ᐃᓅᓯᕐᒥᒃ ᑭᐱᓯᑦᑌᓕᒍᑎᑦᓭᑦ

ᐃᒻᒥᓂᐊᕐᑌᓕᒪᓂᕐᒥᒃ ᐃᓕᑕᕆᔭᐅᔪᖃᕐᓯᒪᕗᖅ ᓄᓇᓕᓕᒫᓄᑦ ᓯᕗᓪᓕᐅᔭᐅᒪᒋᐊᖃᕐᑎᓗᖑ ᐱᓇᓱᐊᖃᑕᐅᓲᓕᒫᓄᑦ ᑖᒃᑯᓄᖓ ᓄᓇᕕᒻᒥ ᐃᓗᓯᓕᕆᔨᓄᑦ.  ᓄᓇᓕᓕᒫᓄᐊᖓᔪᒥᒃ ᑲᑎᒪᔨᐊᐱᓐᓂᒃ ᐱᕙᓪᓕᐊᑎᑦᓯᔪᖃᕐᓯᒪᓕᕐᑐᖅ ᐸᕐᓇᓯᒪᐅᑎᐅᓂᐊᕐᑐᓂᒃ ᐃᒣᓕᒋᐊᖁᔨᒍᑎᓂᓪᓗ ᐃᑯᓪᓚᐅᒥᑎᑦᓯᒋᐊᕈᑎᑦᓴᐅᓂᐊᕐᑐᓂᒃ ᐃᒻᒥᓂᐊᕐᓂᒥᒃ ᓄᓴᕕᒻᒥ.  ᑐᖕᖓᕕᒋᓗᒋᑦ ᐃᒣᓕᒋᐊᖁᔨᒍᑎᐅᓯᒪᔪᑦ, ᐱᓇᓱᐊᖃᑕᐅᔪᓕᒫᑦ ᒫᓐᓇᑯᑦ ᑲᔪᓯᑎᑦᓯᒋᐊᕋᓱᐊᓕᕐᑐᑦ ᓱᓇᓱᐊᕐᑕᐅᒋᐊᖃᓗᐊᖑᐊᑐᓂᒃ.

ᓱᓇᐅᒻᒪᖔᑕ ᐃᒻᒥᓂᐊᕐᑌᓕᒪᓂᕐᒧᑦ ᓱᓇᓱᐊᕐᑕᐅᒋᐊᓖᑦ ᐊᒻᒪᓗ ᐱᒋᐊᕐᑎᑕᐅᒋᐊᓖᑦ

ᐃᒻᒥᓂᐊᕐᑌᓕᒪᓂᕐᒧᑦ ᐊᕐᖁᑎᒋᔭᐅᒍᓐᓇᑐᑦ ᐱᓇᓱᑦᑎᖏᑦ
ᐊᑐᕐᑎᑕᐅᔪᑦ ᐃᒻᒥᓂᐊᕐᑌᓕᒪᓂᕐᒧᑦ ᑲᒪᒋᐊᕐᕈᓯᐅᒍᓐᓇᑐᓂᒃ ᐃᓕᓐᓂᐊᑎᑦᓯᒍᑏᑦ®
ᐳᑦᑕᐅᑏᑦ ᑲᑎᒪᓂᒻᒪᕆᖓᑦ: ᓄᓇᓕᓕᒫᓂᒃ ᒪᒥᓭᓂᕐᒧᑦ ᑲᑎᒪᓂᒻᒪᕆᖃᕐᑎᓯᓂᖅ
ᐃᒻᒥᓂᐊᕐᓂᖅ ᑐᖁᒍᑎᐅᒍᓐᓇᓂᖓᓄᑦ ᐊᒻᒪᓗ ᐃᒻᒥᓂᐊᕋᓱᐊᕐᓯᒪᔪᓂᒃ ᐃᑉᐱᒋᔭᖃᕈᑎᐅᓲᑦ ᓄᓇᕕᒻᒥ
ᐊᓯᖏᑦ ᑲᔪᓯᔪᑦ ᐱᓇᓱᐊᕐᑕᐅᔪᐃᑦ.

ᐃᒻᒥᓂᐊᕐᑌᓕᒪᓂᕐᒥᒃ ᐊᕐᖁᑎᒋᔭᐅᓲᑦ ᐱᓇᓱᑦᑎᖏᑦ

ᖃᒻᒥᑯᑦ ᒪᕐᕈᐃᓂᒃ ᓄᓇᓕᖃᕐᕕᐅᔪᓄᑦ ᖃᓄᐃᓕᖓᒍᑕᐅᓂᐊᕐᑐᓂᒃ ᑕᒪᑦᓱᒧᖓ ᐃᒻᒥᓂᐊᕐᑌᓕᒪᔪᓕᕆᓂᕐᒧᑦ ᓄᐃᑕᐅᔪᖃᕐᓯᒪᓕᕐᑐᖅ ᐊᒻᒪᓗ ᒪᕐᕉᓂᒃ ᐃᒻᒥᓂᐊᕐᑌᓕᒪᔪᓕᕆᔩᑦ ᐱᓇᓱᑦᑎᖏᓐᓂᒃ ᐱᒋᐊᕐᑎᑕᐅᔪᖃᕐᓯᒪᑦᓱᓂ ᐊᑐᓂᑦ ᓄᓇᓕᓕᒫᑦ ᐊᓐᓂᐊᕕᖏᑦᑕ ᐃᓗᐊᓂ.  ᑖᒃᑯᐊ ᑐᕌᒐᖃᕐᑐᑦ ᑐᑭᒧᐊᑦᑎᓯᓂᐊᕆᐊᒥᒃ ᐃᒻᒥᓂᐊᕐᑌᓕᒪᔾᔪᑎᓕᕆᐅᑎᐅᓂᐊᕐᑐᓂᒃ ᓄᓇᓕᓐᓂ, ᐊᕐᕿᓱᐃᓗᑎᓪᓗ ᐊᑦᔨᒋᖏᑐᓂᒃ ᐃᒻᒥᓂᐊᕐᑌᓕᒪᓂᕐᒧᑦ ᓱᓇᓱᐊᕐᑕᐅᓂᐊᕐᑐᓂᒃ, ᐊᒻᒪᓗ ᓴᐳᒻᒥᒍᑎᓂᒃ ᓄᓇᓕᓐᓂᒃ, ᐱᓇᓱᐊᖃᑕᐅᔪᓂᓪᓗ ᐊᒻᒪᓗ ᓄᓇᓕᓐᓂ ᖃᓄᐃᓕᐅᕐᑎᐅᓲᓂᒃ ᐊᕐᕿᓱᕐᑕᐅᔪᖃᕐᑎᓗᒍ ᓄᓇᓕᓐᓄᐊᖓᔪᓂᒃ ᐱᓇᓱᐊᕐᑕᐅᒋᐊᓕᓐᓂᒃ.

ᐊᑐᕐᑎᑕᐅᔪᑦ ᐃᒻᒥᓂᐊᕐᑌᓕᒪᔪᓕᕆᐅᑎᓂᒃ ᐃᓕᓐᓂᐊᑎᑦᓯᒍᑕᐅᓂᖓᓄᑦ

ᑖᒃᑯᐊ ᐃᓕᓐᓂᐊᑎᑦᓯᒍᑏᑦ ᐱᕕᖃᕐᑎᑕᐅᒍᓐᓇᓂᐊᕐᑐᑦ ᑲᒪᒋᔭᖃᓲᓄᑦ ᑲᒪᒋᔭᖃᑦᓯᐊᓂᕐᓴᐅᖁᓪᓗᒋᑦ ᐃᓄᑑᓇᕐᑎᑐᒥᒃ ᐃᒻᒥᓂᐊᕐᑐᐃᓐᓇᕆᐊᖃᕐᑐᒥᒃ.  ᑖᒃᑯᐊ ᐃᓕᓐᓂᐊᑎᑦᓯᒍᑏᑦ ᑐᕌᖓᑎᑕᐅᔪᑦ ᐱᕙᓪᓕᐊᑎᑕᐅᔪᖃᕐᓂᐊᑎᓪᓗᖑ ᒪᑯᓂᖓ: 1) ᖃᓄᖅ ᐃᓕᑕᕆᔭᐅᔪᖃᕈᓐᓇᒪᖔᑦ ᐃᒻᒥᓂᐊᕈᒪᑐᐃᓐᓇᕆᐊᓕᓐᓂᒃ; 2) ᖃᓄᓕᐅᖃᑎᖃᕆᐊᖃᕐᒪᖔᑕ ᐃᓄᒻᒥᒃ ᐃᒻᒥᓂᐊᕈᒪᓂᖃᑐᐃᓐᓇᕆᐊᓕᒻᒥᒃ; ᐊᒻᒪᓗ 3) ᖃᓄᖅ ᓴᐳᒻᒥᔭᐅᒍᓯᖃᓲᖑᒻᒪᖔᑦ ᐃᓄᒻᒥᒃ ᐃᒻᒥᓂᐊᕈᒪᓂᖃᕐᑐᒥᒃ ᕿᓂᕐᑎᓗᒍ ᐃᑲᔪᕐᑕᐅᕕᑦᓴᒥᒃ.

ᓄᓇᕕᒻᒥ, ᓯᑕᒪᓂᒃ ᐃᓄᓐᓂᒃ ᐃᓕᑕᕆᔭᐅᒍᑎᑕᕐᓯᒪᔪᓂᒃ ᐃᓕᓐᓂᐊᑎᑦᓯᔨᐅᓂᐊᕐᑐᓂᒃ ᐃᓚᐅᔪᖃᕐᓂᐊᑐᖅ ᐱᕙᓪᓕᐊᑎᑕᐅᔪᖃᓕᕐᐸᑦ ᑲᔪᓯᑎᑕᐅᔪᖃᓕᕐᐸᓗ ᐃᒻᒥᓂᐊᕐᑌᓕᒪᔪᓕᕆᓂᕐᒧᑦ ᑲᑎᒪᓂᐊᕈᓯᕐᓂᒃ.

ᑲᔪᓯᑎᑦᓯᒍᒪᒍᕕᑦ ᐃᒻᒥᓂᐊᕐᑌᓕᒪᔪᓕᕆᓂᕐᒧᑦ ᑲᑎᒪᓂᐊᕈᓯᕐᓄᑦ ᐅᕝᕙᓘᓐᓃᑦ ᐊᐱᕆᐅᑎᑦᓴᖃᕈᕕᑦ ᑕᒪᑦᓱᒧᖓ ᐃᓕᖓᔪᒧᑦ, ᖃᖓᓕᒫᒃᑯᑦ ᐅᖄᓚᕕᖃᕈᓐᓇᐳᑎᑦ ᒫᑕ ᐃᓄᑉᐸᒃ-ᐃᖃᓗᒻᒧᑦ, ᑲᒪᔨᐅᔪᒧᑦ ᐅᕗᖓ (819) 254-8029 ᐅᕝᕙᓘᓐᓃᑦ ᖃᕆᐅᑕᔭᒃᑯᑦ ᐅᕗᖓ 
suicide.prevention.liaison.worker.inukjuak@ssss.gouv.qc.ca.

ᐳᑦᑕᐅᑏᑦ ᑲᑎᒪᓂᒻᒪᕆᖓᑦ: ᓄᓇᕕᒻᒥ ᓄᓇᓕᓕᒫᑦ ᒪᒥᓭᓂᕐᒧᑦ ᑲᑎᒪᓂᒻᒪᕆᖓᑦ

ᐃᓅᓯᕐᑎᒍᑦ ᖃᓄᐃᓕᐅᖃᑎᒋᑦᓯᐊᓂᕐᒧᑦ ᑲᑎᒪᓂᒻᒪᕆᖃᕐᓯᒪᓂᑯᖓᓄᑦ ᒪᓐᑐᔨᐊᒥ, ᑖᓐᓇ ᑲᑎᒪᓂᒻᒪᕆᒃ ᑐᕌᒐᖃᕐᓂᐊᑐᖅ ᐃᓄᓐᓂᒃ ᖃᐅᔨᔭᐅᑎᑦᓯᓂᐅᓴᒐᓱᐊᕐᓂᒥᒃ, ᑫᓪᓗᑐᐃᓂᕐᒥᓗ ᒪᒥᓴᕐᓂᒥᒃ ᖃᓄᐃᖏᓯᐊᕐᓂᒥᓪᓗ ᓄᓇᓕᓐᓄᑦ ᐃᓚᐅᔪᓄᑦ, ᐊᒻᒪᓗ ᑕᒪᒃᑯᐊ ᑲᒪᒋᐊᕈᓐᓇᑐᐃᑦ ᓴᐳᒻᒥᔭᐅᓯᒪᓂᐊᖁᓪᓗᒋᑦ ᐃᓕᓐᓂᐊᑎᑕᐅᓗᑎᓪᓗ.  ᑖᒃᑯᐊ ᐳᑦᑕᐅᑏᑦ ᑲᑎᒪᓂᒻᒪᕆᖓᑕ ᓯᕗᓪᓕᐹᖓᓂ ᑲᔪᓯᑎᑕᐅᔪᖃᓚᐅᔪᕗᖅ ᐅᑦᑑᐱᕆ 2015-ᒥ ᐳᕕᕐᓂᑐᒥ.

ᐃᒻᒥᓂᐊᕐᓂᖅ ᑐᖁᒍᑕᐅᓲᖑᓂᖓᓄᑦ ᐊᒻᒪᓗ ᐃᒻᒥᓂᐊᕋᓱᐊᕐᓯᒪᔪᒥᒃ ᐃᑉᐱᒋᔭᖃᕐᑎᓯᓂᕐᒧᑦ ᓄᓇᕕᒻᒥ

ᐃᑉᐱᒋᔭᖃᕈᑎᑦᓴᒧᑦ ᓴᓇᕐᕈᑎᑦᓴᖏᓐᓂᒃ ᑲᒪᒋᔭᖃᑦᓴᐅᑎᒋᓲᓅᓕᖓᔪᓂᒃ ᐱᕙᓪᓕᐊᑎᑕᐅᔪᖃᕐᐸᓕᐊᕗᖅ.  ᑖᒃᑯᐊ ᓴᓇᕐᕈᑏᑦ ᐃᑲᔪᕐᓯᓂᐊᕐᑐᑦ ᓄᐊᑕᐅᔪᖃᓕᕐᐸᑦ ᓱᓕᓂᖃᑦᓯᐊᑐᓂᒃ ᐊᖑᒪᑦᓯᑎᑕᐅᑦᓯᐊᑐᓂᓪᓗ ᑐᑭᓯᒪᐅᑎᑦᓴᓂᒃ ᓴᐳᒻᒥᒍᑎᐅᓂᐊᕐᑐᓄᑦ ᑲᒪᒋᐊᕐᓂᒥᒃ ᐱᓕᐅᒥᑎᑦᓯᒋᐊᕐᓗᑎᓪᓗ ᓯᕗᓂᑦᓴᒥ ᑌᒣᓕᑎᑦᓯᑌᓕᒪᒍᑎᑦᓴᒧᑦ ᐸᕐᓇᓯᒪᐅᑎᐅᓂᐊᕐᑐᓂᒃ.

ᐊᓯᖏᓄᑦ ᐱᓇᓱᐊᕐᑕᐅᒥᔪᕐᓄᑦ

 

  • ᖃᐅᔨᓴᕐᑕᐅᔪᖃᕐᓱᓂ: ᐊᕐᖁᑎᐅᒍᓐᓇᑐᓄᑦ ᓂᐳᕐᓯᒣᓐᓇᕈᑎᑦᓴᓄᑦ ᐊᒻᒪᓗ ᐃᒻᒥᓂᐊᕐᑌᓕᒪᓂᕐᓄᑦ
  • ᐱᕙᓪᓕᐊᑎᑕᐅᔪᖃᕐᓱᓂ ᑐᑭᒧᐊᒍᑎᑦᓴᓂᒃ ᓄᓇᓖᑦ ᐊᐅᓚᑦᔭᕆᐊᕈᑎᑦᓴᖏᓐᓄᑦ ᐃᓕᓐᓂᐊᑎᑕᐅᓂᑦᓴᖏᓐᓄᓗ ᐱᐅᓂᕐᐹᓯᐅᕐᓗᑎᒃ ᐃᒻᒥᓂᐊᕐᑌᓕᒪᔪᓕᕆᐅᑎᑦᓴᓂᒃ ᓄᓇᕕᒻᒨᓕᖓᑎᑕᐅᔪᕐᒧᑦ
  • ᐱᕙᓪᓕᐊᑎᑕᐅᔪᖃᕐᓱᓂ ᓄᓇᓕᓕᒫᑦ ᐃᒻᒥᓂᐊᕐᑌᓕᒪᓂᕐᒧᑦ ᐃᑲᔪᕐᕕᓴᒧᑦ ᐅᖄᓚᐅᑎᒃᑯᑦ ᐊᒻᒪᓗ ᐃᓕᓐᓂᐊᑎᑦᓯᒍᑎᐅᒍᓐᓇᑐᓂᒃ ᑲᒪᒋᐊᕈᑎᐅᒍᓐᓇᑐᓂᓪᓗ ᖃᕆᑕᐅᔭᕐᑎᒍᑦ

ᑐᑭᓯᒋᐊᑦᓯᐊᕈᒪᒍᑦᓯ ᐊᓯᖏᓐᓂᓗ ᐃᒻᒥᓂᐊᕐᑌᓕᒪᓂᕐᒧᑦ ᓱᓇᓱᐊᕆᐊᕈᑕᐅᓯᒪᔪᓄᑦ, ᑕᑯᒋᐊᕐᓗᒋᑦ ᐅᕙᓂ ipqnunavik.com