ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑐᖕᖓᓱᑦᑎᓯᔨᐅᓛᕐᒪᑕ ᓄᓇᕕᒻᒥ ᐃᓄᒻᒪᕇᑦ ᐅᖄᖃᑎᒌᓐᓂᖓᓂᒃ: ᑲᑎᖃᑎᒌᓐᓂᒥᒃ ᒪᑭᑕᑦᓯᐊᕆᐊᖃᕐᓂᖏᓐᓄᑦ ᐃᓄᒻᒪᕇᑦ, ᓄᓇᓕᓕᒫᓂ ᐱᓯᒪᔪᑦ ᑲᑎᖃᑎᒌᑦᑎᑕᐅᑎᓪᓗᒋᑦ ᑲᑐᑦᔨᖃᑎᒌᑦᓯᐊᕆᐊᕈᒪᒧᑦ ᐃᓄᒻᒪᕇᑦ ᒪᑭᑕᑦᓯᐊᕆᐊᖃᕐᓂᖏᓐᓄᑦ, ᐊᑦᑕᓀᑦᑐᒥᒋᐊᖃᕐᓂᖏᓐᓄᑦ, ᓲᓱᒋᔭᐅᒋᐊᖃᕐᓂᖏᓐᓄᑦ ᐃᓚᐅᑎᑕᐅᑦᓯᐊᖃᑦᑕᕆᐊᖃᕐᓂᖏᓐᓄᓗ ᓄᓇᕕᓕᒫᒥ.
ᐊᑑᑎᓛᕐᑐᖅ ᔫᓂ 2-ᒥᑦ 4-ᒧᑦ, 2026, ᒪᓐᑐᕆᐊᓪᒥ, ᐅᖄᖃᑎᒌᓐᓂᓴᖅ ᖃᑎᑲᑎᒌᒍᑕᐅᓛᕐᑐᖅ ᐃᓄᒻᒪᕆᓐᓄᑦ, ᑲᒪᔨᐅᓲᓄᓪᓗ, ᖃᓄᐃᖕᖏᓯᐊᕐᓂᓕᕆᔨᓄᓪᓗ, ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔨᐅᑎᓕᕆᕕᓐᓂᒃ ᑭᒡᒐᑐᕐᑐᓄᑦ, ᓄᓇᓕᒻᒥ ᐱᒍᑦᔨᕕᓐᓂᑦ ᐱᓯᒪᔪᓄᑦ, ᓄᓇᓕᓕᒫᓂ ᐱᓇᓱᖃᑎᒋᔭᐅᓲᓄᑦ, ᑐᑭᑖᕐᑎᐅᓲᓄᓪᓗ ᐊᑦᔨᒌᖕᖏᑐᓂ ᐱᓇᓱᕝᕕᖃᕐᕕᓂ.
ᐃᓚᐅᔪᑦᓭᑦ:
ᐃᓚᐅᓛᕐᑐᑦ ᐃᓄᒻᒪᕇᑦ ᑲᒪᔨᐅᓲᓪᓗ, ᑭᒡᒐᑐᕐᑐᐃᓗ ᐱᓇᓱᕝᕕᓂᒃ ᐱᓇᓱᖃᑎᒌᕝᕕᓂᓪᓗ ᐱᓇᓱᖃᑎᖃᓲᓂᒃ ᐃᓄᒻᒪᕇᑦ ᒪᑭᑕᑦᓯᐊᕈᑎᑦᓴᖏᓐᓂᒃ ᓄᓇᕕᓕᒫᒥ. ᐱᓇᓱᕝᕕᓂᑦ ᒪᑯᓇᖕᖓᑦ ᐱᓯᒪᔪᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᑦ, ᓄᓇᕕᒻᒥᐅᑦ ᐃᓄᒻᒪᕇᑦ ᑲᑎᒪᔨᖏᓐᓂᑦ, ᒪᑭᕝᕕᒥᑦ, ᐊᕙᑕᕐᒥᑦ, ᓴᑐᕐᕖᑯᓐᓂᑦ; ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔨᐅᑎᓕᕆᓂᕐᒥᒃ ᐱᓇᓱᖃᑎᒌᒍᑎᓕᓐᓂᑦ ᐃᓚᐅᖃᑕᐅᑎᓪᓗᒋᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, ᐋᓐᓂᐊᕕᒃ ᑐᓚᑦᑕᕕᒃ, ᐋᓐᓂᐊᕕᒃ ᐃᓅᓕᑦᓯᕕᒃ; ᐊᒻᒪᓗ ᐊᕐᓀᑦ ᐃᑲᔪᕐᑕᐅᕕᖏᑦ, ᐃᓄᒻᒪᕇᑦ ᐃᓪᓗᖁᑎᖏᑦ, ᓄᓇᓕᒥᓪᓗ ᐊᕐᓀᑦ ᐊᖑᑏᓪᓗ ᑲᑎᑦᑕᑎᖏᑦ.
ᐅᖄᖃᑎᒌᓐᓂᐅᑉ ᐱᑦᔪᑎᓪᓚᕆᒋᓛᕐᑕᖏᑦ
ᐅᖄᖃᑎᒌᓐᓂᖅ ᐃᓂᓪᓚᑕᐅᓯᒪᓂᖃᓛᕐᑐᖅ ᐱᖓᓱᐃᓚᕿᖓᔪᓂᒃ ᐊᑑᑎᓪᓚᕆᔭᖏᓐᓅᓕᖓᔪᓂᒃ ᐃᓄᒻᒪᕇᑦ ᑲᒪᔨᖏᑦᑕᓗ ᓄᓇᕕᒻᒥ:
- ᐃᓄᒻᒪᕇᑦ ᐊᑦᑕᓀᑦᑐᒦᒋᐊᖃᕐᓂᖓ
ᐃᓚᐅᔪᑦ ᐅᖄᒍᑎᖃᖃᑦᑕᑎᓪᓗᒋᑦ ᒪᑭᑕᑦᓯᐊᕆᐊᖃᕐᓂᖏᓐᓂᒃ, ᓲᓱᒋᔭᐅᒋᐊᖃᕐᓂᖏᓐᓂᒃ, ᐊᑦᑕᓀᑦᑐᒦᒋᐊᖃᕐᓂᖏᓐᓂᓗ ᐃᓄᒻᒪᕇᑦ, ᐃᓚᖃᕐᑎᓗᒋᑦ ᑲᒪᒋᔭᐅᑦᓯᐊᕆᐊᖃᕐᓂᖏᓐᓂᒃ, ᐊᑐᐃᓐᓇᖃᕆᐊᖃᕐᓂᒥᓪᓗ ᑐᑭᓯᒪᐅᑎᑦᓴᓂᒃ ᐃᑲᔪᕐᑕᐅᕕᑦᓴᓂᓪᓗ, ᓲᖑᓯᑎᑦᓯᒋᐊᕈᑎᑦᓴᓂᓪᓗ ᓄᓇᓕᒻᒥ ᐃᑲᔪᕐᑕᐅᕕᓐᓂᒃ ᓴᐳᑦᔭᐅᒋᐊᖃᕐᓂᖏᓐᓂᓗ ᐃᓄᑐᙯᑦ ᐃᓄᒻᒪᕇᓪᓗ ᐊᑦᑕᓇᕐᑐᒨᑐᐃᓐᓇᕆᐊᓖᑦ.
- ᓄᓇᓕᒻᒥ ᐱᒍᑦᔭᐅᕖᑦ ᐃᑲᔪᕐᑎᓭᓪᓗ
ᐅᖄᒍᑎᖃᖃᑦᑕᓗᑎᓪᓗ ᐱᒍᑦᔨᐅᑎᓂᒃ ᐱᒋᐊᕐᑎᑕᐅᓯᒪᔪᓂᓪᓗ ᐃᓄᒻᒪᕇᑦ ᒪᑭᑕᑦᓯᐊᕈᑎᑦᓴᖏᓐᓅᓕᖓᔪᓂᒃ, ᐃᓚᖃᕐᑎᓗᒋᑦ ᖃᓄᐃᖕᖏᓯᐊᕆᐊᖃᕐᓂᒧᑦ ᐱᒍᑦᔨᐅᑏᑦ, ᐊᓇᕐᕋᒥ ᑲᒪᒋᔭᐅᓃᑦ, ᑲᒪᔨᖏᑦᑕ ᓴᐳᒻᒥᔭᐅᒋᐊᖃᕐᓂᖏᑦ, ᐃᓄᐃᑦ ᐃᓕᕐᖁᓯᖓᑎᒍᑦ ᐃᑲᔪᕐᓯᔭᐅᒍᑏᑦ, ᓄᓇᓕᒻᒥ ᓱᒐᑦᓴᖃᕐᑎᑕᐅᒍᑏᑦ, ᐱᕕᑦᓭᓗ ᐃᑲᔪᕐᓯᒍᓐᓇᑐᑦ ᐃᓄᒻᒪᕇᑦ ᑌᒣᓕᖓᑐᐃᓐᓇᑌᓕᒍᑎᑦᓴᖏᓐᓂᒃ, ᐱᑐᑦᓯᒪᖃᑕᐅᑦᓯᐊᕆᐊᖃᕐᓂᖏᓐᓂᒃ, ᓴᐳᑦᔭᐅᒋᐊᖃᕐᓂᖏᓐᓂᓗ ᓄᓇᓕᒥᓂ.
- ᐃᓪᓗᓕᕆᓂᖅ, ᐊᕙᑎᓕᕆᓂᖅ, ᐊᑦᑕᓀᑦᑐᓯᐊᒍᑎᓪᓗᒋᓪᓗ ᐃᓂᑦᓴᖃᕐᑎᑕᐅᒍᑎᖏᑦ
ᑕᒪᓐᓇ ᕿᒥᕐᕈᓂᐅᒐᔭᕐᑐᖅ ᐱᓪᓚᕆᐅᓂᖓᓂᒃ ᐊᑦᑕᓀᑦᑐᓯᐊᒥᒃ, ᐊᑐᐃᓐᓇᐅᑎᑕᐅᑦᓯᐊᑐᒥᒃ, ᐃᓄᐃᑦ ᐃᓕᕐᖁᓯᖓᓅᓕᖓᑦᓯᐊᑐᒥᒃ ᐊᓇᕐᕋᖃᕐᑎᑕᐅᒋᐊᖃᕐᓂᖓᓂᒃ ᐃᓄᒻᒪᕇᑦ, ᐃᓚᖃᕐᑎᓗᒍ ᐃᓪᓗᖃᕐᓂᒧᑦ ᐊᑑᑎᔭᐅᓪᓚᕆᑦᑐᑦ, ᐃᓄᓐᓅᓕᖓᑎᑕᐅᑦᓯᐊᕆᐊᖃᕐᓂᖓ ᐃᓂᑦᓭᑦ, ᐊᑐᐃᓐᓇᐅᑎᑕᐅᒋᐊᖃᕐᓂᖏᓐᓂᓗ, ᓇᔪᕐᑕᖏᓐᓃᑐᐃᓪᓗ ᖃᓄᐃᖕᖏᓯᐊᕐᕕᓴᐅᒍᓐᓇᑐᑦ ᐃᓄᒻᒪᕆᖕᖑᐸᓪᓕᐊᔪᓄᑦ ᓄᓇᕕᒻᒥ ᓄᓇᓕᓐᓂ.
ᐅᖄᖃᑎᒌᓐᓂᖅ ᐃᒣᓕᖓᒐᔭᕐᑐᖅ
ᐅᓪᓗᓂ ᐱᖓᓱᓂ, ᐃᓚᐅᔪᑦ ᐅᖄᔪᓃᖃᑦᑕᕈᓐᓇᓛᕐᑐᑦ, ᐅᓂᒃᑳᓯᐅᖃᑎᒌᑦᑐᓄᓪᓗ ᐃᓚᐅᒍᓐᓇᓗᑎᒃ, ᑲᑎᒪᓂᐊᕈᓯᓕᐊᖃᑦᑕᓗᑎᒃ, ᒪᒥᓴᖃᑎᒌᑦᑐᓕᐊᖃᑦᑕᓗᑎᒃ, ᓱᒐᑦᓴᖃᕐᑎᓯᔪᓕᐊᖃᑦᑕᓗᑎᓪᓗ ᐅᖄᖃᑎᒌᑦᑐᓄᑦ ᓄᓇᕐᖃᑎᒌᖕᖏᑐᓄᑦ ᐱᓇᓱᖃᑎᒌᕝᕕᓂᓪᓗ ᐱᓯᒪᔪᓄᑦ.
ᑕᒪᓐᓇ ᐱᕕᑦᓴᖃᕐᑎᓯᓂᐅᓛᕐᑐᖅ ᑐᓴᕐᑎᓯᖃᑎᒌᒍᓐᓇᓂᕐᒥᒃ ᐊᑑᑎᖃᑦᑕᓯᒪᔭᒥᓂᒃ, ᓇᓗᓀᕐᓯᒍᓐᓇᓂᕐᒥᒃ ᓯᕗᓪᓕᐅᔨᒐᑦᓴᓂᒃ, ᐅᖄᒍᑎᖃᕐᓂᒥᒃ ᐱᔭᕆᐊᑐᒃᑑᕈᑕᐅᓯᒪᔪᓂᒃ, ᐱᒋᐊᕐᑎᑕᐅᑦᓯᐊᓯᒪᔪᓂᒃ ᐅᓂᒃᑳᕈᑎᖃᕐᓂᖅ, ᐱᓇᓱᖃᑎᒌᑦᓯᐊᐸᓪᓕᐊᒋᐊᖃᕐᓂᒥᓪᓗ ᓄᓇᕕᓕᒫᒥ. ᑲᑐᑦᔨᖃᑎᒌᓐᓂᐅᓱᓂ ᓄᓇᓕᒻᒨᓕᖓᑦᓱᓂᓗ, ᐃᓚᕕᐅᑦᓯᐊᖃᑦᑕᓗᓂ, ᓈᓚᓐᓂᑕᖃᑦᓯᐊᓗᓂᓗ ᐃᓘᓐᓇᑎᓪᓗ ᑕᑯᒋᐊᖃᑎᒌᒍᓐᓇᓗᑎᒃ.
ᑐᕌᒐᕐᒧᑦ ᑎᑭᐅᑎᒐᓱᐊᕈᑎᑦᓭᑦ
- ᐱᒍᑦᔨᐅᑏᑦ ᐃᓄᒻᒪᕆᓐᓂᒃ ᓲᖑᓯᑎᒋᐊᕈᒪᒧᑦ ᐊᑕᐅᓯᐅᓕᖓᑎᒋᐊᕐᓗᒋᓪᓗ
- ᐃᓕᒃᑰᑎᕈᑕᐅᖕᖏᓂᕐᓴᐅᓂᐊᕐᑎᓗᒍ ᐊᑕᐅᑦᓯᑰᕐᑎᓯᒋᐊᖃᕐᓂᖅ ᐱᓇᓱᖃᑎᒌᑦᑐᓄᑦ
- ᑐᓂᒪᐅᑎᖃᑦᓯᐊᓂᖅ ᐃᓘᓐᓀᓄᑦ ᐃᑉᐱᒋᔭᐅᓂᖃᑦᓯᐊᑐᒥᒃ
- ᐊᑐᐃᓐᓇᕈᕐᑎᕆᓂᖅ ᑲᔪᓯᑎᑕᐅᓂᑦᓴᖓᓂᒃ ᓄᓇᓕᓕᒫᓂ ᐃᓄᒻᒪᕇᑦ ᐊᑕᐅᑦᓯᑰᕐᑎᓯᔨᖏᑦᑕ ᑲᑎᒪᓂᑦᓴᖓᓂᒃ
ᑕᒪᒃᑯᐊ ᐊᑑᑎᔭᐅᓛᕐᒥᑎᓪᓗᒋᑦ, ᐅᖄᖃᑎᒌᓐᓂᖅ ᐃᑲᔪᕐᓯᒍᑎᑦᓴᓕᐊᒍᓯᒪᕗᖅ ᐊᑯᓂᕐᑐᒧᑦ ᐊᐅᓚᔨᒐᑦᓴᐅᓛᕐᓂᖓᓂᒃ ᓄᓇᓕᓕᒫᓂᓪᓗ ᑲᑐᑦᔨᒍᑕᐅᑦᓯᐊᕆᐊᓪᓚᒋᐊᖃᕐᓂᖓᓂᒃ ᐃᓄᒻᒪᕇᑦ ᒪᑭᑕᑦᓯᐊᕆᐊᖃᕐᓂᖓ ᑲᒪᔨᖏᑦᑕᓗ ᐃᑲᔪᕐᓯᔭᐅᖃᑦᑕᕆᐊᖃᕐᓂᖏᑦᑕ ᓄᓇᕕᒻᒥ.
ᑲᑎᖃᑎᒌᑦᑐᑦ ᒪᑭᑕᑦᓯᐊᕆᐊᖃᕐᓂᖏᓐᓄᑦ ᐃᓄᒻᒪᕇᑦ
ᑐᑭᓯᒋᐊᑦᓯᐊᕈᒪᔪᖃᕐᐸᑦ, ᖃᐅᔨᒋᐊᕐᕕᓴᐅᕗᖅ ᐊᑕᐅᑦᓯᑰᕐᑎᓯᔨ, ᒪᑭᑕᑦᓯᐊᕆᐊᖃᕐᓂᖏᓐᓂᒃ ᐃᓄᒻᒪᕇᑦ ᑲᒪᒋᔭᐅᑦᓯᐊᖏᓐᓇᕆᐊᖃᕐᓂᖏᓐᓂᓗ: coordinator.wellbeing.elder@ssss.gouv.qc.ca