ᑐᓴᐅᒪᔭᐅᑎᑦᓯᒍᑎᒃ ᐃᑯᒪᐅᑎᒧᕐᑐᓂᑦ ᓱᐴᕈᑏᑦ ᐱᓪᓗᒋᑦ

ᓀᓪᓕᑎᕐᓯᒪᐅᑎᖏᑦ ᖃᒻᒥᑯᑦ ᓱᓂᐅᖃᑦᑕᑐᑦ:

ᐊᒥᐊᔨᑫᑦ ᓄᓇᖓᓂ, ᐊᖓᔪᕐᖃᐅᕕᒻᒦᑐᑦ ᖃᐅᔨᓴᖃᑦᑕᒪᑕ ᐳᕙᒻᒥᒍᑦ ᓱᒃᑯᑕᐅᓯᒪᓪᓚᕆᑦᑐᓂᒃ ᑐᖁᖃᑦᑕᑐᓂᓪᓗ. ᐃᑯᒪᒧᕐᑐᓂᒃ ᓱᐴᕈᓯᔭᖃᑦᑕᓂᕐᓄᑦ. ᐊᒥᓲᓂᕐᓭᓗ ᐃᑯᒪᒧᕐᑐᓂᒃ ᓱᐴᕈᓯᔭᖃᑦᑕᑐᕕᓂᐅᓂᖏᓐᓂᒃ ᐋᖓᔮᓐᓇᑐᕐᑕᓕᓐᓂᒃ THC-ᓚᔭᐅᔪᓂᒃ (cannabis-ᓚᔭᐅᔪᓄᑦ ᐅᐊᕈᑎᐅᓲᒥᒃ), ᐃᓚᖏᓪᓗ ᐃᑯᒪᒧᕐᑐᒥᒃ ᓱᐴᕈᓯᔭᖃᑦᑕᑐᕕᓂᐅᑦᓱᑎᑦ THC-ᓚᔭᐅᔪᕐᑕᓕᓐᓂᒃ ᓂᑯᑎᓐᑕᓕᓐᓂᓗ.

ᑯᐯᒃᒥ ᖃᓄᐃᖕᖏᓯᐊᕐᓂᓕᕆᓂᕐᒧᑦ ᑐᕐᖃᑕᕐᕕᒃ ᓱᕐᖁᐃᓯᕐᖃᒥᐅᕗᑦ ᓯᕗᓪᓕᐹᑦᓯᐊᒥᒃ ᑯᐯᒃᒥᐅᒥᒃ ᐳᕙᒻᒥᒍᑦ ᓱᒃᑯᑕᐅᓯᒪᓕᕐᑐᒥᒃ ᐃᑯᒪᒧᕐᑐᒥᒃ ᓱᐴᕈᓯᔭᕐᓂᒥᓄᑦ.

ᓱᓇᐅᕙ ᐃᑯᒪᐅᑎᒧᕐᑐᓂᑦ ᓱᐴᕈᓯᔭᕐᓂᖅ?

ᐃᑯᒪᐅᑎᒧᕐᑐᓂᒃ ᓱᐳᕈᓯᔭᕐᓂᖅ ᑐᑭᖃᕐᑐᖅ ᓂᐅᕐᓯᖄᕐᓱᒍ ᐊᓂᑎᑦᓱᒍᑕᒐ ᓱᐴᓪᓛᖅ, ᓂᐅᕐᓯᔭᐅᓲᖅ, ᐅᑦᑑᑎᒋᓗᒍ ᐃᑯᒪᒨᕐᑐᖅ ᓱᐴᕈᓯᔭᕈᑎᒃ, ᓂᐅᕐᓯᕕᓐᓂ ᐃᕐᓯᕕᐊᐱᓐᓂᑦ, ᓱᓪᓗᓕᐊᐱᒻᒥᓘᓐᓃᑦ, ᐊᓪᓚᐅᑎᐅᔮᕐᑐᓂᓪᓘᓃᑦ ᓂᐅᕐᑕᐅᓲᓂᑦ, ᐊᓯᖏᓐᓂᓗ.

ᓱᐴᕈᑎᑐᐃᓐᓀᑦ ᐊᐅᒻᒪᕆᐊᖃᓲᒍᑎᓪᓗᒋᑦ, ᓂᐅᕐᓯᓃᑦ ᐊᐅᒪᖃᕆᐊᑐᖕᖏᓚᑦ. ᓂᐅᕐᓯᒍᑎᒃ ᐆᓇᕐᓯᓰᓱᖑᕗᖅ ᐃᒪᖓᓂᒃ ᐳᔪᕐᓂᐊᓕᕐᒪᑦ, ᑕᒐ ᓱᐴᓪᓛᑎᑐᓂᐊᓕᕐᒪᑦ.

ᐳᔪᖓ ᐃᓗᓕᖃᕈᓐᓇᑐᖅ ᓂᑯᑎᓐᒥᒃ ᑎᐸᖁᑎᐊᕐᓯᒪᒍᓐᓇᓱᓂ ᐋᖓᔮᓐᓇᑐᕐᑕᖃᕈᓐᓇᓱᓂᓗ cannabis -ᓚᔭᐅᔪᒥᒃ (THC ᐅᕝᕙᓗᓐᓃᑦ CBD). 

ᑲᓇᑕᒥ ᑕᒪᓐᓇ ᖃᓄᐃᓘᕈᑎᐅᕙ ᓄᓇᕕᒻᒥᓗ?

ᑲᓇᑕᒥ ᖃᓄᐃᖕᖏᓯᐊᕐᓂᓕᕆᔩᑦ ᐊᒻᒪᓗ ᑯᐯᒃᒥ ᖃᓄᐃᖕᖏᓯᐊᕐᓂᓕᕆᓂᕐᒧᑦ ᑐᕐᖃᑕᕐᕕᒃ ᐃᒫᙰᓚᒍᑎᓕᐅᕐᓯᒪᕗᑦ ᐳᕙᓕᕆᓂᕐᒥᒃ ᖃᓄᐃᒍᑎᑖᖃᑦᑕᑐᑦ ᐱᑐᑦᓯᒪᓂᖃᑐᐃᓐᓇᕆᐊᖃᕐᓂᖏᓐᓂᒃ ᐃᑯᒪᐅᑎᒧᕐᑐᓂᒃ ᓱᐴᕈᓯᔭᕐᓂᓄᑦ. ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑕᒪᑐᒥᖓ ᐃᑉᐱᒍᓱᒐᓱᐊᑦᓯᐊᑐᑦ ᖃᐅᔨᓴᕈᑎᑦᓴᓕᐅᕐᓯᒪᑦᓱᑎᓪᓗ ᓄᓇᕕᒻᒥ ᑌᒣᑦᑐᕕᓂᐅᔪᖃᕐᐸᑦ. 

ᖃᓄᐃᖕᖏᓯᐊᕆᐊᖃᕐᓂᒧᑦ ᐊᑦᑕᓇᕐᑑᒍᑎᖏᑦ ᐅᓐᓂᑑᑎᐅᔪᓪᓗ ᐃᑯᒪᐅᑎᒧᕐᑐᓂᒃ ᓱᐴᕈᓯᔭᕐᓂᒧᓕᖓᔪᓂᒃ:

ᐃᑯᒪᐅᑎᒧᕐᑐᓂᒃ ᓱᐴᕈᓯᔭᕐᓂᖅ ᐊᑦᑕᓇᕐᓯᒍᑕᐅᒍᓐᓇᑐᖅ. ᐊᑯᓃᕐᑐᒥᒃ ᐃᑯᒪᒧᕐᑐᒥᒃ ᓱᐴᕈᓯᔭᓲᑦ ᖃᓄᓪᓗᐊᑎᒋ ᖃᓄᐃᖕᖏᓯᐊᕆᐊᖃᕐᓂᒥᒍᑦ ᓱᕐᕋᑕᐅᒍᓐᓇᒪᖔᑕ ᖃᐅᔨᒪᔭᐅᕋᑕᖕᖏᑐᖅ. ᐅᕕᒐᕐᑐᐃᑦ, ᐱᐊᕋᑦᓴᓖᑦ ᐊᕐᓀᑦ ᓱᐴᕐᑐᓲᒍᖕᖏᑐᓪᓗ ᐃᑯᒪᒧᕐᑐᒥᒃ ᓱᐴᕈᓯᔭᖁᔭᐅᖕᖏᓚᑦ.

ᐃᑯᒪᐅᑎᒧᕐᑐᓂᒃ ᓱᐴᕈᓯᔭᕐᓂᐊᕈᕕᑦ, ᐃᑉᐱᒍᓱᑦᓯᐊᕆᑦ:

  • ᐱᖁᔭᓂᒃ ᓱᒃᑯᐃᓂᒃᑯᑦ ᓂᐅᕕᕐᑕᐅᓲᑦ ᐊᑦᑕᓇᕐᑐᒥᑎᑦᓯᒋᐊᓪᓚᒍᓐᓇᖁᑦ ᐱᔭᐅᔪᑦᓴᐅᒐᑎᓗ;
  • ᐊᓯᑦᔨᑐᐃᑦᑌᓕᒋᑦ ᐃᑯᒪᐅᑎᒧᕐᑐᓂᒃ ᓱᐴᕈᓯᔭᕈᑎᒥᒃ ᐅᐊᕈᑦᓯᖃᑦᑕᕈᓐᓀᓗᒋᓪᓘᓃᑦ ᐋᖓᔮᕋᓱᐊᕈᑎᑦᓴᓂᒃ ᓂᐅᕕᐊᑦᓴᓕᐅᕐᑐᕕᓃᑦ ᐃᑯᒪᒧᕐᑐᓂᒃ ᓱᐴᕈᓯᔭᕈᑎᓄᑦ ᐊᑐᕐᑐᓴᓕᐊᕆᓯᒪᖕᖏᑕᖏᓐᓂᒃ.
  • ᐃᑯᒪᐅᑎᒧᕐᑐᓂᒃ ᓱᐴᕈᓯᔭᓱᖑᒍᕕᑦ ᐊᑐᓚᐅᕐᓯᒪᒍᕕᓪᓘᓃᑦ, ᐃᒻᒥᓂᒃ ᐃᑉᐱᒋᑦᓯᐊᖃᑦᑕᕆᑦ ᒪᓗᓐᓇᕈᑎᖃᖃᑦᑕᒪᖔᕐᐱᑦ, ᖁᐃᕐᑐᖃᑦᑕᕈᕕᑦ, ᐃᐱᓂᐊᖃᑦᑕᕈᕕᑦ ᓴᕝᕕᓕᕆᖃᑦᑕᕈᕕᓪᓘᓃᑦ. ᑕᒪᒃᑯᐊ ᒪᓗᓐᓇᐅᑎᐅᒍᓐᓇᑐᑦ ᐳᕙᓕᕆᑐᐃᓐᓇᕆᐊᓕᒻᒥᒃ ᐃᑯᒪᒧᕐᑐᓂᒃ ᓱᐴᕈᓯᔭᖃᑦᑕᓂᕐᒧᑦ ᐋᓐᓂᐊᓯᐅᕐᑎᒪᕆᒻᒥᒃ ᑕᑯᓂᐊᑦᓴᐅᑎᒋᓗᑎᑦ ᖃᐅᔨᑎᑦᓯᐊᓗᒍ ᓱᓇᒥᒃ ᐃᑯᒪᐅᑎᒧᕐᑐᓂᒃ ᓱᐴᕈᓯᔭᖃᑦᑕᒪᖔᕐᐱᑦ.
ᖃᕆᑕᐅᔭᒃᑯᑦ ᑕᑯᒋᐊᕋᑦᓭᑦ:

ᐊᑦᑕᓀᑦᑐᒦᒋᐊᖃᕐᓂᒥᒃ ᖃᐅᔨᑎᑦᓯᒍᑏᑦ - ᑲᓇᑕᒥ ᖃᓄᐃᖕᖏᓯᐊᕐᓂᓕᕆᔨᓂᑦ- 28 ᓯᑦᑎᒻᐸ 2019:
https://healthycanadians.gc.ca/recall-alert-rappel-avis/hc-sc/2019/70919a-eng.php

ᑐᓴᕋᑦᓭᑦ Ministère de la Santé et des Services Sociaux –  27 ᓯᑦᑎᒻᐸ 2019:
https://www.msss.gouv.qc.ca/ministere/salle-de-presse/communique-1927/