ᑐᓂᒪᒍᑎᖃᕐᓂᖅ ᓴᐳᒻᒥᒋᐊᖃᕐᓂᒥᒃ ᐃᓄᒻᒪᕆᑦᑎᓂᒃ
ᖁᕕᐊᓲᑎᖃᕐᓂᖅ ᐃᓄᒻᒪᕆᑦᑎᓂᒃ, ᒪᑭᑕᑦᓯᐊᕆᐊᖃᕐᓂᖏᓐᓂᒃ ᓴᐳᒻᒥᓂᖅ
ᐃᓄᒻᒪᕆᑦᑕ ᒪᑭᑕᑦᓯᐊᕆᐊᖃᕐᓂᖓᓂᒃ ᓄᓇᓕᑦᑎᓂ ᐃᑉᐱᒋᔭᖃᕈᒪᕗᒍᑦ. ᓲᓱᒋᓗᒋᑦ ᐅᐱᒋᓗᒋᓪᓗ ᐃᓄᐃᑦ ᐃᓕᕐᖁᓯᕆᒻᒪᐅᒃ ᑲᒪᒋᑦᓯᐊᓗᒋᑦ. ᐃᓕᑕᕐᓯᒪᒐᒥᒃ ᐃᓄᒻᒪᕇᑦ ᐊᑦᑕᓀᑦᑐᒦᑦᓯᐊᕆᐊᖃᕐᓂᖓᓂᒃ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᓯᕗᒻᒧᕆᐊᕈᑎᖃᕐᓯᒪᕗᑦ ᐱᒋᐊᕐᑎᓯᓂᒃᑯᑦ ᓄᓇᕕᒻᒥ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓᓄᑦ ᐅᓪᓗᖁᑎᒥᒃ ᔫᓂ 15, 2024-ᒥ.
ᓇᐅᓕᒫᓂᒃ ᑐᓴᐅᒪᑎᑦᓯᓂᕐᒧᑦ ᑐᕌᒐᑦᑎᓄᑦ ᑎᑭᐅᑎᒐᓱᐊᕈᑎᕗᑦ
ᐃᓄᒻᒪᕇᑦ ᐊᑐᕐᓂᓗᑦᑕᐅᓂᕆᓲᖓ ᓱᕐᕃᓯᒪᓪᓚᕆᑦᑐᐊᓘᕗᖅ ᓄᓇᓕᓕᒫᓂᒃ ᓯᓚᕐᔪᐊᓕᒫᒥ, ᓄᓇᕕᒻᒥ ᑌᒣᒻᒥᓱᓂ. ᐆᖃᔭᐅᔪᐃᑦᑑᒐᓗᐊᕐᑎᓗᒍ, ᐅᒃᑯᐃᖔᕈᑎᒋᔭᐅᑦᓯᐊᓗᓂ ᐅᖄᒍᑕᐅᖃᑦᑕᕆᐊᖃᕐᐳᖅ ᐃᓄᒻᒪᕆᕗᑦ ᓱᒃᑯᓇᕐᑐᒨᖁᓇᒋᑦ. ᓄᓇᕕᒻᒥ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓᓄᑦ ᐅᓪᓗᖁᑎ ᐱᒋᐊᕐᑎᑕᐅᓯᒪᕗᖅ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ ᐃᓚᐅᑎᓪᓗᒍ ᐊᐅᓚᑦᔭᕆᐊᕈᑕᐅᓂᖓᓄᑦ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓ, ᐱᓇᓱᐊᕐᑕᐅᕙᑦᑎᓗᒋᑦ ᐃᑯᓪᓚᑎᑦᓯᒋᐊᕈᑎᑦᓭᑦ, ᖃᐅᔨᒪᒍᓐᓇᐅᑏᑦ ᑲᒪᒍᓰᓪᓗ ᐃᓄᒻᒪᕇᑦ ᐊᑐᕐᓂᓗᑦᑕᐅᑌᓕᒋᐊᖃᕐᓂᖓᓂᒃ. ᑐᕌᒐᖃᕐᑐᒍᑦ ᑲᖐᒋᔭᐅᑎᑦᓯᒋᐊᖃᕐᓂᒥᒃ, ᐃᓕᓭᖃᑦᑕᕆᐊᖃᕐᓂᒥᓪᓗ ᓄᓇᓕᒻᒦᑐᓂᒃ, ᐃᒻᒥᓂᓪᓗ ᐊᐅᓚᑦᓯᒍᓐᓇᓯᒋᐊᖃᕐᓂᖏᓐᓂᒃ ᐊᑕᐅᓯᐅᑦᑎᑐᑦ ᐃᑉᐱᒋᔭᖃᑦᓯᐊᖃᑦᑕᓂᐊᕐᓗᑎᒃ ᐊᑦᑕᓀᑦᑐᒦᒋᐊᖃᕐᓂᖏᓐᓂᒃ ᐅᐱᒋᔭᐅᒋᐊᖃᕐᓂᖏᓐᓂᓗ ᐃᓄᒻᒪᕆᑦᑕ.
ᓇᐅᓕᒫᓂᒃ ᑐᓴᐅᒪᑎᑦᓯᒍᑎᑦᓭᑦ
ᓇᐅᓕᒫᓂᒃ ᑐᓴᐅᒪᑎᑦᓯᓂᖅ, ᔫᓂ 10-15, 2024-ᒥ, ᐃᓚᖃᕐᓂᖁᖅ ᐊᑦᔨᒌᖕᖏᑐᓂᒃ ᑐᓴᐅᒪᑎᑦᓯᒍᑕᐅᒋᐊᓕᓐᓂᒃ ᑐᕌᒐᖃᕈᑕᐅᔪᓂᒃ ᓄᓇᓕᒻᒦᑐᑦ ᐃᓚᐅᑦᓯᐊᑎᓂᐊᕐᓗᒋᑦ ᓲᓱᒋᔭᐅᓂᖃᕐᓂᐊᑎᓪᓗᒋᑦ ᑲᒪᒋᔭᐅᓂᖃᕐᓂᐊᑎᓪᓗᒋᓪᓗ ᐃᓄᒻᒪᕆᕗᑦ:
- ᓱᓕᓗ, ᐱᓇᓱᐊᕐᑕᐅᔪᑦᓴᖃᕈᒪᐅᑎᓂᒃ ᓄᐃᑦᓯᓯᒪᔪᒍᑦ ᑐᓴᕐᑎᓯᑦᓱᑕ ᓄᓇᓕᓐᓂ ᐃᓄᒻᒪᕆᓕᓂᕐᒧᑦ ᐊᑕᐅᑦᓯᑰᕐᑎᓯᔨᓂᒃ, ᐊᑐᐃᓐᓇᕈᕐᑎᕆᖁᓯᒪᑦᓱᒋᑦ ᓱᑎᑦᓯᒍᑎᑦᓴᓂᒃ ᓄᓇᕕᒻᒥ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓᓄᑦ ᐅᓪᓗᖁᑎᓕᐊᒍᓯᒪᔪᒥ.
- ᑭᖑᓪᓕᐸᐅᑎᓪᓗᒍ, ᖃᐅᔨᒪᔭᐅᑎᑦᓯᒍᑦᑕ ᓇᐅᓕᒫᓂᒃ ᑐᓴᐅᒪᑎᑦᓯᒍᑎᓂᒃ ᑕᕐᕋᒥᐅᑦ ᓂᐱᖓᑎᒍᑦ ᑐᓴᐅᒪᔭᐅᑦᓯᐊᓂᕐᓴᐅᒐᔭᕋᑦᑕ ᑐᑭᓯᒪᔭᐅᖁᔭᑦᑎᓂᒃ ᐊᒥᓲᓂᕐᓭᑦ ᑐᓴᐅᒪᓕᕋᔭᕐᒪᑕ.
ᐃᒣᓕᖓᓯᒪᔪᖅ
ᐱᒋᐊᕐᑎᑕᐅᓂᕆᓚᐅᔪᔭᖓ ᓄᓇᕕᒻᒥ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓᓄᑦ ᐅᓪᓗᖁᑎᐅᑉ ᑲᔪᓯᑎᑕᐅᑦᓯᐊᓚᐅᔪᕗᖅ. ᓄᓇᓕᒻᒦᑐᑦ ᐃᓚᐅᑦᓯᐊᑎᓪᓗᒋᑦ ᑐᓴᕋᑦᓴᑎᒍᑦ ᐃᓄᑦᓯᐊᒍᖃᑎᒌᓐᓂᖅ ᓄᐃᑕᑎᑕᐅᑦᓯᐊᑎᓪᓗᒍ. ᓄᓇᓕᓂᓪᓗ ᐱᒋᐊᕐᑎᑕᐅᔪᓂᒃ ᐊᑦᔨᒌᖕᖏᑐᓂᒃ ᓱᒐᑦᓴᖃᕐᑎᓯᖃᑦᑕᓱᑎᒃ. ᑕᒪᒃᑯᐊ ᓱᑎᑦᓯᓃᑦ ᑲᖐᒋᔭᐅᑎᑦᓯᓂᑐᐊᒥᒃ ᓄᐃᑦᓯᒍᑕᐅᓚᐅᔪᖕᖏᓚᑦ ᑭᓯᐊᓂᓕ ᓄᓇᓕᓐᓃᑐᑦ ᖃᓂᓪᓕᒋᐊᖃᑎᒌᓐᓂᑕᖃᓚᐅᔪᒋᕗᑦ, ᐃᕐᙯᒋᐊᕈᑎᐅᑦᓱᓂ ᐃᓄᒻᒪᕆᑦᑎᓂᒃ ᐱᓪᓚᕆᐅᑎᑦᓯᒋᐊᖃᕐᓂᑎᓐᓂᒃ ᐃᓅᓯᑦᑎᒍᑦ.
ᓯᕗᒧᐊᕆᐊᑦᓯᐊᓂᖅ: ᓄᓇᕕᒻᒥ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓᓄᑦ ᐅᓪᓗᖁᑎᖓ 2025-ᒥ
ᑕᕝᕙᓂ ᐊᕐᕌᒍᒥ ᓇᐅᓕᒫᓂᒃ ᑐᓴᐅᒪᑎᑦᓯᓂᐅᑉ ᑲᔪᓯᑦᓯᐊᓯᒪᓂᖓᓄᑦ, ᓄᓇᕕᒻᒥ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓᓄᑦ ᐅᓪᓗᖁᑎᖓᓂᒃ ᐊᕐᕌᒍᑕᒫᑦ ᐊᑑᑎᑦᓯᖃᑦᑕᕈᒪᓯᒪᕗᒍᑦ. ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᓇᓱᖃᑎᖃᑦᓯᐊᖃᑦᑕᓛᕐᑐᑦ ᓄᓇᓕᓐᓃᑐᓂᒃ ᑕᒪᓐᓇ ᑕᕝᕙᓂ ᐊᕐᕌᒍᒥ ᐊᑑᑎᓯᒪᔪᖅ ᑲᔪᓯᑎᑦᓯᐊᕈᒪᑦᓱᒍ, ᓯᕗᓪᓕᐅᔨᖏᓐᓇᕆᐊᖃᕋᑦᑕ ᐃᓄᒻᒪᕆᑦᑕ ᐊᑦᑕᓀᑦᑐᓯᐊᒦᒋᐊᖃᕐᓂᖓᓂᒃ ᒪᑭᑕᑦᓯᐊᕆᐊᖃᕐᓂᖏᓐᓂᓗ.
ᐸᕐᓀᕈᑎᖃᓕᕋᑦᑕ ᐊᕐᕌᒍ 2025-ᒥ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖓᓄᑦ ᐅᓪᓗᖁᑎᐅᓛᕐᑐᒥᒃ, ᓄᓇᓕᓕᒫᓂᒃ ᐱᓇᓱᖃᑎᖃᑦᓯᐊᕈᒪᕗᒍᑦ, ᐃᓱᒪᑖᕆᓯᒪᔭᒥᓂᒃ ᑐᓴᕐᑎᓯᖃᑦᑕᓗᑎᒃ ᐅᕙᑦᑎᓂᒃ, ᐃᓚᐅᖃᑦᑕᓗᑎᓪᓗ ᓄᓇᕕᒻᒥ ᐊᑦᑕᓀᑦᑐᓯᐊᒍᓂᕐᓴᐅᑎᑦᓯᒐᓱᐊᕐᑐᓄᑦ ᐃᓄᒻᒪᕆᓐᓄᑦ ᓇᔪᕋᑦᓴᓯᐊᒍᓂᐊᕐᑎᓗᒍ. ᐊᑕᐅᑦᓯᑯᑦ, ᐱᓇᓱᖃᑎᒌᒍᓐᓇᐳᒍᑦ ᐃᓄᒻᒪᕇᑦ ᓇᓪᓕᒋᔭᐅᑦᓯᐊᑎᓪᓗᒋᑦ, ᓴᐳᒻᒥᔭᐅᑦᓯᐊᓗᑎᒃ, ᑲᒪᒋᔭᐅᑦᓯᐊᑎᓪᓗᒋᓪᓗ ᓲᓱᒋᔭᐅᓗᑎᒃ ᐅᐱᒋᔭᐅᓗᑎᓪᓗ ᑌᒣᒋᐊᖃᕋᓗᐊᕐᒪᑕ.
ᑐᓴᐅᒪᒐᓱᐊᑦᓯᐊᕆᑦ
ᑐᑭᓯᒋᐊᓪᓚᕈᒪᒍᕕᑦ ᓄᓇᕕᒻᒥᐅᑦ ᐃᓄᒻᒪᕇᑦ ᐊᑦᑕᓀᑦᑐᓯᐊᒦᒋᐊᖃᕐᓂᖏᑦᑕ ᓇᐅᓕᒫᓄᑦ ᑐᓴᐅᒪᔭᐅᒋᐊᖃᕐᓂᖓ ᐱᓪᓗᒍ ᖃᓄᕐᓗ ᐃᑲᔪᕈᓐᓇᒪᖔᕐᐱᑦ, ᑕᑯᒋᐊᖃᑦᑕᕈᓐᓇᐳᑎᑦ ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᑎᓐᓂᒃ, ᑕᑯᒋᐊᖃᑦᑕᓗᑎᑦ ᐃᓗᓯᓕᕆᔨᒃᑯᑦ Facebook-ᖓᓂᒃ, ᖃᐅᔨᒋᐊᕐᕕᖃᕐᓗᑎᓪᓘᓃᑦ ᐱᓇᓱᖃᑎᑦᑎᓂᒃ.
ᓴᐳᑦᔨᒍᓐᓇᐳᒍᑦ ᐃᓕᑦᓯᓂᒃ.