ᐱᑦᓯᐊᕋᓱᐊᕈᓯᑦᐊᑦ - ᓄᓇᓕᒻᒥ ᓂᕿᖃᑦᓯᐊᑎᑦᓯᒐᓱᐊᕐᓂᒧᑦ ᐱᓇᓱᐊᕐᓂᓄᑦ

ᓄᓇᓕᑦᓯᓂ ᓂᕿᖃᑦᓯᐊᑎᑦᓯᒐᓱᐊᕐᓂᒧᑦ ᐱᓇᓱᐊᕐᕈᑎᓯᓐᓂᒃ ᖃᓄᖅ ᐱᕙᓪᓕᐊᒍᑎᖃᑦᓯᐊᕈᓐᓇᒪᖔᑦᓯ:

 

ᐅᑯᐊᑕᒐ ᐊᒥᓲᓗᐊᖕᖏᑲᓗᐊᕐᓱᑎᒃ ᐃᑲᔪᕐᓯᐅᒥᒍᓐᓇᐅᔪᑦ ᐱᕙᓪᓕᖁᑎᐅᓕᐅᒥᒍᓐᓇᓱᑎᒃ ᓄᓇᓕᑦᓯᓂ ᓂᕿᖃᑦᓯᐊᑐᑎᑦᓯᒐᓱᐊᕐᓂᒧᑦ ᐱᓇᓱᐊᕐᓂᓂᒃ:

  • ᐱᓇᓱᐊᕐᓂᖃᕐᑎᓯᖃᑦᑕᓗᑭᖃᑦᑕᓯ ᐃᓄᐃᑦ ᐊᒥᓱᑦ ᐱᕕᑦᓴᖃᕐᓂᓴᐅᖃᑦᑕᓂᐊᕐᒪᑕ ᐊᕐᕌᒍᒥ ᐃᓕᓴᕐᑕᐅᖃᑦᑕᓗᑎᒃ ᐅᕝᕙᓘᓐᓃᑦ ᓴᐳᒻᒥᔭᐅᓗᕿᓐᓂᓴᐅᖃᑦᑕᓗᑎᒃ (ᐊᑯᓓᑦᑐᓂᒃ ᐱᓇᓱᐊᕐᓂᖃᕐᐸᑐᐃᑦ ᓯᕗᓪᓕᐸᐅᑦᔭᐅᒍᓐᓇᔭᖏᒻᒪᑕ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ ᓄᓇᓕᒻᒥ ᓂᕿᖃᑦᓯᐊᑎᑦᓯᒐᓱᐊᕐᓂᒧᑦ ᐱᓇᓱᐊᕐᓂᐅᔪᓂᒃ ᑮᓇᐅᔭᖃᕐᑎᓯᓂᒃᑯᑦ)
     
  • ᐊᑕᐅᓯᐅᓯᑐᐃᓐᓇᐅᖏᑦᑐᒥᒃ ᑐᕌᒐᕋᖃᒐᓱᐊᖃᑦᑕᓗᓯ ᐊᒻᒪᓗ ᐊᑦᔨᒌᑦᔭᖏᑦᑐᓂᒃ ᐱᓇᓱᐊᕈᑎᖃᖃᑦᑕᓗᓯ ᐱᓇᓱᑦᑎᖃᕈᓐᓇᑐᐊᕈᑦᓯ (ᓂᖀᑦ ᒥᑦᓵᓄᑦ ᖃᐅᔨᒪᓕᐅᒥᑎᑦᓯᒐᓱᕐᓂᑯᑦ ᐱᒍᓐᓇᓯᐅᒥᑎᑦᓯᒐᓱᐊᕐᓂᑯᓪᓗ, ᓂᕿᑎᒍᑦ ᓴᐳᒻᒥᒐᓱᐊᕐᓂᑯᑦ, ᐃᓄᑑᒍᓐᓀᑎᑦᓯᒐᓱᐊᕐᓂᑯᓪᓗ, ᑌᒫᓗᑳᖅ)
     
  • ᐃᑯᔪᕐᑕᐅᒐᓱᐊᕆᐊᖃᓗᐊᖕᖑᐊᑐᑦ ᐃᓕᓴᕐᓂᒥᓂᒃ ᓄᕐᙯᓐᓇᖃᑦᑕᓂᑐᐃᑦ ᓇᓂᒐᓱᐊᕆᐊᑑᒍᓲᒍᓂᖏᑦ, ᐱᓇᓱᒐᖃᖕᖏᑐᓪᓗ, ᐃᓱᒪᒥᒍᑦ ᑎᒥᒥᒍᓪᓗ ᐃᓗᓯᕐᓱᓯᐊᖕᖏᑐᐃᑦ ᐃᓱᒪᒋᓗᐊᖕᖑᐊᖃᑦᑕᓗᒋᑦ
     
  • ᐱᓇᓱᓐᓂᓯ ᐃᓚᒋᔭᐅᑦᓯᐊᑎᒐᓱᐊᕐᓗᒍ ᐊᓯᖏᓐᓄᑦ ᐱᓇᓱᐊᕐᓂᐅᓕᕆᕐᑐᓄᑦ ᐊᒻᒪᓗ ᐱᓇᓱᐊᕐᑎᓯᒍᑎᐅᓕᕆᕐᑐᓄᑦ ᓄᓇᓕᑦᓯᓂ
     
  • ᐱᓇᓱᐊᖃᑎᒋᕙᓪᓕᐊᖃᑦᑕᓗᒋᑦ ᐱᓇᓱᐊᖃᑎᑦᓴᓯᐊᒍᒍᓐᓇᑐᐃᑦ ᑎᒥᐅᔪᐃᑦ, ᐱᓇᓱᐊᕐᑎᓯᒍᑎᐅᔪᐃᓪᓗ ᐱᒍᑦᔨᒍᑎᐅᔪᐃᓪᓗ ᐃᓚᐅᕕᒋᖃᑦᑕᓗᒋᑦ
    ᐆᑦᑑᑎᒋᓗᒋᑦ: ᓂᐅᕕᕐᕖᑦ, ᓄᓇᓕᒻᒥ ᐊᖑᓇᓱᑦᑏᑦ, ᐋᓐᓂᐊᕖᑦ (ᐃᓅᓯᓕᕆᔩᑦ ISPEC-ᑯᑦ ᐱᓇᓱᐊᕈᑎᖏᑦ, ᐱᒍᑦᔨᖃᑦᑕᓗᒋᑦ ᐃᒻᒥᓂᕐᓱᓯᐊᕐᖃᔭᖕᖏᑐᐃᑦ), ᐱᓇᓱᒐᑦᓴᓕᕆᓂᕐᒧᑦ ᐱᒍᑦᔨᕖᑦ, ᐊᒻᒪᓗ ᖄᖏᕐᓂᑯᓕᐅᕋᓱᐊᕐᑎᐅᒐᑎᒃ ᑎᒥᐅᔪᐃᑦ
     
  • ᓂᕿᑎᒍᑦ ᐃᑲᔪᕐᑕᐅᒍᒪᔪᐃᑦ ᐊᓯᖏᓐᓂᒃ ᐱᒍᑦᔨᓂᖃᕐᒥᔪᓂᒃ ᖃᐅᔨᒋᐊᕐᕕᖃᖃᑦᑕᖁᓗᒋᑦ ᐱᓇᓱᐊᖃᑎᒋᔭᐅᑐᐃᓐᓇᕆᐊᓕᓐᓂᒃ ᐱᓇᓱᒐᑦᓴᓕᕆᓂᕐᒧᑦ ᐱᒍᑦᔨᔨᓂᒃ ᐅᕝᕙᓘᓐᓃᑦ ᐃᓅᓯᓕᕆᔨᓂᒃ.
     
  • ᐃᑲᔪᕋᓱᐊᓗᐊᖕᖑᐊᑕᓯ ᐸᕐᓀᖃᑎᒋᖃᑦᑕᓗᒋᑦ ᐊᒻᒪᓗ ᐱᐅᓯᐅᒥᑎᑦᓯᒐᓱᐊᖃᑎᒋᖃᑦᑕᓗᒋᑦ ᐱᒋᐊᕐᑎᕙᓪᓕᐊᒐᓱᐊᕐᑕᓯᓐᓂᒃ.
     
  • ᐃᓚᐅᖃᑦᑕᑐᐃᑦ ᐱᓇᓱᐊᕐᓂᓄᑦ ᑐᓴᕐᕕᒋᒐᓱᐊᓗᑭᖃᑦᑕᓗᒋᑦ ᖃᓄᖅ ᐃᓱᒪᒋᔭᖃᕐᒪᖔᑕ ᐱᓇᓱᐊᕈᑎᓯ ᐃᑲᔪᕐᓯᒪᓂᖃᕐᒪᖔᑕ ᖃᓄᐃᖕᖏᓯᐊᕋᓱᐊᕐᑎᓯᓂᒃᑯᑦ ᐃᓄᓐᓂᒃ.
     
  • ᐱᓇᓱᐊᕈᑎᒋᔭᓯ ᑲᔪᓯᖏᓐᓇᑎᒐᓱᐊᕐᓗᒍ ᑮᓇᐅᔭᖃᕐᑎᑕᐅᑎᖏᓐᓇᓯᐊᕐᑎᒐᓱᐊᕐᓗᒍ ᐊᑯᓂᕐᑐᑎᒍᑦ ᐱᓇᓱᐊᕈᑕᐅᖁᓇᕐᒪᑦ.
    ᐆᑦᑑᑎᒋᓗᒋᑦ: ᑮᓇᐅᔭᕐᓯᐅᕕᖃᖃᑦᑕᓗᓯ ᐊᑕᐅᓰᑐᐃᓐᓇᐅᖏᑦᑐᒥᒃ ᑮᓇᐅᔭᖃᕐᑎᓯᒍᓐᓇᑐᐃᑦ ᐊᒥᓲᒻᒪᑕ; ᑎᒥᐅᔪᐃᑦ ᐊᓯᖏᑦ ᐱᓇᓱᐊᖃᑎᒋᖃᑦᑕᓗᒋᑦ ᓂᕿᓂᒃ ᑐᓂᕐᕈᑎᖃᕈᓐᓇᑐᐃᑦ ᐅᕝᕙᓘᓐᓃᑦ ᑌᒫᑦᓭᓇᖅ ᐱᓇᓱᐊᕐᒥᔪᐃᑦ ᐅᕝᕙᓘᓐᓃᑦ ᐊᑭᑐᔪᖕᖏᑐᒥᒃ ᐱᓇᓱᕝᕕᓴᒥᒃ ᐊᑦᑕᑐᕐᑎᓯᒍᓐᓇᑐᐃᑦ, ᐱᐅᓕᓂᐊᒐᖃᕐᑎᓯᒍᓐᓇᑐᐃᑦ, ᓄᓇᒃᑯᔫᖃᕐᑎᓯᒍᓐᓇᑐᐃᑦ ᐅᕝᕙᓘᓐᓃᑦ ᐱᓇᓱᑦᑎᖃᕐᑎᓯᒍᓐᓇᑐᐃᑦ; ᓇᒻᒥᓂᖅ ᑮᓇᐅᔭᖃᕐᑎᓯᒍᓐᓇᑐᐃᑦ ᐱᓇᓱᐊᕈᑎᑦᓯᓄᑦ ᐃᓚᒋᔭᐅᕕᒋᒐᓱᐊᖃᑦᑕᓗᒋᑦ (ᐆᑦᑑᑎᒋᓗᒋᑦ; ᐊᑭᑐᓗᐊᖕᖏᑐᓂᒃ ᑎᒥᒧᓪᓗ ᐱᐅᔫᓗᑎᒃ ᓂᖀᑦ ᓂᐅᕐᕈᑎᒋᖃᑦᑕᓗᒋᑦ, ᓄᑖᔭᐅᓗᑎᓪᓗ ᐱᕈᕐᑐᕕᓃᑦ ᓂᕆᒐᑦᓴᓕᐊᕆᖃᑦᑕᓗᒋᑦ, ᐊᓯᖏᓐᓂᓗ).