ᖄᖏᕐᓂᑯᓕᐅᕐᑎᐅᒐᑎᒃ ᓄᓇᓕᐅᑉ ᑎᒥᖁᑎᖏᑦ ᐃᑲᔪᕐᓯᒪᔨᐅᕗᑦ ᐱᐅᓯᐅᒥᑎᑦᓯᒐᓱᐊᕐᓂᒥᒃ ᐃᓅᓯᐅᑉ ᐃᓂᓪᓚᖓᐅᓯᖏᓐᓂᒃ ᖃᓄᐃᖕᖏᓯᐊᕐᑐᑯᓪᓗ ᐃᓅᓯᖃᕆᐊᖃᕐᓂᒥᒃ. ᐱᑦᔪᔨᓂᖓᑦ ᐃᑲᔪᕐᓯᒪᔪᖅ ᐱᑦᔪᔨᒍᑎᖏᓐᓂᒃ ᓇᐅᓕᒫᓂᒃ ᖃᓄᐃᖕᖏᓯᐊᕐᑐᓕᕆᔩᑦ ᐃᓄᓕᕆᓂᕐᒥᓗ ᐱᓇᓱᐊᕐᕖᑦ. ᐊᐅᓚᑕᐅᑦᓱᑎᒃ ᓄᓇᓕᒻᒥ, ᐱᓇᓱᐊᕐᕕᐅᔪᑦ ᑐᑭᓯᒪᓂᕐᐹᓴᔭᐅᑦᓱᑎᒃ ᓄᓇᓕᐅᑉ ᑭᖕᖑᒪᓇᕐᑐᖁᑎᖏᓐᓂᒃ.
ᑐᕌᕋᖏᑦ ᑕᒪᒃᑯᐊ ᓄᓇᓕᐅᑉ ᑎᒥᖁᑎᖏᑦᑕ ᐱᓇᓱᐊᕐᑕᐅᒍᑎᖏᓐᓂ ᐅᑯᐊ
ᐃᑲᔪᕐᓯᒪᔭᐅᒍᓐᓇᓂᕐᒧᑦ ᑐᖕᖓᕕᐅᒋᐊᓖᑦ
ᑮᓇᐅᔭᕐᑕᕋᓱᐊᕈᑏᑦ
ᓄᓇᓖᑦ ᑎᒥᖁᑎᖏᑦ
ᑐᕌᕋᖏᑦ ᑕᒪᒃᑯᐊ ᓄᓇᓕᐅᑉ ᑎᒥᖁᑎᖏᑦᑕ ᐱᓇᓱᐊᕐᑕᐅᒍᑎᖏᓐᓂ ᐅᑯᐊ
- ᑮᓇᐅᔭᖃᕐᑎᓯᓂᖅ ᐊᐅᓚᒍᑎᑦᓴᖏᓐᓂᒃ ᓄᓇᓕᐅᑉ ᑎᒥᖁᑎᖏᓐᓂᒃ;
- ᓄᓇᓕᐅᑉ ᑎᒥᖁᑎᖏᑦ ᑲᑎᒪᔨᖁᑎᖏᓪᓗ ᓴᐳᑎᓯᒪᓗᒋᑦ ᑐᑭᓯᒪᑎᓗᒋᓪᓗ ᑎᓕᔭᐅᒪᒍᑎᒋᔭᒥᓂᒃ ᑲᔪᓯᑎᑦᓯᓯᐊᕈᓐᓇᖁᓪᓗᒋᑦ;
- ᐃᓕᑕᕐᓯᓯᒪᓗᑎᒃ ᑫᓪᓗᑐᐃᒍᓐᓇᓗᑎᓪᓗ ᓄᓇᓕᐅᑉ ᑎᒥᖁᑎᖓᑕ ᐱᓇᓱᐊᕐᑕᖏᓐᓂᒃ;
- ᐃᑉᐱᒋᔭᖃᕐᓗᑎᒃ ᐱᑦᔪᔨᒍᑎᑕᖃᑦᓯᐊᒪᖓᑦ ᐱᓇᓱᐊᕐᑕᐅᔪᐃᓪᓗ ᑲᔪᓯᑦᓯᐊᕋᓗᐊᕐᒪᖔᑕ ᑲᒪᒋᔭᖃᑦᓯᐊᕈᑎᑎᒍᑦ.
ᐃᑲᔪᕐᓯᒪᔭᐅᒍᓐᓇᓂᕐᒧᑦ ᑐᖕᖓᕕᐅᒋᐊᓖᑦ
ᓴᐳᑎᓯᒪᔭᐅᓚᖓᒍᑎᒃ ᑮᓇᐅᔭᖃᕐᑎᑕᐅᓚᖓᒍᑎᓪᓗ ᑕᒡᒎᓇ ᐱᓇᓱᐊᕐᑕᐅᔪᒃᑯᑦ, ᓄᓇᓕᐅᑉ ᑎᒥᖁᑎᖓ ᐅᑯᓂᖓ ᒪᓕᒋᐊᓕᒃ ᑐᖕᖓᕕᖃᕐᓗᓂ:
- ᐱᖁᔭᕐᑎᒍᑦ ᐃᓕᑕᕆᔭᐅᓂᖃᕐᓗᓂ ᑎᒥᖕᖑᑎᑕᐅᓯᒪᒍᑎᒃᑯᑦ ᑯᐯᑉ ᐱᖁᔭᖏᑦ ᐊᐅᓚᑦᓯᒍᑎᐅᔪᑦ ᖄᖏᕐᓂᑯᓕᐅᕐᑎᐅᒐᑎᒃ ᑎᒥᐅᔪᓂᒃ;
- ᑲᑎᒪᔨᓄᑦ ᓯᕗᓕᕐᑕᐅᓗᓂ, ᑖᒃᑯᐊ ᑲᑎᒪᔩᑦ ᐱᑦᔪᔭᐅᑦᑕᑐᓂᑦ ᐅᕝᕙᓗᓐᓃᑦ ᓄᓇᓕᒻᒥᐅᓂᑦ ᐱᓯᒪᒍᓐᓇᑐᑦ;
- ᓄᐃᑎᕆᔨᐅᓗᓂ ᐱᓇᓱᐊᕋᑦᓴᔭᓂᒃ ᓱᖃᑦᓯᓂᐅᔪᓂᒃ ᐃᑲᔪᕐᓯᒪᓂᐊᕐᑐᓂᒃ ᓴᐳᑦᔨᓯᒪᓂᐊᕐᑐᓂᓪᓗ ᐋᓐᓂᐊᓂᓕᕆᓂᐅᑉ ᐃᓄᓕᕆᓂᐅᓪᓗ ᐱᓇᓱᐊᕐᑕᖏᓐᓂᒃ;
- ᐊᐅᓚᓂᖃᕐᓗᓂ ᐊᐅᓚᑦᓯᓯᐊᕈᑎᐅᔪᑎᒍᑦ ᒪᓕᒐᕐᑎᒍᓪᓗ ᓄᐃᑕᐅᒪᔪᓄᑦ ᑯᐯᑉ ᑲᕙᒪᖓᓄᑦ. ᑌᒣᒻᒪᑦ, ᑲᒪᒋᔭᐅᒍᑎᖃᕆᐊᓕᒃ ᐱᖁᔮᐱᓐᓂᒃ ᐊᖏᕐᑕᐅᒪᔪᓂᒃ ᑲᑎᒪᓂᖓᓐᓂ ᑲᑎᒪᔩᑦ, ᑖᒃᑯᐊᓗ ᐊᓯᑦᔨᒋᐊᕐᑕᐅᒍᓐᓇᑑᓗᑎᒃ ᕆᐊᖃᓕᑐᐊᕈᑎᒃ;
- ᓲᓱᒋᔭᖃᑦᓯᐊᓗᓂ ᒪᓕᑦᓯᐊᓗᓂᓗ ᐅᑯᓂᖓ 8-ᓂᒃ ᑐᖕᖓᕕᐅᔪᓂᒃ ᐃᒻᒥᓂᕐᓱᓂᒃᑯᑦ ᓄᓇᓕᒻᒥ ᐊᐅᓚᒍᓯᖃᕐᓂᒧᑦ
- ᖄᖏᕐᓂᑯᓕᐅᕐᑎᐅᖏᓪᓗᓂ ᑎᒥᐅᒋᐊᓕᒃ;
- ᓄᓇᓕᐅᑉ ᐃᓗᐊᓂ ᐱᓇᓱᐊᕆᐊᓕᒃ;
- ᑲᑐᑦᔨᖃᑕᐅᓂᕐᒥᒃ ᐃᓂᓪᓚᖓᑦᓯᐊᓂᕐᒥᓗ ᐊᐅᓚᒍᓯᖃᕐᓗᓂ;
- ᐃᒻᒥᓂᕿᒍᓐᓇᓗᓂ ᓇᓗᓀᕐᓯᓂᕐᒥᒃ ᖃᓄᐃᑦᑐᒥᒃ ᑎᓕᔭᐅᒪᐅᑎᖃᕐᓂᐊᒪᖔᒻᒥ, ᖃᓄᕐᓗ ᐱᓇᓱᐊᕈᑎᖃᕐᓂᐊᒪᖔᒻᒥ, ᐱᓇᓱᒍᓯᖃᕐᓂᐊᒪᖔᒻᒥ ᑐᕌᕋᖃᕐᓂᐊᒪᖔᒻᒥᓗ;
- ᓴᕐᕿᑕᐅᒍᑎᖃᕐᓯᒪᓗᓂ ᐱᒋᐊᕐᑎᓯᓂᖓᒍᑦ ᓄᓇᓕᐅᑉ ᐃᓄᖁᑎᖏᑦᑕ;
- ᐱᔭᖃᕋᓱᐊᕐᓗᓂ ᐃᓅᓯᕐᒨᓕᖓᔪᒥᒃ ᑎᓕᔭᐅᒪᒍᓯᕐᒥᒃ ᐊᓯᐊᑕ ᐱᓇᓱᐊᖕᖏᑕᖓᓂ ᑫᓪᓗᑐᐃᔨᐅᓚᖓᓗᓂ ᐃᓅᓯᕐᒥᒃ ᐊᓯᑦᔨᑎᕆᓂᐅᔪᒥᒃ;
- ᓄᐃᑕᑎᑦᓯᓗᓂ ᐱᓇᓱᐊᖃᑎᖃᕈᓐᓇᓂᕐᒥᒃ ᑲᑐᑦᔨᓂᒃᑯᑦ ᐃᓗᐃᒃᑲᐅᓕᖓᔪᓂᓪᓗ ᐱᓇᓱᐊᕈᑎᖃᕐᓗᓂ, ᑕᑯᓐᓇᒐᖃᕋᓱᐊᕐᑐᓂᒃ ᐃᓗᐃᑦᑐᑯᑦ ᐱᓇᓱᐊᕐᑕᐅᔭᕆᐊᓕᓐᓂᒃ
- ᐊᐅᓚᑕᐅᓗᓂ ᑲᑎᒪᔨᓄᑦ ᐱᑐᑦᓯᒪᕕᖃᖕᖏᑐᓄᑦ ᓇᐅᓕᒫᓕᕆᔨᐅᓂᕐᒧᑦ ᐱᓇᓱᐊᕐᕕᓄᑦ.
ᑮᓇᐅᔭᕐᑕᕋᓱᐊᕈᑏᑦ
ᐱᓇᓱᐊᕐᑕᐅᔪᒃᑯᑦ ᓴᐳᑎᓯᒪᔭᐅᓚᖓᒍᑎᒃ ᑮᓇᐅᔭᖃᕐᑎᑕᐅᓚᖓᒍᑎᓪᓗ, ᑖᒃᑯᐊ ᓄᓇᓕᐅᑉ ᑎᒥᖁᑎᖏᑦ ᐊᕐᕌᒍᑕᒫᑦ ᒫᑦᔨᐅᑉ ᕿᑎᖓᓂ ᑐᑦᓯᕋᐅᑎᓕᐅᕐᐸᒋᐊᓖᑦ ᑮᓇᐅᔭᕐᑕᕈᒪᐅᑎᒥᒃ. ᓄᐃᑎᕆᕙᒋᐊᖃᕐᓱᑎᓪᓗ ᑮᓇᐅᔦᑦ ᐱᓇᓱᐊᕐᑕᐅᓯᒪᔪᐃᓪᓗ ᑐᓴᕐᑎᓯᐅᑎᖏᓐᓂᒃ ᑐᑦᓯᕋᕐᑕᐅᕙᓐᓂᐊᑐᓂᒃ ᐊᕐᕌᒎᑉ ᐃᓗᐊᓂ.
ᑮᓇᐅᔭᕐᑖᕈᒪᐅᑏᑦ ᑐᓴᕐᑎᓯᐅᑏᓪᓗ ᕿᒥᕐᕈᔭᐅᕙᓐᓂᐊᑐᑦ ᐸᕐᓀᑏᑦ ᐱᓇᓱᐊᕐᑕᐅᒋᐊᓕᓐᓂᓗ ᐱᓇᓱᐊᕐᑎᖏᓐᓄᑦ ᓴᐳᑦᔨᓯᒪᔨᐅᔪᓄᑦ ᑎᒥᐅᔪᓂᒃ ᓄᓇᓕᒥᓪᓗ ᐱᓇᓱᐊᕐᑕᐅᔪᓂᒃ. ᕿᒥᕐᕈᔭᐅᓯᒪᓕᕈᓂ ᐋᕐᕿᒋᐊᕐᑕᐅᓯᒪᓕᕈᓂᓗ ᑮᓇᐅᔭᓂᒃ ᑐᑦᓯᕋᐅᑎᒃ ᑐᓂᔭᐅᓕᕋᔭᕐᑐᖅ ᐃᓗᓯᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᖏᕐᑕᐅᔪᑦᓴᓕᐊᖑᓗᓂ.
