- ᓱᓇᐅᕙ ᐃᒻᒥᓂᕿᒍᓐᓇᖏᑦᑐᒥᒃ ᑲᒪᔨ
- ᓱᓇᓂᒃ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᓵᖕᖓᓯᒋᐊᖃᓲᖑᕙᑦ?
- ᓱᓇᓂᒃ ᐃᑲᔪᕐᑕᐅᒍᑎᖃᕈᓐᓇᐸᑦ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ?
- ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᐊᑭᓕᕐᑕᐅᒍᑎᖃᕈᓐᓇᖃᑦ ᐃᑲᔪᕈᑎᒥᓂᒃ?
- ᖃᐅᔨᒋᐊᕐᕕᐅᒍᓐᓇᑐᑦ
ᓱᓇᐅᕙ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔨ?
ᑯᐯᑉ ᑲᕙᒪᖓᑕ ᐋᕐᕿᓯᒪᔭᖏᑎᒍᑦ Act to recognize and support caregivers:
ᐃᒻᒥᓂᕿᒍᓐᓇᖏᑦᑐᒥᒃ ᐃᑲᔪᕐᑎ ᓴᐳᒻᒥᔨᐅᓲᖅ ᐃᑲᔪᕐᑎᐅᓱᓂ ᐃᓚᒥᓂᒃ ᓇᒻᒥᓂᖅ ᐱᒍᓐᓇᖏᕈᑎᖃᕐᓯᒪᓚᐅᕐᑐᑐᒥᒃ ᐱᒍᓐᓇᖏᕈᑎᓕᒻᒥᓗᓐᓃᑦ ᐃᑉᐱᓂᐊᕐᓂᒥᒍᑦ ᐱᑐᑦᓯᒪᕕᒋᑦᓱᒍ, ᐃᓚᒋᑦᓱᒍ, ᐃᓚᓐᓈᕆᑦᓱᒍ, ᓯᓚᕐᖃᑎᒋᑦᓱᒍ, ᐊᓯᐊᖓᓗᓐᓃᑦ. ᐱᒍᓐᓇᖏᕐᓯᒪᒍᓐᓇᑐᖅ ᑎᒥᒥᒍᑦ, ᐃᓱᒪᒥᒍᑦ, ᐃᓅᖃᑎᖃᕐᓂᑯᑦ ᐊᓯᐊᒍᓪᓘᓃᑦ, ᑲᒪᒋᔭᖓ ᖃᑦᓯᓂᒃ ᐅᑭᐅᖃᕋᓗᐊᕐᐸᑦ ᐃᓅᕕᖃᕐᐸᓗᓐᓃᑦ.
ᐃᑲᔪᕐᑎᐅᒍᓐᓇᑐᖅ ᐊᑕᓕᒫᕐᑐᒥᒃ ᐅᕝᕙᓗᓗᓐᓃᑦ ᐃᑲᔪᑲᓪᓛᓲᖑᓗᓂ, ᐊᑯᓃᖕᖏᑐᒥᒃ ᐊᑯᓃᕐᑐᒥᓪᓘᓃᑦ. ᐊᑑᑎᔭᐅᓲᖅ ᐱᓇᓱᒐᐅᑎᓐᓇᒍ ᐊᑭᓕᕐᑐᑕᐅᒐᓂᓗ.
ᑲᒪᔩᑦ ᐃᑲᔪᕈᑎᖃᓲᑦ ᐊᒥᓱᓂᒃ, ᒪᑯᐊ ᐃᓚᐅᑎᓪᓗᒋᑦ:
- ᐃᖏᕐᕋᑎᑎᒍᑦ
- ᓇᒻᒥᓂᖅ ᓴᓗᒪᒐᓱᐊᕐᓂᖏᒍᑦ ᐊᓂᕐᕋᒥᓗ ᓴᓗᒪᒐᓱᐊᕐᓂᑯᑦ
- ᐃᑉᐱᓂᐊᕐᓂᖏᒍᑦ ᐃᑲᔪᕐᑎᐅᓂᒃᑯᑦ
- ᑲᒪᒋᔭᐅᒍᑎᖏᓐᓂᒃ ᐱᒍᑦᔭᐅᒍᑎᖏᓐᓂᓗ ᐊᑕᐅᑦᓯᑰᕐᑎᓯᔨᐅᓂᒃᑯᑦ
ᐆᑦᑐᕋᐅᑏᑦ ᐃᑲᔪᕈᓯᕐᓂᒃ:
- ᐅᕕᒃᑲᖅ ᐱᓇᓱᐊᕈᓯᑕᒫᑦ ᐊᓈᓇᑦᓯᐊᒥᓂᒃ ᐃᑲᔪᓲᖅ ᓂᕿᓯᒋᐊᕐᑐᑎᓪᓗᒍ.
- ᐃᕐᓂᖅ ᐃᓄᑐᖃᕐᒥᒃ ᐊᓈᓇᒥᓂᒃ ᐃᓪᓗᒥᐅᖃᑎᓕᒃ ᐳᐃᒍᕐᑕᑐᒥᒃ ᖃᐅᑕᒫᑦ ᐃᑲᔪᓲᖅ ᐃᑉᐱᒋᔭᖃᕐᓱᓂᓗ, ᐃᑲᔪᕐᓱᒍ ᐊᓂᕐᕋᓯᒪᑎᑦᓱᒍ ᐊᑯᓃᕈᓐᓇᕕᓕᒫᖓᓄᑦ.
- ᐊᓈᓇ ᐃᓄᒻᒪᕆᒻᒥᒃ ᐃᕐᓂᒥᓂᒃ ᖃᐅᑕᒫᖅ ᐳᓛᕆᐊᓲᖅ ᓂᕐᓯᐅᕆᐊᕐᑐᓱᒍ ᖃᐅᑕᒫᕐᓯᐅᑎᖏᓐᓂᒃ ᐃᑲᔪᕐᓱᒍ.
- ᐊᕐᓇᖅ ᖃᑕᖕᖑᑎᒥᓂᒃ ᖃᐅᔨᒋᐊᖃᑦᑕᓲᖅ ᖃᐅᑕᒫᑦ, ᐊᓪᓚᕕᒋᖃᑦᑕᓱᒍᓗ, ᐳᓛᕆᐊᖃᑦᑕᓱᒍᓗ ᑭᑦᓴᓇᕐᑐᑰᕐᓂᖓᓂ.
- ᐊᖓᔪᕐᖄᕆᔭᐅᔫᒃ ᕿᑐᕐᖓᒥᓂᒃ ᑲᒪᒋᔭᖃᓲᒃ ᖃᕆᑕᕐᒥᒍᑦ ᓱᕐᕋᑕᐅᒍᑎᖃᕐᓯᒪᔪᒥᒃ ᓄᓪᓚᖓᓇᑦᓯᐊᑐᒥᒃ ᖃᐅᔨᒪᓇᑦᓯᐊᑐᒥᒃ ᐃᓅᕕᖃᕐᑎᓱᒍ.
ᐅᖃᐅᓰᑦ ᑲᒪᔨᐅᓂᕐᒥᒃ ᐱᐅᓯᓕᒃ, ᐊᑭᓕᕐᑐᑕᐅᒐᓂ ᑲᒪᔨ, ᐊᒻᒪᓗ ᐃᓚᒥᓂᒃ ᑲᒪᔨ ᐊᑐᕐᑕᐅᖃᑦᑕᓲᑦ ᑐᑭᓯᑎᑦᓯᒍᑎᐅᑦᓱᑎᒃ ᐃᑲᔪᕐᑎᒋᔭᐅᔪᖅ ᑲᒪᔨᐅᔪᖅ ᐱᒍᒪᓂᕐᒥᓄᑦ ᓇᒻᒥᓂᖅ ᑲᒪᔨᐅᓂᖓᓂᒃ ᐃᑉᐱᓂᐊᕐᓂᒥᒍᑦ ᐃᓅᓯᕐᒥᒍᑦ ᐱᑐᑦᓯᒪᒐᒥ ᐃᑲᔪᕐᑕᒥᓄᑦ ᑲᒪᒋᔭᕐᒥᓄᑦ, ᐃᓚᒋᒍᓂᐅᒃ ᐃᓚᒋᖕᖏᑲᓗᐊᕈᓂᐅᓪᓗ. ᐃᑲᔪᕐᑎᐅᔪᖅ ᐱᓇᓱᒐᖃᑐᐊᕋᒥ ᐊᑭᓕᕐᑐᑕᐅᒍᑎᖏᑦᓱᒍ ᑌᔭᐅᓲᖅ ᑲᒪᔨ ᐅᕝᕙᓗᓗᓐᓃᑦ ᐱᓇᓱᑦᑎᐅᓱᓂ ᑲᒪᔨ.
ᑲᒪᔩᑦ ᐊᑑᑎᖃᓪᓚᕆᑦᑐᒥᒃ ᐱᓇᓱᒐᖃᓲᑦ ᐃᑲᔪᕐᑎᐅᓱᑎᒃ ᐃᒻᒥᓂᕿᒍᓐᓇᑎᑦᓯᓱᑎᒃ, ᐃᓅᓯᖃᑦᓯᐊᑎᑦᓯᓱᑎᒃ ᐱᑐᑦᓯᒪᑎᑦᓯᓱᑎᓪᓗ ᓄᓇᓕᒻᒧᑦ. ᐃᑲᔪᕐᑎᐅᓂᕐᒥᒍᑦ ᐊᐅᓪᓚᑎᑕᐅᓯᒪᓕᕋᔭᕐᑐᓂᒃ ᐊᓂᕐᕋᓯᒪᒍᓐᓇᑎᑦᓯᓲᑦ ᓄᓇᓕᒻᒥᓃᖏᓐᓇᕈᓐᓇᑎᑦᓯᓲᑦ. ᑖᒃᑯᐊ ᐃᑲᔪᕐᓯᓂᖓ ᐃᓚᒌᓂᒃ ᓄᓇᓕᓐᓂᓗ ᓄᓇᕕᒻᒥ ᓱᕐᕃᓯᒪᓂᖃᓲᖅ ᐱᐅᔪᒥᒃ.
ᓱᓇᓂᒃ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᓵᖕᖓᓯᒋᐊᖃᓲᖑᕙᑦ?
ᐃᑲᔪᕈᑎᒋᓲᖏᑦ ᑲᒪᔩᑦ ᑮᓇᐅᔭᑎᒍᑦ ᓱᕐᕋᑕᐅᓐᓇᑐᖅ ᐊᒻᒪᓗ/ᐅᕝᕙᓗᓗᓐᓃᑦ ᓇᒻᒥᓂᖅ ᑎᒥᒥᓂᒃ ᐃᓱᒪᒥᒍᓪᓗ ᑲᒪᒍᓐᓇᓯᐊᖕᖏᑑᑎᑦᓯᓲᖅ ᐅᕝᕙᓗᓗᓐᓃᑦ ᐊᓯᖏᓐᓂᒃ ᐃᓅᓯᕐᒥᓂ ᐃᓅᖃᑎᐅᓪᓗᐊᖃᔭᕋᑎᒃ ᐃᓚᒥᓂᓪᓗ ᑲᒪᒋᒋᐊᓕᒻᒥᓂᒃ ᑲᒪᑦᓯᐊᖏᓐᓇᓕᒫᕋᑎᒃ. ᓄᓇᕕᒻᒥ, ᑲᒪᔩᑦ ᑲᒪᒋᒋᐊᓕᖏᑦ ᐅᖁᒣᑦᑑᓲᑦ ᓵᖕᖓᒋᐊᖃᕐᓱᒋᑦ ᓱᕐᕃᓱᑎᒃ ᐊᓂᕐᕋᒥ ᐃᑲᔪᕐᑎᖃᕐᓂᒥᒃ ᓴᐳᒻᒥᒍᑎᓂᓪᓗ ᐊᒥᓱᓂ ᓄᓇᓕᓐᓂ.
ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᐃᑲᔪᕐᓯᒪᓪᓚᕆᓲᑦ ᖃᓄᐃᖕᖏᓯᐊᕐᓂᐅᒋᐊᓕᒻᒥᒃ ᓄᓇᕕᒻᒥ ᓄᓇᓕᓐᓂ. ᐱᓇᓱᐊᓲᖏᑦ ᑲᖐᒋᔭᐅᓲᖑᖕᖏᑐᑦ, ᐊᑑᑎᖃᓪᓚᕆᑦᑎᓗᒋᑦ. ᓴᐳᒻᒥᔭᐅᑦᓯᐊᖏᑐᐊᕈᑎᒃ, ᐊᒥᓱᑦ ᐊᓂᕐᕋᓯᒪᒐᔭᕈᓐᓀᑐᑦ ᓄᓇᓕᒻᒥᓃᒐᔭᕈᓐᓀᑐᑦ. ᐊᒥᓱᑦ ᐃᓄᑐᙯᑦ ᑲᒪᔨᖃᓲᖅ ᐃᑲᔪᕐᑎᖃᕐᓱᑎᒃ ᐱᒻᒪᕆᓐᓂᒃ ᖃᐅᔨᒪᐅᓯᖃᕐᑐᑦ, ᐅᖃᐅᓯᓖᑦ ᐱᕐᖁᓯᑐᖃᕐᓂᓗ ᓄᓇᓕᒻᒥ ᐃᓅᓯᐅᔪᒥᒃ ᓲᖑᓯᑎᑦᓯᒋᐊᕈᓐᓇᑐᓂᒃ.
ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᓵᖕᖓᒋᐊᖃᓲᖏᑦ ᒪᑯᐊ:
- ᐃᓱᒫᓐᓂᖅ
- ᐅᖁᒣᓪᓕᐅᓂᖅ ᓯᕘᕋᓂᕐᓗ
- ᑕᖃᒪᓂᖅ
- ᕿᓄᐃᓵᕐᖃᔦᕐᓂᖅ ᑕᖃᓪᓘᒥᓂᕐᓗ
- ᐱᓗᑲᑕᐅᑐᐃᓐᓇᕆᐊᖃᕐᓂᖅ
- ᐅᖁᒣᓪᓕᐅᒪᕆᓐᓂᖅ
- ᐃᓄᑑᑎᕐᓂᖅ
- ᑭᖑᕙᕐᑕᓂᖅ ᐱᓇᓱᒋᐊᕐᑐᖏᑦᑑᖃᑦᑕᓂᕐᓘᓃᑦ ᐃᓕᓐᓂᐊᕆᐊᖕᖏᑑᓂᕐᓘᓃᑦ
- ᐱᓇᓱᐊᕐᓂᒥᓂ ᑫᕙᓪᓚᒍᓯᓕᐅᕈᑎᖏᑦ ᐃᑭᓪᓕᒋᐊᕐᓱᑎᒃ
- ᑮᓇᐅᔭᑎᒍᑦ ᐱᓀᓗᑕᖃᕐᓂᖅ
- ᓇᒻᒥᓂᖅ ᑎᒥᒥᓂᒃ ᑲᒪᒍᓐᓇᓯᐊᕈᓐᓀᓱᑎᒃ ᐃᓱᒪᒥᒍᓪᓗ
- ᐊᓯᖏᓐᓂ ᐃᓅᖃᑎᒌᓂ ᐃᓚᐅᒍᓐᓇᓯᐊᕈᓐᓀᓱᑎᒃ ᐃᓚᒥᓂᓪᓗ ᑲᒪᒋᒋᐊᓕᒻᒥᓂᓪᓗ ᑲᒪᑦᓯᐊᕈᓐᓀᓱᑎᒃ
- ᐃᓚᖓᓂᒃ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔨᓂᐅᒐᓗᐊᕐᓱᑎᒃ ᑲᒪᒋᔭᑦᓴᖑᖓᓲᑦ
- ᑕᖃᓗᐊᕐᓂᖅ: ᑎᒥᒥᒍᑦ, ᐃᑉᐱᓂᐊᕐᓂᒥᒍᑦ ᐃᓱᒪᒥᒍᓪᓗ ᑕᖃᑦᓱᑎᒃ
ᓵᖕᖓᒋᐊᖃᓲᖏᑦ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᖃᐅᔨᒪᓗᒋᑦ, ᑖᒃᑯᐊ ᐃᑲᔪᕐᑎᖃᕆᐊᖃᕐᒥᔪᑦ ᐃᑲᔪᕈᓐᓇᓯᐊᕐᓂᐊᒪᑕ.
ᓱᓇᓂᒃ ᐃᑲᔪᕐᑕᐅᒍᑎᖃᕈᓐᓇᐸᑦ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ?
2020-ᒥᓂᑦ, ᑯᐯᑉ ᑲᕙᒪᖓ ᐱᖁᔭᖕᖑᑎᑦᓯᓯᒪᔪᖅ ᓇᓗᓀᕐᓯᒍᑎᐅᔪᓂᒃ ᓴᐳᒻᒥᒍᑎᐅᑦᓱᑎᓪᓗ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔨᓄᑦ. ᑖᓐᓇ ᐱᖁᔭᖅ ᐊᑐᕐᓱᒍ ᑯᐯᒻᒥ ᐱᓇᓱᒍᑎᑦᓴᓕᐅᕐᓯᒪᔪᑦ ᓇᓗᓀᕐᓯᒍᑎᑦᓴᓂᒃ, ᐃᑲᔪᕈᑎᑦᓴᓂᒃ ᐱᕙᓪᓕᑎᑦᓯᒋᐊᕈᑎᑦᓴᓂᓪᓗ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔨᖃᕐᓂᒥᒃ ᑯᐯᓕᒫᒥ. ᑖᒃᑯᐊ ᑲᕙᒪᒃᑯᑦ ᐊᐅᓚᑦᔭᕆᐊᕈᑎᒋᓚᐅᔪᔭᖓᑦ ᓱᕐᕃᓯᒪᔪᑦ ᓄᓇᕕᒻᒥᒃ, ᓄᑖᓂᒃ ᑮᓇᐅᔭᕐᑖᕈᑎᐅᑦᓱᑎᒃ ᐱᒍᑦᔨᒍᑎᐅᒋᐊᓂᕐᑐᓂᓪᓗ ᐱᖕᖑᑎᑦᓯᒍᑎᑦᓴᑖᕐᓱᑎᒃ ᓴᐳᒻᒥᒍᑎᐅᒐᔭᕐᑐᓂᒃ ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔨᓄᑦ.
ᓄᓇᕕᓕᒫᒥ ᐃᑲᔪᕐᑕᐅᕕᒍᓐᓇᑐᖅ ᐱᐅᓯᕐᓲᑎᐅᖕᖏᑐᑎᒍᑦ ᑲᒪᔨᖃᕐᓂᒧᑦ ᓄᓇᕕᒻᒥ ᐊᔪᐃᓐᓈᕆᔭᐅᑦᓱᓂ ᐱᒍᓐᓇᓯᔭᐅᓚᐅᔪᔪᖅ. ᐱᓇᓱᐊᕐᑎᓯᒍᑏᑦ ᐊᑦᔨᒌᖕᖏᑐᑦ ᐊᑐᐃᓐᓇᐅᔪᑦ ᐋᓐᓂᐊᕕᓐᓂ ᐊᒻᒪᓗ ᐃᑲᔪᕐᑎᐅᓲᓂᒃ ᑲᒪᔨᐅᓲᓂ, ᖃᐅᔨᓴᕐᓂᐅᓚᐅᔫᑉ ᑭᖑᓂᖓᒍᑦ, ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᐊᑦᔨᒌᖕᖏᑐᓂᒃ ᐃᑲᔪᕐᑕᐅᒍᑎᖃᕈᓐᓇᑐᑦ, ᒪᑯᓂᖓ:
- ᐊᓂᕐᕋᒥ ᐃᑲᔪᕐᑎᖃᕐᓂᖅ ᐊᓂᕐᕋᒥ ᐃᒻᒥᓂᕿᒍᓐᓇᑎᑦᓯᒍᑎᓂᒃ ᐊᑭᓕᕐᑐᐃᒍᑏᑦ
- ᑕᙯᕐᓯᑫᓐᓇᑎᑕᐅᓂᕐᒧᑦ ᐊᑭᓕᕐᑐᐃᒍᑏᑦ
- ᑮᓇᐅᔭᑎᒍᑦ ᐃᑲᔪᕐᑕᐅᒍᑏᑦ
- ᑕᙯᕐᓯᑫᓐᓇᑎᑦᓯᒍᑏᑦ
- ᐃᓱᒪᒃᑯᑦ ᐃᑲᔪᕐᑕᐅᒍᑏᑦ ᐃᓄᓕᕆᔨᑎᒍᑦ, ᐊᓂᕐᕋᒥ ᐋᓐᓂᐊᓯᐅᕐᑎᓄᑦ ᐅᐸᑦᑕᐅᖃᑦᑕᕈᑎᑎᒍᑦ ᐅᕝᕙᓗᓗᓐᓃᑦ ᓄᓇᓕᒻᒥ ᐋᓪᓂᐊᕕᑎᒍᑦ
ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᐊᑭᓕᕐᑕᐅᒍᑎᖃᕈᓐᓇᖃᑦ ᐃᑲᔪᕈᑎᒥᓂᒃ?
ᐃᓚᖏᑎᒍᑦ, ᐃᒻᒥᓂᕿᒍᓐᓇᖏᑦᑐᓂᒃ ᑲᒪᔩᑦ ᐊᑭᓕᕐᑐᑕᐅᖃᑦᑕᕈᓐᓇᑐᑦ ᐃᑲᔪᕈᑎᒋᓲᒥᓂᒃ ᐃᓚᒥᓂᒃ. ᐊᕐᖁᑎᒋᓗᒋᑦ ᐊᓂᕐᕋᒥ ᓇᒻᒥᓂᖅ ᑲᒪᒋᓂᕐᒧᑦ ᐊᑭᓕᕐᑐᑕᐅᒍᑏᑦ ᐊᓂᕐᕋᒥ ᐃᒻᒥᓂᕐᓱᒍᓐᓇᓂᕐᒧᑦ ᑮᓇᐅᔭᕐᑖᕈᑎᐅᓲᑦ, ᐊᑭᓖᒍᑎᐅᒍᓐᓇᑐᑦ ᐃᓪᓗᒥᐅᖃᑎᓕᓐᓄᑦ ᐃᒻᒥᓂᕿᒍᓐᓇᖏᑦᑐᓂᒃ ᐱᓇᓱᑦᑎᑖᕈᑎᒋᒍᓐᓇᑕᖏᑦ ᑲᒪᔨᓂᒃ ᐱᓇᓱᑦᑎᒋᒍᒪᔭᒥᓂᒃ, ᐃᓚᖓᓂᓪᓗ ᑲᒪᔨᒋᔭᐅᖏᓐᓇᓕᒫᓲᒥᒃ.
ᐱᒍᓐᓇᐅᑎᖏᑦ ᓇᐅᑦᓯᑐᕐᑕᐅᓚᐅᑲᓪᓗᑎᒃ ᖃᐅᔨᔭᐅᒐᔭᕐᑐᑦ ᐊᓂᕐᕋᓯᒪᔪᓂᒃ ᐋᓐᓂᐊᓯᐅᕆᒋᐊᕐᑐᓲᓄᑦ ᐃᓄᓕᕆᔨᓄᓗᓐᓃᑦ. ᓴᐳᒻᒥᔭᐅᒍᑏᑦ ᐊᑭᓕᕐᑐᑕᐅᒍᑎᐅᒍᓐᓇᑐᑦ ᐃᑲᔪᕈᑏᑦ, ᖃᐅᑕᒫᑦ ᓱᖃᑦᓯᒍᑎᖏᒍᑦ ᐃᑲᔪᕈᑏᑦ, ᓂᕐᓯᐅᓂᖅ, ᐃᓪᓗᖓᓂᒃ ᓴᓗᒪᑎᑦᓯᓂᖅ ᐊᓯᖏᓐᓂᓗ ᐊᓂᕐᕋᒥ ᐃᑲᔪᕐᑕᐅᒍᑎᐅᓲᓂᒃ.
ᖃᐅᔨᒋᐊᕐᕕᐅᒍᓐᓇᑐᑦ:
ᖃᕆᑕᐅᔭᒃᑯᑦ ᐊᓪᓚᑖᕐᕕᒃ: Access.specialcareprograms.nunavik@ssss.gouv.qc.ca
Facebook: ᓄᓇᕕᒻᒥ ᐃᒻᒥᓂᕿᒍᓐᓇᖏᑦᑐᑦ ᐃᑲᔪᕐᑕᐅᒍᑎᖏᑦ
ᐃᓚᖃᕐᒥᑎᓪᓗᒋᑦ, ᑲᒪᔩᑦ ᐃᑲᔪᕐᑕᐅᒍᒪᒍᓐᓇᒥᔪᑦ ᓄᓇᓕᓕᒫᑎᒍᑦ ᐃᑲᔪᕐᑎᐅᓲᓄᑦ ᑲᓇᑕᓕᒫᒥᓗᓐᓃᑦ:
- ᑲᒪᔩᑦ ᓴᐳᒻᒥᔨᖏᑦ ᐅᖄᓚᐅᑎᒃᑯᑦ 1 855 852 7784 (ᐅᒃᑯᐃᖔᓲᖅ ᐅᓪᓚᑰᑦ 8-ᖑᒥᑦ 8-ᖑᒧᑦ)
- ᖃᕆᑕᐅᔭᐅᑉ ᓴᕐᕿᔮᕐᑎᓯᕕᖓᒍᑦ ᑐᑭᓯᑎᑦᓯᒍᑏᑦ L’Appui proches-aidants ᐊᕕᑦᑐᓯᒪᓂᕐᒦᑐᑦ ‘ᑲᒪᔨᐅᕗᖓ’ https://www.lappui.org/en/ . ᖃᕆᑕᐅᔭᒃᑯᓗ ᐅᖄᖄᑎᐅᒍᓐᓇᓱᑎᒃ.
- ᑐᑭᓯᑎᑦᓯᒍᑏᑦ ᐊᑐᐃᓐᓇᐅᔪᑦ ᑯᐯᑉ ᑲᕙᒪᖓᑕ ᓴᕐᕿᔮᕐᑎᓯᒍᑎᖏᓐᓂ ᖃᕆᑕᐅᔭᒃᑯᑦ ᐊᕕᑦᑐᓯᒪᓂᕐᒥ ‘ᐃᑲᔪᕈᑎᑦᓭᑦ ᐱᒍᑦᔨᒍᑏᓪᓗ ᑲᒪᔨᓄᑦ’ https://www.quebec.ca/en/family-and-support-for-individuals/informal-and-family-caregiver/support-resources-services-caregivers
- ᐊᓪᓓᑦ ᐃᓄᐃᑐᐃᓐᓀᓗ ᓂᕆᐅᓐᓂᖃᑦᓯᐊᓂᕐᒧᑦ ᐃᑲᔪᕐᑕᐅᕕᖓ: 1-855-242-3310 (ᐃᓄᒃᑎᑑᕈᓐᓇᑐᑦ ᑭᖕᖒᒪᒋᔭᐅᒍᑎᖏᒃ / English / French)
- ᑯᐯᒻᒥ ᐱᓗᑲᑕᐅᔪᓄᑦ ᐃᑲᔪᕐᑕᐅᕕᒃ: 1-888-489-2287
- ᓄᓇᕕᒻᒥ ᐃᓗᓯᓕᕆᔩᑦ ᐃᓄᓕᕆᔩᓪᓗ ᐃᓄᐃᑦ ᐱᒻᒪᕆᐅᔪᖁᑎᖏᑦ ᐱᓇᓱᒍᑎᖏᓪᓗ ᐃᑲᔪᕐᑕᐅᕕᒃ: 1-877-Nunavik (686-2845) (ᐃᓄᒃᑎᑐᑦ ᖃᓪᓗᓈᑎᑐᓪᓘᓃᑦ ᓂᐱᓕᐅᕈᓐᓇᑐᑎᑦ)