ᓄᓇᓕᒻᒥ ᐱᒍᑦᔨᕖᑦ

ᖄᖏᕐᓂᑯᓕᐅᖏᑐᑦ ᓄᓇᓖᑦ ᑎᒥᖁᑎᖏᑦ ᐱᐅᓯᓕᐅᒥᑎᑦᓯᖃᑕᐅᓲᖑᕗᑦ ᐃᓅᓯᖃᕐᓂᒥᒃ ᐊᒻᒪᓗ ᐃᓅᕕᖃᕐᓂᒥᒃ ᓄᓇᓕᖏᓐᓂ.  ᑖᒃᑯᐊ ᐃᑉᐱᒋᔭᖃᖃᑕᐅᓲᑦ ᐱᒍᑦᔨᒍᑎᒋᔭᐅᓲᓂᒃ ᐃᓄᓕᒫᓂᒃ ᖃᓄᐃᖏᓯᐊᕐᓂᓕᕆᓂᕐᒧᑦ ᐃᓄᓕᕆᓂᕐᒧᓗ ᑎᒥᖁᑕᐅᔪᓄᑦ.  ᓄᓇᓕᓐᓄᐊᖓᑦᓱᑎᒃ, ᐃᓂᖃᑦᓯᐊᓂᕐᐸᐅᔪᑦ ᑐᑭᓯᔭᐅᔪᖃᕋᓱᐊᕐᑎᓗᒍ ᓄᓇᓕᖏᑦᑕ ᑭᖕᖒᒪᒋᔭᖏᓐᓂᒃ. 
 
ᓄᓇᓖᑦ ᑎᒥᖁᑎᖏᑦᑕ ᐃᑲᔪᕐᓯᒪᐅᑎᖏᑦᑕ ᑐᕌᒐᖏᑦ
ᐱᕕᖃᕐᑎᑕᐅᒍᓐᓇᑐᐃᑦ ᐊᕐᕿᓱᕐᑕᐅᒪᒍᑎᖏᓐᓂᒃ 
ᑮᓇᐅᔭᓂᒃ ᑐᑦᓯᕋᕈᑏᑦ ᐱᒐᓱᐊᕈᑎᖏᓐᓂᒃ 
ᓄᓇᓖᑦ ᑎᒥᖁᑎᖏᑦ

ᓄᓇᓖᑦ ᑎᒥᖁᑎᖏᑦᑕ ᐃᑲᔪᕐᓯᒪᐅᑎᖏᑦᑕ ᑐᕌᒐᖏᑦ ᑐᕌᒐᖏᑦ:

  • ᓱᕐᖁᐃᑕᐅᑎᑦᓯᓗᓂ ᑫᓪᓗᑐᐃᓗᑎᓪᓗ ᓄᓇᓖᑦ ᑎᒥᖁᑎᖏᑦᑕ ᓱᓇᓱᐊᕐᓂᖏᓐᓂᒃ; 
  • ᓄᓇᓖᑦ ᑎᒥᖁᑎᖏᑦ ᑲᑎᒪᔨᖏᓪᓗ ᓴᐳᒻᒥᒍᒪᓂᖃᕐᓗᒋᑦ ᑐᑭᓯᑎᓗᒋᓪᓗ ᑲᔪᓯᑎᑦᓯᒋᐊᖃᕆᐊᖏᑦ ᓱᓇᓱᐊᕐᑕᒥᓂᒃ; 
  • ᓴᐳᒻᒥᓗᑎᒃ ᐱᕙᓪᓕᐊᑎᑕᐅᔪᖃᕐᑎᓗᒍ ᐱᓇᓱᑦᑎᖏᑦᑕ ᐱᓇᓱᐊᑦᓯᐊᕈᓐᓇᓂᖏᓐᓂᒃ; 
  • ᐊᐅᓚᑦᓯᒍᑎᓄᑦ ᑮᓇᐅᔭᖃᕐᑎᓯᑦᓯᐊᓗᑎᒃ ᓄᓇᓖᑦ ᑎᒥᖁᑎᖏᑦ; 
  • ᐱᒍᑦᔨᓂᖃᕐᑎᓯᓗᓂ ᓱᓇᓱᐊᕐᑎᓯᓗᓂᓗ ᒪᓕᓪᓗᒋᑦ ᐊᐅᓚᑦᓯᓯᐊᕋᓱᐊᕈᑎᐅᓲᑦ. 

ᐱᕕᖃᕐᑎᑕᐅᒍᓐᓇᑐᐃᑦ ᐊᕐᕿᓱᕐᑕᐅᒪᒍᑎᖏᓐᓂᒃ 

ᐱᕕᖃᕐᑎᑕᐅᒍᒪᑐᐊᕈᓂ ᓴᐳᒻᒥᒍᑎᒥᒃ ᑮᓇᐅᔭᓂᓪᓗ ᐃᑲᔪᕐᓯᒪᐅᑎᑎᒍᑦ, ᓄᓇᓖᑦ ᑎᒥᖁᑎᖓᑦ ᒪᑯᓂᖓ ᐊᕐᕿᓱᕐᓯᒪᐅᑎᖃᕆᐊᓕᒃ: 

  • ᐱᖁᔭᑎᒍᑦ ᑎᒥᐅᔫᒋᐊᓕᒃ, ᑯᐯᒃᑯᑦ ᐱᖁᔭᖏᓐᓄᑦ ᓄᐃᑕᐅᒪᓗᓂ ᐊᐅᓚᑦᓯᓂᖃᕐᑐᒥᒃ ᖄᖏᕐᓂᑯᓕᐅᕐᑎᐅᖏᓐᓂᒧᑦ ᑎᒥᐅᔫᓂᖓᓂᒃ; 
  • ᐊᐅᓚᑕᐅᓂᖃᕆᐊᓕᒃ ᑲᑎᒪᔨᓄᑦ ᐃᓄᑦᑕᖃᓗᐊᖑᐊᑐᒥᒃ ᐊᑐᓲᓂᒃ ᐱᒍᑦᔨᒍᑎᖏᓐᓂᒃ, ᐅᕝᕙᓘᓐᓃᑦ ᓄᓇᓕᓐᓄᑦ ᐱᒍᑦᔭᐅᓲᕐᒧᑦ ᐃᓚᐅᔪᓄᑦ, ᐊᒻᒪᓗ ᓱᓇᓱᐊᕐᓂᖏᑦ ᐱᕕᖃᕐᑎᓯᒍᑎᐅᑎᓪᓗᒋᑦ ᓴᐳᒻᒥᒍᑎᐅᓗᑎᓪᓘᓃᑦ ᖃᓄᐃᖏᓯᐊᕐᓂᓕᕆᓂᕐᒧᑦ ᐃᓄᓕᕆᓂᕐᒧᓗ ᐱᒍᑦᔨᓂᓕᕆᕕᒻᒥᒃ; 
  • ᒪᓕᑦᓯᐊᕆᐊᓕᒃ ᐊᐅᓚᑦᓯᓯᐊᕈᓯᕐᓂᒃ ᒪᓕᒐᕐᓂᓗ ᓄᐃᑕᐅᒪᔪᓂᒃ ᑯᐯᒃ ᑲᕙᒪᖓᓄᑦ.  ᑕᒪᓐᓇᐅᓂᖓᓄᑦ ᐊᐅᓚᑕᐅᓂᖃᓲᖑᒻᒪᑦ ᐱᖁᔮᐱᖏᓐᓄᑦ, ᐊᖏᕐᑕᐅᒪᓂᖃᕐᑐᓄᑦ ᑲᑎᒪᔨᖏᑦᑕ ᑲᑎᒪᓂᖏᓐᓄᑦ ᐊᒻᒪᓗ ᕿᒥᕐᕈᔭᐅᕙᑦᑐᓂᒃ ᔭᕆᐊᖃᓕᑐᐊᕐᒪᑕ; 
  • ᑲᔪᓯᑎᑦᓯᒋᐊᓕᒃ ᐃᑲᔪᕐᓯᒪᐅᑎᒃᑯᑦ ᓱᓇᓱᐊᕐᑕᐅᒋᐊᓕᓐᓂᒃ ᐃᓗᓐᓀᓄᑦ ᑐᕌᒐᖏᓐᓂᒃ ᐊᒻᒪᓗ ᐃᓱᐊᖁᑎᐅᒋᐊᓕᓐᓂᒃ; 
  • ᐃᓄᑦᑕᖃᕆᐊᓕᒃ ᑭᓇᑐᐃᓐᓇᑯᓐᓂᒃ ᓄᓇᕷᒻᒥᐅᓂᒃ ᓴᐳᒻᒥᔭᐅᓂᖃᕐᑐᓂᒃ ᓄᓇᓕᒻᒧᑦ ᐊᒻᒪᓗ ᐊᐅᓚᑕᐅᓂᖃᕐᑐᒧᑦ ᑐᕌᒐᕐᓄᑦ ᐊᑑᑎᔭᐅᔪᕐᓄᑦ.  

ᑮᓇᐅᔭᓂᒃ ᑐᑦᓯᕋᕈᑏᑦ ᐱᒐᓱᐊᕈᑎᖏᓐᓂᒃ 


ᐱᒍᒪᒍᑎᒃ ᓴᐳᒻᒥᔭᐅᒍᑎᑦᓴᓂᒃ ᑮᓇᐅᔭᓂᓪᓗ, ᓄᓇᓖᑦ ᑎᒥᖁᑎᖏᑦ ᒪᓂᔨᒋᐊᓖᑦ ᓱᓇᓱᐊᕐᓂᖏᑦᑕ ᑐᓴᕐᑎᓯᒍᑎᖏᓐᓂᒃ, ᑮᓇᐅᔭᓕᕆᐅᑎᖏᑦᑕ ᑐᓴᕐᑎᓯᒍᑎᖏᓐᓂᓗ ᐊᒻᒪᓗ ᑮᓇᐅᔭᓂᒃ ᑐᑦᓯᕋᐅᑎᖏᓐᓂᒃ ᒪᓕᓪᓗᒋᑦ ᐅᓪᓗᓕᐊᕆᔭᐅᓯᒪᔪᑦ. 
 
ᑐᓴᕐᑎᓯᒍᑏᓓᓗ ᑮᓇᐅᔭᓂᒃ ᐱᒐᓱᐊᕈᑏᓪᓗ ᕿᒥᕐᕈᔭᐅᓲᑦ ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᑦᑕ ᓄᓇᓖᑦ ᑎᒥᖁᑎᖏᓐᓂᒃ ᑐᑭᒧᐊᑦᑎᑕᐅᓂᖏᓐᓄᑦ ᑲᑎᒪᔨᐊᐱᖏᓐᓂᒃ ᐊᑐᓂᑦ ᐅᐱᕐᖓᓴᑕᒫᑦ. 
 
ᕿᒥᕐᕈᔭᐅᓯᒪᓕᑐᐊᕋᒥᒃ ᐊᕐᕿᒋᐊᕐᑕᐅᒪᓕᑐᐊᕐᒪᑕᓗ ᑕᑯᓐᓈᓱᒋᑦ ᑮᓇᐅᔦᑦ ᐊᑐᐃᓐᓇᐅᑎᑕᐅᔪᑦ, ᑮᓇᐅᔭᖃᕐᑎᓯᒍᓯᐅᓂᐊᕐᑐᓂᒃ ᑐᓂᔭᐅᔪᖃᓲᖑᕗᖅ ᐃᓗᓯᓕᕆᔩᑦ ᑲᑎᒪᔨᖏᓐᓄᑦ ᔫᓂᐅᓕᕐᒪᑦ ᐊᖏᕐᑕᐅᒋᐊᓕᓐᓂᒃ ᐃᒣᓕᒋᐊᖁᔨᒍᑎᐅᒋᐊᓕᓐᓄᓗ ᑯᐯᒃᑯᑦ ᑲᕙᒪᖓᓄᕐᑕᐅᓂᐊᕐᑐᓂᒃ, ᑖᒃᑯᐊ ᐱᔪᓐᓇᓯᑎᑦᓯᓂᐊᕐᑎᓗᒋᑦ ᑮᓇᐅᔭᖃᕐᑎᓯᒍᓯᒋᓂᐊᕐᑕᖏᓐᓂᒃ ᐱᖓᓱᑦ ᑕᕐᖀᑦ ᐊᓂᒍᕐᓂᑕᒫᑦ ᐊᕐᕌᒍᒥ. 

ᓄᓇᓖᑦ ᑎᒥᖁᑎᖏᑦ

ᐅᖓᕙᒥ ᑐᑭᒧᐊᑦᑎᑕᐅᓂᖃᕐᑐᓂᒃ ᐃᓪᓗᖃᕐᑎᓯᒍᑏᑦ ᐊᒥᓲᓈᕐᑎᑐᓂᒃ

Ungava Supervised Apartments

P.O. Box 900, Kuujjuaq  J0M 1C0

ᐱᕕᖃᕐᑎᓯᓂᕐᒧᑦ ᐊᑭᓕᕐᑕᐅᒍᓐᓇᓯᐊᕐᑐᒥᒃ ᐊᖏᕐᕋᒥᒃ ᐃᓄᑑᓈᕐᑎᑐᓂᒃ ᐃᓱᒪᒃᑯᑦ ᐱᓀᓗᑕᓕᓐᓄᑦ ᐅᕝᕙᓘᓐᓃᑦ ᐃᓱᒪᒃᑯᑦ ᐃᓱᐃᓪᓕᖓᐅᑎᓕᓐᓄᑦ.  ᐃᑲᔪᕐᓗᒋᑦ ᐊᖏᕐᕋᓖᑦ ᐃᒻᒥᓂᕿᒍᓐᓇᓯᒐᓱᐊᕐᑎᓗᒋᑦ ᐊᒻᒪᓗ ᐃᓄᓕᒫᓂᒃ ᖃᐅᔨᑎᑦᓯᓂᖃᕐᓗᓂ ᐃᓅᓯᒃᑯᑦ ᐅᑎᕐᐸᓕᐊᒐᓱᐊᕐᓂᖃᕐᑐᓂᒃ.

ᑐᖕᖓᓱᕝᕕᒃ ᐊᕐᓀᑦ ᕿᒫᕕᖓᑦ

TUNGASUVVIK WOMEN’S SHELTER

P.O. Box 586, Kuujjuaq J0M 1C0

ᐱᕕᖃᕐᑎᓯᒍᑎᐅᑦᓱᓂ ᑎᒥᒃᑯᓗ ᐃᓱᒪᒃᑯᓗ ᓴᐳᒻᒥᒍᑎᓂᒃ ᐊᕐᓇᓂᒃ ᕿᑐᕐᖓᖏᓐᓂᓗ ᐊᖏᕐᕋᒥᓂ ᐱᓗᑲᑦᑕᐅᓂᑯᕐᓂᒃ ᐊᑐᓗᑲᑦᑕᐅᓂᕐᓂᓗ ᐊᒻᒪᓗ ᐃᓱᐃᓪᓕᖓᔪᒦᑦᑐᓄᑦ.  ᑖᓐᓇ ᕿᒫᕕᒃ ᐃᒣᓕᖓᓂᖃᕐᒪᑦ:

  • ᐃᑉᐱᒋᔭᖃᕐᓱᓂ ᐱᒍᑦᔭᐅᔪᐃᑦ ᐱᑎᑕᐅᑦᓯᐊᕋᓗᐊᕐᒪᖔᑕ ᑭᖕᖒᒪᒋᔭᖏᓐᓂᒃ ᐊᑦᑕᓇᖕᖏᑐᒥᓪᓗ ᓇᓂᕝᕕᓴᕐᒥᒃ;
  • ᐃᑲᔪᕐᓱᑎᒃ ᐊᕐᓇᓂᒃ ᑲᒪᒋᒋᐊᓕᖏᓐᓂᒃ ᐊᑑᑎᒋᐊᓕᕐᑎᓗᒋᑦ ᖃᓄᐃᓕᖓᓂᖏᑦᑎᒍᑦ, ᒪᑯᓂᖓ ᐅᐃᕆᒪᓇᕐᑐᓕᕆᐅᑎᓂᒃ, ᐊᒻᒪᓗ ᑲᔪᖏᕐᓴᓱᒋᑦ ᐱᒍᑦᔭᐅᔪᑦ ᐱᐅᔪᕐᒧᑦ ᐊᓯᑦᔨᒐᓱᐊᕐᑎᓗᒋᑦ, ᐱᓇᓱᒍᑎᖃᕐᑎᓗᒋᓪᓗ ᐃᓚᒌᑦ ᖃᓄᐃᓕᐅᖃᑦᑕᐅᑎᓂᖏᓐᓂᒃ ᐊᒻᒪᓗ ᐃᓅᕕᖃᕐᓗᓂ ᐊᑦᑕᓇᖕᖏᑐᒥᒃ ᖃᓄᐃᖏᓯᐊᕐᓂᓴᐅᔪᒥᓪᓗ ᐃᓅᓯᖃᕐᓂᒥᒃ;
  • ᑐᑭᓯᒪᐅᑎᑦᓴᖃᕐᑎᓯᓲᖑᑦᓱᓂ ᐃᓕᓭᑦᓱᓂᓗ ᑕᒪᑦᓱᒧᖓ ᐱᓗᑲᑦᓯᓂᕐᒧᑦ, ᐊᐅᓚᑦᔦᓯᒪᓲᖑᓂᖓᓄᓪᓗ ᐱᐊᕋᕐᓂᒃ ᑕᑯᓐᓈᓯᒪᔪᓂᒃ ᐱᓗᑲᑦᓯᓂᐊᓗᒻᒥᒃ ᐊᖏᕐᕋᒥᓂ, ᐊᖓᔪᕐᖄᕆᔭᐅᔪᐃ ᑲᒪᑦᓯᐊᕈᓯᖏᓐᓄᓗ ᐊᓯᖏᓐᓂᓗ.

ᐱᒍᑦᔨᒍᑏᑦ ᐱᕕᖃᕐᑎᑕᐅᓲᑦ ᐊᕐᓇᓄᑦ ᓄᓇᓕᒻᒥᐅᓄᑦ ᐅᕝᕙᓘᓐᓃᑦ ᐊᓯᖏᓐᓂᑦ ᓄᓇᓕᓐᓂᑦ ᐱᓯᒪᔪᓄᑦ ᔭᕆᐊᖃᑐᐊᕋᒥᒃ.

ᖃᔭᖅ ᐃᑲᔪᕐᓯᒪᐅᑎᖓᓄᑦ

QAJAQ NETWORK

P.O. Box 29, Kuujjuaq J0M 1C0

 

ᖃᔭᖅ ᐃᑲᔪᕐᓯᒪᐅᑎᖏᑦ ᕿᓂᕐᒪᑕ ᐃᑲᔪᕈᒪᑦᓱᑎᒃ ᐊᖑᑎᓂᒃ ᓇᒻᒥᓂᖅ ᐱᕈᕐᐸᓕᐊᓂᕐᒥᒍᑦ ᐱᐅᓯᖃᕐᑐᓄᑦ ᐃᓱᐃᓪᓕᐅᓂᖃᕐᑐᓄᓪᓘᓃᑦ.  ᑫᓪᓗᑐᐃᓂᒃᑯᑦ ᐃᑲᔪᕐᓯᒪᐅᑎᓂᒃ ᐱᒍᑦᔨᒍᑎᓂᓪᓗ ᐱᓕᐅᒥᑎᑦᓯᒍᑎᑦᓴᒧᑦ ᓇᒻᒥᓂᖅ ᐊᒻᒪᓗ ᐃᓗᓐᓈᒍᑦ ᖃᓄᐃᖏᓯᐊᕐᓂᖃᕐᓂᒥᒃ, ᐱᕙᓪᓕᐊᑎᑕᐅᔪᖃᕋᓱᐊᕐᓱᓂ ᖃᓄᐃᖏᓯᐊᕐᑐᒥᒃ ᐊᑦᑕᓇᖕᖏᓂᕐᓴᒥᓗ ᓄᓇᓕᓐᓂᒃ ᐊᑦᔨᒋᑦᑎᓯᑦᓯᐊᕋᓱᐊᖏᓐᓇᓱᓂ ᐊᕐᓇᓂᓗ ᐊᖑᑎᓂᓪᓗ.

ᐱᒍᑦᔨᒍᑏᑦ ᐊᑐᐃᓐᓇᐅᑎᑕᐅᔪᑦ ᐊᖑᑎᓕᒫᓄᑦ ᑭᖕᖒᒪᑦᓯᐊᔪᓄᑦ ᓄᓇᓕᓕᒫᑎᒍᑦ.

ᐃᓱᐊᕐᓯᕕᒃ ᒪᒥᓴᕐᕕᖓᑦ

ISUARSIVIK TREATMENT CENTRE

P.O. Box 749, Kuujjuaq J0M 1C0

ᐱᕕᖃᕐᑎᓯᑦᓱᑎᒃ ᐃᓗᕐᕈᓯᕐᑎᒍᑦ ᑐᖕᖓᕕᖃᕐᑐᒥᒃ ᖃᓄᐃᖏᓯᐊᕋᓱᐊᕐᓂᒧᑦ ᐃᑲᔪᕐᓯᒪᐅᑎᓂᒃ ᐃᓄᐃᑦ ᑎᒍᓯᒐᓱᐊᕐᑎᓗᒋᑦ ᖃᓄᐃᖏᓯᐊᕐᑐᒥᒃ ᐅᐃᕆᒪᓇᕐᑐᑕᖃᖕᖏᑐᒥᓪᓗ ᐃᓅᒍᓯᕐᒥᒃ.  ᑫᓪᓗᑐᐃᑦᓱᑎᒃ ᐃᓄᐃᑦ ᐱᔪᕆᐅᓯᖓᓂᒃ, ᓇᒻᒥᓂᖅ ᒪᑭᒋᐊᕈᓐᓇᐅᓂᓪᓗ, ᐊᓂᕐᓂᓕᕆᐅᑎᓂᓪᓗ ᒪᒥᓴᕐᓂᒥᓪᓗ ᓇᓪᓕᓂᒃᑯᑦ ᖃᓄᐃᖏᓯᐊᕐᑐᒥᓗ ᐱᕙᓪᓕᐊᓂᖃᕐᑐᒥᓗ ᐃᓅᓯᖃᕋᓱᐊᕐᑐᓄᑦ ᐊᑦᑕᓇᖕᖏᑐᒥᒃ ᐅᐃᕆᒪᓇᕐᑐᖃᖕᖏᑐᒥᓗ ᐊᕙᑎᖃᕐᓂᒥᒃ.

ᑐᓵᔨᐊᐱᒃ ᐃᓄᑐᖃᖃᐅᑎᖓᑦ

TUSAAJIAPIK DAY CENTRE

P.O. Box 149, Kuujjuaq J0M 1C0

ᑖᓐᓇ ᐃᓄᑐᖃᖃᐅᑎᒃ ᓱᓇᓱᐊᕐᑎᓯᓂᖃᓲᖑᕗᖅ ᐃᓄᒻᒪᕆᓐᓂᒃ ᐃᓄᑑᓇᕐᑎᑐᓂᓪᓗ ᐃᒻᒥᓂᕿᑦᓯᐊᕈᓐᓇᖏᑦᑐᓂᒃ ᐊᖏᕐᕋᖃᕐᑎᑕᐅᔪᓂ ᑐᓵᔨᐊᐱᒻᒥ ᐊᒻᒪᓗ ᐃᓄᑐᖃᕐᓂᒃ ᐃᓄᑑᓈᕐᑎᑐᓂᓪᓗ ᐃᒻᒥᓂᕿᒍᓐᓇᖏᑦᑐᓂᒃ ᐊᖏᕐᕋᖃᕐᑐᓄᑦ ᑰᔾᔪᐊᑉ ᓄᓇᓕᖓᓂ.

ᓄᓇᕕᒻᒥ ᐅᕕᒃᑫᑦ ᑲᑎᒪᕕᖃᕐᕕᖓᑦ

QARJUIT YOUTH COUNCIL

P.O. Box 179, Kuujjuaq J0M 1C0

ᑲᑎᒪᕕᖃᕐᑎᓯᒍᑕᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᐅᕕᒃᑲᖏᓐᓂᒃ ᓇᒻᒥᓂᕐᒥᓄᑦ ᐅᖃᕐᕕᒋᒍᓐᓇᑕᖓᓂᒃ ᐃᓅᓯᓕᕆᓂᕐᒧᑦ ᐊᒻᒪᓗ ᖃᓄᐃᖏᓯᐊᕐᓂᓕᕆᓂᕐᒧᑦ ᑫᓪᓗᑐᐃᓂᖃᕐᓱᓂᓗ ᖃᓄᐃᖏᓯᐊᕐᑐᒥᒃ ᐃᓅᓯᖃᕈᓯᕐᒥᒃ.

ᐅᕙᑦᑎᓄᑦ ᑐᑭᒧᐊᑦᑎᑕᐅᓂᖃᕐᑐᐃᑦ ᐃᓪᓗᖃᕐᑎᓯᓂᕐᒧᑦ

Uvattinut Supervised Apartments

P.O. Box 385, Puvirnituq J0M 1P0

ᐱᕕᖃᕐᑎᓯᑦᓱᑎᒃ ᐃᒻᒥᓂᕿᔪᓄᑦ ᐃᓅᕕᖃᕐᑎᓯᓂᕐᒥᒃ ᐊᒻᒪᓗ ᓄᓇᓕᓐᓄᑦ ᓴᐳᒻᒥᔭᐅᔪᓂᒃ ᐱᒍᑦᔨᒍᑎᓂᒃ ᑕᒪᒃᑯᓂᖓ ᐃᓄᓐᓂᒃ ᑮᓇᐅᔭᓕᐅᑦᓯᐊᓲᖑᖏᑐᓂᒃ ᐃᓱᒪᒃᑯᑦ ᐱᓀᓗᑕᓕᓐᓂᒃ ᐊᒻᒪᓗ ᐸᕐᓇᓯᒪᒌᑦᓯᐊᕈᓐᓇᖏᑦᑐᓂᒃ.  ᐊᖏᕐᕋᖃᕐᑐᐃᑦ ᐳᕕᕐᓂᑐᒥᐅᔭᐅᓗᐊᖑᐊᓲᖑᕗᑦ, ᑭᓯᐊᓂ ᓄᓇᓖᑦ ᐊᓯᖏᓐᓂᑦ ᓄᓇᕕᒻᒥ ᑐᖕᖓᓱᑦᑎᑕᐅᑦᓯᐊᕋᓗᐊᕐᒥᓱᑎᒃ ᐃᓂᖃᑐᐊᕈᑎᒃ.

ᓭᓕᕕᒃ ᐃᓄᑐᖃᕐᓂᒃ ᐊᖏᕐᕋᖃᕐᑎᓯᕕᖓᑦ

SAILIVIK ELDER’S HOME

P.O. Box 301, Puvirnituq J0M 1P0

ᐱᕕᖃᕐᑎᓯᑦᓱᓂ ᐊᑦᑕᓇᖕᖏᑐᒥᒃ, ᐃᓱᕐᕆᓇᕐᑐᒥᓗ ᐃᓅᕕᖃᕐᕕᐅᒍᓐᓇᑐᒥᒃ ᑕᒪᒃᑯᓄᖓ ᐃᓄᑐᖃᕐᓄᑦ ᐳᕕᕐᓂᑐᒥᐅᓄᑦ ᐊᒻᒪᓗ ᓄᓇᓖᑦ ᓯᓚᕐᖃᑎᖏᓐᓄᑦ ᐊᑌᓐᓇᑐᒥᒃ ᐊᖏᕐᕋᖃᕆᐊᓕᓐᓄᑦ.

ᐱᕕᖃᕐᑎᓯᑦᓱᓂ ᐃᓄᑐᖃᕐᓂᒃ ᐊᑯᓂᖏᑐᑯᑦ ᓇᔫᑎᖕᖏᓚᐅᕐᑐᕋᓱᐊᕐᓂᖏᓐᓂᒃ ᑕᒪᑦᓱᒪᖕᖓᑦ ᐃᓅᕕᒋᓲᑐᖃᖏᓐᓂᑦ ᐊᒻᒪᓗ ᐅᓪᓗᑯᑦ ᐃᑲᔪᕐᓯᒪᐅᑎᓂᒃ ᓄᓇᓖᑦ ᐃᓄᑐᖃᖏᓐᓂᒃ ᐱᕙᓪᓕᐊᑎᑦᓯᒐᓱᐊᕈᑎᓄᑦ ᐃᓅᓯᕐᑎᒍᑦ ᓱᓇᓱᐊᕈᑎᖏᓐᓂᒃ ᓂᕿᖃᑦᓯᐊᓂᖏᓐᓂᓗ.

ᐱᒍᑦᔨᒍᑎᐅᓲᖑᑦᓱᓂ ᐃᓄᑐᖃᕐᓂᒃ ᓄᓇᓕᒻᒥᐅᓂᒃ ᐊᓯᖏᓐᓂᓘᓐᓃᑦ ᓄᓇᓕᓐᓂᑦ ᐱᓯᒪᔪᓂᒃ ᑕᓯᐅᔭᕐᔪᐊᒥᐅᓂᒃ.

ᐊᔭᐱᕐᕕᒃ ᐊᕐᓀᑦ ᕿᒫᕕᖓᑦ ᐃᓄᑦᔪᐊᒥ

AJAPIVIK WOMEN’S SHELTER OF INUKJUAK

P.O. Box 229, Inukjuak J0M 1M0

ᐱᕕᖃᕐᑎᓯᑦᓱᓂ ᓯᓂᑦᑕᐅᕕᐅᒍᓐᓇᑐᒥᒃ ᐊᕐᓇᓄᑦ ᕿᑐᕐᖓᖏᓐᓄᓗ ᕿᒫᕕᒻᒥ.  ᑭᖕᖑᒪᒋᔭᐅᓕᑐᐊᕋᒥ ᑖᓐᓇ ᕿᒫᕕᒃ ᓯᓂᑦᑕᕕᐅᑫᓐᓇᓯᓲᖑᒻᒥᔪᖅ ᐃᓄᑐᖃᕐᓄᑦ ᐊᕐᓇᓄᑦ ᐊᑦᑕᓇᖕᖏᑐᒥᒃ ᓇᔪᕐᕕᐅᒍᓐᓇᑐᒥᒃ ᐃᓱᐃᓪᓕᖓᔪᒦᓂᐊᖏᒪᑕ ᐅᕝᕙᓘᓐᓃᑦ ᐊᑐᓗᑲᑦᑕᐅᕕᐅᓂᐊᖏᑐᒦᑦᑎᓯᒍᑕᐅᑦᓱᓂ.

ᐱᒍᑦᔨᓂᖃᓲᖑᕗᖅ ᐊᕐᓇᓂᒃ ᓄᓇᓕᒻᒥᐅᓂᒃ ᐊᓯᖏᓐᓂᓘᓐᓃᑦ ᓄᓇᓕᓐᓂᑦ ᐱᓯᒪᔪᓂᒃ ᑭᖕᖒᒪᓇᑐᐊᕐᒪᑦ.

ᐅᓈᖅ ᐊᖑᑏᑦ ᑲᑐᑦᔨᖃᑎᒌᓐᓂᖓᑦ ᐃᓄᑦᔪᐊᒥ

UNAAQ MEN’S ASSOCIATION OF INUKJUAK

P.O. Box 413, Inukjuak J0M 1M0

ᓴᐳᒻᒥᓲᖑᑦᓱᑎᒃ ᐅᕕᒃᑲᓂᒃ ᐊᖑᑎᓂᓪᓗ ᐅᕕᒃᑲᐅᓂᕐᓴᓂᒃ ᑫᓪᓗᑐᐃᓪᓚᕆᓐᓂᒃᑯᑦ ᐃᓄᐃᑦ ᐃᓗᕐᕈᓯᖓᓂᒃ ᓄᓇᓖᑦ ᐃᓗᐊᓂ, ᐃᓚᐅᕕᐅᑎᓪᓗᒍ ᐊᑦᔨᒋᖏᑐᓂᒃ ᐅᑭᐅᓕᓐᓂᒃ ᐊᖑᑎᓂᒃ.

ᐅᑭᐅᖃᑎᒌᖏᑐᐃᑦ ᖃᓂᖕᖏᑕᕆᓐᓂᖏᓐᓂᒃ ᖃᓂᓪᓕᑎᕆᓂᖃᓲᑦ, ᑫᓓᓗᑐᐃᓂᒃᑯᑦ ᐃᓄᐃᑦ ᐃᓗᕐᕈᓯᖓᓂᒃ ᐊᒻᒪᓗ ᓴᐳᒻᒥᓂᐊᓕᕋᒥᒃ ᐊᖑᑎᐊᕈᕐᓂᒃ ᓄᓇᓕᒻᒥᐅᓂᒃ ᓂᑯᕐᕋᕈᓐᓇᓯᒐᓱᐊᕐᑎᓗᒋᑦ ᐃᓕᓐᓂᐊᑎᑕᐅᑦᓱᑎᓪᓗ ᐱᐅᓯᑐᖃᕐᓂᒃ ᐃᓄᑐᖃᕐᓄᑦ ᐅᖃᐅᓯᕆᔭᐅᔪᓂᒃ.

ᐱᓇᓱᐊᖃᑎᖃᕐᓱᑎᒃ ᐃᕐᖃᑐᐃᔨᓕᕆᔨᓂᒃ ᐃᓄᒻᒪᕆᐅᓕᕐᑐᑦ ᓴᐳᒻᒥᔭᐅᓂᖃᕐᑎᓗᒋᑦ ᐃᕐᖃᑐᐃᔨᒃᑰᕆᐊᓕᓐᓂᒃ ᐊᒻᒪᓗ ᐃᓅᓯᕐᑎᒍᑦ ᐅᑎᕐᐸᓕᐊᕕᖃᕆᐊᓕᓐᓂᒃ ᒪᒥᓴᕆᐊᓕᓐᓂᓗ.  ᑕᒪᒃᑯᐊ ᓴᐳᒻᒥᒋᔭᖃᕐᓃᑦ ᐱᒍᑦᔨᒍᑎᐅᓲᑦ ᑭᖕᖑᒪᒋᔭᐅᔪᓂᒃ ᐊᖑᑎᐊᕈᕐᓄᑦ ᐊᒻᒪᓗ ᐳᐃᒍᕐᑕᐅᑌᓕᑎᑕᐅᑦᓱᑎᒃ ᐊᒻᒪᓗ ᓴᐳᒻᒥᔭᐅᑦᓯᐊᓂᖃᕐᓱᑎᒃ ᑭᖕᖒᒪᑦᓯᖏᓐᓂᓕᒫᖏᓐᓂ.

ᐊᔭᒍᑕᖅ ᐃᓄᑐᙯᑦ ᐊᖏᕐᕋᖃᕐᑎᓯᕕᖓᓄᑦ ᑲᑎᒪᔨᐊᐲᑦ

AJAGUTAQ ELDERS’ HOME COMMITTEE

P.O. Box 320, Inukjuak J0M 1M0

ᐸᕐᓇᓯᒪᐅᑎᓕᐅᕐᑕᐅᔪᖃᕐᓗᓂ ᓴᓇᒍᑎᑦᓴᒧᑦ ᐃᓄᑐᙯᑦ ᐊᖏᕐᕋᓴᖓᓂᒃ ᐃᓄᑦᔪᐊᒥ.

ᐱᓇᓱᖃᑎᒋᓗᒋᑦ ᑲᕙᒫᒃᑯᓄᓪᓗ ᓄᓇᓕᓕᒫᑎᒍᓪᓗ ᐱᔪᑦᓴᐅᔮᕈᑕᐅᔪᓂᒃ ᓴᓇᒍᑎᑦᓴᒧᑦ, ᐃᓗᒥᐅᑕᑖᕐᑎᓯᒍᑎᒧᓪᓗ ᐊᐅᓚᑦᓯᒍᑎᒧᓪᓗ ᐃᓄᑐᙯᑦ ᐊᖏᕐᕋᖃᕐᕕᓴᖏᓐᓂᒃ.  ᐃᑉᐱᒋᑦᓱᒋᑦ ᐱᓇᓱᑦᑎᐅᖃᑕᐅᔪᑦ ᐊᐅᓚᑦᓯᓂᕐᒥᓗ ᐃᓄᑐᖃᕐᓂᒃ ᐊᖏᕐᕋᖃᕐᑎᓯᕕᖓᓂᒃ ᐱᒍᑦᔭᐅᔪᐃᑦ ᐃᓱᐊᕆᓂᕐᐹᖓᑎᒍᑦ.

ᓯᕆᕕᒃ ᓲᑉᐳᑐᕆᐊᕐᑐᕕᒃ

PO Box 379, Inukjuak J0M 1M0

ᓯᕆᕕᒃ ᓂᕿᓕᕆᕕᐅᕗᖅ ᐃᓄᒃᔪᐊᖅ, ᓄᓇᕕᒻᒥ. ᑖᓐᓇ ᐃᑲᔪᕐᓯᒪᐅᑕᐅᒐᓱᐊᕐᑐᖅ ᐃᓄᐃᑦ ᓂᕿᖃᑦᓯᐊᖏᒻᒧᑦ ᑳᓲᒍᓂᖏᓐᓂᒃ ᐊᒻᒪᓗ ᐃᓄᑑᑎᓗᐊᕐᑌᓕᒪᑦᔪᑎᐅᑦᓱᓂ ᓄᓇᓕᓐᓂ, ᐃᑲᔪᕐᓯᒪᒐᓱᐊᕐᓱᓂᓗ ᓂᕿᑦᓯᐊᕙᐅᓂᕐᓴᓂᒃ ᓂᕆᒋᐊᖃᕐᓂᒥᒃ ᐊᔪᕆᓯᒪᒐᓱᐊᕐᓂᒥᒃ. ᑎᒥᒧᑦ ᐊᑲᐅᓂᕐᓴᓂᒃ ᓂᕿᓂᒃ ᐱᑕᖃᕐᑎᓯᒐᓱᐊᕐᓱᓂ ᐊᒻᒪᓗ ᓂᕿᓂᒃ ᐃᑲᔪᕐᓯᒪᐅᑎᖃᕋᓱᐊᕐᓱᓂ ᑐᖕᖓᓇᕐᑐᒪᕆᒃ ᑖᕙᓂ ᓂᕆᒋᐊᒥᒃ ᐃᓅᖃᑎᒌᓂᓪᓗ ᐳᓛᖃᑦᑕᐅᑎᕕᐅᑦᓱᓂ!

ᐃᓂᑦᓯᐊᖅ ᐊᕐᓀᑦ ᕿᒫᕕᖓᑦ

INITSIAQ WOMEN’S SHELTER

P.O. Box 239, Salluit J0M 1S0

ᕿᒫᕕᖃᕐᑎᓯᒍᑕᐅᓗᓂ ᓴᐳᒻᒥᕕᐅᓗᓂᓗ ᐃᓄᐃᑦ ᐊᕐᓇᖏᓐᓂᒃ ᕿᑐᕐᖓᖏᓐᓂᓗ ᐱᓗᑲᑦᑕᐅᓂᑯᕐᓄᑦ ᑌᒣᓕᔭᐅᑐᐃᓐᓇᕆᐊᖃᕐᑐᓄᓪᓘᓃᑦ ᓄᓇᕕᒻᒥᐅᓂᒃ.  ᐃᓂᖃᕐᑎᓯᕕᐅᑦᓱᓂ ᑭᖕᖒᒪᑦᓯᓂᐊᕐᑐᓄᑦ ᐃᓱᕐᕆᓇᕐᑐᒦᕝᕕᐅᒍᓐᓇᑐᒥᒃ ᐃᓱᐊᕐᓴᑕᐅᕕᐅᒍᓐᓇᑐᒥᓗ.

ᐱᒍᑦᔨᓲᑦ ᐊᕐᓇᓂᒃ ᓄᓇᓕᒻᒥᓂᒃ ᐊᓯᖏᓐᓂᑦ ᓄᓇᓕᓐᓂᑦ ᐱᓯᒪᒐᓗᐊᕐᐸᑕ ᑭᖕᖒᒪᑦᓯᔪᖃᕐᐸᑦ.

ᐃᕿᑦᓯᕕᒃ ᐃᓚᒌᑦ ᐃᓪᓗᖁᑎᖓ

P.O. Box 29, Salluit J0M 1S0

ᐊᒥᓱᓂ ᑭᒡᒐᑑᑎᐅᒍᓐᑐᓂᒃ ᐱᑕᓕᒃ ᑐᖕᖓᕕᖃᑦᓯᐊᓱᑎᒃ ᒪᓕᒐᕐᒥᓂᒃ ᐃᓅᖃᑎᒌᑦᓯᐊᓂᕐᒧᓕᖓᒐᓱᐊᕐᑐᓂᒃ, ᑲᑎᑦᑕᕕᖃᕐᐸᓕᐊᑎᑦᓯᒐᓱᐊᕐᓱᓂ, ᐊᑑᑎᑦᓯᐊᕋᓱᐊᕐᓱᓂᓗ ᐃᓄᐃᑦ ᖃᓄᐃᑦᑐᑐᐃᓐᓇᐅᒐᓗᐊᕐᐸᑕ ᑐᖕᖓᓱᑦᑎᓯᑦᓱᓂ ᐃᑲᔪᕐᓯᒪᒐᓱᐊᒧᑦ ᓄᓇᓖᑦ ᐱᕙᓪᓕᐊᕆᐊᖃᕐᓂᖏᓐᓂᒃ. ᐱᓇᓱᖃᑎᖃᓲᖅ ᑲᒃᑲᓛᓂᒃ, ᐃᓚᒌᓂᒃ ᐊᒻᒪᓗ ᐯᕆᑦᓯᔨᓂᒃ ᓲᖑᓂᖏᓐᓂᒃ ᐃᓄᐃᑦ ᓴᕐᕿᑎᑦᓯᒐᓱᐊᖃᑕᐅᑦᓱᓂ, ᐱᔪᓐᓇᓂᕆᒍᓐᓇᑕᖏᑦ ᐱᕙᓪᓕᐊᑎᒐᓱᐊᕐᓱᒋᑦ, ᖃᓄᐃᖕᖏᓯᐊᓂᕐᑰᑦᓯᐊᑐᓂᓗ ᐃᓅᑦᔪᓯᓂᒃ ᐱᕙᓪᓕᐊᑎᑦᓯᒐᓱᐊᕐᓱᓂ.

ᐃᕿᑦᓯᕕᒃ ᓱᖑᐅᓯᓭᒍᑎᖃᓚᐅᔪᕗᖅ ᐊᐅᓚᑦᔭᕆᐊᕈᑎᒋᑦᓱᓂᒋᑦ ᐃᒣᑦᑐᓂᒃ:

  • ᓴᕐᕿᑎᑦᓯᒐᓱᐊᖃᑕᐅᑦᓱᓂ ᐃᓅᓯᒃᑯᑦ ᖃᓄᕐᑑᓂᕐᒥ ᐊᓐᓇᐅᒪᒍᓯᐅᒐᔭᕐᑐᓂᒃ ᐃᓄᓐᓄᑦ ᐊᕐᓱᕈᕐᓇᑐᒦᑦᑐᓄᑦ ᓂᐅᕐᖃᒐᕐᓗᑑᒪᓃᑦ ᐱᓪᓗᒋᑦ, ᐃᓱᒪᒃᑯᑦ ᐱᔮᕐᓱᑕᐅᓃᑦ ᐊᒻᒪᓗ ᐃᑉᐱᓂᐊᕐᓂᑯᑦ ᖁᐊᕐᓵᓇᕐᑐᒦᖃᑦᑕᑐᕕᓃᑦ;
  • ᐃᑲᔪᕐᓯᒪᔪᖅ ᑭᒡᒐᑐᕐᓂᖃᕐᓱᓂ ᐃᓗᕐᕈᓯᑎᒎᕐᑐᓂᒃ ᓇᔪᒐᖃᑦᓯᐊᑎᑦᓯᒐᓱᐊᕐᓂᒥᒃ;
  • ᐃᑲᔪᕐᓯᒪᔪᖅ ᐃᓅᑦᔪᓰᑦ ᐊᓯᑦᔨᑐᕋᕐᐸᓕᐊᕈᓯᒋᓲᖏᑎᒍᑦ ᐊᑦᑕᓇᖕᖏᓂᕐᓴᑯᑦ, ᐱᓪᓚᕆᐅᑎᑦᓯᓂᒃᑯᑦ ᐊᒻᒪᓗ ᑲᑦᓱᙰᑦᑑᓗᑎᒃ ᐃᓅᓯᖃᕐᓂᒧᑦ;
  • ᐱᕙᓪᓕᐊᑎᑦᓯᔪᖅ, ᐱᐅᓯᕙᓪᓕᐊᑎᑦᓱᒋ ᐊᒻᒪᓗ ᐱᕈᕐᐸᓕᐊᑕᐅᒐᕐᑎᓱᒋᑦ ᕿᑐᕐᖓᓕᒃ-ᕿᑐᕐᖓᖓᑕᓗ ᐱᖃᑎᒌᒍᓯᒋᒋᐊᖃᕐᓂᖓᓂᒃ;
  • ᑭᖑᕚᕇᑦ ᐱᑑᑎᓯᒪᐅᑎᑦᓯᐊᕆᐊᖃᕐᓂᖏᓐᓂᒃ ᑲᓲᑎᑎᑦᓯᒐᓱᐊᕐᑐᖅ ᐱᒋᐅᕐᓴᖃᑦᑕᐅᑎᓂᒃᑯᑦ, ᓱᖃᑦᓯᑎᑕᐅᓂᒃᑯᑦ ᐊᒻᒪᓗ ᐃᓚᓱᒍᓱᓐᓂᑯᑦ ᑲᒪᒋᐅᑎᑦᓯᐊᕆᐅᕐᓴᓂᒥᒃ ᐃᓚᒌᑎᒍᑦ ᐊᒻᒪᓗ ᓄᓇᓕᐅᖃᑎᒌᑎᒍᑦ ᐃᓱᒪᒋᒻᒥᓱᒍ;
  • ᑲᔪᖏᕐᓭᔪᖅ ᐃᓚᒌᓂᒃ ᐃᓄᓐᓂᓗ ᐃᓕᒃᑰᓈᕐᑎᑐᓂᒃ ᐃᕕᕐᓯᐸᓪᓕᐊᕈᓯᕐᒥᒃ ᓄᓇᓕᒻᒥᓄᑦ, ᐊᑯᓂᐊᓗᒃ ᓄᐃᑕᒍᓐᓀᑐᕕᓂᐅᒐᓗᐊᕈᑎᒃ, ᓂᕆᒃᑲᓱᒋᑦ ᓇᓪᓕᓂᒃᒥᒃ ᐃᓚᒌᓕᒫᓅᓕᖓᑎᓪᓗᒍ ᐃᓗᐃᑦᑐᖑᕐᑎᓯᒐᓱᐊᕐᓱᓂ, ᐊᒻᒪᓗ ᐃᓕᑕᕐᓯᑎᑦᓯᒐᓱᐊᕐᓱᓂ ᑭᖕᖒᒪᓇᕐᓂᖓᓂᒃ ᑕᒪᑐᒥᖓ ᓇᓪᓕᓂᕐᒥᒃ ᐊᑎᒋᐊᕆᐊᖃᕐᓂᒥᒃ ᐃᓚᒌᑦ ᐱᓗᐊᕐᑐᒥᒃ ᐊᓯᑦᔨᑐᕋᑲᓪᓚᓗᐊᕐᓯᒪᑐᐊᕐᐸᑕ ᐃᓅᓯᕐᒥᓂᒃ;
  • ᐃᓱᒻᒪᓯᐅᑉ ᓴᕐᕿᑎᑦᓯᒐᓱᐊᕈᓯᖓᓂᒃ ᑲᔪᖏᕐᓭᒍᑎᖃᕐᑐᖅ ᐱᒋᐅᕐᓴᐅᑎᐅᑎᑦᓱᒍ, ᐊᑦᔨᖑᐊᓕᐅᕐᓂᐅᒐᓗᐊᕐᐸᑦ, ᑖᓂᓯᕐᓂᐅᒐᓗᐊᕐᐸᑦ, ᑐᓴᕐᓂᔮᕈᑎᓕᕆᓂᐅᒐᓗᐊᕐᐸᑦ, ᒥᖑᐊᕐᓂᐅᒐᓗᐊᕐᐸᑦ ᐅᕝᕙᓘᓐᓃᑦ ᐅᖃᐅᓯᒃᑯᑦ ᐅᖄᒋᐅᕐᓴᓂᐅᒐᓗᐊᕐᐸᑦ ᐅᓂᒃᑲᐅᓯᐅᑎᓪᓗᒋᑦ.

ᕿᓚᖕᖑᐊᓇᖅ ᐃᑲᔪᕐᑕᐅᒋᐊᓕᓐᓂᒃ ᐊᖏᕐᕋᖃᕐᑎᓯᕕᖓᑦ

QILANGNGUANAAQ ASSISTED LIVING CENTRE

P.O. Box 145, Kangiqsujuaq J0M 1K0

ᐊᖏᕐᕋᖃᕐᑎᓯᒍᑎᐅᑦᓱᓂ ᐃᓄᑐᖃᕐᓂᒃ ᐱᕐᖃᔭᑦᓯᐊᖏᑦᑐᓂᓗ ᑭᓇᒃᑯᑐᐃᓐᓇᓂᒃ ᓴᐳᒻᒥᔭᐅᒋᐊᖃᓲᓂᒃ, ᖃᐅᑕᒫᑦ ᐃᑲᔪᕐᑕᐅᒋᐊᖃᓲᓂᓪᓗ ᑐᑭᒧᐊᑦᑎᑕᐅᒋᐊᖃᓲᓂᓪᓗ ᐊᑦᑕᓇᖕᖏᑐᒥ ᓯᓚᖃᕐᑎᑕᐅᓂᒃᑯᑦ.

ᒥᐊᓂᕐᓯᕕᒃ ᐃᓚᒌᑦ ᐃᓪᓗᖁᑎᖓ

PO Box 189, Kangiqsujuaq J0M 1K0

ᑎᓕᔭᐅᒪᐅᑎᖓ

  • ᒪᓂᒪᑎᑎᓯᒐᓱᐊᕐᑐᖅ ᐊᑦᑕᓇᕈᓐᓀᓗᓂ ᑐᖕᖓᓇᕐᑑᓗᓂᓗ ᓇᔪᕋᑦᓴᒥᒃ ᓄᓇᓕᒻᒥᐅᓄᑦ ᑲᖏᕐᓱᔪᐊᒥ;
  • ᐊᐅᓚᑦᓯᓗᓂ ᐱᔭᒃᓴᓂᒃ ᑭᒡᒐᑑᑎᓂᓗ ᖃᓄᐃᖕᖏᓯᐊᕐᓂᒨᓕᖓᔪᓂᒃ ᐱᕙᓪᓕᐊᖁᓪᓗᒋᑦ ᓄᓇᓕᒻᒥᐅᑦ;
  • ᓇᔪᕐᑕᐅᕙᓪᓗᓂ ᒪᒥᓴᕐᕕᒋᓗᒍ ᐃᓄᓐᓄ ᐃᓕᒃᑰᑎᕐᑐᓄᑦ ᐃᓚᒐᓴᖏᑦ ᐃᓚᒋᓗᒋᑦ;
  • ᐸᕐᓇᐸᓪᓗᓂ ᓱᖃᑦᓯᑎᑦᓯᕙᓪᓗᓂᓗ ᖃᓄᐃᖕᖏᓯᐊᕆᐊᖃᕐᓂᒨᓕᖓᔪᓂᒃ ᓄᓇᓕᒻᒥᐅᓄᑦ;
  • ᐊᓯᖏᓐᓂᓗ ᐱᔭᒃᓴᖃᕐᑎᓯᕙᓪᓗᓂ ᑖᒃᑯᓄᖓ ᑌᔭᐅᔪᓅᓕᖓᔪᓂᒃ.

ᑕᑯᕐᖂᑕᕈᑎᖓ

ᐃᓚᒌᑦ ᐃᓪᓗᖁᑎᖓ  ᐅᓚᐱᑦᓴᓇᕐᑐᓯᐊᖑᓚᖓᔪᖅ, ᑐᖕᖓᓱᑦᑎᓯᕙᓪᓗᓂ ᐃᓂᖃᕐᑎᓯᑦᓯᐊᕙᓪᓗᓂᓗ ᐱᓇᓱᐊᕐᕕᓴᒥᒃ ᐱᔭᒃᓴᓂᒃ ᑭᒡᒐᑑᑎᓂᓗ ᒪᓂᒪᑎᑕᐅᔪᓂᒃ, ᐃᔨᒋᓗᓂ ᐃᑲᔪᕐᓯᒪᒍᒪᓂᕐᒧᑦ ᑲᖏᕐᓱᔪᐊᕐᒥᐅᓂᒃ ᖃᓄᐃᖕᖏᓯᐊᕐᓂᒨᕐᐸᓕᐊᑕᕋᓱᐊᓕᕐᑐᓂᒃ ᑎᒥᒥᖑᑦ ᐃᓅᓯᕐᒥᒍᓪᓗ. ᐁᕕᐅᓲᑦᓴᔭᐅᓂᐊᕐᑐᖅ ᐃᓄᓐᓄᑦ ᑭᓇᒃᑯᓕᒫᓄᑦ ᒪᒥᒍᒪᔪᓄᑦ ᐃᓅᓯᕐᒥᓂ ᐃᓚᒌᒍᓈᕐᑎᑐᑐᓄᓘᓐᓃᑦ ᐃᑲᔪᕐᓯᒪᔭᐅᖃᑦᑕᓂᐊᕐᒪᑕ ᑲᔪᖏᕐᓴᑕᐅᑦᓯᐊᖃᑦᑕᓗᑎᓪᓗ. ᐃᕐᖃᑐᐃᓂᓕᒫᑦᓯᐊᑦ ᕿᒪᑦᑕᐅᖃᑦᑕᓚᖓᔪᑦ ᑲᑕᒻᒥ ᐃᑎᕆᐊᓕᕈᑎᒃ. ᐃᑎᕐᑐᓕᒫᑦ ᑲᔪᖏᕐᓴᑕᐅᔪᐃᓐᓇᐅᖃᑦᑕᓂᐊᕐᑐᑦ ᐱᕕᓕᒫᒥᒍᑦ ᐊᔪᐃᓐᓈᖃᖁᔭᐅᓗᑎᒃ ᐃᒻᒥᓂᒃ, ᐃᓕᑕᕆᔭᐅᒻᒪᑦ ᒪᒥᓐᓂᖅ ᐱᕙᓪᓕᐊᑕᐅᒐᓲᑦᓴᔭᐅᒻᒪᑦ ᑎᑭᑦᓴᕋᑕᓲᒍᒻᒪᑦ ᐃᓅᓯᐅᑉ ᐱᕙᓪᓕᐊᓂᖓ ᒪᓕᑦᓱᒍ.

ᑎᓕᔭᐅᒪᐅᑎᖓ

ᖃᓄᐃᖕᖏᓯᐊᕐᓂᓕᕆᔩᑦ ᑲᑎᒪᔨᖏᑦ ᓴᕐᕿᑎᑦᓯᕙᓪᓕᐊᕗᑦ ᐃᓚᒌᑦ ᐃᓪᓗᖁᑎᖓᓂᒃ ᐅᓚᐱᑦᓴᐅᑎᑕᖃᑦᓯᐊᑐᒥᒃ, ᑐᖕᖓᓇᕐᑑᓱᓂ, ᒪᒥᓴᕐᕕᐅᓱᓂᓗ ᑲᖏᕐᓱᔪᐊᒥ ᐱᕙᓪᓕᐊᑎᑦᓯᒐᓱᐊᕐᓂᒥᓄᑦ ᐃᓅᑉ ᐃᓕᒃᑰᑑᑉ ᐃᓅᓯᖓᑕ ᖃᓄᐃᖕᖏᓯᐊᕐᓂᒧᑦ ᑎᑭᐅᑎᒐᓱᐊᕐᑎᓗᒍ ᐊᒻᒪᓗ ᓄᓇᓖᑦ ᖃᓄᐃᖕᖏᓯᐊᕋᓱᐊᕐᓂᖓᓄᑦ ᐃᑲᔪᕐᓯᔭᐅᒋᐊᕐᑐᕕᐅᑦᓱᓂ ᑕᕐᕋᒥ.

ᖃᕐᒫᐱᒃ ᐃᓪᓗᖓ

QARMAAPIK HOUSE

P.O. BOX 219, Kangiqsualujjuaq J0M 1N0

ᐱᕕᑦᓴᖃᕐᑎᓯᒍᑕᐅᑦᓱᓂ ᐃᓚᒌᓂᒃ ᓄᓇᓕᓐᓂ, ᐊᖓᔪᕐᖄᕆᔭᐅᓂᕐᒥᒃ ᐃᓕᓭᓂᖃᕐᓱᑎᓪᓗ ᐊᓯᖏᓐᓂᓗ ᐊᑐᕐᓂᖃᕐᑐᓂᒃ ᐃᓕᓐᓂᐊᑎᑦᓯᒍᓯᖃᕐᒥᓱᑎᒃ.  ᐱᕙᓪᓕᐊᑎᑕᐅᔪᖃᕐᓱᓂ ᐱᐊᕃᑦ ᕿᒥᕐᕈᐊᓴᖏᓐᓂᒃ ᑕᑯᓐᓈᓂᖃᕐᑐᓂᒃ ᐱᐊᕋᐅᑉ ᐱᕙᓪᓕᐊᑎᑕᐅᒍᓯᖓᓄᑦ ᐊᖓᔪᕐᖄᕆᔭᐅᔪᓪᓗ ᐱᐊᕋᐅᓪᓗ ᖃᓄᐃᓕᐅᕈᑎᓲᖑᓂᖏᓐᓄᑦ.

ᐱᕙᓪᓕᐊᑎᑕᐅᔪᖃᕐᓗᓂ ᓄᓇᓕᓐᓂ ᐃᒐᕕᐅᓂᐊᕐᑐᒥᒃ ᐃᓕᓐᓂᐊᑎᑦᓯᕕᐅᒍᓐᓇᓂᐊᕐᑐᒥᒃ ᑕᒪᑦᓱᒧᖓ ᓂᕿᑦᓯᐊᖃᕐᑎᓯᓂᕐᒧᑦ ᖃᓄᐃᖏᓯᐊᕈᑕᐅᔪᓂᒃ ᓂᕆᑎᑦᓯᓂᕐᒧᓗ.

ᐊᑦᑕᓇᖕᖏᑐᒥᒃ ᐅᕕᒃᑫᑦ ᐃᓂᑦᓴᖃᕐᑎᓯᕕᐅᒍᓐᓇᓱᓂ ᐊᑦᑕᓇᖕᖏᒦᓐᓂᖃᓕᕐᑐᓄᑦ ᐃᓚᒌᑦ ᐊᖏᕐᕋᖓᓂ ᐅᕝᕙᓘᓐᓃᑦ ᑲᒪᔨᖓ ᐃᒥᕐᓯᒪᓕᑐᐊᕐᒪᑦ.

ᓴᑐᕐᕕᒃ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᑦ ᓄᓇᕕᒻᒥ

SATURVIIT INUIT WOMEN’S ASSOCIATION OF NUNAVIK

PO Box 12-4, St-Lazare, Québec J7T 2B1

ᐱᒍᑦᔨᒍᑎᐅᓲᖑᑦᓱᓂ ᓄᓇᕕᐅᑉ ᐊᕐᓇᖏᓐᓄᑦ ᓂᐸᖃᕐᕕᐅᓲᓂ, ᑭᒡᒐᑐᕐᓂᐊᕐᑎᓗᒍ ᑖᒃᑯᐊ ᐱᔪᑦᓴᐅᔮᕈᑎᖏᓐᓂᒃ ᐊᒻᒪᓗ ᖃᓄᐃᖏᓯᐊᕐᑎᓯᒐᓱᐊᕐᕕᐅᓱᓂ.  14 ᓄᓇᓖᑦ ᖃᓄᐃᓕᕕᒋᒋᐊᕐᕕᐅᓲᑎᒃ ᐊᒻᒪᓗ ᐃᓄᐃᑦ ᐊᕐᓇᖏᑦ ᖃᓪᓗᓈᓄᑦ ᐊᐅᓪᓛᓯᒪᓂᑯᖏᑦ.  ᑲᔪᖏᕐᓴᓱᒋᑦ ᐊᕐᓀᑦ ᐱᐅᔫᓂᖃᕐᑐᓂᒃ ᐱᓂᐊᕐᓂᖃᑦᓯᐊᕈᑎᑦᓴᖏᓐᓄᑦ ᐱᐅᓯᓕᐅᒥᑎᑦᓯᒐᓱᐊᕐᑎᓗᒋᑦ ᓇᒻᒥᓂᖅ ᐃᓅᖃᑕᐅᓂᕐᒥᒃ ᒪᑭᑕᒐᓱᐊᕐᓂᑯᓪᓗ ᖃᓄᐃᖏᑑᒐᓱᐊᕐᓗᑎᒃ.  ᐊᔪᐃᓐᓇᐅᑎᖃᕐᓗᓂ ᓄᓇᓕᓕᒫᑎᒍᑦ ᐃᑲᔪᕐᓯᒪᐅᑎᓂᓪᓗ ᐱᒍᑦᔨᒍᑎᓂᓪᓗ ᑫᓪᓗᑐᐃᒍᑎᐅᑎᓪᓗᒋᑦ ᖃᓄᐃᖏᓯᐊᕐᑐᓂᒃ ᐊᕐᓇᓂᒃ, ᐱᐊᕋᕐᓂᓗ ᐃᓚᒌᓂᓪᓗ.

ᓴᑐᕐᕖᑦ ᑮᓇᐅᔭᖃᕐᑎᓯᒍᓐᓇᓲᑦ ᐊᓯᐊᒍᓪᓗ ᓴᐳᒻᒥᓂᖃᕐᓱᑎᒃ ᓄᓇᓖᑦ ᐊᕐᓇᖏᑦᑕ ᑲᑐᑦᔨᖃᑎᒌᖏᓐᓂᒃ ᓄᓇᓕᓐᓂ ᐱᓇᓱᐊᕐᑕᐅᔪᖃᓕᑐᐊᕐᒪᑦ.  ᓄᓇᓕᓕᒫᓄᐊᖓᔪᓂᒃ ᐱᓇᓱᐊᒐᖃᓲᖑᒻᒥᔪᑦ ᐊᕐᓇᓅᓕᖓᔪᓂᒃ ᑭᒡᒐᑐᓲᖑᑦᓱᑎᓪᓗ ᓄᓇᕕᐅᑉ ᐊᕐᓇᖏᓐᓂᒃ ᑲᓇᑕᒥᐅᑕᓕᒫᑎᒍᑦ ᖃᓄᐃᓕᒋᐊᖁᔨᔨᐅᓂᕐᒧᓗ ᐃᓕᓐᓂᐊᓯᒪᒋᐊᖃᕐᓂᒧᓪᓗ ᐱᓇᓱᑦᑐᓴᓕᐊᖑᓯᒪᔪᕐᑎᒍᑦ.