ᑲᑐᑦᔨᖃᑎᒌᑦᓯᐊᓗᑕ ᐃᓄᑐᖃᕗᑦ ᓴᐳᒻᒥᓂᖃᑦᓯᐊᓂᖏᓐᓄᑦ ᖃᓄᐃᖕᖏᓯᐊᕐᓂᖏᓐᓄᓗ
ᐊᕐᕌᒍᑕᒫᑦ ᔫᓂ 15-ᒥ, ᓄᓇᕕᐅᑉ ᓄᓇᓕᓕᒫᖏᑕ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᖓ ᐊᑐᐃᓐᓇᕈᐃᒍᑎᖃᓲᖑᕗᑦ ᓯᓚᕐᔪᐊᒥ ᐃᓄᑐᖃᕐᓂᒃ ᐱᔮᕆᓂᐅᕙᑦᑐᓂᒃ ᐃᑉᐱᒋᔭᖃᕐᓂᐅᑉ ᐅᓪᓗᖓ, ᑖᓐᓇ ᐅᓪᓗᖅ ᓯᓚᕐᔪᐊᓕᒫᒥ ᐱᓇᓱᒍᑎᐅᕙᓕᕐᑐᖅ ᑐᕌᖓᑦᓱᓂ ᑕᑯᑦᓴᐅᑎᑦᓯᓂᑦᓴᓄᑦ ᐃᓄᑐᙯᑦ ᐱᑦᓯᐊᑕᐅᖕᖏᑐᓂᕆᓲᖏᓐᓂᒃ.
ᐃᓘᓐᓇᑕ ᑕᒪᑐᒥᖓ ᑲᒪᑦᓯᐊᕆᐊᖃᕐᖁᒍᑦ
ᐃᓄᑐᙯᑦ ᐱᑦᓯᐊᑕᐅᖕᖏᑑᒍᓐᓇᖁᑦ ᐋᓐᓂᑎᕐᑕᐅᒍᓐᓇᓱᑎᓪᓗ ᖃᓄᑐᐃᓐᓇᖅ—ᐃᑉᐱᓂᐊᕐᓂᑎᒍᑦ, ᑎᒥᒻᒥᑎᒍᑦ, ᐃᓱᒪᒥᑎᒍᑦ, ᐅᕝᕙᓗ ᑮᓇᐅᔭᒃᑯᑎᒍᑦ,—ᐊᒻᒪᓗ ᖃᐅᑕᒫᑲᓵᖅ ᖃᐅᔨᔭᐅᓲᖑᖕᖏᑐᑦ ᐅᕝᕙᓗ ᐅᖃᕐᑕᐅᓲᖑᖕᖏᑐᑦ. ᐃᓚᒋᔭᐅᑐᐊᕈᕕᓪᓘᓃᑦ, ᑲᒪᔨᒋᔭᐅᒍᕕᓪᓘᓃᑦ, ᓯᓚᕐᖃᑎᒋᔭᐅᒍᕕᓪᓘᓃᑦ, ᐅᕝᕙᓗ ᐱᖃᑎᒋᔭᐅᒍᕕᓪᓘᓃᑦ/ᐃᓚᓐᓈᒋᔭᐅᒍᕕᓪᓘᓃᑦ, ᐃᑉᐱᒍᓱᑦᓯᐊᕆᐊᖃᕐᖁᑎᑦ ᐃᓄᑐᙯᑦ ᑲᒪᒋᔭᐅᑦᓯᐊᕋᓗᐊᕐᒪᖔᑕ ᐱᑦᓯᐊᑕᐅᓲᖑᒐᓗᐊᕐᒪᖔᑕᓗ, ᓲᓱᒋᔭᐅᑦᓯᐊᓲᖑᒐᓗᐊᕐᒪᖔᑕᓗ ᓲᓱᒋᔭᐅᒋᐊᖃᕐᒪᑕ.
2026 ᓴᕐᕿᔮᕐᑎᓯᓂᐅᑉ ᓇᓗᓀᕐᑕᐅᒍᑎᖏᑦ
- ᓄᓇᕕᒻᒥ ᐃᓄᑐᖃᖏᑦᑕ ᐅᖃᓕᒪᖃᑎᒌᓐᓂᖏᑦ: ᑲᑎᖃᑎᒌᑦᑎᓯᓂᖅ ᐃᓄᑐᖃᐅᓕᕐᑐᓂᒃ, ᐱᓇᑐᖃᑎᒌᑦᑐᓂᒃ, ᑎᒥᐅᔪᓂᓪᓗ ᓄᓇᓕᓐᓂᒃ ᐱᓯᒪᔪᓂᒃ ᐱᖓᓱᓂ ᐅᓪᓗᓂᒃ, ᐃᓱᒪᒋᔭᖃᕐᓂᒧᑦ ᐅᖃᓕᒪᒍᑎᖃᕐᓂᒧᓪᓗ ᓯᕗᓪᓕᐸᐅᑦᔭᐅᔭᕆᐊᓕᓐᓂᒃ, ᐅᑯᐊ ᐆᑦᑑᑎᒋᓗᒋᑦ:
• ᐃᓄᑐᙯᑦ ᐊᑦᑕᓇᕐᑐᒦᑦᑎᑕᐅᑦᑌᓕᓂᖏᑦ ᐊᒻᒪᓗ ᐅᖑᒪᑦᓯᓂᖅ ᓱᒃᑯᔨᐊᖃᕐᓂᐅᓲᓂᒃ
• ᓄᓇᓕᐅᑉ ᐱᒍᑦᔨᐅᑎᖏᑦ ᐃᑲᔪᕐᓯᐅᑎᖏᓪᓗ
• ᐃᓪᓗᖃᕐᓃᑦ ᐋᕐᕿᒋᐊᕐᑕᐅᒍᑎᖏᓪᓗ ᐃᓅᕕᒋᔭᖏᑦᑕ - ᐃᓄᑐᙯᑦ ᐅᓪᓛᕈᒥᑕᕐᑎᑕᐅᓂᖏᑦ: ᓄᓇᓕᒻᒥ ᐱᒋᐊᕐᑎᓯᒍᑎᐅᕙᓪᓕᐊᔪᖅ ᐃᑲᔪᕐᑎᒋᔭᐅᑎᓪᓗᒋᑦ ᓄᓇᕕᒻᒥ ᐳᓖᓰᑦ ᐅᖑᒪᑦᓯᓂᕐᒧᑦ ᐱᓇᓱᑦᑎᖓᓄᑦ ᓄᓇᓕᒻᒧᓗ ᐱᓇᓱᖃᑎᒋᔭᐅᔪᓄᑦ. ᑕᒪᑦᓱᒪᐅᑉ ᐆᑦᑐᕋᕈᑕᐅᓂᖓ ᓄᐃᑦᓯᒍᓐᓇᕕᓕᒃ ᑐᖕᖓᓇᕐᑐᒥᒃ ᐱᑐᖃᑎᒌᒍᓐᓇᓯᑎᑦᓯᓂᕐᒥᑦ, ᑕᐅᕐᓯᐅᑎᖃᑎᒌᒍᓐᓇᓯᑎᑦᓯᓂᕐᒥᒃ ᑐᓴᕋᑦᓴᖁᑎᒥᓂᒃ, ᐊᒻᒪᓗ ᖁᕝᕙᑎᑦᓯᒋᐊᕐᓂᒥᒃ ᐃᓄᑐᙯᑦ ᐊᑦᑕᓇᕐᑐᒦᑦᑎᑕᐅᑦᑌᓕᓂᖏᓐᓂᒃ ᓄᓇᓕᒻᒥ. ᑐᕌᒐᕆᔭᐅᔪᖅ ᓱᒃᑫᑐᒥᒃ ᐊᖏᓕᒋᐊᕆᕙᓪᓕᐊᑎᑕᐅᒐᓱᐊᕐᓂᖓ ᐱᒋᐊᕐᑎᓯᒍᑎᐅᕙᓪᓕᐊᔪᖅ ᐃᓚᐅᑎᑕᐅᕙᓪᓕᐊᕋᔭᕐᓂᖏᓐᓄᑦ ᓄᓇᓖᑦ ᐊᓯᖏᑦ ᐊᕐᕌᒍᕐᒥᒃ ᙯᔪᓂᑦ.
- ᓴᕐᕐᕿᔮᕐᑎᓯᓂᖅ: ᓄᐃᑕᑎᑦᓯᓂᒃᑯᑦ ᑐᓴᕋᑦᓴᓂᒃ ᐱᑦᓴᑕᖃᕈᑎᓂᓪᓗ ᐱᑦᔪᑎᒋᓗᒋᑦ ᐃᓄᑐᙯᑦ ᐊᑦᑕᓇᕐᑐᒦᑦᑎᑕᐅᑦᑌᓕᓂᖏᑦ ᓄᓇᓕᒻᒥᓗ ᑲᒪᑦᓯᐊᓂᐅᔪᑦ.
ᑲᑐᑦᔨᖃᑎᒌᑦᓯᐊᓗᑕ, ᑲᔪᓯᑦᓯᐊᕈᓐᓇᖁᒍᑦ ᓴᐳᒻᒥᓯᐊᕐᓗᑕ, ᓲᓱᑦᓴᓯᐊᕐᓗᑕᓗ, ᐊᒻᒪᓗ ᓲᓱᑦᓴᓯᐊᕐᓗᑕ ᐃᓄᑐᖃᕗᓐᓂᒃ ᓄᓇᕕᒻᒥᐅᓂᒃ ᐱᒻᒪᕆᐅᑦᓯᐊᓂᖏᓐᓂᒃ.