ᓴᐴᓗᑦᓯᒋᐊᕐᓂᖅ

ᐊᒥᓱᒐᓚᓐᓂᒃ ᑲᐴᑎᒧᑦ ᓄᐃᑎᑕᐅᕐᖃᔭᖕᖏᑐᓂᒃ ᐊᓐᓂᐊᓂᒃ ᐱᑕᖃᕐᑐᖃᕐᐳᖅ ᐅᓪᓗᒥ, ᐅᑦᑑᑎᒋᓗᒍ, ᐊᐅᐸᕐᑕᑳᕐᓂᓂᒃ, tetanus ᐊᒻᒪᓗ ᐳᕙᒃᑯᑦ ᐃᒻᒪᓇᕐᑐᓂᒃ. ᐋᓐᓂᐊᒋᒃᑯᓯᕐᑐᑕᐅᓂᖅ ᑲᐴᑎᒧᑦ ᖃᐅᔨᒪᔭᐅᕗᖅ ᐊᑦᑕᓇᖕᖏᑑᒋᐊᖓ ᐊᑐᕐᓂᖃᑦᓯᐊᕆᐊᖓᓗ ᐋᓐᓂᐊᓕᕐᑌᓕᒪᒍᑎᐅᒍᓐᓇᑎᓗᒍ ᐃᒻᒥᓂᒃ ᐊᒻᒪᓗ ᓇᓪᓕᒋᔭᑎᓐᓂᒃ ᓴᐳᑦᔨᓯᒪᒍᑎᐅᑦᓱᓂ.
 

ᐱᖓᓱᑦ ᐱᑦᔪᑎᑦᓭᑦ ᑲᐱᔭᐅᓯᒪᒋᐊᖃᕐᓂᒧᑦ

1. ᑭᖑᓂᖃᕈᑕᐅᒍᓐᓇᑐᓂᒃ ᖃᓄᐃᒍᑎᑖᕈᒪᖕᖏᒧᑦ

ᑲᐱᔭᐅᓯᒪᓂᖅ ᖃᓂᒻᒪᒪᕆᒌᒃᑯᑎᑦᓯᐊᒍᓂᕐᐸᐅᕗᖅ ᑭᖑᓂᖃᓪᓚᕆᑐᐃᓐᓇᕆᐊᓕᓐᓂᒃ. ᐃᓚᖓᒍᑦ, ᖃᓂᒻᒪᓚᕆᑦᑐᖃᑐᐊᕋᒥ ᑎᒥᒃᑯᑦ ᓱᒃᑯᑕᐅᒍᓐᓇᑐᖃᕐᒪᑦ ᑐᖁᑐᐃᓐᓇᕆᐊᖃᕐᑐᖃᕐᓱᓂᓘᓐᓃᑦ.

ᐆᑦᑐᕋᐅᑎᒐ, ᐃᓚᖓᒍᑦ ᑐᖁᒍᑕᐅᒍᓐᓇᓲᒍᕗᖅ tetanus-ᒍᓂᕋᕐᑕᖅ, ᒪᒥᓴᕐᑕᐅᒍᑎᑦᓴᖃᖕᖏᓇᒥ. Polio-ᒍᓂᕋᕐᑕᖅ, ᑎᒥᒃᑯᑦ ᓄᑮᕈᑕᐅᒍᓐᓇᑐᖅ ᓂᒪᕈᓐᓇᑦᓯᐊᕈᓐᓇᖏᕈᑕᐅᒍᓐᓇᒥᑦᓱᓂ.

ᖃᓂᒻᒪᑐᕕᓂᐅᔪᖃᕐᓗᓂ ᐱᐅᓯᑐᐃᓐᓇᐅᑎᓪᓗᒍ ᑎᒥᒃᑯᑦ ᓴᐴᓗᑦᓯᒍᑕᐅᑐᐃᓐᓇᓲᒍᒻᒥᔪᖅ ᑭᓯᐊᓂ, ᑭᖑᓂᖃᕈᑕᐅᓪᓚᕆᒍᓐᓇᓲᒍᒻᒥᔪᑦ ᖃᓂᒻᒪᕈᑕᐅᔪᑦ. ᑲᐱᔭᐅᓯᒪᓗᓂ, ᐊᑦᑕᓇᕐᓯᓂᐅᔭᖕᖏᓂᕐᓴᐅᔪᖃᕈᓐᓇᑐᖅ.  

2. ᓴᐳᑦᔨᒍᒪᒧᑦ ᐊᑦᑕᓇᕐᓯᓂᐅᔭᕐᑐᓂᒃ ᖃᓂᑕᕆᔭᑦᑎᓂᒃ

ᐃᓄᐃᑦ ᐃᓚᖏᑦ ᐊᑦᑕᓇᕐᓯᓂᐅᔭᕐᓂᓴᐅᓲᑦ ᖃᓂᒻᒪᑐᐊᕋᒥᒃ. ᐱᐊᕋᑦᓴᓖᑦ, ᓄᑕᕃᑦ, ᐃᓄᒻᒪᕇᓪᓗ, ᐊᑯᓃᕐᑐᒥᓪᓗ ᖃᓂᒪᔪᑦ ᑎᒥᒻᒥᒍᓪᓘᓃᑦ ᓴᐴᓗᑕᖃᑦᓯᐊᖏᑦᑐᑦ. ᐃᓄᐃᑦ ᐃᓚᖏᑦ ᑲᐱᔭᐅᒍᓐᓇᓲᒍᖕᖏᒥᔪᑦ ᓱᒃᑯᕈᑎᖃᓲᒍᒐᒥᒃ ᑲᐴᑎᐅᑉ ᐃᒪᖓᓂᒃ ᖃᓄᐃᒍᑎᖃᕐᓂᒥᓄᓪᓘᓃᑦ. ᑲᐱᔭᐅᓯᒪᓂᖅ ᓴᐳᒻᒥᒍᑎᑦᓯᐊᒍᕗᖅ ᑕᒪᒃᑯᓂᖓ ᐅᖄᔭᑦᑎᓂᒃ.

3. ᓄᓇᓕᒻᒦᑐᑦ ᓴᐳᑦᔨᒍᒪᑦᓱᒋᑦ

ᑲᐱᔭᐅᓯᒪᔪᖅ ᓇᓪᓕᐊ ᖃᓂᒻᒪᒍᑎᒥᓂᒃ ᐊᓯᒥᓄᑦ ᐁᑦᑑᑎᖃᖕᖏᓂᕐᓴᐅᒍᓐᓇᐳᖅ. ᑲᐱᔭᐅᓯᒪᓗᑎᑦ, ᐃᒻᒥᓂᒃ ᓴᐳᑦᔨᕗᑎᑦ, ᓄᓇᕐᖃᑎᓕᒫᕐᓃᕕᓪᓗ.

ᑲᐴᑏᑦ ᐊᑑᑎᖓ

ᑲᐱᔭᐅᓯᒪᑦᓱᓂ ᑎᒥᕗᑦ ᓴᐴᓗᑕᖃᑦᓯᐊᕈᓐᓇᑐᖅ ᖁᐱᕐᕈᑖᕇᒃᑯᑎᒥᒃ ᐁᑦᑐᑑᑕᐅᓲᓂᒃ ᐅᕝᕙᓘᓐᓃᑦ ᖁᐱᕐᕈᑖᕇᒃᑯᑎᐅᑦᓱᓂ ᖃᓂᒻᒪᕈᑕᐅᒍᓐᓇᑐᓂᒃ ᖃᓂᒻᒪᑐᖃᓚᐅᕋᓂᓘᓐᓃᑦ ᓴᐴᓗᑕᖃᑦᓯᐊᑐᖃᓯᑦᓱᓂ.

ᑲᐴᑏᑦ ᐃᒪᖏᑦ antigens-ᒍᓂᕋᕐᑕᓂᒃ ᐅᐊᕈᑎᖃᕐᓂᐸᐅᓲᒍᕗᑦ. ᑎᒥᐅᑉ ᓴᐴᓗᑕᖓᓄᑦ ᐃᓕᑕᕆᔭᐅᑦᓯᐊᑐᓂᒃ ᖁᐱᕐᕈᑕᖃᓕᕐᒪᖔᑦ ᑎᒥᕗᑦ ᑌᒪ ᓴᐴᓗᑦᓯᔭᐅᓂᐊᓕᕐᒪᑦ ᑎᒥᕗᑦ ᖃᓂᒻᒪᑐᖃᕈᓐᓀᓯᑦᓱᓂ. ᑎᒥᑦᑕ ᓴᐴᓗᑕᖓ ᐃᓕᑕᕐᓯᒍᓐᓇᓯᓲᖅ ᐃᓕᑕᕐᓯᒍᓐᓇᕆᐊᓕᒻᒥᓂᒃ ᖃᓂᒪᒍᑕᐅᓲᒥᒃ ᖁᐱᕐᕈᒥᒃ ᑎᒥᒻᒨᕋᓱᐊᕐᑐᖃᓕᕐᒪᑦ.

ᐃᓚᖓᒍᑦ ᓴᐴᓗᑕᖓ ᑎᒥᑦᑕ ᐃᕐᙯᑎᑕᐅᒋᐊᖃᑦᑕᕆᐊᖃᓲᒍᒻᒪᑦ ᖃᓄᐃᑦᑑᒪᖔᑦ antigen-ᒍᓂᕋᕐᑕᖅ ᑎᒥᐅᑉ ᓴᐴᓗᑕᖓ ᓴᐳᑦᔨᓯᐊᕆᐊᖃᕐᓂᒥᓂᒃ ᓱᑲᑦᑐᒥᒃ ᐃᕐᙯᖃᑦᑕᓂᐊᕐᒪᑦ ᖃᓂᒪᒧᑦ ᑎᒥ ᐱᔭᐅᒐᓱᐊᓯᑉᐸᑦ. ᑌᒣᒻᒪᑕᒐ ᑲᐱᔭᐅᒋᐊᓪᓚᖃᑦᑕᕆᐊᖃᓲᒍᕗᑦ.

ᑲᐴᑏᑦ ᐱᕙᓪᓕᖁᑎᐅᑦᓯᐊᕈᓐᓇᓂᖏᑦ

ᑲᐴᑏᑦ ᐱᑕᖃᓲᒍᓕᕐᑎᓗᒋᑦ, ᖃᓂᒻᒪᕈᑕᐅᓪᓚᕆᓲᒍᓯᒪᔪᑦ ᐃᓚᖏᑦ ᐱᑕᖃᓲᒍᒍᓐᓀᖁᑦ, (ᒪᑯᐊ ᐊᐅᐸᓗᑳᓐᓂᖅ ᓯᓚᕐᔪᐊᓕᒫᒥ, polio-ᒍᓂᕋᕐᑕᓘᓐᓃᑦ ᑲᓇᑕᒥ). ᐊᓯᖏᑦ ᖃᓂᒻᒪᕈᑕᐅᓲᑦ ᖃᓂᒻᒪᕈᑕᐅᓗᐊᓲᒍᒍᓐᓀᓯᒪᔪᑦ ᓄᓇᕐᔪᐊᓂ ᐱᕙᓪᓕᐊᓯᒪᓪᓚᕆᑦᑐᓂ, (ᒪᑯᐊ diphtheria, tetanus ᐅᕝᕙᓘᓐᓃᑦ ᑎᖑᓪᓗᓇᕐᑐᖅ B ᐅᕕᒐᕐᑐᐃᑦ ᑲᐱᔭᐅᒍᑎᒋᓲᕆᓕᕐᑕᖏᓐᓂ).

ᑭᓯᐊᓂᓕ, ᐊᓯᖏᑦ ᐋᓐᓂᐊᓯᐅᑏᑦ ᑌᒣᓲᒍᒻᒥᒪᑕ, ᑲᐴᑎᒥᒃ ᓇᓪᓕᐊᓂᓪᓘᓃᑦ 100%-ᒧᑦ ᐱᕙᓪᓕᖁᑎᓪᓚᕆᐅᒍᓐᓇᑐᖃᓲᒍᖕᖏᓚᖅ. ᐱᕙᓪᓕᖁᑎᐅᓚᖓᑉᐸᑦ ᑲᐴᑎ ᒪᑯᐊ ᐃᓱᒪᒋᔭᐅᒋᐊᖃᕐᒪᑕ, ᐅᑭᐅᖏᑦ ᑲᐱᔭᐅᔫᑉ, ᖃᓄᐃᓐᓂᖓ /ᖃᓄᐃᖕᖏᓂᖓ, ᐊᑦᔨᒌᐸᓲᓂᖏᓪᓗ ᖁᐱᕐᕈᐃᑦ ᐁᑦᑐᑑᑕᐅᓲᑦ ᓲᖑᓂᖏᑦᑕ ᐁᑦᑑᑕᐅᖃᑦᑕᓱᑎᒃ ᑲᐴᑎᐅᓪᓗ ᐃᒪᖓᓃᑦᑐᑦ ᐊᑦᔨᒌᖕᖏᑐᑦ ᐅᐊᕈᑦᓰᒍᑕᐅᓯᒪᔪᑦ.

ᑲᐱᔭᐅᒍᑏᑦ ᐱᕙᓪᓕᖁᑎᒋᑦᓯᐊᓚᖓᒍᕕᐅᒃ, ᓲᓱᑦᓴᓯᐊᕆᐊᖃᕐᐳᑎᑦ ᐅᓐᓂᑑᑎᓕᐊᒍᓯᒪᔪᓂᒃ ᐋᓐᓂᐊᓯᐅᕐᕕᓂ ᐱᓇᓱᑦᑎᓄᑦ, ᐱᓗᐊᕐᑐᖅ ᖃᑦᓯᕕᓪᓗᑎᑦ ᑲᐱᔭᐅᒋᐊᖃᕐᓃᑦ ᐃᓱᒪᒋᓗᒍ ᖃᑦᓯᕕᓪᓗᑎᑦ ᑲᐱᔭᐅᓯᒪᒋᐊᖃᕐᓃᑦ ᖃᖓᓗ ᐃᓱᐊᕐᓂᐸᐅᒻᒪᖔᑦ ᑲᐱᔭᐅᕕᑦᓭᑦ.

ᑲᐴᑏᑦ ᐊᑦᑕᓀᑦᑐᓯᐊᒍᓂᖓ

ᑲᐱᔭᐅᒍᑎᑦᓴᓕᒫᑦ ᑲᓇᑕᒥ ᐃᕐᐸᑎᑕᐅᓲᑦ, ᐃᓘᓐᓇᑎᒃ, ᒪᓕᒐᖃᕐᑎᑕᐅᓪᓚᕆᑦᓱᑎᒃ ᐊᑦᑕᓇᕐᓯᒍᑕᐅᑦᑌᓕᒋᐊᖃᕐᓂᒥᒃ.

ᑲᐱᔭᐅᒍᑏᑦ ᐃᓚᖏᑦ ᓱᕐᕋᑕᐅᓐᓇᓲᒍᒻᒥᔪᑦ ᐃᓱᕐᕆᖏᑦᑑᒍᑕᐅᓯᑦᓱᑎᒃ ᑎᒥᒃᑯᑦ. ᑯᐯᒃᒥ ᓇᓂᑐᐃᓐᓇᓗ ᓯᓚᕐᔪᐊᒥ, ᐃᑉᐱᒋᔭᖃᖏᓐᓇᓕᒫᓲᑦ ᖃᐅᔨᑦᓴᐅᑎᒋᒐᓱᐊᕐᓱᑎᒃ ᓱᕐᕋᑕᐅᒍᑎᖃᕐᑐᖃᕐᓂᒪᖔᑦ, ᓱᕐᕋᑕᐅᓪᓚᕆᑦᑐᖃᕐᓯᒪᒻᒪᖔᓪᓘᓃᑦ, ᐅᕝᕙᓘᓐᓃᑦ ᓱᕐᕋᑕᐅᒍᑎᐅᓗᑭᖕᖏᑐᒥᒃ ᓱᕐᕋᑕᐅᓯᒪᔪᖃᕐᒪᖔᑦ ᑲᒪᑦᓴᐅᑎᒋᓚᖓᑦᓱᑎᒃ ᑌᒣᑦᑐᖃᕐᓂᐸᑦ.

ᐊᒥᓲᓂᕐᓭᑦ, ᓱᕐᕋᑕᐅᓂᖃᓪᓗᐊᓲᒍᖕᖏᑐᑦ ᓱᕐᕋᑕᐅᓯᒪᑫᓐᓇᓲᒍᒐᓗᐊᕐᒥᓱᑎᒃ. ᓱᕐᕋᑕᐅᓯᒪᑫᓐᓇᕈᓐᓇᓲᑦ, ᐆᑦᑐᕋᐅᑎᒃᑲ, ᐆᓇᒐᓛᑦᓱᑎᒃ ᑲᑉᐳᓕᕆᒐᓛᑦᓱᑎᓪᓘᓃᑦ. ᑕᒪᒃᑯᐊᓗ ᐱᐅᓯᑐᐃᓐᓇᐅᓲᒍᓂᕋᕐᑕᐅᓱᑎᒃ ᓱᒃᑯᕈᑕᐅᒍᓐᓇᕋᑎᒃ.

ᐃᓛᓐᓂᓴᕋᑕᖅ, ᑲᐱᔭᐅᔪᕕᓂᕐᒥᒃ ᓱᒃᑯᑕᐅᓪᓚᕆᑦᑐᖃᓲᒍᒻᒥᔪᖅ, ᑌᒫᑦᓭᓇᖅ ᑎᒥᒃᑯᑦ ᓱᒃᑯᑕᐅᔪᕐᑕᖃᓲᒍᒻᒥᒪᑦ ᓂᕆᒋᐅᕐᑕᒥᓂᒃ ᓂᕆᔪᖃᑐᐊᕐᒪᑦ. ᑕᒪᒃᑯᐊ ᑎᒥᒃᑯᑦ ᓱᒃᑯᑕᐅᓂᐅᓲᑦ ᒪᒥᓴᕐᑕᐅᒍᑎᐅᒍᓐᓇᑐᑦ. ᑌᒣᒻᒪᑕᒐ ᑲᐱᔭᐅᕐᖃᒥᐅᑦᓱᑕ ᐅᑕᕐᕿᖁᔭᐅᓚᕿᓲᒍᕗᒍᑦ 15-ᒥᓂᑦᓂᒃ ᐊᓂᓚᐅᕋᑕ.

Vaccines offered in Nunavik

ᐱᑐᕝᕕᐅᒍᓐᓇᑐᑦ