ᓄᓇᕕᒻᒥ, ᐱᒍᑦᔨᒍᑏᑦ ᖃᓄᐃᑦᑐᑐᐃᓐᓀᑦ ᐊᑑᑎᔭᐅᒍᓐᓇᑐᑦ ᐃᑲᔪᕐᓂᒧᑦ ᐃᓚᒌᑦᑐᓂᒃ ᐊᑦᓱᕈᕐᓇᑐᒃᑰᑐᓂᒃ ᐱᔪᓐᓇᑎᑕᐅᔪᓂᒃ ᐋᓐᓂᐊᕕᓐᓂᒃ. ᐅᑯᐊ ᐃᓚᐅᑎᑕᐅᑦᓱᑎᒃ, ᑭᓯᐊᓂ ᑖᒃᑯᑐᖑᖕᖏᑲᓗᐊᕐᓱᑎᒃ:
- ᐱᒍᑦᔨᒍᑏᑦ ᓄᓇᓕᓐᓅᓕᖓᔪᑦ ᐃᓄᓕᕆᓂᕐᒨᓕᖓᔪᐃᓪᓗ
- ᐱᒍᑦᔨᒍᑏᑦ ᒪᒥᓴᕐᓂᒨᓕᖓᔪᑦ
- ᐱᒍᑦᔨᒍᑏᑦ ᓴᐳᒻᒥᒐᓱᐊᕐᓂᒧᑦ ᐅᕕᒃᑲᓂᒃ
- ᐱᒍᑦᔨᒍᑏᑦ ᐱᐊᕋᕐᓄᑦ, ᐅᕕᒐᕐᑐᓄᓪᓗ ᐃᓚᒌᑦᑐᓄᓪᓗ
ᐱᒍᑦᔨᒍᑏᑦ ᓄᓇᓕᓐᓅᓕᖓᔪᑦ ᐃᓄᓕᕆᓂᕐᒨᓕᖓᔪᐃᓪᓗ
ᐱᒍᑦᔨᒍᑏᑦ ᓄᓇᓕᓐᓅᓕᖓᔪᑦ ᐃᓄᓕᕆᓂᕐᒨᓕᖓᔪᐃᓪᓗ ᓄᓇᕕᒻᒥ ᐊᐅᓚᑕᐅᔪᑦ ᑕᒪᖏᓐᓂᒃ ᐋᓐᓂᐊᕖᓐᓂᒃ. ᐱᒍᑦᔨᒍᑏᑦ ᓄᓇᓕᓐᓅᓕᖓᔪᑦ ᐃᓄᓕᕆᓂᕐᒨᓕᖓᔪᐃᓪᓗ ᐊᑐᐃᓐᓇᐅᔪᑦ ᓄᓇᓕᓐᓄᑦ (0-ᓂᒃ 100-ᒧᑦ ᐅᑭᐅᓕᓐᓄᑦ) ᒪᓕᓪᓗᒍ ᒪᓕᒐᖅ ᓲᓱᑦᓴᑐᖅ ᐱᒍᑦᔨᒍᑎᓂᒃ ᐃᓗᓯᓕᕆᓂᕐᒨᓕᖓᔪᑦ ᐃᓄᓕᕆᓂᕐᒨᓕᖓᔪᓪᓗ. ᑖᒃᑯᐊ ᐱᔪᓐᓇᑎᑦᓯᔪᑦ ᐱᒍᑦᔨᒍᑎᓂᒃ ᐃᓄᓕᕆᓂᕐᒨᓕᖓᔪᓂᒃ ᒫᓐᓄᒧᑦ ᐊᑑᑎᔭᐅᒍᓐᓇᑐᓂᒃ ᑭᖕᖒᒪᑦᓯᔪᓄᑦ. ᑖᒃᑯᐊ ᐱᒍᑦᔨᒍᑏᑦ ᐱᔪᓐᓇᑎᑕᐅᔪᑦ ᐃᓄᓐᓄᑦ ᐃᑲᔪᕈᒪᔪᓄᑦ ᑭᓯᐊᓂ.
ᐱᒍᑦᔨᒍᑏᑦ ᐃᓚᒌᑦᑐᓄᑦ ᐊᑦᓱᕈᕐᓇᑐᒃᑰᑐᓄᑦ ᒪᓕᑦᓯᐊᑐᑦ ᐃᓚᒌᑦᑐᑦ ᑭᖕᖒᒪᒋᔭᖏᓐᓂᒃ; ᐃᓚᖓᓂᒃ ᑭᓯᐊᓂ ᐊᑑᑎᔭᐅᒍᓐᓇᓱᑎᒃ ᑭᖕᖒᒪᒋᔭᐅᓕᕐᒪᑕ ᑭᓯᐊᓂ ᐊᒻᒪᓗ ᓯᕕᑐᔪᒧᑦ ᐊᑑᑎᔭᐅᒍᓐᓇᓱᑎᒃ. ᐅᑯᐊ ᐆᑦᑑᑎᒋᓗᒋᑦ:
- ᐃᑲᔪᕐᑕᐅᓂᖅ ᑮᓇᐅᔭᑎᒍᑦ ᐅᕝᕙᓘᓐᓃᑦ ᑭᖒᒪᑦᓯᐸᑦ ᓱᓇᒐᓚᓐᓂᒃ ᐆᑦᑑᑎᒋᓗᒋᑦ ᓂᖀᑦ ᐅᕝᕙᓘᓐᓃᑦ ᐋᓐᓄᕌᑦ ᑭᖕᖒᒪᒋᔭᐅᑉᐸᑕ ᐃᓚᒌᑦᑐᓄᑦ ᐊᑦᓱᕈᕐᓇᑐᒃᑰᑐᓄᑦ;
- ᐱᔪᓐᓇᑎᑦᓯᓱᑎᑦ ᐃᓕᓐᓂᐊᕋᑦᓴᓂᒃ ᓄᐃᑦᓯᒋᐊᕐᑎᓯᒐᓱᐊᕐᓂᒧᑦ ᐱᔪᓐᓇᐅᑎᑦᓯᐊᓂᒃ ᐱᕈᕐᓭᓂᕐᒧᑦ ᐊᖓᔪᕐᖄᓄᑦ;
- ᐃᓄᒃ ᐅᕝᕙᓘᓐᓃᑦ ᐃᓚᒌᑦᑐᑦ ᑕᑯᔭᐅᒋᐊᓪᓚᓗᑎᒃ.
ᐱᒍᑦᔨᒍᑏᑦ ᒪᒥᓴᕐᓂᒨᓕᖓᔪᑦ
ᐱᒍᑦᔨᒍᑏᑦ ᒪᒥᓴᕐᓂᒨᓕᖓᔪᑦ ᓄᓇᕕᒻᒥ ᐊᐅᓚᑕᐅᔪᑦ ᐅᖓᕙᒥ ᑐᓚᑦᑕᐅᕕᐅᑉ ᐋᓐᓂᐊᕕᖓᓂᒃ. ᐃᑲᔪᓲᑦ ᐃᓅᖃᑎᒌᑦᓯᐊᕆᐊᖃᕐᓂᖏᓐᓄᑦ ᐅᕝᕙᓘᓐᓃᑦ ᐱᔪᓐᓇᑎᑦᓯᓱᑎᒃ ᐱᒍᑦᔨᒍᑎᓂᒃ ᒪᒥᓴᕐᓂᒨᓕᖓᔪᓂᒃ ᐅᕕᒐᕐᑐᓄᑦ 0-ᒥᒃ 17-ᒧᑦ ᐅᑭᐅᓕᓐᓄ, ᐊᑦᓱᕈᕐᓇᑐᒃᑰᑐᓄᑦ ᐱᐅᓯᒥᓂᒃ, ᐃᓱᒪᒥᓂᒃ ᐅᕝᕙᓘᓐᓃᑦ ᐃᓚᒥᓂᒃ, ᑭᖕᖒᒪᑦᓯᓚᕿᑦᓱᑎᒃ ᑲᒪᒋᔭᐅᓂᕐᒥᒃ ᐃᑲᔪᕐᑕᐅᓂᕐᒥᓗ. ᑖᒃᑯᐊ ᐱᒍᑦᔨᒍᑏᑦ ᐊᐱᕆᔭᐅᒍᓐᓇᑐᑦ ᐅᕕᒐᕐᑐᓂᒃ ᓴᐳᒻᒥᒐᓱᐊᓲᓂᒃ, ᐱᒍᑦᔨᒍᑎᓂᓪᓗ ᐱᐊᕋᕐᓄ, ᐅᕕᒐᕐᑐᓄᓪᓗ ᐃᓚᒌᑦᑐᓄᓪᓗ ᐊᒻᒪᓗ ᐱᒍᑦᔨᒍᑎᓂᒃ ᐃᓄᓕᕆᓂᕐᒨᓕᖓᔪᑦ. ᓄᓇᕕᒻᒥ, ᐱᒍᑦᔨᒍᑏᑦ ᒪᒥᓴᕐᓂᒨᓕᖓᔪᑦ ᐅᑯᐊ ᐃᓚᐅᑎᑕᐅᒻᒥᔪᑦ:
- ᐱᒍᑦᔨᒍᑎ ᐱᔪᓐᓇᑎᑦᓯᓂᕐᒧᑦ ᐱᓇᓱᑦᑎᒥᒃ ᑎᒥᐅᔫᑉ ᓯᓚᑖᓂ ᐃᑲᔪᕐᓂᒧᑦ ᐃᓄᓐᓂᒃ ᐱᔪᓐᓇᑎᑕᐅᔪᖅ 14-ᓂ ᓄᓇᓕᓐᓂ. ᑖᒃᑯᐊ ᐱᓇᓱᑦᑏᑦ ᐱᓇᓱᓲᑦ ᑕᑯᓂᐊᕐᓱᑎᒃ ᐃᓚᒌᑦᑐᓂᒃ ᐊᕐᓵᓂᑦᑌᓕᒐᓱᑦᓱᑎᒃ ᐱᐊᕋᕐᓂᒃ ᐅᕝᕙᓘᓐᓃᑦ ᐅᑎᕐᑎᓯᒐᓱᐊᕐᓱᑎᒃ ᐅᕕᒐᕐᑐᓂᒃ ᐃᓚᒥᓄᑦ;
- ᒪᕐᕉᒃ ᒪᒥᓴᕐᕖᒃ ᐱᒍᑦᔭᐅᔪᓄᑦ ᐅᑭᐅᓕᓐᓄᑦ 6-ᓂᒃ 12-ᒧᑦ;
- ᒪᕐᕉᒃ ᓇᔪᒑᒃ ᐱᒍᑦᔭᐅᔪᓄᑦ ᐅᑭᐅᓕᓐᓄᑦ 12-ᓂᒃ 18-ᒧᑦ;
- ᒪᒥᓴᕐᕕᒥᒃ ᐅᕕᒐᕐᑐᓄᑦ ᐊᖑᑎᓄᑦ ᐅᑭᐅᓕᓐᓄᑦ 12-ᓂᒃ 18-ᒧᑦ;
- ᒪᒥᓴᕐᕕᒥᒃ ᐅᕕᒐᕐᑐᓄᑦ ᐊᕐᓇᓄᑦ ᐅᑭᐅᓕᓐᓄᑦ 12-ᓂᒃ 18-ᒧᑦ;
- ᒪᒥᓴᕐᕕᒥᒃ ᐅᒃᑯᐊᓯᒪᔪᒥᒃ ᓱᕈᓯᕐᓄᑦ ᒪᓕᒐᕐᑖᑎᑕᕕᓂᕐᓄᑦ ᐃᕐᖃᑐᐃᔨᒧᑦ YCJA-ᑯᑎᒍᑦ.
ᐱᒍᑦᔨᒍᑏᑦ ᓴᐳᒻᒥᒐᓱᐊᕐᓂᒧᑦ ᐅᕕᒃᑲᓂᒃ
ᐱᒍᑦᔨᒍᑏᑦ ᓴᐳᒻᒥᒐᓱᐊᕐᓂᒧᑦ ᐅᕕᒃᑲᓂᒃ ᓄᓇᕕᒻᒥ ᑲᒪᒋᔭᐅᒋᐊᓖᑦ ᑕᒪᖏᓐᓄᑦ ᐋᓐᓂᐊᕖᓐᓄᑦ. ᐅᕕᒃᑫᑦ ᓴᐳᒻᒥᔨᒃᑯᖏᑦᑕ ᒪᓕᒐᖓ (YPA) ᑯᐯᒃᒥ ᒪᓕᒐᐅᕗᖅ ᑯᐯᒃ ᓄᓇᓕᓕᒫᖏᓐᓂ ᐋᕐᕿᑕᐅᓯᒪᑦᓱᓂ ᓴᐳᒻᒥᒐᓱᐊᕐᓂᒧᑦ ᐅᕕᒐᕐᑐᓂᒃ 18-ᓂᒃ ᐅᑭᐅᖃᕋᑕᖕᖏᑐᓄᑦ ᓴᐳᒻᒥᓂᖃᑦᓯᐊᖏᑦᑐᓄᑦ ᐅᕝᕙᓘᓐᓃᑦ ᐱᕈᕐᓯᐊᓂᖏᑦ ᐊᑦᑕᓇᕐᑐᒦᑉᐸᑦ. ᑐᕌᒐᖃᕐᓱᓂ ᐃᑕᔪᕐᓂᒧᑦ ᐱᐊᕃᑦ ᖃᓄᐃᖕᖏᓯᐊᕐᓂᖏᓐᓂᒃ, ᐃᑉᐱᒍᓱᑦᓯᐊᕋᓱᑦᓱᑎᒃ ᓴᐳᒻᒥᓂᖃᑦᓯᐊᓂᖏᓐᓂᒃ ᐱᕈᕐᓴᓯᐊᕐᓂᖏᓐᓂᓗ. ᒪᓕᒐᖅ ᐃᓚᐅᑎᑦᓯᔪᖅ ᐊᑑᑎᔭᐅᒍᑎᓂᒃ ᐅᕕᒐᕐᑐᓄᑦ ᐃᓚᒌᑦᑐᓄᓪᓗ ᓄᓇᖃᕐᖄᓯᒪᔪᓄᑦ, ᐃᓕᑕᕐᓯᓯᒪᑦᓱᑎᒃ ᐃᓗᕐᖁᓯᒥᓂᒃ ᐊᑦᔨᐅᖏᑦᑐᓂᒃ, ᐊᑑᑎᓯᒪᔭᕐᒥᓂᓪᓗ ᐊᒻᒪᓗ ᖃᓄᐃᓕᖓᓂᖏᓪᓗ ᓄᓇᓕᖏᓐᓂ.
ᐅᑯᐊ ᐊᑑᑎᔭᐅᑉᐸᑕ ᐅᖃᕈᑕᐅᒍᓐᓇᑐᑦ ᐅᕕᒃᑲᓂᒃ ᓴᐳᒻᒥᒐᓱᐊᓲᓂᒃ:
- ᕿᒪᑦᑕᐅᓯᒪᑉᐸᑦ
- ᓲᖑᖕᖏᐸᑦ
- ᒪᒥᓴᕐᑕᐅᒋᐊᖃᕈᓂ ᐋᓐᓂᐊᖃᕐᓂᒧᑦ ᐃᓱᒪᒥᑎᒍᑦ
- ᓈᖃᑦᑕᐸᑦ ᐋᓐᓂᑎᕐᑕᐅᖃᑦᑕᑐᓂᒃ ᐊᓂᕐᕋᒥᓂᒃ
- ᑑᔭᕐᑕᐅᔪᕕᓂᐅᑉᐸᑦ ᐅᕝᕙᓘᓐᓃᑦ ᐱᑦᓯᐊᑕᐅᓐᓂᖏᑉᐸᑦ ᓄᓕᐊᕐᓂᑎᒍᑦ
- ᐋᓐᓂᑎᕐᑕᐅᖃᑦᑕᐸᑦ ᑎᒥᒻᒥᑎᒍᑦ
- ᐱᓀᓗᑕᖃᓪᓗᑐᕐᐸᑦ ᐱᐅᓯᖓᓄᑦ
ᐸᓯᔭᑦᓴᑖᕐᐸᑕ, ᑎᒥᐅᔫᑉ ᐊᕕᑦᑐᓯᒪᓂᖓᑕ ᐱᓇᓱᑦᑎᖏᑦ ᑲᒪᓲᑦ ᐸᓯᔭᑦᓴᓂᒃ ᖃᐅᔨᒋᐊᕋᓱᐊᕐᖄᓲᑦ ᖃᓄᐃᓘᕐᑐᓴᐅᒻᒪᖔᑕ ᐸᓯᔭᑦᓴᐅᑉ ᒥᑦᓵᓄᑦ ᓱᓕᓪᓚᕆᒪᖔᖅ ᑲᒪᒋᔭᐅᔪᑦᓴᐅᒪᖔᕐᓗ. ᑲᒪᒋᔭᐅᔪᑦᓴᐅᑐᐊᕐᐸᑦ, ᖃᐅᔨᓴᕐᑕᐅᓲᖅ ᖃᐅᔨᕋᓱᐊᕐᓂᒧᑦ ᐱᐊᕋᖅ ᓴᐳᒻᒥᓂᖃᑦᓯᐊᕋᓗᐊᕐᒪᖔᖅ ᐅᕝᕙᓘᓐᓃᑦ ᐱᕈᕐᓴᓂᖓ ᐊᑦᑕᓇᕐᑐᒦᒻᒪᖔᖅ. ᐱᐊᕋᖅ ᐊᑦᑕᓇᕐᑐᒦᓐᓂᕋᕐᑕᐅᐸᑦ, ᐅᕕᒃᑫᑦ ᓴᐳᒻᒥᔨᒃᑯᖏᑦ ᐱᒍᑦᔨᓛᕐᑐᑦ ᐱᐊᕋᕐᒧᑦ ᐃᓚᒥᓄᓪᓗ, ᐊᑑᑎᖁᔭᐅᔪᑦ ᖃᓄᐃᒋᔭᐅᖕᖏᐸᑕ ᐃᕐᖃᑐᐃᕕᓕᐊᕈᓐᓀᓗᑎᒃ ᐅᕝᕙᓘᓐᓃᑦ ᐃᕐᖃᑐᐃᕕᓕᐊᕐᓗᑎᒃ ᑐᑭᑖᕐᑕᐅᓂᕐᒧᑦ.
ᐅᕕᒃᑫᑦ ᓴᐳᒻᒥᔨᒃᑯᖏᑦ ᐱᓇᓱᒐᕐᑖᑎᑦᓯᓲᑦ ᐃᓚᒌᓄᑦ ᓇᔪᕐᑎᓯᒍᒪᔪᓄᑦ ᐅᕕᒐᕐᑐᓂᒃ ᑭᖕᖒᒪᑦᓯᔪᓂᒃ ᐊᒻᒪᓗ ᑖᒃᑯᓂᖓ ᐃᓚᒌᓂᒃ ᓇᔪᒐᓕᓐᓂᒃ ᐅᕕᒐᕐᑐᓂᒃ ᑲᒪᓲᖑᒻᒥᔪᑦ, ᐱᓇᓱᖃᑎᖃᕐᓱᑎᒃ ᓄᓇᕕᒻᒥ ᐃᓚᒌᑦ ᐸᐸᑕᐅᕕᖓᓂᒃ.
ᐱᒍᑦᔨᒍᑏᑦ ᐱᐊᕋᕐᓄᑦ, ᐅᕕᒐᕐᑐᓄᓪᓗ ᐃᓚᒌᑦᑐᓄᓪᓗ
ᐱᒍᑦᔨᒍᑏᑦ ᐱᐊᕋᕐᓄᑦ, ᐅᕕᒐᕐᑐᓄᑦ ᐃᓚᒌᑦᑐᓄᓪᓗ ᓄᓇᕕᒻᒥ ᐊᐅᓚᑕᐅᔪᑦ ᑕᒪᖏᓐᓂᒃ ᐋᓐᓂᐊᕖᓐᓂᒃ. ᒪᓕᒉᑦ ᐃᕐᖃᑐᐃᕕᑎᒍᑦ ᐅᕕᒐᕐᑐᓄᑦ ᓲᓱᑦᓴᓯᐊᕐᓂᖏᑦᑐᓄᑦ ᐱᖁᔭᕐᓂᒃ ᑳᓇᑕᐅᑉ ᑲᕙᒪᖓᓄᑦ ᒪᓕᒐᒋᔭᐅᕗᖅ ᐊᑑᑎᔭᐅᓲᖑᑦᓱᑎᒃ ᐅᕕᒐᕐᑐᓄᑦ ᐅᑭᐅᓕᓐᓄᑦ 12-ᓂᒃ 17-ᒧᑦ ᓲᓱᓐᓂᖏᑦᑐᕕᓂᐅᓂᕋᕐᑕᐅᔪᓄᑦ ᐱᖁᔭᕐᓂᒃ ᐅᕝᕙᓘᓐᓃᑦ ᐱᑦᓯᐊᓂᖕᖏᑐᓄᑦ ᑳᓇᑕᐅᑉ ᑲᕙᒪᖓᑕ ᐱᖁᔭᖏᓐᓂᒃ.
ᒪᓕᒉᑦ ᐱᖁᔭᕐᑎᒍᑦ ᐅᕕᒐᕐᑐᓄᑦ ᐊᑦᔨᖃᖕᖏᑐᑦ ᒪᓕᒐᕐᓂᒃ ᐱᖁᔭᕐᑎᒍᑦ ᐃᓄᒻᒪᕆᓐᓄᑦ. ᒪᓕᒉᑦ ᐱᖁᔭᕐᑎᒍᑦ ᐅᕕᒐᕐᑐᓄᑦ ᑐᑭᓯᒪᑦᓯᐊᖁᔨᓲᑦ ᐊᑑᑎᓯᒪᔭᕐᒥᓂᒃ ᐊᒻᒪᓗ ᐱᒻᕆᐅᑎᑦᓱᑎᒃ ᒪᒥᓴᕐᓂᒥᒃ ᐊᒻᒪᓗ ᐃᓚᐅᑎᑕᐅᒋᐊᓪᓛᐸᓕᐊᓂᕐᒥᒃ ᐅᕕᒐᕐᑐᓂᒃ ᐃᓕᑕᕐᓯᓯᒪᑦᓯᐊᖁᔨᑦᓱᑎᒃ ᐃᓄᓐᓂᒃ ᐋᓐᓂᑎᕐᑕᕕᓂᖏᓐᓂᒃ ᐊᒻᒪᓗ ᓄᓇᕐᖃᑎᒥᓂᒃ. ᑕᒪᓐᓇ ᐃᓚᐅᑎᑦᓯᒥᔪᖅ ᐃᓚᒌᑦᑐᓂᒃ. ᐱᓇᓱᖃᑎᖃᕐᓱᑎᒃ 14-ᓂᒃ ᓄᓇᓕᓐᓂᒃ, ᑐᕌᒍᑎᓕᒃ ᐊᑑᑎᒋᐊᓪᓚᕈᓐᓀᓂᕐᒥᒃ ᐊᒻᒪᓗ ᓲᓱᑦᓴᓂᕐᒥᒃ ᓴᐳᒻᒥᓂᖃᑦᓯᐊᓂᕐᒥᒃ ᓯᕕᑐᔪᒧᑦ ᐃᓄᓕᒫᒧᑦ ᐃᑲᔪᖃᑎᒌᑦᓯᐊᓗᑎᒃ ᓄᓇᕐᖃᑎᒌᑦ ᐊᑑᑎᑦᓯᐊᓗᑎᒃ ᐃᓄᐃᑦ ᐃᓗᕐᖁᓯᖏᓐᓂᒃ ᐊᑑᑎᓲᑐᖃᖏᓐᓂᒃ.