ᓄᓇᕕᒻᒥ ᐊᓐᓂᐊᓂᓕᕆᓂᕐᒧᓗ ᐃᓄᓕᕆᓂᕐᒧᓗ ᐱᒍᑦᔨᒍᑏᑦ ᐃᓚᖃᓲᑦ ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᓐᓂᒃ, ᐃᓅᓕᑦᓯᕕᒃ ᐊᓐᓂᐊᕕᖓᓂᒃ (ᑕᓯᐅᔭᕐᔪᐊᒥ) ᐊᒻᒪᓗ ᐅᖓᕙᒥ ᑐᓚᑦᑕᕕᒃ ᐊᓐᓂᐊᕕᖓᓂᒃ (ᐅᖓᕙᒥ). ᐊᑎᓕᐅᕐᑕᐅᓚᐅᔪᑎᓗᒋᑦ ᐅᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ (ᐊᖏᖃᑎᒌᓐᓂᖅ) ᐊᒻᒪᓗ ᑭᖑᓂᐊᒍᑦ ᐊᖏᖃᑎᒌᒍᑎᐅᓯᒪᒻᒥᔪᑦ ᓄᐃᑦᓯᒍᑎᐅᓯᒪᓕᕐᑐᑦ ᑐᑭᒧᐊᒍᑎᑦᓴᓂᒃ ᑕᒪᑦᓱᒧᖓ ᐱᕙᓪᓕᐊᑎᑦᓯᓂᕐᒧᑦ ᐊᓐᓂᐊᓂᓕᕆᓂᕐᒧᓗ ᐃᓄᓕᕆᓂᕐᒧᓗ ᐱᒍᑦᔨᒍᑎᓂᒃ ᓄᓇᕕᒻᒥ. ᑕᒪᒃᑯᐊ ᐊᓐᓂᐊᓂᓕᕆᓂᒃᑯᓗ ᑲᒪᒋᔭᖃᕐᓃᑦ ᐊᒻᒪᓗ ᐃᓄᓕᕆᓂᕐᒥᒃ ᐱᒍᑦᔨᒍᑏᑦ ᑯᐯᒃᑯᓄᑦ ᑎᒍᒥᐊᕐᑕᐅᒪᑕ, ᑭᓯᐊᓂ ᓈᒻᒪᓯᓕᕐᑎᑕᐅᒋᐊᕐᓯᒪᑦᓱᑎᒃ ᑕᒫᓂ ᓄᓇᖃᕐᑐᓄᑦ.
ᓄᓇᕕᐅᑉ ᐃᓄᖏᑦᑕ ᐃᓱᒪᒋᑦᓱᒋᑦ ᐊᒻᒪᓗ ᐃᓗᕐᕈᓯᖃᕆᐊᖏᑦ ᐊᑦᔨᒋᔭᐅᖏᑐᒥᒃ, ᓄᓇᕕᒻᒥᐅᑦ ᐱᔪᓐᓇᓯᐊᓪᓚᕆᒻᒥᔪᑦ ᐊᕐᕿᒍᑎᑦᓴᐅᒍᓐᓇᑐᓂᓪᓗ ᐱᔭᐅᒪᑦᑌᓕᒍᓯᕐᓂᓗ. ᐊᓐᓂᐊᓂᓕᕆᓂᒃᑯᑦ ᐃᓄᓕᕆᓂᒃᑯᓗ ᐱᒍᑦᔨᓂᖅ ᐱᓇᓱᐊᕐᑕᐅᑎᓪᓗᒍ, ᑫᓪᓗᑐᐃᒍᑎᓂᒃ, ᐱᔭᐅᒪᑦᑌᓕᒍᑎᓂᓪᓗ ᓴᐳᑦᔨᓯᒪᒍᑎᓄᓪᓗ ᓱᓇᓱᐊᕐᑎᑕᐅᒍᓐᓇᓲᖑᒪ ᐊᑕᐅᓯᐅᓕᖓᓂᕐᓴᐅᑎᓗᒋᑦ ᑌᒣᓕᐅᕐᑐᑐᖃᐅᓂᖏᑦᑎᒍᓪᓗ.
ᑕᒪᒃᑯᐊ ᑲᒪᒋᐊᑦᓴᐅᑎᒋᒍᓐᓇᓲᓪᓗ ᖃᐅᔨᒪᔪᒻᒪᕆᓪᓗ ᓄᓇᕕᐅᑉ ᐊᓐᓂᐊᓂᓕᕆᓂᒃᑯᓗ ᐃᓄᓕᕆᓂᒃᑯᓗ ᐱᒍᑦᔭᐅᕕᖏᓐᓄᑦ ᓵᖕᖓᓯᒋᐊᖃᓲᖑᑦᓱᑎᒃ ᐊᓐᓂᐊᓂᓕᕆᓂᕐᒧᐊᖓᔪᓂᒃ, ᐃᓗᕐᕈᓯᒨᓕᖓᔪᒥᓗ, ᐃᓄᓕᕆᓂᕐᒥᓗ ᐊᒻᒪᓗ ᑮᓇᐅᔭᓕᕆᐅᑎᓂᒃ. ᐱᓇᓱᑦᑎᓕᕆᓂᕐᒧᑦ, ᓱᓇᖃᓪᓚᕆᓐᓂᑯᓗ ᑮᓇᐅᔭᑎᒍᓪᓗ ᐱᕕᑦᓴᐅᑎᑕᐅᔪᑦ ᑌᒪᖕᖓᑦ ᐊᑑᑎᔭᐅᓲᖑᑦᓱᑎᒃ ᐊᕐᕿᓱᐃᑎᑕᐅᑦᓱᑎᒃ ᐃᓱᐊᖁᑎᑦᓴᓂᒃ ᐱᑕᖃᕆᐊᖃᕐᑐᓂᒃ ᓄᓇᕕᒻᒥᐅᑦ ᖃᓄᐃᖏᓯᐊᕈᑎᑦᓴᖏᓐᓄᑦ.
ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᑦ
ᑖᒃᑯᐊ ᓄᐃᑕᐅᓯᒪᔪᑦ 1995-ᒥ ᒪᓕᑦᓱᒋᑦ ᐅᑯᐊ ᐱᖁᔦᑦ ᐱᑦᔪᑎᒋᑦᓱᒋᑦ ᐊᓐᓂᐊᓂᓕᕆᓂᕐᒥᓗ ᐃᓄᓕᕆᓂᕐᒥᓗ ᐱᒍᑦᔨᓂᕐᒧᑦ, ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᑦ ᑎᓕᔭᐅᒪᒍᑎᖃᓗᐊᖑᐊᓲᑦ ᐊᕐᕿᓱᐃᔨᐅᒋᐊᖃᕐᓂᒥᒃ ᐊᓐᓂᐊᓂᓕᕆᓂᕐᒧᓗ ᐃᓄᓕᕆᓂᕐᒧᓗ ᐱᒍᑦᔨᒍᑏᑦ ᐃᑲᔪᕐᓯᒪᐅᑎᖏᓐᓂᒃ ᑕᒫᓂ ᓄᓇᒥ (14-ᓂᒃ ᓄᓇᕕᐅᑉ ᓄᓇᓕᖏᓐᓂᒃ), ᓇᓗᓀᔦᖃᑦᑕᓗᑎᓪᓗ ᑕᒪᒃᑯᐊ ᐃᑲᔪᕐᓯᒪᐅᑏᑦ ᐊᑐᕐᓂᖃᑦᓯᐊᕋᓗᐊᕐᒪᖔᑕ ᐃᑉᐱᒋᔭᖃᕐᓗᑎᓪᓗ ᑕᒪᒃᑯᐊ ᐊᑐᓲᑦ ᐱᑎᑕᐅᑦᓯᐊᕋᓗᐊᕐᒪᖔᑕ ᓈᒻᒪᒋᔭᐅᑦᓯᐊᓂᖃᕐᑐᓂᒃ ᑖᒃᑯᓄᖓ ᑭᖕᖒᒪᒋᔭᐅᔪᓄᑦ. ᓱᓕ. ᐃᑉᐱᒋᔭᖃᓲᖑᒻᒥᔪᑦ ᐊᑐᕐᑕᐅᓯᐊᕋᓗᐊᕐᒪᖔᑕ ᑮᓇᐅᔭᖃᕐᑎᓯᒍᑎᐅᕙᑦᑐᑦ ᓄᓇᕕᐅᑉ ᓄᓇᖓᓄᑦ.
ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᑦ ᑎᒥᐅᔫᕗᖅ ᐱᐅᓯᓕᐅᒥᑎᑦᓯᒐᓱᐊᕐᓂᑯᑦ ᖃᓄᐃᖏᓯᐊᕐᓂᖏᓐᓂᒃ ᐃᓄᖏᑦᑕ 14-ᓂᒃ ᓄᓇᓕᓐᓃᑐᓂᒃ ᑕᒫᓂ ᓄᓇᖁᑎᖓᓐᓂ. ᑖᒃᑯᐊ ᐃᓗᓐᓈᒍᑦ ᑐᕌᖓᕕᖃᕐᑐᑦ ᓈᒻᒪᓈᕐᑎᓯᒋᐊᕐᑎᐅᓂᕐᒥᒃ ᑕᒪᒃᑯᓂᖓ ᐊᓐᓂᐊᓂᓕᕆᓂᒃᑯᓗ ᐃᓄᓕᕆᓂᒃᑯᓗ ᐱᒍᑦᔨᒍᑏᑦ ᐃᑲᔪᕐᓯᒪᐅᑎᖏᓐᓂᒃ ᑖᒃᑯᓄᖓ ᐃᓄᐃᑦ ᑭᖕᖒᒪᒋᔭᖏᓐᓄᑦ ᐊᒻᒪᓗ ᓄᓇᕕᐅᑉ ᖃᓄᐃᓕᖓᓂᖓᓄᑦ.
ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᑦ ᑲᒪᒋᔭᖃᓲᑦ ᐊᓐᓂᐊᓂᓕᕆᓂᕐᒧᓗ ᐃᓄᓕᕆᓂᕐᒧᓗ ᐱᒍᑦᔨᒍᑏᑦ ᐸᑦᔭᖏᓐᓂᒃ ᐅᓄᕐᓂᓕᓐᓂᒃ $167 ᒥᓕᐊᓐᑖᓚᑲᓴᓐᓂᒃ ᐃᓄᓐᓂᒃ ᐱᒍᑦᔨᒍᑎᓂᒃ 14-ᓂ ᓄᓇᓕᓐᓂ. ᐊᓪᓚᕕᒻᒪᕆᖃᕐᓱᑎᓪᓗ ᑰᔾᔪᐊᒥ.