ᑯᕕᐊᓲᑎᖃᕐᓂᖅ ᓯᓚᑐᔫᓂᕐᒥᒃ ᕿᒻᒪᑯᐃᓯᒪᓂᕐᒥᓗ ᓄᓇᕕᒻᒥ
ᐊᕐᕌᒍᑕᒫᑦ ᐃᓄᒻᒪᕇᑦ ᐅᓪᓗᖁᑎᖃᕐᑎᑕᐅᓲᒍᕗᑦ ᑕᕐᕿᓕᒫᒥ ᖁᕕᐊᓲᑎᒋᔭᐅᑦᓱᑎᒃ ᐅᐱᒋᔭᐅᑦᓱᑎᒃ ᐃᑲᔪᕐᓯᒪᖃᑦᑕᓂᕆᓲᖏᑦ ᐃᓄᒻᒪᕇᑦ ᓄᓇᓕᑦᑎᓂ. ᐊᕐᕌᒍᑕᒫᑦ, ᐅᒃᑑᐸ 1-ᒥ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐊᑐᐃᓐᓇᕈᕐᑎᕆᓲᒍᒻᒪᑕ ᐅᐱᒋᔭᐅᒍᑎᑦᓴᖏᓐᓂᒃ ᐃᓄᐃᑦ ᐃᓕᕐᖁᓯᖏᓐᓂᒃ ᕿᒻᒪᑯᐃᓯᒪᓂᖏᓐᓄᑦ, ᓯᓚᑐᓂᖏᑦᑕᓗ ᖃᐅᔨᒪᔭᑐᖃᖏᑦᑕᓗ ᐃᓄᒻᒪᕆᑦᑕ ᓄᓇᕕᒻᒥ.
ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐱᓯᒪᑦᓱᓂ - ᐃᓗᓯᕐᓱᓯᐊᕐᓂᖅ, ᖃᓄᐃᖕᖏᓯᐊᕐᓂᖅ, ᐊᒻᒪᓗ ᐃᓅᖃᑎᒌᑦᓯᐊᓂᖅ - ᓇᐅᓕᒫᓂᒃ ᑐᓴᐅᒪᑎᑦᓯᒍᑎ ᖃᐅᔨᒪᑎᑦᓯᓂᐅᓛᕐᖁᖅ ᑎᒥᒃᑯᑦ, ᐃᑉᐱᓂᐊᕐᓂᑯᑦ ᐃᓅᓯᒃᑯᑦ ᒪᑭᑕᑦᓯᐊᕆᐊᖃᕐᓂᖏᓐᓂᒃ ᐃᓄᒻᒪᕆᑦᑕ. ᐊᑦᔨᒌᖕᖏᑐᓂᒃ ᓱᑎᑕᐅᓂᖃᖃᑦᑕᓛᕐᑐᑦ ᐱᒋᐊᕐᑎᑕᐅᓂᖃᖃᑦᑕᓗᓂᓗ ᐱᑐᑦᓯᒪᖃᑎᒌᒍᑎᑦᓴᖏᑦ ᓄᓇᓕᒻᒦᑐᑦ ᐃᓄᒻᒪᕆᑦᑎᓂᒃ, ᑭᖑᕚᕇᑦ ᑲᓱᓕᐅᒥᓗᑎᒃ, ᖁᕕᐊᓲᑎᐅᑎᓪᓗᒋᓪᓗ ᐱᔭᑦᓴᕆᒋᐊᖃᓲᖏᑦ ᐃᓄᒻᒪᕇᑦ ᐃᓅᖃᑎᒌᑎᒍᑦ.
“ᑌᒪᖕᖓᓂᐊᕐᔪᖅ ᐃᓄᑐᙯᑦ ᓱᖑᓂᕆᔭᐅᓯᒪᕗᑦ ᐃᓅᖃᑎᒌᑦᑐᓄᑦ ᓯᓚᑐᓂᕐᒥᒍᑦ ᓯᕗᓕᕐᓯᒪᒐᒥᒃ ᐊᓐᓇᐅᒪᒍᓐᓇᖁᓪᓗᑕ.
—ᒥᓂ ᑯᔦ 2024-ᒥ ᐅᖃᕐᑕᕕᓂᖏᑦ ᓱᑎᑦᓯᓂᖃᕐᑎᓗᒍ
ᓄᓇᕕᒻᒥ ᐃᓄᒻᒪᕆᓐᓄᑦ ᐅᓪᓗᖁᑎ ᓇᐅᓕᒫᓂᒃ ᑐᓴᐅᒪᑎᑦᓯᒍᑕᐅᑎᓪᓗᒍ ᐊᑑᑎᔭᐅᓛᕐᑐᑦ:
- ᓄᓇᕕᓕᒫᒥᑦ ᕿᓂᕐᓂᖅ ᐱᓇᓱᐊᕐᑕᐅᒍᒪᔪᓂᒃ: ᕿᓄᒍᑎᓕᐅᕐᓗᓯ ᓄᓇᓕᒻᒥ ᐱᓇᓱᐊᕐᑕᐅᒍᒪᒐᔭᕐᑐᓂᒃ ᐆᑦᑐᕋᐅᑎᒋᑦᓱᒋᑦ ᐅᓂᒃᑳᑐᐊᕐᓃᑦ ᐃᓕᕐᖁᓯᓕᕆᓃᑦ ᖁᕕᐊᓲᑎᑦᓴᐅᑎᓪᓗᒋᑦ ᐃᓄᒻᒪᕆᓐᓂᒃ. ᐊᖏᕈᑕᐅᔪᑦ ᕿᓄᒍᑏᑦ ᑮᓇᐅᔭᖃᕐᑎᑕᐅᒐᔭᕐᑐᑦ ᖃᐅᔨᒪᑎᑦᓯᒍᑕᐅᓗᑎᓪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ.
- ᐃᓄᒻᒪᕇᑦ ᐅᓪᓗᖁᑎᖓᓅᓕᖓᔪᑦ ᑕᑯᓐᓇᕋᑦᓭᑦ: ᑕᑯᓐᓇᕋᑦᓴᐅᓛᕐᑐᑦ "A Lifetime of Wisdom," ᐅᓂᒃᑳᑐᐊᕐᑐᑦ ᐅᖃᐅᓯᑦᓴᖏᓪᓗ ᒥᓂ ᑯᔦᑉ ᓵᓕ ᒍᐊᑦᓗ.
- ᑲᒪᒋᔭᐅᑦᓯᐊᕆᐊᖃᕐᓂᒧᑦ ᐱᒋᐅᕐᓴᑎᑦᓯᓃᑦ: ᐆᑦᑐᕋᕐᑕᐅᔪᖅ ᐱᓇᓱᑦᑕᐅᔪᑦᓴᖅ ᑲᒪᔩᑦ ᐱᒋᐅᕐᓴᔭᐅᓂᑦᓴᖓ ᐃᓄᒻᒪᕇᑦ ᑲᒪᒋᔭᐅᑦᓯᐊᕆᐊᖃᕐᓂᖏᓐᓅᓕᖓᔪᖅ ᖃᐅᔨᒪᔭᐅᑎᑦᓯᓂᕐᒥᓗ ᐃᓄᒻᒪᕇᑦ ᒪᑭᑕᑦᓯᐊᕆᐊᖃᕐᓂᖏᓐᓂᒃ.
- Facebook-ᑎᒍᑦ ᓇᐅᓕᒫᓂᒃ ᑐᓴᐅᒪᑎᑦᓯᒍᑎ: ᑕᕐᕿᓕᒫᒥ ᓇᐅᓕᒫᓂᒃ ᑐᓴᐅᒪᑎᑦᓯᒍᑎ ᐅᓪᓗᑕᒫᒃ ᐅᖃᐅᓯᑦᓴᑕᖃᖃᑦᑕᓗᓂ ᐱᓇᓱᐊᖃᑎᒌᒍᑎᑦᓴᓂᓪᓗ.
- ᓄᓇᓕᒻᒥ ᓵᓚᖃᕋᓱᐊᖃᑕᐅᓂᖅ: ᖃᕆᑕᐅᔭᒥᑦ ᐱᒍᓐᓇᑕᓯ ᐊᑑᑎᔭᐅᖃᑦᑕᓛᕐᑐᓄᑦ ᐅᓪᓗᖁᑎ ᑐᓴᐅᒪᑎᑦᓯᖃᑦᑕᓗᓯᓗ ᐃᓚᐅᓂᑦᓯᓂᒃ ᖃᕆᑕᐅᔭᒃᑯᑦ ᑐᓴᐅᒪᑎᑦᓯᒍᑎᑎᒍᑦ ᐱᑐᖃᑎᒋᓗᒋᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᓵᓚᖃᐅᑎᑖᑐᐃᓐᓇᕆᐊᖃᕐᓗᑎᑦ, ᓵᓚᖃᐅᑎᐅᓛᕐᒥᑎᓪᓗᒍ iPad.
- ᐊᑭᓐᓇᒥᐅᑌᑦ: ᐃᓄᒻᒪᕇᑦ ᐅᓪᓗᖁᑎᖓᓅᓕᖓᔪᑦ ᐊᑭᓐᓇᒥᐅᑌᑦ ᓄᐃᑕᑎᑕᐅᖃᑦᑕᓛᕐᑐᑦ ᓄᓇᓕᓐᓂ ᓱᖃᑦᓯᕕᓐᓂ, ᐃᓕᓴᕐᕕᓂ, ᐋᓐᓂᐊᕕᓐᓂᓗ.
- ᓈᓚᐅᑎᒃᑰᓃᑦ: ᑐᓵᒐᓱᐊᖃᑦᑕᓗᓯ ᓇᐅᓕᒫᓂᒃ ᑐᓴᐅᒪᑎᑦᓯᒍᑎᑦᑎᓂᒃ ᑐᓴᐅᑎᒃᑯᑦ ᓰᐲᓰᒃᑯᓗ.
ᓄᓇᕕᒻᒥ ᐃᓄᒻᒪᕆᓐᓄᑦ ᐅᓪᓗᖁᑎ ᓇᐅᓕᒫᓂᒃ ᑐᓴᐅᒪᑎᑦᓯᒍᑕᐅᑎᓪᓗᒍ ᐊᑑᑎᔭᐅᓛᕐᑐᑦ:
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐃᓘᓐᓀᓂᒃ ᐃᓚᐅᑦᓯᐊᖁᔨᓚᐅᔪᕗᒍᑦ ᓄᓇᕕᒻᒥ ᐃᓄᒻᒪᕇᑦ ᐅᓪᓗᖁᑎᖓᓂ ᓄᓇᓕᒻᒥ ᓵᓚᖃᐅᑎᑖᕋᓱᐊᓛᕐᑐᓄᑦ ᖃᕆᑕᐅᔭᕐᒥᑦ ᐱᓗᒋᑦ ᓱᒐᑦᓴᖃᕐᑎᓯᓂᕐᒧᑦ ᐅᓪᓗᖁᑎᒥᒃ ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᑎᓐᓂᑦ ᐃᓚᐅᑦᓯᐊᖁᔨᓚᐅᔪᑦᓱᑕᓗ ᐅᒃᑑᐸᓕᒫᒥ 2024-ᒥ. ᐃᓚᐅᖁᔨᖃᑦᑕᖁᔨᑦᓱᑕ ᐃᓚᓐᓈᓯᓐᓂᒃ, ᐃᓚᑦᓯᓂᒃ, ᐱᓇᓱᖃᑎᑦᓯᓂᓪᓗ ᖁᕕᐊᓲᑎᖃᕐᑎᓗᑕ ᐃᓄᒻᒪᕆᖁᑎᑦᑎᓂᒃ - ᓇᑯᕐᒦᒃ ᑲᑦᓱᙰᑦᑐᓯᐊᒍᓚᐅᔪᓂᑦᓯᓄᑦ, ᑲᔪᓯᓂᖃᑦᓯᐊᓚᐅᔪᕗᖅ ᓱᒐᑦᓴᖃᕐᑎᓯᓂᕗᑦ !
ᑕᕝᕙᓂ ᐊᕐᕌᒍᒥ, ᓵᓚᓐᓃᔨᐊᖃᓚᐅᔪᕗᒍᑦ ᙯᑦᓯᔪᕕᓂᕐᒥᒃ ᐊᑦᔨᖁᑎᒥᒃ ᐊᑖᑕᒥᓂᒃ ᐃᓄᒻᒪᕆᐅᓕᕐᑐᒥᒃ ᐱᖕᖑᐊᖃᑎᖃᕐᓱᓂ, ᑕᒪᒻᒥᓗ iPad-ᑖᕐᓱᑎᒃ ᓂᐅᕕᕐᕕᒥᓂᑕᕐᒥᓗ ᓄᐃᓚᑦᓴᒥᒃ ᓵᓚᓐᓃᒍᑎᑖᕐᓱᑎᒃ. ᐅᓪᓗᖁᑎᓯ ᑕᕐᓯᓯᐊᕐᓯᒋᑦ ᐊᕐᕌᒍ ᐱᓕᐅᑎᓂᐅᓛᕐᑑᑉ ᖃᖓᐅᓛᕐᓂᖓᓂᒃ ᐃᓚᐅᑦᓯᐊᖁᓇᓛᕐᓱᓯᓗ ᐅᐱᒋᔭᖃᓕᕈᑦᑕ ᓄᓇᕕᒻᒥᐅᑦ ᐃᓄᒻᒪᕆᖏᓐᓂᒃ.
ᓇᑯᕐᒦᒃ ᐃᓚᐅᑦᓯᐊᓂᕋᑦᓯ ᓴᐳᑦᔨᓯᐊᕐᓱᓯᓗ !
ᖃᐅᔨᒋᐊᕐᕕᓴᖅ
ᐊᐱᕐᓲᑎᑦᓴᖃᕈᑦᓯ ᖃᓄᑐᐃᓐᓇᖅ, ᖃᐅᔨᒋᐊᕐᕕᐅᒍᓐᓇᑐᖅ: coordinator.wellbeing.elder@ssss.gouv.qc.ca.
(PPO | ᒪᑭᑕᑦᓯᐊᕆᐊᖃᕐᓂᖏᓐᓄᑦ ᐃᓄᒻᒪᕇᑦ ᑲᒪᒋᔭᐅᑦᓯᐊᕆᐊᖃᕐᓂᖏᓐᓄᓗ)
ᑲᑎᖃᑦᑕᑕ ᐅᐱᒍᓱᓪᓗᑕ, ᓴᐳᑦᔨᓗᑕ ᖁᕕᐊᓲᑎᖃᕐᓗᑕᓗ ᐃᓄᒻᒪᕆᑦᑎᓂᒃ !