᒪᕆᐊᓘᑦᓱᑎᒃ ᐃᓗᕐᖁᓯᕐᒥᒃ ᐆᒻᒪᑎᑦᓯᒋᐊᓪᓚᕋᓱᐊᕐᓂᒧᑦ, ᓄᕐᖃᖓᑎᑦᓯᒐᓱᐊᕐᓂᒥᒃ ᐱᓇᓱᐊᕐᓂᓄᑦ, ᐊᒻᒪᓗ ᐱᓗᐊᕐᑐᒥᒃ ᒪᒥᓴᕐᓂᒥᒃ ᐱᓇᓱᐊᕐᓂᓄᑦ. ᖃᐅᔨᒪᓂᓖᑦ ᐃᑲᔪᕈᓐᓇᑐᒥᒃ ᓇᓗᓀᕐᓯᓂᕐᒥᒃ ᓯᕗᓂᕐᒧᑦ ᑕᑯᓐᓇᑕᐅᔪᒥᒃ ᐃᓗᓯᖃᑦᓯᐊᓂᕐᒧᑦ ᓄᓇᓕᒻᒥ, ᐊᒻᒪᓗ ᖃᐅᔨᒪᑦᓱᑎᒃ ᐱᓇᓱᐊᕆᐊᒥᒃ ᐱᐅᓂᕐᓴᒧᑦ ᓲᓱᑦᓴᓯᐊᕐᓂᑯᑦ ᐊᒻᒪᓗ ᖃᓄᖅ ᐊᑐᐃᓐᓇᕈᕐᑎᕆᒋᐊᒥᒃ ᓄᓇᓕᓐᓂᒃ ᐱᐅᓂᕐᓴᒧᑦ ᓯᕗᓂᕐᒧᑦ. ᑭᓯᐊᓂ ᖃᓂᖕᖏᑕᕇᓐᓂᖓ ᐃᓄᑐᙯᑦ ᐊᒻᒪᓗ ᓄᑲᕐᓰᑦ ᑭᖑᕚᑦ ᐊᖏᓕᕙᓪᓕᐊᓲᖅ, ᑲᑎᑎᒋᐊᓕᕗᑦ ᐅᕕᒃᑲᕗᑦ ᐱᕈᖁᓗᒋᑦ ᓲᖑᔫᓗᑎᒃ ᐃᓗᓯᕐᓱᓯᐊᕐᓗᑎᓪᓗ.
ᐃᓕᑦᓯᒋᐊᓪᓛᓂᖅ ᐃᓄᑐᐃᓐᓀᑦ ᐃᓗᕐᖁᓯᖓᓂᒃ ᐃᓪᓕᕆᔭᖏᓐᓂᓗ ᐱᒻᒪᕆᐊᓗᒃ. ᑕᒪᓐᓇ ᐊᖏᔪᒻᒪᕆᒻᒥᒃ ᐊᒻᒪᓗ ᐱᐅᔪᒻᒪᕆᒻᒥᒃ ᓱᕐᕃᒍᓐᓇᑐᖅ ᐃᓅᖃᑎᒌᓐᓂᑎᓐᓂᒃ. ᐃᓚᒋᔭᐅᑎᑦᓯᓂᖅ ᐃᓗᕐᖁᓯᕐᒥᒃ ᐃᓕᓪᕆᔭᓂᓪᓗ ᐱᓇᓱᕝᕕᒥ ᐱᐅᓰᒋᐊᕈᓐᓇᑐᖅ ᓱᕐᕃᓂᖏᓐᓂᒃ ᐱᓇᓱᐊᕐᑕᐅᔪᑦ. ᐃᓄᑐᖃᕗᑦ ᐱᔭᖃᕆᐊᓖᑦ ᑖᑦᓱᒥᖓ. ᖃᐅᔨᒪᓂᖓ ᐱᑕᖃᕆᐊᓕᒃ ᒪᒥᓭᓂᕐᒧᑦ ᐊᒻᒪᓗ ᐱᕈᕐᑎᓯᓂᕐᒧᑦ ᐃᓅᖃᑎᒌᓐᓂᑎᓐᓂᒃ.
ᐅᕙᖕᖓᑦ ᐱᓯᒪᔪᖅ: ᓰᐲᓰᒃᑯᓂᑦ ᓀᓪᓕᑎᕐᓯᒪᔪᖅ ᐋᓂ ᖁᒫᓘᑉ ᐅᖃᕐᑕᕕᓂᖓ, 2023
ᑲᒪᑦᓯᐊᓂᖅ ᐃᓄᑐᖃᕐᓂᒃ
ᐃᓄᑐᖃᕗᑦ ᐅᕙᑦᑎᓂᒃ ᑭᖕᖒᒪᑦᓯᒥᔪᑦ. ᐃᓄᑐᖃᕈᕐᐸᓕᐊᑦᓱᑎᒃ, ᑭᖕᖒᒪᑦᓯᔪᑦ ᓴᐳᑦᔨᓂᑦᑎᓂᒃ ᐊᒻᒪᓗ ᐃᑲᔪᕐᓂᑎᓐᓂᒃ ᐅᓪᓗᑕᒫᕐᓯᐅᑎᓄᑦ ᖃᓄᐃᖕᖏᓯᐊᖁᓗᒋᑦ ᐊᑦᑕᓇᕐᑐᒦᒍᓐᓀᓗᑎᓪᓗ ᐊᒻᒪᓗ ᐃᓅᓗᑎᒃ ᐅᓚᐱᕐᓴᐅᑎᖃᕐᓇᑐᒥ. ᓇᑯᕐᓴᓲᖑᒻᒥᔪᑦ ᐸᔪᑐᐊᕋᑦᑎᒋᑦ ᓂᕿᑐᐃᓐᓇᓂᒃ, ᐱᓗᐊᕐᑐᒥᒃ ᒪᙯᕐᖃᔭᖕᖏᑐᐊᕋᒥᒃ ᐅᕙᓘᓐᓃᑦ ᐃᖃᓪᓕᐊᖃᔭᖕᖏᑐᐊᕋᒥᒃ ᑌᒣᓐᓂᕆᖃᑦᑕᓯᒪᔭᒥᑎᒍᑦ, ᓂᕿᑐᐃᓐᓇᖅ ᐱᒻᒪᕆᐅᒻᒪᑦ ᐃᓗᓯᖓᓄᑦ. ᐃᓄᑐᙯᑦ ᐊᓕᐊᓱᓲᖑᒻᒥᔪᑦ ᐳᓛᕆᐊᕐᑕᐅᖃᑦᑕᕆᐊᒥᒃ, ᐃᓚᖓᓂ ᐊᓂᐊᕋᓪᓗᐊᖃᔭᓲᖑᖕᖏᓇᒥᒃ ᑌᑦᓱᒪᓂ ᖃᑦᑕᓯᒪᓂᕐᒥᑎᑐᑦ.
ᐃᓄᑐᖃᕗᑦ ᐅᕙᑦᑎᓂᒃ ᑭᖕᖒᒪᑦᓯᒥᔪᑦ. ᐃᓄᑐᖃᕈᕐᐸᓕᐊᑦᓱᑎᒃ, ᑭᖕᖒᒪᑦᓯᔪᑦ ᓴᐳᑦᔨᓂᑦᑎᓂᒃ ᐅᓪᓗᑕᒫᕐᓯᐅᑎᓄᑦ ᖃᓄᐃᖕᖏᓯᐊᖁᓗᒋᑦ, ᐊᑦᑕᓇᕐᑐᒦᖁᓇᒋᑦ, ᐊᒻᒪᓗ ᐃᓱᒫᓗᖁᓇᒋᑦ. ᓇᑯᕐᓴᓲᖑᒻᒥᔪᑦ ᐸᔪᑐᐊᕋᑦᑎᒋᑦ ᓂᕿᑐᐃᓐᓇᓂᒃ, ᐱᓗᐊᕐᑐᒥᒃ ᒪᙯᕐᖃᔭᖕᖏᑐᐊᕋᒥᒃ ᐅᕙᓘᓐᓃᑦ ᐃᖃᓪᓕᐊᖃᔭᖕᖏᑐᐊᕋᒥᒃ ᑌᒣᓐᓂᕆᖃᑦᑕᓯᒪᔭᒥᑎᒍᑦ, ᐱᒻᒪᕆᐅᒻᒪᑦ ᐃᓗᓯᖓᓄᑦ. ᐃᓄᑐᙯᑦ ᐊᓕᐊᓱᓲᖑᒻᒥᔪᑦ ᐳᓛᕆᐊᕐᑕᐅᖃᑦᑕᕆᐊᒥᒃ, ᐃᓚᖓᓂ ᐊᓂᐊᕋᓪᓗᐊᖃᔭᓲᖑᖕᖏᓇᒥᒃ ᑌᑦᓱᒪᓂ ᖃᑦᑕᓯᒪᓂᕐᒥᑎᑐᑦ.
ᑲᒪᒋᔭᐅᑦᓯᐊᓂᖓ ᐃᓄᑐᙯᑦ ᐱᐅᓯᖅ ᐊᒻᒪᓗ ᐱᓂᐊᕐᓂᖃᕐᓂᖅ ᐱᒻᒪᕆᐅᑎᑦᓯᔪᒥᒃ ᖃᓄᐃᖕᖏᓯᐊᕐᓂᖏᓐᓂᒃ, ᐃᑉᐱᒋᔭᖃᑦᓯᐊᓂᖅ ᑭᖕᖒᒪᒋᔭᖏᓐᓂᒃ, ᐊᒻᒪᓗ ᓲᓱᑦᓴᓂᐅᑦᓱᓂ ᐱᒍᒪᔭᖏᓐᓂᒃ ᐊᒻᒪᓗ ᑐᑭᑖᖏᓐᓂᒃ, ᐃᓚᖃᕐᓱᑎᒃ ᑐᑭᑖᑐᐊᕐᒪᑕ ᐃᑲᔪᕐᑕᐅᒍᒪᖕᖏᓂᕐᒥᒃ.
ᐃᓂᓕᐅᕈᓐᓇᖁᒍᑦ ᓈᒻᒪᓈᕐᑐᓂᒃ ᑲᒪᒋᔭᐅᑦᓯᐊᓂᖓᓄᑦ ᐃᓄᑐᙯᑦ ᐱᓇᓱᖃᑎᒌᓐᓂᑯᑦ ᐃᒣᓪᓗᑕ:
- ᐃᓄᑐᖃᕐᓅᓕᖓᑎᓗᒋᑦ
- ᐃᑉᐱᒋᑦᓯᐊᓗᒋᑦ ᐱᒍᓐᓇᓂᖏᑦ ᖃᓄᐃᓘᕆᐊᕐᓂᒥᒃ
- ᓲᓱᒋᑦᓯᐊᓗᒋᑦ ᐊᒻᒪᓗ ᐃᓕᑕᕐᓯᓗᒋᑦ ᓲᓱᒋᔭᑦᓴᐅᒋᐊᖃᕐᓂᖏᑦ.
- ᑫᓪᓗᑐᕐᓗᒋᑦ ᐃᓅᖃᑎᒌᑦᑐᓄᑦ ᐃᓚᒋᔭᐅᓂᕐᒥᒃ ᐊᒻᒪᓗ ᐃᓚᐅᖃᑕᐅᓂᕐᒥᒃ.
- ᑲᑐᑦᔨᓗᑕ ᓴᐳᑦᔨᓗᒋᑦ.
ᐅᕙᖕᖓᑦ ᐱᓯᒪᔪᖅ:
ᕕᓕᐊᑦᓱ, ᑯᕆᔅᑎᕗ, ᖃᓄᐃᓕᕐᐱᑖ? ᓄᓇᕕᒻᒥ ᐃᓗᓯᓕᕆᓂᕐᒥᒃ ᖃᐅᔨᓴᕐᓂᖅ, ᓄᓇᓕᒻᒨᓕᖓᔪᖅ ᑐᓴᕐᑎᓯᒍᑎ, ᑐᑭᖓ ᐃᓄᑐᐃᓐᓀᑦ ᐃᓗᕐᖁᓯᖓᓂᒃ ᓴᕐᕿᑎᑦᓯᒍᑎᐅᑉ ᐊᒻᒪᓗ ᐃᓅᖃᑎᒌᓐᓂᒥ ᖃᐅᔨᒍᑎᐅᔪᑦ ᐃᓗᓯᕐᒥᒃ ᓄᓇᕕᒻᒥ. ᐅᖃᕐᑕᐅᓯᒪᔪᖅ ᐅᕙᓂ: ᓇᐅᑦᓯᑐᐃᓂᖅ ᐃᓗᓯᓕᕆᓂᕐᒥᒃ ᐊᒻᒪᓗ ᐃᓄᓕᕆᓂᕐᒥᒃ ᓄᓇᕕᒻᒥ: ᐊᑐᕐᑏᑦ ᐃᓱᒪᒋᔭᖏᑦ. ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, 2021.