ᐃᓚᐅᒋᑦᓯ ᐅᕙᑦᑎᓂ 2025-ᒥ ᐃᓄᑐᙯᑦ ᐅᓪᓗᖃᕐᑎᑕᐅᓂᖏᑦᑕ ᖃᐅᔨᑎᑦᓯᓕᐅᒥᒐᓱᐊᕐᓂᒥᒃ!
ᐊᓕᐊᓱᒍᑎᖃᕐᓂᖅ ᐃᑲᔪᕐᓯᓂᕐᓗ ᐃᓄᑐᖃᕐᓂᒃ ᓄᓇᕕᒻᒥᐅᓂᒃ
ᓄᓇᕕᒻᒥ ᐃᓄᑐᙯᑦ ᐅᓪᓗᖃᕐᑎᑕᐅᓂᖏᑦᑕ ᖃᐅᔨᑎᑦᓯᓕᐅᒥᒐᓱᐊᕐᓂᖅ, ᓯᕗᓕᕐᑎᓗᒋᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᐱᓇᓱᖃᑎᖃᕐᓱᑎᑦ ᓄᓇᓕᐅᑉ ᑎᒥᖏᓐᓂᒃ, ᖃᓄᐃᖕᖏᓯᐊᕐᓂᒧᑦ ᐱᓇᓱᑦᑎᓂᒃ, ᐃᓄᑐᖃᕐᓂᒃ ᑐᑭᒧᐊᑦᑎᓯᔨᓂᒃ ᐊᒻᒪᓗ ᐃᓕᓐᓂᐊᕕᓐᓂᒃ ᐱᒋᐊᕐᑎᑕᐅᓲᖅ ᐆᑦᑑᐱᕆᒋᐊᑕᒫᑦ ᐅᐱᒍᓱᓐᓂᒧᑦ ᐃᓄᑐᖃᕐᓂᒃ, ᖁᕝᕙᑎᑦᓯᒋᐊᕐᓂᒧᑦ ᐊᑦᑕᓇᕐᑐᒦᒋᐊᖃᖕᖏᓂᖏᓐᓂᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᓗ, ᐊᒻᒪᓗ ᓲᖑᓯᒋᐊᕆᓂᕐᒥᒃ ᑭᖑᕚᕇᑦ ᐱᑐᑦᓯᒪᐅᑎᓂᖏᓐᓂᒃ.
ᖃᐅᔨᑎᑦᓯᒋᐊᕐᓂᐅᑉ ᑐᕌᒐᖏᑦ
- ᓇᓗᓀᕐᓗᒋᑦ ᐱᒻᒪᕆᐅᓂᖏᑦ ᖃᓄᐃᓘᕐᑎᐅᓂᖏᑦᑕ ᐃᓄᑐᙯᑦ ᓄᓇᕕᐅᑉ ᓄᓇᓕᖏᓐᓃᑐᑦ
- ᐊᓕᐊᓱᒍᑦᔨᓗᒋᑦ ᐃᓄᑐᙯᑦ ᐃᑲᔪᕐᓯᓂᕆᓯᒪᔭᖏᑦ ᐃᓗᕐᕈᓯᑦᑎᓂᒃ, ᖃᐅᔨᒪᔭᑦᑎᓂᒃ ᓄᓇᓕᒻᒥᓗ.
- ᐊᑐᐃᓐᓇᕈᐃᓂᖅ ᓴᓇᕐᕈᑎᓂᒃ ᐱᑦᓴᑕᓂᓪᓗ ᐃᑲᔪᕐᓯᓂᕐᒧᑦ ᐃᓄᑐᙯᑦ ᐊᑦᑕᓇᕐᑐᒦᒋᐊᖃᖕᖏᓂᖏᓐᓂᒃ.
- ᖁᕝᕓᒋᐊᕐᓂᖅ ᖃᐅᔨᒪᑎᑦᓯᓕᐅᒥᓂᕐᒥᒃ ᐱᑦᓴᑕᖃᕐᕕᓂᒃ ᐱᑦᔪᔨᒍᑎᖏᓐᓂᓗ ᐊᑐᐃᓐᓇᐅᔪᓂᒃ ᑐᓴᕐᑎᓯᒍᓐᓇᓯᓂᕐᒧᑦ ᑲᒪᒋᔭᐅᑦᓯᐊᖏᑦᑐᓂᒃ
- ᑎᒍᒋᐊᕐᓗᒋᑦ ᑭᖑᕚᕇᑦ ᐱᑐᑦᓯᒪᐅᑎᓂᖏᑦ
2025 ᓱᖃᑦᓯᐅᑎᖏ
- ᑐᓴᒐᑦᓭᑦ ᓄᐃᑕᐅᓂᖏᑦ: ᐱᒋᐊᕐᑎᓯᓂᖅ ᖃᐅᔨᑎᑦᓯᓕᐅᒥᓂᕐᒥᒃ ᐊᒻᒪᓗ ᑕᐅᕐᓯᐅᑎᖃᑎᒌᓐᓂᖅ ᐱᒋᐊᕐᑎᓯᒍᑎᐅᓗᐊᖕᖑᐊᑐᓂᒃ.
- Facebook-ᑯᑦ ᖃᐅᔨᑎᑦᓯᓕᐅᒥᓂᖅ: ᐃᓚᐅᑎᓪᓗᒋᑦ ᐊᓪᓚᑕᐅᓯᒪᔪᑦ ᐅᑯᓄᖓ ᐆᑦᑑᑎᒋᓗᒋᑦ: ᐃᓄᑐᙯᑦ ᐱᑦᓴᑕᖃᕐᕕᖏᑦ, ᑭᖑᕚᕇᑦ ᑲᑎᒪᓂᐊᕈᓯᖏᑦ, ᐃᓄᑐᙯᑦ ᐱᔪᓐᓇᐅᑎᖏᑦ, ᐊᒻᒪᓗ ᐃᓗᕐᕈᓯᐅᑉ ᓇᓗᓀᔭᕐᑕᐅᓂᖏᑦ.
- ᐊᑦᑕᓇᕐᑐᒦᖕᖏᓂᕐᒧᑦ ᖃᐅᔨᒋᐊᕐᕕᒃ ᐊᓪᓚᕕᑦᓴᖏᑦ, ᓯᑯᑦᓴᔮᐲᑦ ᐊᒻᒪᓗ ᖃᐅᒪᓲᑦ ᑕᓕᕐᒥᐅᑌᑦ: ᑐᓂᐅᕐᖃᑕᕕᓃᑦ ᐃᓄᑐᖃᕐᓄᑦ ᓄᓇᓕᓐᓄᑦ ᐊᕐᖁᑎᒋᔭᐅᑎᓪᓗᒋᑦ ᐱᓇᓱᖃᑎᒋᔭᐅᔪᑦ.
- ᐃᓄᑐᙯᑦ ᖃᓄᐃᖕᖏᓯᐊᕐᓂᒧᑦ ᑐᓴᒐᑦᓴᖁᑎᖏᑦ– ᑐᖓᓕᖓ ᓄᐃᑎᑕᐅᓯᒪᔪᖅ: ᖃᐅᔨᔭᐅᑎᑦᓯᓂᖅ ᓄᓇᓕᓕᒫᑦ ᑐᓴᕐᑎᑕᐅᒍᑎᖏᓐᓂᒃ ᐊᒻᒪᓗ ᖃᓄᐃᓘᕐᑕᐅᔪᑦᓴᐅᓂᖏᓐᓄᑦ ᖃᓄᐃᖕᖏᓯᐊᕆᐊᖃᕐᓂᖏᑦ.
- ᑲᑎᕕᒃ ᐃᓕᓴᕐᓂᓕᕆᓂᖅ ᐆᑦᑐᕋᕐᓂᖓ ᐱᓇᓱᐊᒐᑦᓴᒥᒃ– “ᐅᓪᓗᐃᓇᕐᒥ ᐃᓅᓯᖓ ᐃᓄᑐᖃᐅᑉ”: ᐃᓕᓐᓂᐊᕕᒻᒥ ᑲᑎᒪᓂᐊᕈᓰᑦ ᐃᑦᔭᓯᖕᖑᐊᓂᕐᒥᒃ ᐃᓄᒻᒪᕆᖕᖑᐸᓪᓕᐊᓂᕐᒥᒃ ᐱᕈᐃᓚᕿᒐᓱᐊᕐᓂᒧᑦ ᐊᓯᒥᓂᒃ ᐃᑉᐱᓂᐊᕈᓐᓇᓯᓂᕐᒥᒃ ᑐᑭᓯᒍᓐᓇᓯᓂᕐᒥᓗ.
ᑐᓴᕆᐊᓪᓛᕈᒪᒍᕕᑦ
ᒪᓕᓪᓗᒋᑦ NRBHSS-ᑯᑦ Facebook-ᒥ, ᓈᓚᓪᓗᒍ ᑐᓴᐅᑎᒃᑯ ᐅᕝᕙᓘᓐᓃᑦ ᖃᐅᔨᒋᐊᕐᕕᒋᓗᒋᑦ
coordinator.wellbeing.elder@ssss.gouv.qc.ca
ᓄᓇᕕᒻᒥ ᑐᓴᕋᑦᓭᑦ ᐱᒻᒪᕆᐅᔪᑦ ᓲᓱᑦᓴᓯᐊᕐᓂᒧᑦ ᐃᓄᑐᙯᑦ ᐱᒻᒪᕆᐅᑦᓯᐊᓂᖏᓐᓂᒃ: ᐱᒻᒪᕆᐅᑎᑕᐅᓛᕐᑐᑦ ᖃᐅᔨᒪᔭᑐᖃᖏᑦ ᐊᒻᒪᓗ ᐃᓕᕐᖁᓯᖏᑦ ᐁᑦᑑᑎᐅᓯᒪᔪᑦ ᓄᓇᕕᒻᒥ
"ᑌᒪᖕᖓᑦ ᐃᓄᑐᙯᑦ ᐱᒻᒪᕆᐅᑦᓯᐊᑐᑦ ᐃᓕᕐᖁᓯᕗᓐᓄᑦ, ᐃᓕᑦᓯᑎᑦᓯᖃᑦᑕᓱᑎᒃ ᓲᖑᔫᑦᓯᐊᓂᕐᒥᒃ ᐃᓅᓯᕐᒥ, ᒪᓕᑦᓯᐊᕈᓐᓇᒥᓪᓗ ᐃᓅᓯᐅᑉ ᐊᓯᑦᔨᓲᖑᓂᖓᓂᒃ, ᓲᓱᑦᓴᓯᐊᕐᓂᒥᓪᓗ. ᐊᑑᑎᓯᒪᔭᖏᑦ ᐃᓅᓯᕐᒥ ᐃᑲᔪᖏᓐᓇᑐᑦ ᐅᕙᑦᑎᓂᒃ ᒪᓕᒐᑦᓴᓯᐊᖑᒻᒪᑕ ᐅᓪᓗᒥᒧᑦ. ᐊᑏ ᐃᓄᑐᖃᕐᓂᒃ ᐃᓕᑦᓯᓄᑦ ᙯᖁᔨᓚᐅᕆᑦ ᐅᖄᒋᐊᕐᑐᖁᓗᒋᑦ ᖃᐅᔨᒪᔭᑐᖃᕐᒥᓂᒃ ᐊᒻᒪᓗ ᑐᑭᓯᒪᑎᑕᐅᓂᕐᓴᐅᓂᐊᕋᕕᑦ ᐃᑉᐱᒍᓱᑦᓯᐊᓂᕐᒥᒃ ᐃᓚᕗᓐᓂᒃ ᓄᓇᕐᖃᑎᕗᓐᓂᓗ ᐱᒻᒪᕆᐅᑦᓯᐊᓂᖏᓐᓂᒃ."
— ᒥᓂ ᑯᔩ, ᐅᖄᒋᐊᕐᑐᑐᕕᓂᖅ ᑐᓴᕋᑦᓴᓂᒃ ᐱᒻᒪᕆᐅᔪᓂᒃ ᓲᓱᑦᓴᓯᐊᕐᒧᑦ 2024-ᒥ
ᓄᓇᕕᒻᒥ ᑐᓴᕋᑦᓭᑦ ᐱᒻᒪᕆᐅᔪᑦ ᓲᓱᑦᓴᓯᐊᕐᓂᒧᑦ ᐃᓄᑐᙯᑦ ᐱᒻᒪᕆᐅᑦᓯᐊᓂᖏᓐᓂᒃ ᐅᓪᓗᖓ ᐊᑑᑎᔭᐅᓲᖅ ᐊᕐᕌᒍᑕᒫᑦ ᓲᓱᑦᓴᓯᐊᕐᓱᑎᑦ ᐃᓄᑐᙯᑦ ᖃᓄᐃᖕᖏᓯᐊᕐᓂᖏᓐᓂᒃ ᑎᒥᒻᒥᑎᒍᑦ, ᐃᑉᐱᓂᐊᕐᓂᑎᒍᑦ, ᐊᒻᒪᓗ ᐃᓅᖃᑎᒌᓐᓂᑎᒍᑦ. ᐱᒋᐊᓛᕐᓱᓂ ᐆᑑᐱᕆ 1-ᒥ ᐊᑑᑎᔭᐅᓛᕐᑐᖅ ᑕᕐᕿᓕᒫᖅ, ᐊᑑᑎᓛᕐᑐᑦ ᓱᖃᑦᓯᓂᕐᓂᒃ ᖃᓂᑕᖃᑦᓯᐊᕆᐊᓪᓛᕋᓱᓐᓂᒧᑦ ᓄᓇᕐᖃᑎᒥᐅᓂᒃ ᐃᓄᑐᖃᕐᓂᓗ, ᐃᓅᖃᑎᒌᑦᓯᐊᕆᐊᓪᓚᑎᑦᓯᒐᓱᐊᕐᒧᑦ ᑭᖑᕚᕇᑦᑐᓕᒫᓂᒃ, ᐊᒻᒪᓗ ᓲᓱᑦᓴᓯᐊᕐᓂᒥᒃ ᐱᒻᒪᕆᐅᑦᓯᐊᓂᖏᓐᓂᒃ ᐊᑑᑎᖃᑦᓯᐊᓂᖏᓐᓂᓗ ᓄᓇᓕᖏᓐᓂ.
ᓄᓇᕕᒻᒥ ᑐᓴᕋᑦᓭᑦ ᐱᒻᒪᕆᐅᔪᑦ ᓲᓱᑦᓴᓯᐊᕐᓂᒧᑦ ᐃᓄᑐᙯᑦ ᐱᒻᒪᕆᐅᑦᓯᐊᓂᖏᓐᓂᒃ 2024-ᒥ ᐅᑯᓂᖓ ᐱᒻᒪᕆᐅᑎᑦᓯᓯᐊᕐᑐᑦ:
- ᓄᓇᕕᒻᒥᐅᓕᒫᑦᓯᐊᑦ ᐊᑑᑎᖁᔭᕐᒥᓂᒃ ᐸᕐᓇᓯᒪᐅᑎᓄᑦ ᐊᐅᓪᓚᑎᑦᓯᒍᓐᓇᑐᑦ: ᓄᓇᕕᒻᒥᐅᑦ ᐊᐅᓪᓚᑎᑦᓯᓯᐊᕈᓐᓇᑐᑦ ᐊᑑᑎᖁᔭᕐᒥᓂᒃ ᓄᓇᓕᖓᓂ ᓇᓪᓕᐅᓂᕐᓯᐅᓕᕐᐸᑕ ᐆᑦᑑᑎᒋᓗᒋᑦ ᐅᓂᒃᑳᒋᐊᕐᑐᓂᖅ ᐅᕝᕙᓗ ᑕᑯᓐᓈᑎᑕᐅᓂᖅ ᐱᔪᓐᓇᓯᐊᕐᑕᖏᓐᓂᒃ ᒪᓕᑦᓯᐊᑐᓂᒃ ᐃᓄᐃᑦ ᐃᓕᕐᖁᓯᖏᓐᓂᒃ ᐱᒻᒪᕆᐅᑎᑦᓯᓯᐊᕐᓂᒧᑦ ᐃᓄᑐᖃᕐᓂᒃ. ᐸᕐᓇᓯᒪᐅᑏᑦ ᐊᖏᕈᑕᐅᔪᑦ ᑮᓇᐅᔭᖃᕐᑎᑕᐅᓛᕐᑐᑦ ᐊᒻᒪᓗ ᐊᑭᑭᓪᓕᕆᐊᕈᑎᒥᒃ ᐱᓯᒪᔪᓂᒃ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔨᓂᒃ.
- ᐱᒋᐅᕐᓴᐅᑏᑦ ᓄᕐᖃᑎᑦᓯᒐᓱᐊᕐᓂᒧᑦ ᐋᓐᓂᑎᕆᓂᕐᒥᒃ ᐱᑦᓯᐊᖏᓐᓂᒥᓗ: ᑖᓐᓇ ᐸᕐᓇᓯᒪᐅᑎᒃ ᐆᑦᑑᑎᐅᑦᓱᓂ ᐁᑦᑐᐃᓲᖅ ᐃᓕᓐᓂᐊᕋᑦᓴᓂᒃ ᑲᒪᔨᓄᑦ ᓄᕐᖃᑎᑦᓯᒐᓱᐊᕐᓂᒧᑦ ᐋᓐᓂᑎᕆᓂᕐᒥᒃ ᐱᑦᓯᐊᖏᓐᓂᒥᓪᓗ ᐃᓄᑐᖃᕐᓄᑦ ᐊᒻᒪᓗ ᓲᓱᑦᓴᓂᕐᒧᑦ ᐃᓄᑐᙯᑦ ᖃᓄᐃᖕᖏᓯᐊᕐᓂᖏᓐᓂᒃ.
- ᑐᓴᕐᑎᓯᓂᖅ ᑐᓴᕋᑦᓴᓂᒃ ᐱᒻᒪᕆᐅᔪᓂᒃ ᓲᓱᑦᓴᓯᐊᕐᓂᒧᑦ ᕓᔅᐳᒃᑯᑦ: ᑕᕐᕿᓕᒫᖅ ᑐᓴᕐᑎᓯᓛᕐᖁᑦ ᑐᓴᕋᑦᓴᓂᒃ ᐱᒻᒪᕆᐅᔪᓂᒃ ᓲᓱᑦᓯᐊᕐᓂᒧᑦ ᑐᓴᕐᑎᓯᑦᓯᐊᓂᕐᒧᑦ ᐅᖄᔭᐅᓂᐊᕐᑐᓂᒃ ᐅᓪᓗᓕᒫᖅ ᐊᒻᒪᓗ ᓱᖃᑦᓯᓂᕐᓂᒃ ᐊᓕᐊᓇᕐᑐᓂᒃ.
- ᑐᓴᐅᑎᒃᑯᑦ ᑐᓴᕐᑎᓯᓂᖅ ᑐᓴᕋᑦᓵᐱᓐᓂᒃ: ᐊᑏ ᑐᓵᕆᐊᕐᑐᓚᐅᒋᑦ ᑐᓴᕋᑦᓵᐱᕗᓐᓂᒃ ᐱᒻᒪᕆᐅᔪᓂᒃ ᓲᓱᑦᓴᓯᐊᕐᓂᒧᑦ ᑐᓴᐅᑎᒃᑯᑦ ᐊᒻᒪᓗ ᓰᐲᓰ ᐅᑭᐅᕐᑕᑐᒥ.
- ᓄᓇᕕᒻᒥ ᐃᓄᑐᙯᑦ ᐅᓪᓗᖓᓄᑦ ᐅᖁᒣᑦᑑᒐᓗᐊᕐᐸᑕ ᐆᑦᑐᕋᖁᔭᐅᕗᑦ: ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᒪᔩᑦ ᓲᓱᑦᓴᓯᐊᕐᑐᑦ ᓄᓇᕕᒻᒥᐅᓂᒃ ᐃᓚᐅᑦᓯᐊᓂᕐᒥᒃ ᓄᓇᕕᒻᒥ ᐃᓄᑐᙯᑦ ᐅᓪᓗᖓᓄᑦ ᐅᖁᒣᑦᑑᒐᓗᐊᕐᐸᑕ ᐆᑦᑐᕋᕐᓗᑎᒃ ᐊᑑᑎᓗᑎᒃ ᓱᖃᑦᓯᓂᕐᓂᒃ ᐃᓄᑐᙯᑦ ᐃᓚᐅᖃᑕᐅᓗᑎᓪᓗ ᓄᓇᓕᖓᓂ ᐆᑑᐱᕆ 2024-ᒥ. ᓵᓚᓖᑦ ᐱᑖᕐᑎᑕᐅᓛᕐᑐᑦ: ᐁᐹᑦᒥᒃ ᐊᒻᒪᓗ ᓂᐅᕕᒍᑎᕐᒥᒃ ᓄᐃᓚᓐᓂᒃ ᓂᐅᕕᕐᕕᒥ.
- ᐊᐅᓚᔫᖅ ᐃᓄᑐᙯᑦ ᐅᓪᓗᖓᓂ: ᐊᑏ ᑕᑯᓐᓈᓛᕐᖁᑎᑦ ᐊᐅᓚᔫᒃᑯᑦ "ᐃᓅᓯᓕᒫᖏᓐᓂ ᖃᐅᔨᒪᓂᖃᑦᓯᐊᓂᖏᓐᓂᒃ" ᐱᒻᒪᕆᐅᑎᑦᓯᓗᑎᒃ ᐃᓄᑐᙯᑦ ᐅᓂᒃᑳᖏᓐᓂᒃ ᐅᖄᕈᒪᔭᖏᓐᓂᓗ ᐅᖄᔭᐅᓗᑎᒃ ᒥᓂ ᑯᔩᒧᑦ ᓵᓕ ᒍᐊᑦᒧᓪᓗ ᐅᖄᒋᐊᕐᑐᓛᕐᒪᑏᒃ ᑕᒪᑐᒧᖓ.