ᖃᓄᐃᖕᖏᓯᐊᕐᕕᐅᒍᓐᓇᑐᓂᒃ ᐃᓕᓐᓂᐊᕕᖃᕐᓂᖅ

ᖃᓄᐃᖏᓯᐊᕐᓂᒧᑦ ᐃᓕᓐᓂᐊᕕᖓᑦ ᑐᕌᒐᖃᕐᐳᑦ ᐊᑐᕐᑎᓯᒐᓱᐊᕐᓂᐅᓂᐊᕿᕐᑐᖅ ᓱᓇᓱᐊᕐᓂᓂᒃ ᐱᓂᐊᕐᓂᓂᓪᓗ ᑫᓪᓗᑐᐃᓂᖃᕐᑐᓂᒃ ᖃᓄᐃᖏᓯᐊᕐᓗᓂ ᐃᓄᓯᖃᑦᓯᐊᕋᓱᐊᕐᓂᒥᒃ ᐃᓕᓐᓂᐊᕕᐅᑉ ᐃᓗᐊᓂ. ᑕᒪᒃᑯᐊ ᐃᓕᓐᓂᐊᕖᑦ ᖃᐅᔨᒪᓇᕐᒪᑕ ᐱᒍᑦᔨᕕᓪᓚᕆᐅᓲᖑᒋᐊᖏᑦ ᓄᓇᓕᓐᓄᑦ, ᑕᒪᒃᑯᐊ ᓱᓇᓱᐊᕐᑕᐅᓂᐊᕐᑐᑦ ᐃᓕᓐᓂᐊᕕᒻᒥ ᐊᐅᓚᑕᐅᓂᖏᑦ ᐃᓕᓐᓂᐊᕕᐅᑉ ᓯᓚᑖᓄᓕᖓᑎᑕᐅᖃᑦᑕᓚᖓᒻᒥᔪᑦ.

ᑕᒪᓐᓇ ᖃᓄᐃᖏᓯᐊᕐᓂᒧᑦ ᐃᓕᓐᓂᐊᕕᖃᕐᓂᖅ, ᐃᓕᑕᕆᔭᐅᒪᓂᖃᕐᓱᓂ ᑕᒫᓂ ᓄᓇᑦᑎᓄᑦ ᐃᑲᔪᕐᓯᒪᐅᑎᒋᔭᐅᒋᐊᖏᑦ, ᓴᐳᒻᒥᒍᑎᐅᓪᓚᕆᓂᐊᕐᑐᑦ ᓴᐳᒻᒥᒍᑎᐅᓂᐊᕐᑐᓂᒃ ᐊᕐᕿᓱᕐᑕᐅᒪᔪᓄᑦ ᐃᓕᓐᓂᐊᕕᓐᓂ. ᑲᑎᕕᒃ ᐃᓕᓐᓂᐊᓂᓕᕆᕕᖓᑦ ᐃᓚᐅᖃᑕᐅᓪᓚᕆᓂᐊᕐᑐᖅ ᑕᒪᑦᓱᒪᐅᑉ ᑲᔪᓯᑦᓯᐊᑎᑕᐅᓚᖓᓂᖓᓄᑦ ᑕᒪᑦᓱᒧᖓ ᐃᑲᔪᕐᓯᒪᐅᑎᒧᑦ.

ᐊᓕᐊᓇᕐᑐᖅ!
ᓂᒪᒃ
ᐃᓕᓐᓂᐊᕕᒻᒪ ᓱᖃᑦᓯᕕᖓᑦ: ᓯᓚᕐᔪᐊᖑᑦᓱᓂ ᐊᓕᐊᓇᕐᑐᑯᕕᒃ - ᐊᓃᖕᖑᐊᓕᕈᑎᒃ ᓱᓇᓱᐊᕐᓂᒧᑦ
ᔫᑲ ᐃᙯᓕᓴᕈᓯᖓᓂᒃ ᐊᑐᕐᑎᑕᐅᑎᑦᓯᓗᓂ ᐅᕕᒃᑲᓂᒃ

ᐊᓕᐊᓇᖅ!

ᐊᓕᐊᓇᕐᑐᖅ - ᙯᒋᑦ, ᐃᓅᓯᕐᒥᒃ ᐊᓕᐊᓱᖃᑎᒌᓚᐅᕐᓗᒃ - ᓱᓇᓱᐊᕐᑕᐅᓂᖃᕐᓯᒪᓕᕐᑐᖅ 2013-2014-ᒥᓗ 2014-2015-ᒥᓗ. ᓯᑕᒪᓂᒃ ᐃᑦᔭᒐᐅᑎᔪᕐᓂᒃ ᐅᕕᒃᑲᓂᒃ ᐱᓯᒪᑦᓱᑎᒃ ᑲᖏᕐᓱᐊᓗᔾᔪᐊᒥᑦ (ᐊᓐᑐᔨᐊ ᑉᕋᔫᒥᓪᓗ ᔫᓕᐊ ᓯᓐᐅᐲᓐᒥᓪᓗ) ᐊᒻᒪᓗ ᓴᓪᓗᓂ (ᓕᐅᔨ ᑕᒧᓭᒥᒃ ᐊᒻᒪᓗ ᔫᑎᑦ ᓇᓗᐃᔪᕐᒥᒃ) ᐳᓛᕆᐊᕐᑐᖃᓚᐅᔪᕗᖅ ᓄᓇᕕᐅᑉ ᐃᓕᓐᓂᐊᕕᖏᓐᓄᑦ ᑫᓪᓗᑐᐃᓂᖃᕆᐊᕐᑐᓱᑎᒃ ᖃᓄᐃᖏᓯᐊᕐᑐᒥᒃ ᐃᓅᓯᖃᑦᓯᐊᕈᓯᕐᒥᒃ ᐊᒻᒪᓗ ᐱᒻᒪᕆᐅᓲᖑᓂᖓᓄᑦ ᓴᐱᓕᕐᑌᓕᒪᒋᐊᖃᕐᓂᒧᑦ ᐅᖁᒣᑦᑐᑰᕐᓇᓕᕋᓗᐊᕐᒪᑦ.
2013ᒥᑦ - 2014ᒧᑦ    (ᖃᓪᓗᓈᑎᑐᕐᑐᐃᑦ ᑭᓯᐊᓂ)
2014ᒥᑦ - 2015ᒧᑦ    (ᖃᓪᓗᓈᑎᑐᕐᑐᐃᑦ ᑭᓯᐊᓂ)

ᓂᒪᒃ

ᓂᒪᒃ - ᓅᓪᓗᑎᑦ - 20-ᐅᑦᓱᑎᒃ ᓯᒃᑭᑖᐲᑦ ᓴᓇᔭᐅᓯᒪᔪᑦ ᐱᐊᕋᕐᓅᓕᖓᑦᓱᑎᒃ ᐃᓕᓐᓂᐊᕆᐊᖓᑐᓄᑦ (ᐳᕐᑐᓂᓕᓐᓄᑦ 1-ᒥᓗ 2-ᒥᓗ. ᑖᒃᑯᐊ ᓯᒃᑭᑖᐲᑦ ᐃᑲᔪᕐᓯᒋᐊᓪᓚᕈᑎᑦᓴᓕᖑᓯᒪᔪᑦ ᐃᓕᓐᓂᐊᑎᑦᓯᔨᓂᒃ ᓄᐃᑦᓯᒐᓱᐊᓕᕈᑎᒃ ᓱᓇᓱᐊᕋᑦᓴᐅᓂᐊᕐᑐᓂᒃ ᐃᓕᓐᓂᐊᕕᐅᑉ ᐃᓗᐊᓂ ᖃᕆᐊᖓ ᐊᕐᕿᓱᕆᐊᕈᓐᓀᓂᖃᕐᑎᓗᒍ. ᑕᒪᒃᑯᐊ ᐃᙯᓕᓴᕐᑎᓯᒍᑎᑦᓴᓕᐊᖑᓯᒪᔪᑦ ᑐᖕᖓᕕᖃᕐᑐᑦ ᔫᑲ ᐃᙯᓕᓴᕐᑎᓯᒍᓯᖏᓐᓂᒃ ᐃᓚᖃᕐᒥᓱᑎᒃ ᐊᓂᕐᑎᕆᒍᓯᕐᓂᒃ ᓄᓪᓚᖓᑦᓯᐊᕈᑎᑦᓴᒧᑦ ᐃᓱᒪᑦᓯᐊᕈᑎᑦᓴᒧᓪᓗ. ᑕᒪᒃᑯᐊ ᓯᒃᑭᑖᐲᑦ ᓄᐃᑕᐅᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᕕᖓᑦ ᐱᓇᓱᐊᖃᑕᐅᑎᓪᓗᒍ 2014-ᒥ, ᐱᒋᐊᕐᑎᑕᐅᓪᓚᕆᓂᐊᕐᑐᑦ ᐅᑭᐊᑦᓴᐅᓕᕐᐸᑦ 2015-ᒥ.

ᐃᓕᓐᓂᐊᕕᒻᒪ ᐊᓐᓃᖑᐊᕕᖓ: ᓯᓚᕐᔪᐊᒥ ᐊᓕᐊᓱᕝᕕᒃ - ᐊᓂᖕᖑᐊᑐᓄᑦ ᓱᓇᓱᐊᕐᕕᐅᑎᓪᓗᒍ

ᐃᓕᓐᓂᐊᕕᒻᒪ ᐊᓃᖕᖑᐊᕕᖓ: ᓯᓚᕐᔪᐊᒥ ᐊᓕᐊᓱᕝᕕᒃ ᐃᑲᔪᕐᓯᒍᑎᓕᐊᖑᓯᒪᔪᑦ ᐱᕙᓪᓕᐊᑎᑕᐅᓯᒪᑦᓱᑎᒃ ᑭᓄ-ᑯᐯᒃᑯᓄᑦ. ᓄᓇᓕᓕᒫᓄᑦ ᓇᒻᒥᓈᕐᑎᑕᐅᒋᐊᕐᓯᒪᓕᕐᑐᑦ ᑭᓯᐊᓂ ᑖᒃᑯᐊ ᑐᕌᒐᖏᑦ ᑖᒃᑯᓭᓐᓇᐅᖏᓐᓇᑐᑦ: ᐊᓂᖕᖑᐊᓕᕐᐸᑕ ᓱᓇᓱᐊᕐᑎᑕᐅᓂᕐᓴᐅᓂᐊᕐᑎᓗᒋᑦ ᐊᒻᒪᓗ ᐱᕕᖃᕐᑎᓗᒋᑦ ᐃᓕᓐᓂᐊᑎᑦᓯᔩᓪᓗ ᐊᑦᔨᒋᖏᑐᐃᑦ ᑲᒪᒋᐊᕈᓐᓇᑐᐃᓪᓗ ᑎᒃᑯᐊᑕᐅᓯᒪᔪᑦ ᑐᑭᒧᐊᑦᑎᓯᓂᐊᕐᑎᓗᒋᑦ ᓯᓚᒥ ᐊᓃᖕᖑᐊᓂᕐᒥᒃ.

ᔫᑲ ᐃᙯᓕᓴᕐᑎᓯᒍᑎᐅᒍᓐᓇᓂᖓᓄᑦ ᐅᕕᒃᑲᓂᒃ

ᐅᕕᒃᑫᑦ ᔫᑲᒥᒃ ᐃᙯᓕᓴᕐᑎᓯᒍᑎᖏᑦ ᐃᓕᓐᓂᐊᑎᑦᓯᒍᑎᓕᐊᖑᓯᒪᔪᑦ ᑕᑯᑦᓴᐅᑎᑦᓯᔪᓄᑦ ᐊᑯᓂᕐᓂᖃᖕᖏᑐᓂᒃ ᔫᑲᒥᒃ ᐃᙯᓕᓴᕐᑎᓯᒍᓯᕐᓂᒃ ᐃᑯᓪᓚᐅᒥᑎᑦᓯᒋᐊᕋᓱᐊᕈᑎᒧᑦ ᓄᓪᓚᖓᕐᖃᔭᖕᖏᓂᕐᒥᒃ, ᐃᓱᒪᔮᕐᓂᒥᒃ, ᑐᑦᓯᒪᓂᕐᒥᒃ ᓯᓂᕐᖃᔦᒪᓂᕐᒥᓗ. ᑕᒪᑦᓱᒧᖓ ᐃᓕᓐᓂᐊᑎᑦᓯᒍᑏᑦ ᒪᕐᕈᐃᓕᖓᔪᑦ: ᐃᓕᓐᓂᐊᑎᑦᓯᔨᓅᓕᖓᔪᐃᓪᓗ ᐊᓯᖏᓪᓗ ᐅᕕᒃᑲᓄᑦ ᓯᕗᓕᕐᓯᔨᐅᒍᓐᓇᑐᓄᑦ.