ᐱᓇᓱᒉᑦ ᐊᒻᒪᓗ ᐱᓇᓱᑦᑏᑦ

ᑖᓐᓇ ᐱᓇᓱᐊᕐᕕᒃ ᓴᐳᒻᒥᓲᖑᕗᖅ ᓄᓇᓕᓐᓂᒃ ᐃᓄᑑᓈᕐᑎᑐᓂᓪᓗ ᐃᑉᐱᓂᕐᐊᓂᑯᑦ ᐅᖁᒣᑦᑐᑰᓕᑐᐊᕐᒪᑕ ᐱᓇᓱᑦᑎᓯᖃᕐᓂᑯᑦ ᓴᐳᒻᒥᔨᓂᒃ.

ᑮᓇᐅᔭᑎᒍᑦ ᓴᐳᒻᒥᓂᖃᓲᖑᒻᒥᔪᑦ ᑕᕐᕋᒥᐅᑦ ᓄᓇᓕᖏᓐᓂᒃ ᑲᔪᓯᑎᑦᓯᒍᑎᑦᓴᒧᑦ ᖃᓄᐃᖏᓯᐊᕐᓂᓕᕆᔩᑦ ᑲᑎᒪᔨᐊᐱᖏᓐᓂᒃ ᑕᒫᓂ ᓄᓇᒥ. ᑖᒃᑯᐊ ᖃᓄᐃᖏᓯᐊᕐᓂᓕᕆᔩᑦ ᐃᓄᑦᑕᖃᓲᑦ ᓄᓇᓕᒻᒥᐅᓂᒃ ᐃᓕᑕᕆᔭᐅᑎᑦᓯᒐᓱᐊᕐᓱᑎᒃ ᖃᓄᐃᖏᓯᐊᕐᓂᓕᒧᓪᓗ ᑲᒪᑦᓯᐊᓂᑉᒧᓗ ᑭᖕᖒᒪᓇᕐᑐᓄᑦ. ᐃᓚᐅᔪᐃᑦ ᐱᓂᐊᕐᓂᖃᕐᑐᓴᐅᕗᑦ ᐊᕐᖁᑎᒋᔭᐅᓗᑎᒃ ᐃᓄᓐᓄᓗ ᐊᒻᒪᓗ ᓄᓇᓖᑦ ᑎᒥᖁᑎᖏᓐᓄᑦ.

ᖃᓄᐃᖏᓯᐊᕐᓂᓕᕆᔩᑦ ᑲᑎᒪᔨᐊᐱᖏᓐᓄᑦ ᐃᓚᐅᔪᐃᑦ ᐱᖁᔭᓕᐅᕐᑎᐅᓂᕐᒥᒃ ᓄᑭᖃᓲᖑᖏᑐᑦ ᑭᓯᐊᓂ ᖃᓄᐃᓕᒋᐊᖁᔨᒍᓐᓇᑑᒐᓗᐊᑦ ᑲᕙᒫᐱᒃᑯᑦ ᑲᑎᒪᔨᖏᓐᓂᒃ, ᐊᓐᓂᐊᕕᒻᒥᐅᓂᒃ ᐊᒻᒪᓗ ᐃᓄᓐᓂᒃ ᑕᒪᑦᓱᒧᖓ ᖃᓄᐃᖏᓯᐊᕐᓂᓕᕆᓂᕐᒧᑦ ᑲᒪᑦᓯᐊᓂᕐᒧᓗ. ᑖᒃᑯᐊ ᖃᓄᐃᖏᓯᐊᕐᓂᓕᕆᔩᑦ ᑲᑎᒪᔨᐊᐱᖏᑦᑕ ᐱᕕᑦᓴᖃᕐᑎᓯᒍᑎᖏᓐᓄᑦ ᐅᕝᕙᓘᓐᓃᑦ ᓄᓇᓕᓐᓄᑦ ᐃᓚᐅᔪᓄᑦ ᑲᒪᒋᔭᐅᒍᓐᓇᖏᑦᑐᓂᒃ ᐱᓀᓗᑕᖃᕐᑐᖃᓕᑐᐊᕐᒪᑦ, ᑖᒃᑯᐊ ᖃᓄᐃᖏᓯᐊᕐᓂᓕᕆᔩᑦ ᑲᑎᒪᔨᐊᐱᖏᑦ ᐃᒣᓕᒋᐊᖁᔨᓲᑦ ᑲᕙᒫᐱᒃᑯᑦ ᑲᑎᒪᔨᖏᓐᓂᒃ ᑕᒪᒃᑯᐊ ᐱᓀᓗᑌᑦ ᖃᐅᔨᔭᐅᔪᑦᓴᐅᒋᐊᖏᑦ ᑲᒪᒍᓐᓇᑐᒧᑦ ᑎᒥᐅᔪᒧᑦ. $25,000.00 ᑖᓚᓂᒃ ᑮᓇᐅᔭᖃᕐᑎᓯᒍᑎᓂᒃ ᑐᓂᔭᐅᔪᖃᓲᖅ ᑲᕙᒫᐱᒃᑯᓄᑦ ᐊᕐᕌᒍᑕᒫᑦ.

ᐊᑦᔨᒋᖏᑐᐃᑦ ᐃᑲᔪᕐᓯᒪᐅᑏᑦ ᑲᒪᒋᔭᐅᓲᓄᑦ ᐱᓇᓱᐊᕐᕕᒧᑦ ᒪᑯᐊᖑᔪᑦ:

ᖃᐅᒪᓂᕐᓴᒥᒃ ᓯᕗᓂᑦᓴᖃᕐᓂᒧᑦ
ᐃᓕᓐᓂᐊᕆᐊᕐᑎᑕᐅᓂᑯᕐᓂᒃ ᐃᑲᔪᕐᓯᒪᐅᑎᖏᓐᓂᒃ
ᐃᓄᑐᖃᕐᓂᒃ ᐊᑐᓗᑲᑦᑕᐅᑎᑦᓯᑌᓕᒍᑎᓂᒃ
ᐃᕐᖑᓯᐅᕐᓂᒥᒃ ᐃᓕᓐᓂᐊᑎᑦᓯᒍᑎᓂᒃ ᐱᒍᑦᔨᒍᑎᓂᓪᓗ

ᑐᑭᓯᒋᐊᓪᓚᑐᖃᕈᒪᑉᐸᑦ, ᐅᖄᓚᕕᖃᕈᓐᓇᐳᑎᑦ ᑲᒪᔨᓂᒃ ᑲᒪᒋᔭᖃᓲᓂᒃ ᐊᑦᔨᒋᖏᑐᓂᒃ ᐱᑦᔪᑕᐅᔪᓂᒃ. ᐱᓇᓱᐊᕐᑕᐅᒍᒪᔪᒧᑦ ᑮᓇᐅᔭᑦᓴᖏᓐᓂᒃ ᑐᑦᓯᕋᕈᒪᒍᕕᑦ, ᑕᑕᕐᓭᒋᐊᓕᒃ ᐅᕙᑦᑎᓄᑦ ᙯᓗᒋᑦ. ᓇᑯᕐᓴᓂᐊᕐᐳᒍᑦ ᕿᒥᕐᕈᓕᑐᐊᕈᑦᑕ ᑐᑦᓯᕋᐅᑎᑎᓐᓂᒃ.

ᖃᐅᒪᓂᕐᓴᒥᒃ ᓯᕗᓂᑦᓴᖃᕐᓃᑦ

ᓄᓇᓕᓐᓂ ᑐᖕᖓᕕᖃᕐᓱᓂ ᑫᓪᓗᑐᐃᒐᓱᐊᕐᓂᒧᑦ ᐱᒪᑎᑦᓯᑌᓕᒪᓂᕐᒧᓗ ᐃᑲᔪᕐᓯᒪᐅᑎᐅᕗᖅ ᐊᓪᓓᓗ ᐃᓄᐃᓪᓗ ᓄᓇᓕᖏᓐᓅᓕᖓᑦᓱᑎᒃ. ᑖᒃᑯᐊ ᐃᑲᔪᕐᓯᒪᐅᑏᑦ ᐊᐅᓚᑕᐅᓂᖃᓲᑦ ᐃᓕᓭᓂᕐᒨᓕᖓᔪᓂᒃ ᓱᓇᓱᐊᕈᑎᓂᒃ ᖃᐅᔨᔭᐅᑎᑦᓯᒐᓱᐊᕈᑎᐅᑦᓱᑎᒃ, ᐊᓯᑦᔩᒐᓱᐊᕈᑎᐅᑦᓱᑎᓪᓗ ᐱᐅᓯᕆᔭᐅᓲᓂᒃ, ᐱᕈᕐᓭᓂᕐᒥᓗ ᖃᐅᔨᒪᔭᐅᔪᓂᒃ ᐊᒻᒪᓗ ᐱᔪᓐᓇᑕᐅᔪᓂᒃ. ᑖᒃᑯᐊ ᐃᑲᔪᕐᓯᒪᐅᑏᑦ ᑮᓇᐅᔭᖃᕐᑎᓯᓲᑦ 14-ᓂᒃ ᓄᓇᕕᐅᑉ ᓄᓇᓕᖏᓐᓂᒃ ᐊᑦᔨᒋᖏᑐᓄᑦ ᓄᓇᓕᓐᓂ ᐱᓇᓱᐊᕐᑕᐅᓲᓄᑦ. ᑮᓇᐅᔦᑦ ᐊᒡᒐᑐᕐᑕᐅᓲᑦ ᓄᓇᓖᑦ ᐅᓄᕐᓂᖏᑦ ᒪᓕᑦᓱᒋᑦ.

ᑖᒃᑯᐊ ᐃᑲᔪᕐᓯᒪᐅᑏᑦ ᑕᓪᓕᒪᐅᑎᑕᐅᓂᖃᕐᑐᑦ ᒪᑯᓄᖓ: ᐃᓱᒪᒃᑯᑦ ᖃᓄᐃᖏᓯᐊᕐᓂᓕᕆᓂᖅ, ᐱᐊᕋᕐᒥᒃ ᐱᕙᓪᓕᐊᑎᑦᓯᓂᖅ, ᐊᖓᔪᕐᖄᕆᔭᐅᓂᕐᒧᑦ ᐃᓕᓴᕐᓂᖅ, ᖃᓄᐃᖏᓯᐊᕐᑐᓂᒃ ᐱᐊᕋᖃᕈᓯᕐᓂᒃ ᐊᒻᒪᓗ ᐊᓐᓂᑌᓕᒪᔾᔪᑎᓂᒃ. ᐊᓪᓓᓗ ᐃᓄᐃᓪᓗ ᓄᓇᓕᖏᑦ ᐃᓱᒪᒥᑦᑎᑕᐅᓂᖃᓲᑦ ᓇᓗᓀᕈᒪᔭᕐᒥᓂᒃ ᐃᑲᔪᕐᓯᒪᐅᑎᑦᓴᒥᒃ (ᑎᑦᓴᓂᒃ) ᓄᓇᓕᓐᓄᐊᖓᔪᓄᑦ ᐃᑲᔪᕐᓯᒪᐅᑎᓄᐊᖓᔪᓂᒃ, ᐱᒍᑦᔨᒍᑎᓅᓕᖓᔪᓪᓗ ᐊᒻᒪᓗ ᓱᓇᓱᐊᕋᑦᓴᓄᑦ.

ᐃᓕᓐᓂᐊᕆᐊᕐᑎᑕᐅᓚᐅᕐᑐᕕᓂᕐᓂᒃ ᐃᑲᔪᕐᓯᒪᐅᑎᖏᓐᓄᑦ

ᐃᓕᓐᓂᐊᕆᐊᕐᑎᑕᐅᓚᐅᕐᑐᕕᓂᕐᓄᑦ ᑐᑭᑖᕈᑏᑦ ᖃᓄᐃᖏᓯᐊᕐᓂᑯᑦ ᓴᐳᒻᒥᓂᕐᒧᑦ ᐃᑲᔪᕐᓯᒪᐅᑎᖏᑦ ᐱᕕᖃᕐᑎᓯᒍᑎᐅᓲᖑᕗᖅ ᐃᓱᒪᒃᑯᑦ ᖃᓄᐃᖏᓯᐊᕐᓂᓕᕆᓂᕐᒧᑦ ᐃᑉᐱᓂᐊᕐᓂᑯᓗ ᓴᐳᒻᒥᒍᑎᓄᑦ ᐱᒍᑦᔨᒍᑎᓂᒃ ᑕᒪᒃᑯᓄᖓ ᐃᓕᓐᓂᐊᕆᐊᕐᑎᑕᐅᓚᐅᕐᑐᕕᓂᕐᓄᑦ ᐃᓚᖏᓐᓄᓗ ᐊᑐᕐᑎᑕᐅᓂᓕᒫᖏᓐᓂ ᐅᑯᐊ ᐃᓕᓐᓂᐊᕆᐊᕐᑎᑕᐅᓚᐅᕐᑐᕕᓂᕐᓄᑦ ᐃᓂᓓᒍᑎᓄᑦ ᐊᖏᖃᑎᒌᒍᑎᖏᑦ, ᐃᓚᖃᕐᑐᓂᒃ: ᐊᑭᓖᒍᑎᓂᒃ, ᐃᓄᑑᓈᕐᑎᑐᐃᑦ ᓇᐅᑦᓯᑐᕐᑕᐅᒍᑎᖏᓐᓂᒃ, ᓱᓕᔪᓂᒃ ᐅᑎᕐᕕᖃᕐᓂᒧᓪᓗ ᑲᒪᔨᐅᔪᓂᒃ ᐊᒻᒪᓗ ᐅᐱᒋᔭᖃᕐᓂᒧᑦ ᓱᓇᓱᐊᕐᓂᐅᔪᓂᒃ. ᐱᒍᑦᔨᒍᑏᑦ ᐊᑖᒍᕐᑐᑦ ᑐᑭᑖᕈᑏᑦ ᖃᓄᐃᖏᓯᐊᕐᓂᒥᒃ ᓴᐳᒻᒥᓂᕐᒧᑦ ᐃᑲᔪᕐᓯᒪᐅᑎᒃᑯᑦ ᐊᑦᑕᓇᖕᖏᑑᓂᖃᕐᐳᑦ, ᖃᐅᔨᒪᔭᐅᑦᑌᓕᒪᒍᑎᖃᕐᓱᑎᓪᓗ, ᓲᓱᒋᔭᖃᕐᓱᑎᓪᓗ ᐊᒻᒪᓗ ᐃᕐᖃᑐᓂᖃᕋᑎᒃ.

ᐃᓄᑐᖃᕐᓂᒃ ᐊᑐᓗᑲᑦᑕᐅᑎᑦᓯᑌᓕᓂᖅ

ᓄᓇᕕᒻᒥᐅᑦ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖏᓐᓂᒃ ᑲᖐᒋᔭᐅᑎᑦᓯᒋᐊᕈᑏᑦ ᓇᐅᓕᒫᓂᒃ (10/06 – 15/06)

ᓲᓱᒋᔭᖃᕐᓂᖅ ᐅᐱᒋᔭᖃᕐᓂᓗ ᐃᓄᒻᒪᕆᑦᑎᓂᒃ ᐱᓪᓚᕆᖁᑎᒋᕙᕗᑦ ᓄᓇᓕᑦᑎᓄᑦ ᓲᖑᓯᒋᐊᕈᑕᐅᓪᓚᕆᑦᓱᓂ.

ᐃᓄᐃᑦ ᐃᓄᒻᒪᕇᑦ ᖃᐅᔨᒪᔪᓪᓚᕆᐅᕗᑦ ᓄᓇᒥᓂᒃ, ᓱᓇᑦᑎᐅᒋᐊᖃᕐᓂᒥᓂᒃ ᐃᓚᒌᑎᒍᑦ, ᑲᒪᒋᔭᑦᓴᕆᒋᐊᓕᒥᓂᓪᓗ ᐱᐅᓕᐊᑦᓯᐊᕆᐊᖃᕐᓂᑯᑦ ᐅᖃᐅᓯᕐᒥᓂᒃ ᐃᓕᕐᖁᓯᕐᒥᓂᓪᓗ ᕿᒻᒪᑯᐃᒍᑎᒋᓗᒋᓪᓗ. ᓄᓇᓖᑦ ᐃᓅᒐᓱᐊᕈᑎᑦᓴᖃᕐᕕᒥᓂᒃ. ᐃᓚᒌᓐᓂᖓ ᑐᖕᖓᕕᖃᕐᓱᓂ ᓯᕗᓕᓂᒥᒃ ᑭᖑᕚᑦᓴᒥᓂᓪᓗ. ᐃᓄᒻᒪᕇᑦ ᑌᒣᒻᒪᑦ ᑲᒪᒋᔭᑦᓴᖃᕐᐳᑦ ᐃᓕᓭᒍᑎᖃᕆᐊᖃᕐᓂᒥᒃ ᐃᓄᐃᑦ ᐱᓇᓱᐊᓲᖏᓐᓂᒃ ᖃᐅᔨᒪᔭᑐᖃᖏᓐᓂᓗ ᓱᓇᑐᐃᓐᓇᑎᒎᖃᑦᑕᕋᓗᐊᕋᒥᒃ ᒪᑭᒋᐊᑦᓯᐊᓲᒍᓂᕐᒥᓄᑦ ᐅᐱᒋᔭᖃᕐᓂᒥᓄᓪᓗ ᐃᓄᖁᑎᒥᓂᒃ (ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐃᓄᒻᒪᕆᓐᓅᓕᖓᔪᖅ ᒪᓕᒐᖅ ᐱᓇᓱᐊᕐᑕᐅᒋᐊᓕᑦᑕᖏᓪᓗ, ᓄᕕᒻᐸ 2017).

ᐃᓄᒻᒪᕇᑦ ᒪᑭᑕᑦᓯᐊᓂᕆᒋᐊᓕᖓ

ᐃᓗᓯᕐᓱᓯᐊᕐᓂᖅ: ᐃᓘᓐᓈᒍᑦ ᑎᒥᒃᑯᑦ, ᐋᓐᓂᐊᖃᕐᑐᖃᕋᓂ, ᐋᓐᓂᓇᕐᑐᑰᖃᑦᑕᑐᖃᕋᓂ ᐊᕐᖁᓇᕐᓯᒪᔪᖃᕋᓂᓘᓐᓃᑦ ᐱᓇᓱᐊᕆᐊᓕᒥᓂᒃ ᓱᓇᓱᐊᕈᒪᔭᒥᓂᓪᓘᓃᑦ ᐱᕐᖃᔦᕐᓯᒪᒍᑎᒋᑦᓱᒋᑦ. ᑕᒪᓐᓇ ᑐᑭᓕᒃ ᖃᓄᐃᖕᖏᑐᑦᓯᐊᒍᓂᕐᒥᒃ ᑎᒥᒃᑯᑦ, ᐃᓅᓕᕐᓂᒥᑦ ᐃᓄᑐᖃᐅᓂᕐᒧᑦ.
ᖃᓄᐃᖕᖏᓯᐊᕐᓂᖅ: ᐃᓅᑉ ᐃᓘᓐᓈᒍᑦ ᒪᑭᑕᑦᓯᐊᓂᖓ, ᐃᓱᒫᓘᑎᑦᓴᖃᕋᓂ ᐋᓐᓂᓇᕐᑐᑰᕋᓂᓗ, ᐃᓱᕐᕆᓱᓂ, ᐊᓕᐊᑦᓱᓂ ᐃᑉᐱᓂᐊᕐᓂᑯᓪᓗ ᑲᑉᐱᐊᓱᒐᓂ. ᓭᒪᓂᖃᑦᓯᐊᓱᓂ, ᓄᓪᓚᖓᑦᓯᐊᓱᓂ ᐃᓱᒪᓐᓈᓱᓂᓗ ᓯᕗᒻᒧᕆᐊᑦᓯᐊᕈᓐᓇᓱᓂ ᐱᒍᓐᓇᓂᖃᑦᓯᐊᓱᓂᓗ. ᐱᓪᓚᕆᐅᑎᑦᓯᓱᓂ ᖃᓂᑕᖃᕆᐊᖃᕐᓂᒥᒃ ᐃᓅᖃᑎᒥᓂᒃ ᐊᑦᑕᓀᑦᑐᓯᐊᒦᓪᓗᓂᓗ ᑲᒪᒋᔭᐅᑦᓯᐊᓂᕐᒦᓗᓂᓗ.
ᐃᓅᖃᑎᒌᑦᓯᐊᓂᕐᒦᓂᖅ. ᐃᓅᖃᑎᖃᑦᓯᐊᓂᕐᒥᒃ ᐃᓚᒋᔭᓂᒃ, ᐃᓚᓐᓈᕆᔭᕐᓂᒃ, ᓄᓇᕐᖃᑎᒋᔭᕐᓂᒃ ᐊᓯᖏᓐᓂᓗ ᓄᓇᓕᒻᒥᐅᓂᒃ ᓇᓂᑐᐃᓐᓇᒥᐅᓂᓪᓘᓃᑦ ᐱᓪᓚᕆᐅᑎᑦᓯᓂᖅ ᐃᓘᓐᓈᒍᑦ ᖃᓄᐃᖕᖏᓯᐊᕈᑎᑦᓴᒥᒍᑦ ᒪᑭᑕᑦᓯᐊᕈᑎᑦᓴᒥᒍᓪᓗ.

ᖃᐅᔨᒋᐊᕐᕕᐅᓯᒪᔪᑦ:

Fletcher, Christopher, ᖃᓄᐃᓕᕐᐱᑖ ? ᓄᓇᕕᒻᒥ ᓄᓇᓕᓕᒫᓂ ᐃᓄᐃᑦ ᖃᓄᐃᒻᒪᖔᑕ ᖃᐅᔨᓴᕐᓂᖅ, ᓄᓇᓕᓐᓅᓕᖓᔪᓂᒃ ᖃᐅᔨᓴᐅᑎᕕᓂᕐᓂᒃ ᑐᓴᕐᑎᓯᒍᑎ, ᑐᑭᖓ ᐃᓄᐃᑦ ᐃᓕᕐᖁᓯᖓᑕ ᐱᓇᓱᐊᕐᑕᐅᒍᓯᖓᑕ ᐊᒻᒪᓗ ᐃᓅᓯᒃᑯᑦ ᖃᐅᔨᒪᐅᑎᐅᓲᑦ ᐃᓗᓯᕐᓱᓯᐊᕆᐊᖃᕐᓂᒥᒃ ᓄᓇᕕᒻᒥ. ᐊᓪᓚᑕᐅᓯᒪᔪᓃᑦᑐᑦ: ᕿᒥᕐᕈᔭᐅᓯᒪᓂᖓᓂᒃ ᐃᓗᓯᓕᕆᓂᐅᑉ ᐃᓅᓯᓕᕆᓂᐅᓪᓗ ᓄᓇᕕᒻᒥ: ᐊᑐᕐᑏᑦ ᑕᑯᓐᓇᕈᓯᖏᑦ. ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, 2021.

ᐃᓄᒻᒪᕇᑦ ᑲᒪᒋᔭᐅᑦᓯᐊᖏᑦᑑᓂᖓ

ᐃᓄᒻᒪᕇᑦ ᑲᒪᒋᔭᐅᑦᓯᐊᖏᑦᑑᓂᖓ ᐱᓐᓀᓗᑕᐅᓲᒍᕗᖅ ᓄᓇᓕᓐᓂ ᓯᓚᕐᔪᐊᓕᒫᒥ. ᑲᒪᒋᔭᐅᑦᓯᐊᖏᑦᑑᓂᖅ ᓇᓂᑐᐃᓐᓈᕋᓗᐊᕐᑎᓗᒍ, ᑕᒪᓐᓇ ᐃᔨᕐᑐᐊᕆᔭᐅᓲᒍᕗᖅ, ᐃᓓᓐᓇᖏᓪᓗ ᓂᓪᓕᕈᑎᖃᓲᒍᒐᓗᐊᕐᑎᓗᒋᑦ ᐃᓅᖃᑎᒌᑎᒍᓪᓗ “ᓂᐯᑦᑑᒍᑕᐅᓲᒍᑦᓱᓂ”.

ᓄᓇᓕᑦᑎᓂ ᐃᓄᒻᒪᕇᑦ ᓴᐳᒻᒥᔭᐅᓂᖃᓲᒍᕗᑦ ᐃᓕᑕᕆᔭᐅᓂᖃᕐᑎᑕᐅᓲᒍᑎᓪᓗᒋᑦ ᖃᐅᔨᒪᐅᑏᑦ ᑲᑉᐱᐊᓱᑦᑐᖃᓕᕐᒪᑦ ᓂᑦᔮᔪᖃᓕᕐᒪᓗ. ᓴᐳᒻᒥᔪᑦᓭᑦ ᐃᑲᔪᕐᑐᓭᓪᓗ ᐊᑐᐃᓐᓇᐅᑎᓪᓗᒋᑦ ᐃᑲᔪᕐᑕᐅᒋᐊᓕᓐᓄᑦ. ᐱᓇᓱᖃᑎᒌᓪᓗᑕ, ᓄᓇᓕᖃᕈᓐᓇᐳᒍᑦ ᐃᓄᒻᒪᕆᓐᓂᒃ ᐅᐱᒋᔭᖃᕐᕕᐅᒍᓐᓇᑐᒥᒃ ᑲᒪᒋᔭᐅᑦᓯᐊᖃᑦᑕᑎᓪᓗᒋᓪᓗ ᓲᓱᒋᔭᐅᑦᓯᐊᖃᑦᑕᑎᓪᓗᒋᓪᓗ ᐅᐱᒋᔭᐅᓂᖃᑦᓯᐊᑎᓪᓗᒋᓪᓗ ᑌᒫᒃ ᐱᐅᓯᖃᕐᕕᐅᒋᐊᖃᕐᒪᑕ.

ᐊᑕᐅᑦᓯᑯᑦ, ᑫᓪᓚᑐᐃᒍᑎᖃᕈᓐᓇᐳᒍᑦ ᒪᑭᑕᑦᓯᐊᓂᕆᒋᐊᓕᖏᓐᓂᒃ ᐃᓄᒻᒪᕇᑦ ᑲᒪᒋᔭᐅᑦᓯᐊᖏᑦᑑᒍᑎᒋᓲᖏᓐᓂᓗ ᐱᑕᖃᕈᓐᓀᑎᑦᓯᒐᓱᐊᕐᓗᑕ

ᐃᓄᒻᒪᕇᑦ ᑲᒪᒋᔭᐅᑦᓯᐊᕆᐊᖃᕐᓂᖏᑦ

ᐃᓄᒻᒪᕆᓐᓂᒃ ᑲᒪᑦᓯᐊᓂᖅ ᐱᐅᓯᒃᑰᕆᐊᖃᕐᐳᖅ ᐱᓂᐊᕐᓂᑰᕐᓗᓂᓗ ᒪᑭᑦᑕᑦᓯᐊᖁᓪᓗᒋᑦ ᓲᓱᒋᔭᐅᑦᓯᐊᖁᓪᓗᒋᓪᓗ ᑭᖕᖒᒪᒋᔭᖏᑎᒍᓪᓗ, ᐱᒍᒪᔭᖏᑎᒍᓪᓗ ᓇᓪᓕᑳᕐᓯᒪᔭᖏᑎᒍᓪᓗ, ᐊᖏᖕᖏᑑᖃᑦᑕᕋᓗᐊᕐᐸᑕ. ᓄᐃᑦᓯᒍᓐᓇᐳᒍᑦ ᑲᒪᒋᔭᐅᑦᓯᐊᕕᑦᓴᖏᓐᓂᒃ ᐃᓄᒻᒪᕇᑦ ᑲᑐᑦᔨᓗᑕ ᐃᒣᒍᓐᓇᓯᓂᐊᕋᑦᑕ:

ᑕᑯᓐᓇᑕᑐᐊᖃᑫᓐᓇᖃᑦᑕᓗᑕ ᐱᓂᐊᕐᓂᑎᓐᓂᒃ ᐃᓄᒻᒪᕆᓐᓄᑦ
ᓲᓱᒋᓗᒋᑦ ᖃᐅᔨᕙᓪᓚᓯᐊᕐᓗᒋᓪᓗ ᐱᒍᓐᓇᐅᑎᖃᕐᒪᑕ ᐃᒻᒥᓂᒃ ᐱᓪᓚᕆᐅᑎᒍᓐᓇᓂᕐᒥᒃ
ᐃᓅᖃᑎᒌᑦᑐᓄᑦ ᐃᓚᐅᑎᖃᑦᑕᓗᒋᑦ
ᑲᑐᑦᔨᓗᑕ ᐃᑲᔪᕐᓯᒪᓗᒋᑦ.

ᐃᑲᔪᕐᑎᓭᑦ ᐱᕗᑦ ᐃᑲᔪᕐᑕᐅᒋᐊᖃᑐᖃᕐᐸᑦ. ᐃᑲᔪᕐᑎᓴᐅᒻᒥᔪᑦ ᒪᑯᐊᒍᑎᓪᓗᒋᑦ:

***ᐅᖄᓚᕕᒋᓗᒍ 9111 ᐅᐃᒪᓇᕐᓯᔪᖃᕐᐸᑦ.***

ᑕᑎᒋᒍᓐᓇᑕᕐᓄᑦ ᐃᑲᔪᕐᑕᐅᒍᒪᖃᑦᑕᓗᑎᑦ, ᐆᑦᑐᕋᐅᑎᒐ, ᓄᓇᓕᒻᒥᐅᒧᑦ ᐅᖄᕕᑦᓴᓯᐊᒍᓂᕐᐹᒧᑦ, ᐃᓚᓐᓅᕕᑦ ᓇᓪᓕᐊᓄᑦ, ᐃᓚᓐᓈᓅᕕᑦ ᐅᕝᕙᓘᓐᓃᑦ ᐋᓐᓂᐊᕕᒻᒥ ᐱᓇᓱᑦᑎᒧᑦ.

ᓄᓇᓕᓐᓂ ᐃᑲᔪᕐᑕᐅᕕᓐᓄᑦ:

819-XXX-9111
ᓄᓇᓕᒻᒥ ᐋᓐᓂᐊᕕᒻᒧᑦ

ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ:

ᐃᓄᐃᑦ ᐱᓪᓚᕆᖁᑎᖏᓐᓂᒃ ᐱᓇᓱᐊᓲᖏᓐᓂᓗ ᐱᓇᓱᕝᕕᒃ (ᐃᓄᒃᑎᑐᑦ - ᖃᓪᓗᓈᑎᑐᑦ): 1-877-686-2845
ᐃᓄᒻᒪᕇᑦ ᖃᓄᐃᖕᖏᓯᐊᕈᑎᑦᓴᖏᓐᓂᒃ ᐊᑕᐅᑦᓯᑰᕐᑎᓯᔨ (ᐅᐃᒍᐃᑎᑐᑦ - ᖃᓪᓗᓈᑎᑐᑦ): coordinator.wellbeing.elder@ssss.gouv.qc.ca.
ᐱᒍᑦᔨᐅᑏᑦ ᐱᒍᑦᔨᐅᑎᐅᑦᓯᐊᒪᖔᑕ ᐃᑉᐱᒍᓱᑦᑎ ᐅᓐᓂᓗᕝᕕᐅᓱᓂᓗ: complaints.nrbhss@ssss.gouv.qc.ca.

Info-Santé (ᐅᐃᒍᐃᑎᑐᑦ - ᖃᓪᓗᓈᑎᑐᑦ): 811

ᑲᒪᒋᔭᐅᑦᓯᐊᖏᑦᑑᔪᖃᕐᓂᐸᑦ ᐅᖄᓚᕕᑦᓴᖅ (ᑯᐯᒃᒥ) (ᐅᐃᒍᐃᑎᑐᑦ - ᖃᓪᓗᓈᑎᑐᑦ): 1-888-489-2287

ᐃᕐᖑᓯᐅᕐᓂᒥᒃ ᐃᓕᓐᓂᐊᑎᑦᓯᓂᕐᒧᑦ ᐃᑲᔪᕐᓯᒪᐅᑏᑦ ᐊᒻᒪᓗ ᐱᒍᑦᔨᒍᑏᑦ

ᓯᑕᒪᓂᒃ ᐃᓅᓕᕐᑎᓯᕕᖃᓲᖑᕗᖅ ᓄᓇᕕᒻᒥ. ᐱᖓᓱᐃᑦ ᑕᓯᐅᔭᕐᔪᐊᒥᑦᑎᓗᒋᑦ ᐃᓄᑦᔪᐊᒥ, ᐳᕕᕐᓂᑐᒥ ᐊᒻᒪᓗ ᓴᓪᓗᓂ, ᐊᒻᒪᓗ ᐊᑕᐅᓯᖃᕐᑎᓗᒍ ᐅᖓᕙᒥ ᑰᔾᔪᐊᒥ.

ᐃᕐᖑᓯᐅᕐᓂᒧᑦ ᐃᑲᔪᕐᓯᒪᐅᑎᖏᑦ ᐊᑐᕐᑕᐅᓲᖑᕗᑦ ᑐᖕᖓᒍᑕᐅᑦᓱᑎᒃ ᐃᕐᖑᓯᐅᕐᓂᒥᒃ ᐃᓕᓭᓂᕐᒧᑦ ᐱᔪᓐᓇᓯᒍᑎᑖᕐᓂᒧᓪᓗ ᓄᓇᕕᒻᒥ ᐊᑦᔨᒋᔭᐅᓂᖃᕐᑐᓄᑦ ᐅᑯᓄᖓ Ordre des sages-femmes du Québec (OSFQ) ᐊᒻᒪᓗ Association of Ontario Midwives (AOM) ᓇᒻᒪᓈᕐᑎᑕᐅᒋᐊᕐᓯᒪᔪᓄᑦ ᓄᓇᕕᐅᑉ ᓄᓇᖓᓂᒥᐅᓄᑦ. ᓄᓇᓕᓐᓂ ᐃᕐᖑᓯᐅᕐᑏᑦ ᑕᑯᓐᓈᓂᖃᓗᐊᖑᐊᓲᖑᒻᒪᑕ ᐱᐊᕋᑦᓴᖃᐅᒐᕐᓂᒥᒃ, ᐃᓅᓕᕐᑎᓯᓂᕐᒥᓗ ᐊᒻᒪᓗ ᐃᓅᓕᕐᓯᒪᓕᕐᑐᓂᒃ. ᓄᓇᕕᒻᒥ ᐃᕐᖑᓯᐅᕐᑏᑦ ᓯᕗᓕᕐᓯᔨᐅᓲᖑᕗᑦ ᓇᒻᒪᑐᓂᓪᓗ ᓇᒻᒪᓯᐊᖏᑐᓂᓪᓗ ᖃᓄᐃᓕᖓᔪᖃᓕᐊᕐᒪᑦ ᐊᒻᒪᓗ ᐱᓇᓱᐊᖃᑕᐅᓲᖑᑦᓱᑎᒃ ᐊᓯᖏᓐᓂᒃ ᐊᓐᓂᐊᓂᓕᕆᓂᕐᒧᑦ ᐱᓇᓱᐊᖃᑕᐅᓲᓄᑦ. ᓄᓇᕕᒻᒥ ᐃᕐᖑᓯᐅᕐᑏᑦ ᐱᔪᓐᓇᓯᐊᕐᓂᖏᑦ ᖄᖏᐅᑎᓂᖃᓲᖑᒐᓗᐊᑦ ᐊᑐᕐᑕᐅᓲᓄᑦ ᐅᑯᓇᓂ OSFQ ᐊᒻᒪᓗ AOM ᐱᑦᔪᑎᒋᑦᓱᒍ ᑌᒣᑦᑐᓕᕆᓲᖑᓂᖏᓐᓄᑦ ᓄᓇᒥ ᐅᐸᑦᑕᑐᐃᓐᓇᕈᓐᓇᖏᑦᑐᒥ.

ᐱᓇᓱᐊᕐᕕᖓᑦ ᐃᓄᐃᑦ ᐃᓪᓕᕆᔭᖏᓐᓄᑦ ᐱᐅᓯᖏᓐᓄᓗ ᑎᓕᔭᐅᒪᕗᑦ ᐱᓇᓱᐊᕆᐊᖃᕐᓂᒥᒃ ᓄᓇᓕᓕᒫᓄᐊᖓᔪᒥᒃ ᑲᔪᓯᑎᑕᐅᔪᖃᕐᑎᓗᒍ ᐃᓅᓕᕐᑎᓯᕕᓐᓂᒃ ᑕᒫᓂ ᓄᓇᑦᑎᓂ ᐊᒻᒪᓗ ᐊᓐᓂᐊᕕᒻᒥ ᐸᕐᓇᓯᒪᐅᑎᒋᔭᐅᓂᐊᕐᑐᓄᑦ ᑰᔾᔪᐊᒥ ᐃᓅᓕᕐᑎᓯᕕᖓᓄᑦ.