ᓱᓀᓐᓈ ᑎᒻᒥᐊᑉ ᖃᓂᒻᒪᓯᖓ?
ᖃᓂᒪᓐᓇᖅ (ᖁᐱᕐᕈᖅ) ᑎᒻᒥᐊᓃᓲᖅ ᐁᑦᑐᑐᑎᐅᓲᖑᑦᓱᓂᓗ ᑎᒻᒥᐊᓂ. ᑎᒻᒥᐊᑦ, ᐱᓗᐊᕐᑐᒥᒃ ᐃᒫᓃᓲᑦ, ᑎᒻᒥᐊᑉ ᖃᓂᒻᒪᓯᖓᑕ ᖁᐱᕐᕈᖓᓂ ᐱᑕᖃᓲᑦ. ᓱᕐᕋᑕᐅᖏᓐᓇᓕᒫᓲᖑᖕᖏᑲᓗᐊᕐᓱᑎᒃ ᖃᓂᒪᒧᑦ ᑭᓯᐊᓂ ᐁᑦᑐᑑᑎᖃᕈᓐᓇᑐᑦ ᐊᓯᖏᓐᓄᑦ ᑎᒻᒥᐊᖑᖃᑎᒥᓄᑦ ᖃᓂᒻᒪᕆᐊᑭᑦᑐᔭᕐᓄᓗ ᑎᒻᒥᐊᖁᑎᒋᔭᐅᔪᓄᑦ.
ᑖᓐᓇ ᖁᐱᕐᕈᖅ ᑎᒻᒥᐊᓃᕙᓪᓗᓲᖑᒐᓗᐊᕐᓱᓂ, ᐁᑦᑑᑎᐅᒍᓐᓇᑐᖅ ᐊᓯᖏᓐᓄᑦ ᐆᒪᔪᓄᑦ. ᐊᒥᓲᖕᖏᑑᒐᓗᐊᑦ ᐳᐃᔩᑦ ᑎᒻᒥᐊᑉ ᖃᓂᒻᒪᓯᖓᓂᒃ ᐱᑕᖃᕆᐊᖏᑦ ᖃᐅᔨᔭᐅᖃᑦᑕᓯᒪᔪᑦ ᑯᐯᑉ ᓯᕿᓂᖓᓂ St. Lawrence ᑰᖓᑕ ᓴᓂᐊᓂ. ᑖᒃᑯᐊ ᐳᐃᔩᑦ ᖃᓂᒻᒪᓚᕿᓯᒪᔪᑦ ᖃᓂᑕᓕᕕᓂᐅᑦᓱᑎᒃ ᑎᒻᒥᐊᓂᒃ ᑐᖁᔪᕕᓂᕐᓂᒃ ᖃᓂᒻᒪᑐᕕᓂᕐᓂᓘᓐᓃᑦ ᖁᐱᕐᕆᓯᒪᑦᓱᑎᒃ, ᑖᕙᓂ ᓄᓇᒥ ᕿᑐᕐᖏᐅᕕᓖᓐᓇᐅᒐᒥᒃ ᖃᓂᑕᕇᑉᐸᑐᑦ.
ᓱᒧᑦ ᑎᒻᒥᐊᑦ ᖃᓂᒻᒪᓯᖓ ᑐᓴᕋᑦᓴᑎᒎᕈᑕᐅᖃᑦᑕᖃ?
ᖃᓂᒻᒪᐅᕋᑦᑐᓕᒪᕆᐅᔪᖅ ᒪᓐᓇᐅᑎᓪᓗᒍ ᖁᐱᕐᕈᐊᕈᓯᖅ (H5N1-ᒥᒃ ᓇᓗᓀᒃᑯᑕᓕᒃ) ᐁᑦᑐᑐᑎᐅᑦᓴᐅᑎᒋᒍᓐᓇᑐᖅ ᐱᑕᖃᕐᐸᓓᒻᒪᑦ North America-ᒥ. ᒥᑏᑦ ᓂᕐᓖᓗ ᖃᐅᔨᒪᔭᐅᔪᑦ ᑕᑦᓱᒥᖓ ᐱᑕᑦᓯᓲᖑᒋᐊᖏᑦ, ᐅᐱᕐᖓᓴᒥᒃ ᑎᑭᐊᔭᖃᑦᑕᓕᕐᒥᑎᓪᓗᒋᑦ ᑕᒪᒃᑯᐊ ᑎᒻᒥᐊᑦ, ᖃᐅᔨᔭᐅᓯᒪᔪᖃᓕᕐᑐᖅ ᑯᐯᒻᒥ ᐃᒻᒪᖄᖓᓪᓛ ᓄᓇᕕᒻᒥ ᐱᑕᖃᑐᐃᓐᓇᕆᐊᓕᒃ.
ᓄᓇᕘᕐᒥ ᓛᐸᑐᐊᒥᓗ ᖃᐅᔨᔭᐅᔪᖃᖃᑦᑕᒪᑦ ᑎᒻᒥᐊᑦ ᖃᓂᒻᒪᓯᖓᓂ, ᑌᒪᓪᓗᐊ ᖃᐅᔨᔭᐅᔪᖃᕐᓯᒪᓕᕐᒥᔪᖅ ᓄᓇᕕᒻᒥ
ᖃᐅᔨᒋᐊᑦᓯᐊᕈᒪᒍᕕᑦ ᐅᓇ ᑕᑯᒋᐊᕐᓗᒍ: Highly pathogenic avian influenza - Canada.ca
ᐃᓄᒻᒨᕈᓐᓇᖄ ᑕᓐᓇ ᖃᓂᒪᓐᓇᖅ?
ᐃᓄᐃᑦ ᑕᒪᑦᓱᒧᖓ ᖃᓂᒻᒪᓚᕿᒍᓐᓇᓂᖓ ᐳᒃᑭᑐᐊᐱᒃ. ᑲᑉᐱᐊᓇᕐᓯᒍᓐᓇᑑᒐᓗᐊᖅ ᑕᓐᓇ ᖃᓂᒻᒪᓯᖅ ᑭᓯᐊᓂ ᐃᓄᓐᓂᓯᒪᕋᑕᖕᖏᑐᖅ ᑲᓇᑕᒥ ᐅᓪᓗᒥᐅᑎᓪᓗᒍ. ᖃᐅᔨᒪᔭᐅᓪᓗᐊᕋᓂᓗ ᖃᓄᖅ ᑎᒻᒥᐊᒥᑦ ᐃᓄᒻᒨᓲᖑᒻᒪᖔᑦ ᑕᓐᓇ ᖁᐱᕐᕈᖅ. ᑭᓯᐊᓂ ᓄᕙᕈᔪᕐᑎᒍᑦ, ᐊᐅᒃᑯᑦ ᐊᒻᒪᓗ/ᐅᕝᕙᓗᓐᓃᑦ ᐊᓇᒃᑯᑦ ᐁᑦᑐᑎᐅᒍᓐᓇᓂᐊᖕᖒᕆᔭᖅ. ᖃᓂᒻᒪᑐᕕᓂᐅᒍᕕᑦ ᑎᒻᒥᐊᓕᕆᔪᕕᓂᐅᓗᑎᑦ ᐊᓐᓂᐊᓯᐅᕐᑎᒪᕆᒻᒥᒃ ᐊᓐᓂᐊᓯᐅᕐᑎᒥᓪᓘᓃᑦ ᑕᑯᑦᓴᐅᑎᒋᒋᑦ ᐊᓐᓂᐊᕕᑦᓯᓂ.
ᖃᓄᖅ ᐊᖑᓇᓱᑦᑏᑦ ᐃᑉᐱᒍᓱᑦᓯᐊᕋᓱᐊᕈᓐᓇᖃᑦ?
ᖃᓄᐃᖕᖏᑐᖅ ᐅᒻᒪᔪᕋᓱᐊᕐᓗᒍ, ᐊᑦᑐᔭᕐᓗᒍ ᓂᕆᓗᒍᓗ ᑎᒻᒥᐊᖅ ᖃᓂᒪᖕᖏᑐᖅ. ᑭᓯᐊᓂ ᖁᐱᕐᕆᕈᑕᐅᒍᓐᓇᒪᑦ ᐊᑦᑑᔭᕐᓗᒍ ᑎᒻᒥᐊᖅ, ᐅᑯᓂᖓ ᒪᓕᑦᑕᐅᖁᔨᔪᒍᑦ.
ᐊᑦᑑᔭᓕᕈᕕᐅᒃ, ᓴᓗᒻᒪᓴᓕᕈᕕᐅᒃ ᐅᒪᔪᕐᑕᕕᓃᑦ ᐅᕝᕙᓗᓃᑦ ᒪᓐᓂᑕᓕᕈᕕᑦ:
- ᐱᒍᓐᓇᕕᓕᒫᒃᑯᑦ ᐊᑑᐃᑌᓕᓗᑎᑦ ᐊᐅᖓᓂᒃ, ᐊᓇᖓᓂᒃ ᓄᕙᕈᔪᖓᓂᓪᓗ ᑎᒻᒥᐊᑉ
- ᐊᓂᕐᑎᕆᑦᓯᐊᑐᒦᓪᓗᑎᑦ
- ᓯᓚᒦᒍᕕᑦ, ᐅᕐᖁᐊᓃᑦᑌᓕᓗᑎᑦ ᑎᒻᒥᐊᕕᓂᐅᑉ ᓂᐅᕐᖃᓚᕿᑦᓴᕈᐊᕋᕕᑦ ᓴᓂᕐᓂᒃ, ᒥᕐᖁᓂᒃ ᐊᓯᖏᓐᓂᓗ ᑕᑯᑦᓴᐅᒐᑎᒃ ᓂᐅᕐᑕᐅᒍᓐᓇᑐᓂᒃ
- ᑭᓀᑦ ᐊᑑᔭᕐᑌᓕᓗᒍ ᐊᒡᒐᑎᑦ ᐃᕕᐅᑎᓪᓗᒋᑦ
- ᐱᒍᓐᓇᕕᓕᒫᒃᑯᑦ ᐊᒡᒐᔮᕐᓯᒪᖃᑦᑕᓗᑎᑦ (ᕿᓪᓚᕿᐊᖑᔭᓂᒃ)
- ᐱᔭᕇᕈᕕᑦ ᐊᒡᒐᑎᑦ ᐃᕐᕈᑐᑦᓯᐊᖃᑦᑕᓗᒋᑦ ᐅᕝᕙᐅᑎᒧᑦ ᓂᕈᒥᑦᑐᒧᓪᓗ ᐃᒪᕐᒧᑦ, ᐃᒪᕐᒥᒃ ᐊᑐᐃᓐᓇᖃᖕᖏᑯᕕᑦ, ᐊᒡᒐᓂᒃ ᓴᓗᒻᒪᓭᑎᒥᒃ ᐃᒡᒍᑎᐊᐱᓐᓂᓗᓐᓃ ᐊᑐᕐᓗᑎᑦ 60%-ᒥ ᖁᐱᕐᕈᐃᔦᒍᑎ ᓱᖑᓂᖃᕐᑎᓗᒍᒋ
- ᒪᓐᓂᑕᓕᕈᕕᑦ ᓴᓗᒪᔪᑦ ᓴᓗᒣᑦᑐᐃᓗ ᒪᓐᓃᑦ ᐊᕕᑦᑐᓯᐊᕐᓗᒋᑦ, ᓯᖁᒥᑦᓯᒪᔪᓪᓗ ᐃᒋᓪᓗᒋᑦ
- ᒪᓐᓃᑦ ᓴᓗᐊᖓᔪᒧᑦ ᐊᓪᓚᑎᕆᐊᓖᑦ:ᐃᐲᔭᕐᓗᒋᑦ ᓴᓗᒪᔪᒧᑦ ᓴᓗᐊᖓᔪᒧᑦ ᐊᓪᓚᕈᑎᐊᓗᑦᓴᔭᒧᑦ, ᖃᓪᓗᓈᕐᑕᒧᑦ ᐅᕝᕙᓗᓐᓃᑦ ᓴᓂᐅᑎᐅᔭᕐᒧᑦ. ᐃᒪᕐᒧᑦ ᖃᐅᓯᓕᕐᑎᕆᐊᖃᖏᑕᑎᑦ ᑭᓂᑦᓯᑎᒋᐊᖃᕐᓇᒋᓪᓗ ᒪᓐᓃᑦ, ᐃᒪᕐᒧᑦ ᓱᕋᑕᐅᒍᓐᓇᒪᑕ, ᖁᐱᕐᕈᑯᓗᑦᑕᓯᔭᐅᒍᓐᓇᓱᑎᒃ.
ᒪᙯᑐᕕᓂᐅᓗᑎᑦ ᐃᒣᓗᕆᐊᖃᕐᒥᔪᑎᑦ:
- ᒪᙯᓯᐅᑎᑎᑦ ᓴᓗᒻᒪᓯᐊᕐᓗᒋᑦ ᖁᐱᕐᕈᐃᔦᑎᒧᑦ ᓂᕿᓕᕆᕕᕕᓂᑎᓪᓗ ᐅᕝᕙᓯᐊᕐᓗᒋᑦ ᐅᕙᐅᑎᐊᕐᓯᒪᔪᒧᑦ ᐃᒪᕐᒧᑦ, ᖁᐱᕈᐃᔦᑎᒧᓪᓗ ᐊᓪᓚᑎᕐᓗᒋᑦ.
- ᐊᓐᓄᕌᑎᑦ ᐱᕐᓗᒋᑦ ᐊᓯᑦᔨᓗᒋᓪᓗ ᑲᒥᐊᓗᒐᓴᑎᑦ, ᐊᑦᑑᒥᑎᕐᓯᒪᑐᐃᓐᓇᕆᐊᖃᕐᒪᑕ ᐊᐅᖏᓐᓇᒥᑎᕐᓯᒪᓗᑎᓪᓗ, ᐊᓀᓐᓇᕈᕐᓯᒪᓗᑎᓪᓘᓃᑦ, ᓄᕙᕈᔪᐃᓐᓇᒥᑎᕐᓯᒪᓗᑎᓪᓘᓃᑦ. ᐊᓂᕐᕋᕈᕕᑦ ᐅᕝᕙᕆᐊᓕᑎᑦ ᐊᓐᓄᕌᑦ.
ᑐᖁᖓᔪᓂᒃ ᑎᒻᒥᐊᓂᒃ ᓇᒻᒥᓂᖅ ᑐᖁᓐᓂᖏᑦᑕᑎᓐᓂᒃ ᐊᑦᑑᔭᕆᐊᖃᖕᖏᑐᑎᑦ ᐅᕝᕙᓗᓐᓃ ᑎᒻᒥᐊᖅ ᑐᖁᖓᖕᖏᑑᒐᓗᐊᖅ ᐊᔪᒉᑦᑐᒥᒃ ᐱᐅᓯᖃᕐᐸᑦ. ᓇᓗᓇᕇᒃᑯᑏᑦ ᑎᒻᒥᐊᖅ ᖃᓂᒪᒻᒪᖔᑦ, ᐅᐃᒻᒪᖓᔪᖅ, ᓴᔪᑦᑐᖅ ᐅᕐᕈᔮᕐᑕᑐᖅ, ᓂᐊᖁᕐᒥᒍᑦ, ᖁᖓᓯᕐᒥᒍᑦ ᐃᔨᒥᒍᓪᓗ ᐳᓪᓕᑐᖅ, ᕿᑫᓐᓇᑐᖅ ᓂᒪᕐᖃᔭᑦᓯᐊᖏᑦᑐᖅ, ᖁᐃᕐᑐᑐᖅ, ᐊᓂᕐᑎᕆᒡᒐᕋᓱᑦᑐᖅ ᐅᕝᕙᓗᓐᓃᑦ ᑕᒋᐅᑦᓴᔪᖅ, ᐃᑎᑦᑕᑐᖅ ᐅᕝᕙᓗᓐᓃᑦ ᑐᖁᐊᕿᔪᖅ.
ᐳᐃᔩᑦ ᐱᐅᓯᕐᓱᖏᑦᑐᑦ ᑐᖁᐃᓐᓇᓚᕿᒍᑎᓖᑦ ᐊᔪᒉᑦᑐᒥᒃ.
ᐅᑦᑐᕋᐅᑎᑦ ᑎᒻᒥᐊᖅ ᖃᕆᑕᕐᒥᒍᑦ ᓱᕐᕋᑕᐅᒪᒋᐊᖓ ᖃᓂᒻᒪᓯᕐᒧᑦ:
ᖃᐅᔨᒋᐊᕐᕕᖃᕈᓐᓇᑐᑎᑦ ᖃᓄᖅ ᑲᒪᒋᔭᖃᕈᓐᓇᒪᖔᑉᐱᑦ ᑎᒻᒥᐊᓂᒃ ᑲᓇᑕᐅᑉ ᑲᕙᒪᒃᑯᖏᓐᓂᑦ, ᐃᓚᖃᕐᓱᓂ ᐊᖑᓇᓱᑦᑏᑦ ᖃᓄᐃᓘᕐᑐᓴᐅᒻᒪᖔᑕ ᑐᑭᓯᑎᑦᓯᐅᑎᓂᒃ: Wild birds and avian influenza – Handling guidelines - Canada.ca
ᖃᓄᖅ ᐃᒐᒋᐊᖃᕐᖁᖓ ᐊᑐᐃᓐᓇᕈᕐᑎᕆᐊᖃᕐᖁᖓ ᑎᒻᒥᐊᒥᒃ (ᒥᑎᕕᓂᕐᒥᒃ, ᓂᕐᓕᕕᓂᕐᒥᒃ)/ᒪᓐᓂᓂᒃ ᑎᒻᒥᐊᑉ ᖃᓂᒻᒪᓯᖓ ᐱᑕᖃᕐᑎᓗᒍ?
ᑎᒻᒥᐊᑦ ᒪᓐᓂᖏᓪᓗ ᓂᕿᑦᓯᐊᕌᓗᐃᑦ.
ᖃᓚᓯᒪᑦᓯᐊᑐᑦ ᒥᑎᕕᓃᑦ, ᓂᕐᓕᕕᓃᓪᓗ ᒪᓐᓃᓗ ᖃᓂᒻᒪᓚᕿᖕᖏᓂᕐᓴᐅᒍᑎᐅᒍᓐᓇᑐᑦ ᑎᒻᒥᐊᑉ ᖃᓂᒻᒪᓯᖓᓂᒃ.
ᖃᐅᔨᒪᔭᐅᔪᑎᒍᑦ, ᐊᕿᒡᒌᑦ ᐃᓱᒫᓗᓐᓇᖏᑦᑐᑦ, ᑭᓯᐊᓂ ᐃᑉᐱᒍᓱᑦᓯᐊᕈᑕᐅᖁᔭᐅᔪᑦ ᐊᑐᕐᑕᐅᓯᐊᕆᐊᖃᕐᒥᔪᑦ ᑎᒎᓪᓚᓕᕈᕕᒃᑭᑦ.
ᐅᑯᐊ ᐃᒣᒋᐊᖁᔨᒍᑏᑦ ᖃᓂᒻᒪᓚᕿᒌᒃᑯᑎᐅᒍᓐᓇᑐᑦ.
ᑎᒎᓪᓚᓂᖅ:
- ᐁᐸᔪᖅ ᓂᕿ ᐊᓯᖏᓐᓄᑦ ᓂᕿᐅᒻᒥᔪᓄᑦ ᐊᑦᑐᐊᕆᐊᖃᖕᖏᑐᖅ ᐃᒻᒥᒎᑦᓯᐊᕆᐊᓖᑦ ᐊᑦᑑᒥᑎᓚᕿᖁᓇᒋᑦ
- ᐊᒡᒐᑎᑦ ᐃᕐᕈᑐᑦᓯᐊᖃᑦᑕᕆᐊᓖᑦ, ᓂᕿᓕᕆᓚᐅᕐᓇᒃ ᐱᔭᕇᕈᕕᓪᓗ
- ᓂᕿᓕᕆᐅᑎᕕᓂᑎᑦ ᓴᓗᒻᒪᓴᑦᓯᐊᕆᐊᓖᑦ, ᓂᕿᓕᕆᕕᕕᓂᑎᓪᓗ ᐅᓇᕐᑐᒧᑦ ᐅᕝᕙᐅᑎᐊᕐᓯᒪᔪᒧᑦ ᐊᓪᓚᑎᕐᓗᒋᑦ ᐊᒻᒪᓗ ᓴᓗᒻᒪᓭᑎᒧᑦ ᐅᕝᕙᓗᓐᓃᑦ ᔭᕕᐊᒃᓯᒧ 25ml ᐃᒪᕐᒥᒃ 2L ᐃᓚᓕᒻᒧᑦ
ᐃᒐᓂᖅ:
- ᖃᓚᑦᓯᐊᕆᐊᓖᑦ ᒪᓐᓃᑦ: ᐃᓗᐊ ᐁᐸᒍᓐᓀᓗᓂ
- ᓂᕿᖓ ᓇᑲᑎᕐᓯᒪᔪᐃᓪᓗ:ᐁᐸᔫᒋᐊᖃᖕᖏᑐᑦ
ᓱᒌᐊᖃᕐᖁᖓ ᓇᕝᕚᕈᒪ ᑐᖁᖓᔪᒥᒃ ᖃᓂᒪᔪᒥᓪᓘᓃᑦ ᑎᒻᒥᐊᒥᒃ ᐳᐃᔨᒥᓪᓘᓃᑦ?
ᓯᕗᓪᓕᐹᒥ ᐅᖄᓚᓗᑎᑦ ᔨᐊᕋᓪᑏᓐ ᑯᐃᒧᑦ ᐱᐊᕆ ᕗᐊᑦᒧᓪᓘᓃᑦ ᓄᓇᕕᐅᑉ ᖃᐅᔨᓴᕐᕕᖓᓄᑦ (819-964-2925).
ᓱᒋᐊᖃᕐᖁᖔ ᓇᕝᕚᕈᒪ ᑐᖁᖓᔪᒥᒃ ᖃᓂᒪᔪᒥᓪᓘᓃᑦ ᑎᒻᒥᐊᒥᒃ?
ᐊᑦᑐᐃᒋᐊᖃᖕᖏᑐᑎᑦ ᑐᖁᖓᔪᒥᒃ ᖃᓂᒪᔪᒥᓘᓃᑦ ᑎᒻᒥᐊᒥᒃ. ᐅᖄᓚᕕᖃᕈᓐᓇᑐᑎᑦ ᔨᐊᕋᓪᑏᓐ ᑯᐃᒥᒃ ᐱᑕ ᒣᒥᓪᓘᓃᑦ ᓄᓇᕕᐅᑉ ᖃᐅᔨᓴᕐᕕᖓᓂ (819-964-2925) ᑐᓴᕐᑎᓗᒋᒃ ᖃᐅᔨᔭᕐᓂᒃ.
ᓱᒋᐊᖃᕐᖁᖔ ᓇᕝᕚᕈᒪ ᑐᖁᖓᔪᒥᒃ ᖃᓂᒪᔪᒥᓪᓘᓃᑦ ᐳᐃᔨᒥᒃ?
ᐊᑦᑐᐃᒋᐊᖃᖕᖏᑐᑎᑦ ᑐᖁᖓᔪᒥᒃ ᖃᓂᒪᔪᒥᓘᓃᑦ ᐳᐃᔨᒥᒃ. ᐅᖄᓚᕕᖃᑦᓴᐅᑎᒋᒋᐊᖃᕐᑐᑎᑦ ᔨᐊᕋᓪᑏᓐ ᑯᐃᒥᒃ ᐱᑕ ᒣᒥᓪᓘᓃᑦ ᓄᓇᕕᐅᑉ ᖃᐅᔨᓴᕐᕕᖓᓂ (819-964-2925) ᑐᓴᕐᑎᓗᒋᒃ ᖃᐅᔨᔭᕐᓂᒃ. ᑎᒻᒥᐊᑉ ᖃᓂᒻᒪᓯᖓ ᖃᐅᔨᔭᐅᓯᒪᕋᑕᖕᖏᑐᖅ ᓄᓇᕕᐅᑉ ᐳᐃᔨᖏᓐᓂ.