ᐊᐅᐸᕐᓇᖅ ᓯᓚᕐᔪᐊᓕᒫᒥ ᑫᕕᑐᐃᓐᓇᑐᖅ.
ᑯᐯᒻᒥ, 2024 ᐱᒋᐊᕐᖃᒥᐅᓂᖓᓂᓂᑦ ᐊᒥᓱᑦ ᐊᐅᐸᕐᓇᓂᕋᕐᑕᐅᕙᑦᑐᑦ. ᐃᓚᖏᑦ ᐁᑦᑐᑕᕕᓂᐅᑎᓗᒋᑦ ᐃᓐᓂᐊᓯᒪᑦᓱᑎᒃ ᓄᓇᕐᓚᒧᑦ ᐊᐅᐸᕐᓇᒥᒃ ᐁᑦᑐᑑᑎᕕᐅᔪᒥ. ᑭᓯᐊᓂ, ᐃᓚᖏᑦ ᑯᐯᒻᒥ ᐊᐅᐸᕐᓇᑲᑦᑕᑎᓪᓗᒋᑦ ᐁᑦᑐᑕᐅᕙᒻᒥᑎᓗᒋᑦ.
ᑕᕝᕙᓂ ᖁᑉᐱᒐᕐᒥ:
- ᓇᓗᓀᕐᓯᐅᑎᒃ
- ᒪᓗᓐᓇᕈᑏᑦ
- ᐋᕐᖀᒍᓐᓇᑐᑦ
- ᐅᐃᒪᓇᕐᓰᓚᖀᒍᓐᓇᓂᖏᑦ
- ᐁᑦᑐᑕᐅᒍᑎᐅᒍᓐᓇᑐᑦ
- ᐅᖑᒪᓂᖅ ᐊᒻᒪᓗ ᐁᑦᑐᑕᐅᑦᑌᓕᓂᖅ
- ᑭᓇᒃᑯᑦ ᐊᐅᐸᕐᓇᑖᕈᓐᓇᐸᑦ
- ᐃᓕᒃᑯᑦ ᐊᑑᑎᔭᐅᒍᓐᓇᕕᖏᑦ
ᓇᓗᓀᕐᓯᐅᑎᒃ
ᐊᐅᐸᕐᓇᖅ ᐃᓂᕐᑑᒪᓇᕐᑐᖅ ᐁᑦᑐᑑᑎᐅᒡᒐᑐᕋᓂᓗ. ᐊᐅᐸᕐᓇᖅ ᐊᓂᕐᑎᕆᓂᒃᑯᑦ ᓯᐊᒻᒪᓲᖅ ᐃᓄᒃ ᐊᐅᐸᕐᓇᑐᖅ ᐊᓂᕐᑎᕆᑎᓪᓗᒍ, ᖁᐃᕐᑐᑎᓪᓗᒍ, ᑕᒋᐅᑦᓴᑎᓪᓗᒍ, ᐅᕝᕙᓘᓐᓃᑦ ᐅᖄᑎᓗᒍ.
ᐊᐅᐸᕐᓇᖅ ᐱᒻᒪᕆᑦᓯᒪᔪᖅ ᓇᓂᓕᒫᕐᓱᓂ ᐊᒥᐊᔨᑲᐅᑉ ᑕᕐᕋᖓᓂ. ᑕᑯᑦᓴᐅᖏᓐᓂᓴᐅᓕᕐᓯᒪᔪᖅ ᐱᕙᓪᓕᖁᑎᐅᓂᖏᓐᓄᑦ ᑲᐴᑎᐅᑉ. ᐅᓪᓗᒥᐊᓪᓛᑦ, ᑯᐯᒃ ᐃᓛᓐᓂ ᐊᐅᐸᕐᓇᑐᕐᑕᖃᓯᓲᖅ. ᐊᐅᐸᕐᓀᑦ ᓇᓂᓕᒫᖅ ᐃᓅᒍᓐᓀᕈᑕᐅᓲᓄᑦ ᓱᓕ ᐃᓚᐅᔪᖅ ᑲᒃᑲᓛᕌᐱᓐᓄᑦ ᒥᑭᔪᕐᓚᓄᑦ. ᑖᑦᓱᒥᖓ ᖃᓂᒻᒪᓯᕐᑖᕇᒃᑯᑎᖃᕐᐳᖅ ᐱᕙᓪᓕᖁᑎᑦᓯᐊᒥᒃ ᐊᑦᑕᓇᕋᓂᓗ ᑲᐴᑎᒥᒃ.
ᒪᓗᓐᓇᕈᑎᖏᑦ
ᑕᑲᒃᑯᐊ ᓯᕗᓪᓕᐸᐅᓲᑦ ᐊᐅᐸᕐᓇᑐᖃᓯᒻᒪᑦ:
- ᐆᓇᕐᓱᓂ
- ᓱᕐᓗᒋᒃ ᓯᒥᑦᓯᒪᑦᓱᑎᒃ ᑲᒃᑭᐅᖃᑦᑕᓱᓂᓗ
- ᖁᐃᕐᑐᖃᑦᑕᓱᓂ
- ᐃᔨᒋᒃ ᖁᕐᕕᓘᒃᑳᓱᑎᒃ ᐊᐅᐸᕐᑑᓱᑎᒃ
- ᐃᔨᒋᒃ ᕿᕐᖕᖓᖃᑦᑕᓱᑎᒃ
- ᖃᓄᑐᐃᓐᓇᖅ ᐃᓱᕐᕆᒐᓂ
ᑭᖑᓂᖓᓂ, ᑮᓇᖓ ᐊᐅᐸᕐᑐᓛᖕᖑᓲᖅ ᐊᒻᒪᓗ ᑌᒪ ᑎᒥᖓ
ᐅᓪᓗᐃᑦ ᐃᒣᓪᓗᐊᑐᑦ ᐊᓂᒍᕈᓐᓇᑐᑦ 5-ᓂᑦ 21-ᓄᑦ (ᐊᑯᓪᓕᐅᑎᓗᒋᑦ 10-ᓂᑦ 14-ᓄᑦ) ᐊᐅᐸᕐᓇᐅᑉ ᖁᐱᕐᕈᐊᕈᓯᖏᓐᓄᑦ ᐊᑦᑐᑕᕕᓂᐅᑦᓱᓂ ᐊᒻᒪᓗ ᒪᓗᓐᓇᕈᑎᖏᑦ ᓄᐃᕐᖃᓯᑦᓱᑎᒃ. ᐊᑎᖃᕐᑎᑕᐅᔪᖅ ᒪᓐᓂᓕᐅᕐᕕᒥᒃ. ᐃᓄᒃ ᐁᑦᑐᐃᒍᓐᓇᓯᓲᖅ ᐊᓯᒥᓂᒃ ᐅᓪᓗᓂ 4-ᓂ ᐊᐅᐸᓪᓛᑕᑦᓯᓚᐅᕋᓂ ᐊᒻᒪᓗ ᑭᖑᓂᖓᒍᑦ ᐁᑦᑐᐃᒍᓐᓇᓚᖓᑦᓱᓂ ᐅᓪᓗᓂ 4-ᒋᐊᓪᓚᓂ ᐊᐅᐸᕐᓇᒥᒃ. ᐊᐅᐸᕐᓀᑦ ᓄᐃᑕᓲᑦ 1-ᓂᑦ 2-ᓄᑦ ᐱᓇᓱᐊᕈᓰᓐᓂ. ᐁᑦᑑᑕᐅᒍᐊᕐᑐᒪᕆᒃ, ᒪᓗᓐᓇᕈᑎᖃᕈᕕᑦ ᐊᐅᐸᕐᓇᕆᐊᒥᒃ, ᓯᕙᓂᕐᓗᒍ Info-Santé 811 ᐋᓐᓂᐊᓯᐅᑎᒃᑯᓕᐊᓚᐅᕐᓇᒃ ᐅᕝᕙᓘᓐᓃᑦ ᐅᐃᒪᓇᕐᑐᑯᕕᓕᐊᓚᐅᕐᓇᒃ.
Info-Santé ᐱᓇᓱᑦᑎᖏᑦ ᐊᓂᓚᐅᕐᑎᓇᒃ ᑐᑭᓯᑎᑦᓯᓚᖓᔪᑦ ᖃᓄᐃᓘᕆᐊᖃᕐᒪᖔᑉᐱᑦ ᐁᑦᑐᐃᑌᓕᒍᑎᓂᒃ (ᐆᑦᑑᑎᒃ, ᕿᙰᑦ ᖃᓃᓪᓗ ᒪᑐᒪᑎᓗᒋᒃ). ᑌᒣᓕᖓᒍᕕᑦ, ᐃᓚᑎᑦ ᐊᓯᑎᓪᓗ ᐁᑦᑐᖏᑦᑕᕆᒍᓐᓇᑕᑎᑦ.
ᑖᑦᓱᒥᖓ ᖃᓄᐃᒍᑎᖃᓕᕈᕕᑦ ᑕᒉᓐᓇᖅ ᑲᒪᒋᔭᐅᑲᐱᒋᐊᖃᕐᑐᑎᑦ, ᐋᓐᓂᐊᓯᐅᑏᑦ ᑐᓴᕐᑎᓗᒋᑦ ᐊᐅᐸᕐᓇᑐᕆᒍᕕᑦ ᐅᕝᕙᓘᓐᓃᑦ ᕿᑐᕐᙰᑦ ᐊᐅᐸᕐᓇᑐᕆᒍᕕᐅᒃ.
ᐊᐅᐸᕐᓇᖅ ᐊᒥᓱᐃᓂᒃ (ᐅᐃᒪᓇᕐᓰᓚᖀᒍᓐᓇᑐᖅ).
ᐋᕐᖀᒍᓐᓇᑐᑦ
ᐃᓕᒃᑰᑐᒥᒃ ᐋᕐᖀᒍᓐᓇᓚᕆᑦᑐᑕᖃᖕᖏᑐᖅ. ᑲᐴᑎᒃ ᑖᓐᓇᑐᐊᒍᐃᓐᓈᑐᖅ ᖃᓂᒻᒪᓯᕐᑖᕇᒃᑯᑎᐅᑦᓱᓂ. ᐊᐅᐸᕐᓇᑯᕕᑦ, ᐃᒣᒋᐊᖃᕐᑐᑎᑦ:
- ᐊᓇᕐᕋᓯᒪᑐᐃᓐᓇᓗᑎᑦ
- ᐊᓯᓐᓃᕕᑦ ᑕᑯᑦᑌᓕᓗᑎᑦ ᑲᑎᒪᑦᓯᑌᓕᓗᑎᑦ
- ᑕᙯᕐᓯᓯᐊᕐᓗᑎᑦ
- ᐃᒥᑦᓯᐊᖃᑦᑕᓗᑎᑦ, ᐆᑦᑑᑎᒃ ᐃᒪᑐᐃᓐᓇᒥᒃ
- ᐆᓇᕇᒃᑯᑎᑐᖃᑦᑕᓗᑎᑦ ᐅᕝᕙᓘᓐᓃᑦ ᐃᓱᐃᓪᓘᑯᕕᑦ ᐄᓯᖃᑦᑕᓗᑎᑦ
ᐅᐃᒪᓇᕐᓰᓚᖀᒍᓐᓇᓂᖏᑦ
ᐊᐅᐸᕐᓇᒧᑦ ᐅᐃᒪᓇᕐᓯᔭᐅᓚᕿᒍᓐᓇᑐᑦ ᐅᑯᐊ ᐃᓚᖏᑦ:
- ᓯᐅᑎᒃᑯᑦ ᐃᒻᒪᓗᓂ (5-ᓂᑦ 9%-ᓄᑦ ᓯᐅᓯᕆᓯᓲᑦ)
- ᐊᓇᑭᑕᓯᓗᓂ ᓄᕐᖃᖃᔭᖕᖏᑐᒥᒃ, ᐃᓅᓕᕐᖃᒦᑦ ᐱᓗᐊᖕᖑᐊᑎᓗᒋᑦ
- ᐳᕙᖏᑦ ᐃᒻᒪᓗᑎᒃ (1-ᓂ 5%-ᓄᑦ ᐳᕙᓕᕆᓯᓲᑦ)
- ᖀᕐᓱᖃᑦᑕᓗᓂ (ᑎᒥᖓ ᓯᑎᓕᓗᓂ ᓄᑭᖏᓪᓗ ᕿᓗᔨᓗᑎᒃ ᓂᒫᓪᓛᓗᓂ ᐊᒻᒪᓗ ᐃᓛᓃᕈᓐᓀᓗᓂ ᓴᔪᓗᓪᓗᓂ)
- ᑕᐅᑐᖏᕐᓗᓂ ᐅᕝᕙᓘᓐᓃᑦ ᑐᓵᕐᖃᔦᕐᓗᓂ
- ᖃᕆᑕᖓ ᓱᒃᑯᑕᐅᓗᓂ ᐋᕐᕿᖃᔦᕐᓗᓂ (1-ᓗᐊᖏᑦ 1,000-ᓂ ᑌᒣᓚᕿᓲᑦ)
- ᑐᖁᓗᓂ (1-ᓗᐊᖏᑦ 3,000-ᓂ ᑌᒣᓚᕿᓲᑦ)
ᐅᐃᒪᓇᕐᓯᓲᒍᓂᕐᐹᑦ ᖃᓄᐃᓪᓗᐊᓂᖏᑦ
ᐅᐃᒪᓇᕐᓯᓚᕿᔪᑦ ᐅᑯᓇᓃᕙᓪᓗᓲᑦ ᖃᓄᐃᓪᓗᐊᓂᖏ:
- ᓄᑕᕃᑦ ᐊᑕᐅᓯᐅᑉ ᐊᑖᓂ ᐅᑭᐅᓖᑦ
- ᐃᓄᐃᑦ ᓱᐴᓗᑕᖏᑦ ᓴᖕᖐᓕᓯᒪᐅᑎᓖᑦ ᒪᒥᓴᐅᑎᓄᑦ ᐊᓯᖏᓐᓄᑦ ᖃᓂᒻᒪᓯᓄᑦ ᐅᕝᕙᓘᓐᓃᑦ ᐱᒻᒪᕆᓐᓂᒃ ᖃᓂᒻᒪᓯᓖᑦ ᐆᑦᑑᑎᒋᑦᓱᒍ ᐸᑎᕐᒥᒍᑦ ᑲᒡᒍᑎᓖᑦ
- ᓄᑕᕋᑦᓴᓖᑦ ᓈᒻᒪᖏᑦᑐᓂᒃ ᑲᐱᔭᐅᓯᒪᔪᑦ ᐊᐅᐸᕐᓇᑖᕇᒃᑯᑎᓄᑦ
ᓄᑕᕋᑦᓴᓖᑦ ᐊᐅᐸᕐᓇᑐᑦ ᐊᓂᕐᑎᕆᖕᖏᑐᒥᒃ ᓄᑕᕋᕐᑖᓯᓐᓇᐅᓂᕐᓴᐅᓲᑦ ᐅᕝᕙᓘᓐᓃᑦ ᓄᑕᕋᕐᑖᑲᐱᓗᐊᕐᓗᑎᒃ.
ᖁᐱᕐᕈᐊᕈᓯᖏᓐᓄᑦ ᐊᐅᐸᕐᓇᐅᑉ ᐊᑦᑐᑕᐅᓯᒪᔪᑦ, ᐃᓄᐃᑦ ᑖᒃᑯᐊ ᑐᓴᕐᑎᓯᑦᓴᐅᑎᒋᒋᐊᓖᑦ Info-Santé 811-ᒧᑦ ᓯᕙᓂᕐᓗᑎᒃ ᖃᐅᔨᓴᕐᑕᐅᓂᐊᕋᒥᒃ ᐊᒻᒪᓗ, ᒋᐊᖃᕈᑎᒃ, ᐊᐅᐸᕐᓇᕇᒃᑯᑎᒧᑦ ᒪᒥᓴᐅᑎᑕᑦᓯᔭᐅᓗᑎᒃ. ᑖᓐᓇ ᑲᐱᔭᐅᒍᑕᐅᒋᐊᓕᒃ ᐅᓪᓗᐃᑦ ᓯᑕᒪᐅᔪᕐᑐᑦ ᐊᓂᒍᓚᐅᕐᑎᓇᒋᑦ ᐁᑦᑐᑕᐅᔪᕕᓂᐅᓗᓂ ᖁᐱᕐᕈᐊᕈᓯᕐᓂᒃ.
ᐁᑦᑐᑕᐅᒍᑎᐅᒍᓐᓇᑐᑦ
ᐊᐅᐸᕐᓇᖅ ᐁᑦᑐᑑᑎᐅᓲᖅ. ᖁᐱᕐᕆᓇᑐᐃᓐᓇᕆᐊᖃᓲᒍᒻᒥᔪᖅ ᐊᒻᒪᓗ ᖃᓂᒻᒪᓯᕐᑖᓗᓂ ᐊᐅᐸᕐᓇᑐᓂᒃ ᖁᐱᕐᕈᐊᕈᓯᕐᑕᓯᓯᒪᔪᒥᒃ ᑲᑎᓯᓪᓚᕆᑦᓯᒪᖕᖏᑲᓗᐊᕈᓂ. ᐆᑦᑑᑎᒃ, ᖃᓂᒻᒪᓯᕐᑕᓕᒻᒥᒃ ᐃᓪᓗᐊᕈᓯᒦᖃᑎᖃᑐᐃᓐᓇᓗᓂ, ᐊᑯᓂᐅᖕᖏᑑᓐᓃᑦ.
ᖁᐱᕐᕈᐊᕈᓯᖅ ᐆᒪᒍᓐᓇᑐᖅ ᐊᒥᓱᓂ ᐃᑲᐅᕐᓂᓂ ᓂᐅᕋᑦᓴᒦᓪᓗᓂ ᐊᒻᒪᓗ ᐊᓪᓛᑦ ᐃᕐᐸᓗᓂ. ᖃᓂᒻᒪᓯᖅ ᐁᑦᑑᑕᐅᒍᓐᓇᒥᔪᖅ ᐊᑦᑐᑕᐅᓪᓚᕆᓪᓗᓂ, ᖁᐱᕐᕆᓯᒪᔪᖅ ᐃᓄᒃ ᐊᑦᑐᓗᒍ ᐅᕝᕙᓘᓐᓃᑦ ᖁᐱᕐᕈᐊᕈᓯᕐᑕᓯᓯᒪᔪᑦ ᓱᓇᑐᐃᓐᓀᑦ ᐊᑦᑐᓗᒋᑦ.
ᐅᖑᒪᓂᖅ ᐊᒻᒪᓗ ᐁᑦᑐᑕᐅᑦᑌᓕᓂᖅ
ᐅᖑᒪᓂᖅ ᐁᑦᑐᑕᐅᑦᑌᓕᓗᓂ
ᑲᒃᑲᓛᑦ ᐃᓄᒻᒪᕇᓪᓗ ᖃᓂᒪᔪᑦ ᐊᓇᕐᕋᓯᒪᒋᐊᓖᑦ ᐯᕆᑦᓯᕕᓕᐊᕆᐊᖃᖕᖏᑐᑦ, ᐃᓕᓴᕐᕕᓕᐊᕆᐊᕐᖃᖕᖏᑐᑦ ᐊᒻᒪᓗ ᐱᓇᓱᐊᕆᐊᕐᖃᔭᖕᖏᑐᑦ ᐊᒻᒪᓗ ᑲᑎᒪᑦᓯᑌᓕᓗᑎᒃ ᒥᑭᔪᕐᓚᓂᒃ ᑲᒃᑲᓛᓂᒃ, ᐃᓄᓐᓂᒃ ᓴᐴᓗᑕᒥᒍᑦ ᓴᖕᖐᓕᓯᒪᔪᓂᒃ ᐊᒻᒪᓗ ᓄᑕᕋᑦᓴᓕᓐᓂᒃ ᐊᕐᓇᓂᒃ. ᐊᓇᕐᕋᓯᒪᒋᐊᓖᑦ ᐅᓪᓗᓂ ᓯᑕᒪᓂ ᐊᐅᐸᓪᓛᓯᔪᕕᓂᐅᓗᑎᒃ.
ᑲᐴᑎᒃ
ᑲᐱᔭᐅᓗᓂ ᐱᐅᓂᕐᐹᖅ ᐅᖑᒪᔭᐅᒍᑎᐅᒍᓐᓇᒪᑦ ᐊᐅᐸᕐᓇᓄᑦ. ᐊᐅᐸᕐᓇᕇᒃᑯᑎᒃ ᑲᐴᑎᒃ ᐅᐊᕈᑎᒌᑦᑕᓕᒃ ᑲᐴᑎᐅᑦᓱᓂ, ᑐᑭᖓ ᐅᖑᒪᑦᓯᒍᓐᓇᑐᖅ ᐊᒥᓱᐃᓂᒃ ᖃᓂᒻᒪᓯᕐᑖᕇᒃᑯᑎᐅᓗᓂ ᐊᑕᐅᑦᓯᑯᑦ.
ᐅᑯᐊ ᓚᒻᒪᑕ Québec’s immunization schedule, (ᑯᐯᒻᒥ ᑲᐴᑕᐅᒋᐊᓕᓐᓄᑦ ᓈᒻᒪᓯᑦᑕᕈᑎᒃ), ᑲᒃᑲᓛᑦ ᑲᐱᔭᐅᒋᐊᖃᓲᑦ 12-ᓂᒃ ᑕᕐᕿᖃᓕᕈᑎᒃ ᐊᒻᒪᓗ 18-ᓂᒃ ᑕᕐᕿᖃᓕᕈᑎᒃ. ᑲᐴᑎᑦ ᑌᒣᒻᒪᑦ ᐅᖑᒪᑦᓯᓲᖅ ᓈᒻᒪᑐᒥᒃ ᐊᐅᐸᕐᓇᒥᒃ ᖃᓂᒻᒪᓯᕐᑖᕈᓐᓇᕕᒻᒥᓃᓕᕋᒥ. ᑌᒣᒻᒪᑦ ᑲᐱᔭᐅᔪᑦᓴᐅᖁᓗᒍ ᐅᖃᕈᑎᒋᒋᐊᓖᑦ ᖃᓂᓐᓂᐸᐅᓕᕐᑎᓗᒍ ᐅᓪᓗᖓ ᕿᑐᕐᙰᑦ ᐊᑕᐅᓯᕐᒥᒃ ᐅᑭᐅᕐᑖᕕᑦᓴᖓ. ᐊᑯᓂᓕᑦᓯᒋᐊᖃᖕᖏᑐᖅ ᑲᐱᔭᐅᒋᐊᖃᓕᕐᓗᓂ, ᕿᑐᕐᙰᑦ ᐊᒥᓱᐃᓄᐊᓪᓛᑦ ᐊᑦᔨᒌᖕᖏᑐᓄᑦ ᑲᐱᔭᐅᒋᐊᖃᕋᓗᐊᕐᐸᑦ ᐊᑕᐅᑦᓯᑯᑦ ᐊᐅᐸᕐᓇᕇᒃᑯᑎᐅᑉ ᐊᓯᖏᓐᓄᑦ.
ᑭᓇᐃᓐᓇᖅ ᐃᓅᓕᕐᑐᕕᓂᖅ 1970-ᒥᑦ ᑖᕗᖓᓕᒫᖅ ᐊᐅᐸᕐᓇᕇᒃᑯᑎᒧᑦ ᑲᐱᔭᐅᓚᐅᕐᓯᒪᖕᖏᑯᓂ ᐅᕝᕙᓘᓐᓃᑦ ᐊᐅᐸᕐᓇᓚᐅᕐᓯᒪᖕᖏᑯᓂ ᑲᐱᔭᐅᒋᐊᓕᒃ.
ᑳᓇᑕᒥ ᑲᐳᕐᑕᐅᑲᑦᑕᓯᔪᕕᓂᐅᑎᓗᒋᑦ ᐊᑭᖃᖕᖏᑐᓂᒃ, ᐅᓄᕐᓂᖏᑦ ᐊᐅᐸᕐᓇᑐᑦ ᐃᑭᓪᓕᐅᒥᓯᒪᔪᑦ 97%-ᒧᑦ.
ᐃᑉᐱᒋᒋᐊᓕᖏᑦ ᐃᓐᓂᐊᑲᑦᑕᑐᑦ
ᐊᒥᓱᐃᓂ ᓄᓇᕐᓚᓂ ᐊᐅᐸᕐᓇᐸᑦᑐᑦ ᐊᒥᓲᕗᑦ. ᐊᐅᓪᓚᓚᐅᕐᓇᒃ, ᑲᐱᔭᐅᕕᒋᓯᒪᔦᑦ ᐅᕝᕙᓘᓐᓂᑦ ᕿᑐᕐᖓᐱᑦ ᑲᐱᔭᐅᕕᒋᓯᒪᔭᖓᑕ ᓇᓗᓀᕐᓯᐅᑎᑕᖓ ᑕᑯᒐᓱᐊᕐᑕᐅᐸᑦ ᐋᓐᓂᐊᓯᐅᑎᐊᓗᒻᒧᑦ ᐅᕝᕙᓘᓐᓂᑦ ᐋᓐᓂᐊᓯᐅᑎᒧᑦ ᓈᒻᒪᒐᔭᕐᑐᖅ. ᖃᐅᔨᒍᒪᒍᕕᑦ ᓈᒻᒪᑐᓂᒃ ᐊᐅᐸᕐᓇᕇᒃᑯᑎᒧᑦ ᑲᐱᔭᐅᓯᒪᒻᒪᖔᑉᐱᑦ, ᖃᐅᔨᒐᓱᐊᕐᓗᒍ ᐊᐅᓚᓂᓕᕆᕕᖓ ᐋᓐᓂᐊᓯᐅᑎᒃᑯᑦ, ᓄᓇᓕᓯᓐᓂᓘᓐᓃᑦ ᐋᓐᓂᐊᓯᐅᑎᒃᑯᓯ, ᓄᓇᓕᓯᓐᓂ ᑭᒡᒐᑐᕐᕕᒃ ᐅᕝᕙᓘᓐᓃᑦ ᓯᕙᓂᕐᓗᑎᑦ ᐅᕗᖓ 1-877-644-4545.
ᑲᐱᔭᐅᓚᖓᔪᒧᑦ ᒪᓕᒐᑦᓭᑦ
ᓱᕐᖁᐃᓗᒍ ᐃᒣᒻᒪᖔᑉᐱᑦ ᓈᒻᒪᑐᓂᒃ ᐅᖑᒪᔭᐅᓂᖃᕐᒪᖔᑉᐱᑦ, ᑲᐱᔭᐅᒍᑎᒃ ᐊᐅᐸᕐᓇᕇᒃᑯᑎᒃ ᐊᑭᖃᖕᖏᑐᖅ ᑯᐯᒻᒥ ᑲᐴᑎᓄᑦ ᐱᓇᓱᐊᕈᑦᔨᐅᑎᐅᑉ ᐊᑖᒍᑦ. ᑕᑯᓗᒍ ᑯᐯᒻᒥ ᑲᐴᑎᓄᑦ ᐱᓇᓱᐊᕈᑦᔨᐅᑎᒃ ᒪᓕᑦᑕᐅᒋᐊᓖᑦ ᖃᐅᔨᒋᐊᕐᓗᒋᑦ ᐅᕙᓂ ᑲᐱᔭᐅᓚᖓᔪᒧᑦ ᒪᓕᒐᑦᓭᑦ.
ᑭᓇᒃᑯᑦ ᐊᐅᐸᕐᓇᓚᕿᒍᓐᓇᐸᑦ
ᑭᓇᑐᐃᓐᓇᑯᑦ ᐅᖑᒪᔭᐅᒍᑎᖃᖕᖏᑐᑦ ᐊᐅᐸᕐᓇᕇᒃᑯᑎᒧᑦ ᐅᕝᕙᓘᓐᓃᑦ ᐊᐅᐸᕐᓇᓯᒪᖕᖏᑐᑦ ᐊᐅᐸᕐᓇᑖᕈᓐᓇᑐᑦ.
ᐃᓕᒃᑰᑐᑦ ᒪᓕᑦᑕᐅᒋᐊᓖᑦ
ᐊᐅᐸᕐᓇᖅ ᖃᓂᒻᒪᓯᐅᕗᖅ ᑐᓴᕐᑕᐅᑎᑕᐅᒋᐊᖃᕐᓱᓂ.
ᖃᐅᔨᓴᕐᑏᑦ ᐱᓇᓱᑦᑏᑦ ᐊᒻᒪᓗ ᐃᓗᓯᓕᕆᔩᑦ ᐱᓇᓱᑦᑎᒪᕇᑦ ᖃᐅᔨᒍᑎᒃ ᐊᐅᐸᕐᓇᑐᒥᒃ, ᑐᓴᕐᑎᓯᒋᐊᓖᑦ ᑭᓇᓕᒫᒃᑯᓂᒃ ᐃᓗᓯᓕᕆᓂᕐᓄᑦ ᐊᖓᔪᕐᖄᓂᒃ.
ᐊᐅᐸᕐᓇᖅ ᐃᓕᓭᕕᐅᑉ ᐃᓗᐊᓂ: ᓱᒋᐊᖃᕐᒪᖔᑕ
ᐃᓕᓴᕐᕕᒃ ᑐᓴᕐᑎᓯᑦᓴᐸᑦ ᐊᐅᐸᕐᓇᑐᖃᕆᐊᖓ, ᐊᒻᒪᓗ ᒪᓕᓪᓗᒍ ᖃᓂᒻᒪᓯᐅᑉ ᐃᕐᐸᐸᓪᓕᐊᒍᓯᖓ, ᑲᐱᔭᐅᒻᒣᑐᐃᑦ ᐊᓇᕐᕋᓯᒪᑐᐃᓐᓇᖁᔭᐅᒍᓐᓇᑐᑦ ᓯᐊᒻᒪᐸᓪᓕᐊᓂᖓ ᐃᓱᓕᖕᖏᓂᖓᓂ. ᑖᒃᑯᐊ ᐃᓕᒃᑰᑎᕐᑐᑦ ᐃᓕᓴᕐᕕᒧᑦ ᐅᑎᕈᓐᓇᑐᑦ ᑎᒍᒥᐊᕐᓗᑎᒃ ᐊᑐᕐᑐᓂᒃ ᓱᕐᖁᐃᓇᕐᑎᓯᐅᑎᓂᒃ ᑲᐱᔭᐅᓯᒪᒋᐊᒥᒃ. ᑖᓐᓇ ᒪᓕᒐᖅ ᑐᕌᒐᓕᒃ ᐅᖑᒪᑦᓯᒋᐊᖃᕐᓂᓂᒃ ᐃᓗᓯᕐᓱᒋᐊᖃᕐᓂᖏᓐᓂᒃ ᐅᖑᒪᔭᐅᒍᑎᖃᖕᖏᑐᑦ ᐊᑕᐅᓯᐅᑦᑎᑐᑦ ᐊᒻᒪᓗ ᓄᓇᓕᖏᑦ.