ᓅᕕᒻᐱᕆᐅᑉ ᑕᕐᕿᖓ ᐃᑲᔪᕐᑎᓂᒃ ᐅᐱᒍᓱᓐᓇᐅᒪᑦ ᓄᓇᕕᒻᒥ!
ᑖᒃᑯᐊ ᐊᕐᕌᒍᑕᒫᑦ ᐱᕙᓪᓕᐊᑎᑦᓯᒍᑎᐅᓲᑦ ᐅᐱᒍᓱᓐᓂᐅᓱᖑᕗᑦ ᐊᑦᔨᖃᖕᖏᑐᒥ ᑐᓂᒪᓂᖃᓱᖑᓂᖏᓐᓂᒃ ᑲᒪᔨᒋᔭᐅᓲᓂᒃ ᓄᓇᕕᒻᒥ. ᑖᒃᑯᐊ ᐃᓚᑦᔪᒍᓱᓐᓂᖃᕐᓱᑎᒃ ᓄᓇᓕᒻᒥᓂ ᓄᓇᕐᖃᑎᒥᓂᒃ ᐃᑲᔪᕐᓯᒪᒻᒪᕆᑦᓱᑎᒃ ᐱᓇᓱᓱᖑᕗᑦ ᖃᓄᐃᖕᖏᓯᐊᖁᔨᑦᓱᑎᒃ ᓴᐳᒻᒥᓱᒥᓐᓂᒃ , ᐱᑕᖃᕐᑎᓯᒍᑎᖃᕐᓱᑎᒃ ᐱᑕᖃᓪᓚᕆᒋᐊᖃᕐᓱᑎᒃ ᑲᒪᒍᓯᐅᓲᓂᒃ ᐃᑲᔪᕐᓯᒪᒍᑎᐅᑦᓱᑎᒃᓗ ᐃᓄᓐᓂᒃ ᐱᔪᓐᓇᓯᐊᕋᑎᒃ ᐅᕝᕙᓘᓐᓃᑦ ᐃᓗᓯᕐᓘᑎᓕᓐᓂᒃ.
ᐱᒋᐊᖕᖓᓕᓚᐅᕐᓯᒪᒐᒥᓂᑦ 2022-ᒥ, ᑖᒃᑯᐊ ᑲᒪᔨᓂᒃ ᐅᐱᒍᓱᓐᓃᑦ ᓄᐃᑕᑎᑕᐅᓂᕆᓱᖏᑦ ᓇᓪᓕᐅᓂᕐᓯᐅᕈᑎᐅᓱᖑᕗᑦ ᐊᑐᑎᓕᒻᒪᕆᐅᑦᓱᑎᒃ ᐃᑲᔪᕐᓯᒪᒍᑎᐅᔪᑦ ᑕᒪᖏᓐᓂᒃ ᐱᐅᓯᓱᑎᑎᒍᓪᓗ ᐊᒻᒪᓗ ᐱᓇᓱᑦᑎᐅᕕᒋᑦᓱᒋᑦ-ᑲᒪᔨᐅᔪᑎᒍᑦ. ᑖᒃᑯᐊ ᐱᓇᓱᐊᕈᓯᓕᒫᒥ ᐱᓂᐊᕐᓂᐅᓲᑦ ᒫᓐᓇᐅᓕᕐᑐ ᑕᕐᕿᓕᒫᒥ ᓇᓪᓕᐅᓂᕐᓯᐅᓂᐅᓱᖑᓕᕐᖁᑦ, ᓄᐃᑕᑎᑦᓯᓱᑎᒃ ᑕᒪᓐᓇ ᐱᓂᐊᕐᓂᖅ ᐱᒻᒪᕆᐅᓂᖃᕆᐊᖓ.
2024-ᒥ ᐱᒐᓱᒍᑎᐅᔪᓂ ᓄᐃᑕᓗᐊᖕᖑᐊᑐᑦ:
- ᑲᒪᑦᓯᐊᓯᑎᐅᓂᕐᐹᒥᒃ ᐱᕙᓪᓕᐊᑎᑦᓯᒍᑎᖃᕐᓃᑦ:
ᓄᓇᕐᖃᑎᒌᑦ ᑕᓂᕿᕕᐅᕗᑦ ᑎᒃᑯᐊᓯᖁᔭᐅᑦᓱᑎᒃ ᑲᒪᑦᓯᐊᓯᑎᓂᕐᐹᓂᒃ ᑐᓂᒪᓂᖃᑦᓯᐊᓱᖑᑦᓱᑎᒃᓗ ᓱᕐᕃᓂᖃᑦᓯᐊᓲᓂᒃᓗ.
ᒪᕐᕈᐃᒃ ᑎᒃᑯᐊᓯᓂᕐᒥᒃ ᐊᑑᑎᒍᑏᒃ:
- ᑎᒃᑯᐊᓯᒍᑏᑦ ᑐᓂᔭᐅᒍᓐᓇᖁᑦ ᑲᕆᑕᐅᔭᑎᒍᑦ ᐊᒃᓚᓯᒪᔪᖕᖑᐃᒍᑎᐅᓗᑎᒃ ᐅᕙᓂ
- ᐃᓚᐅᖃᑎᒌᑦ ᐊᐅᓪᓚᑎᑦᓯᒍᓐᓇᒥᔪᑦ ᓯᑯᑦᓴᔭᒥ ᐊᒃᓚᓯᒪᔪᖕᖑᐃᕕᖃᕐᓗᑎᒃ ᖃᕆᑕᐅᔭᑎᒍᓪᓗ ᐊᒃᓚᖃᑦᑕᐅᑎᒍᑎᒃᑯᑦ ᐊᐅᓪᓚᑎᒃᓗᒋᑦ ᐅᕗᖓ ᐆᑦᕆ ᐋᔅᓰ (RRSSSN): audrey.hachey.rr17@ssss.gouv.qc.ca ᐅᓇ ᐅᒃᓗ ᐊᓂᒍᓚᐅᕐᑎᓇᒍ ᓅᕕᒻᐱᕆ 29, 2024.
- ᓇᓗᓀᕐᑕᐅᒍᑏᓪᓗ ᓵᓚᖃᐅᑏᓪᓗ:
ᐃᓚᒋᔭᐅᑎᓪᓗᒍ ᑲᒪᔨᓂᒃ ᐅᐱᒋᔭᖃᕐᓂᒥᒃ ᑕᕐᕿᖁᑕᐅᔪᒧᑦ, ᐱᑦᓯᐊᕕᖕᖓᓱᑎᒃ ᑲᒪᔨᐅᓲᑦ ᓇᓗᓀᕐᑕᐅᓂᖃᓛᕐᐳᑦ ᐊᑭᓕᕐᑕᐅᒍᑎᖃᖃᑦᑕᓗᑎᒃᓗ ᐊᒥᓱᐃᓂᒃ ᓵᓚᖃᐅᑎᑦᓴᔭᓂᒃ. ᑕᒪᒃᑯᐊ ᐃᓚᖃᓛᕐᑐᑦ ᑯᐊᐸᒃᑯᓂᑦ ᓂᐅᕕᕐᓂᐊᕈᑎᑦᓴᔭᓂᒃ, ᐃᒡᓗᒥᓂᒃ ᐊᑭᓕᒍᑎᑦᓴᔭᓂᒃ ᐱᑎᑦᓯᒍᑎᒋᓛᕐᑕᖏᓐᓂᒃ ᓄᓇᕕᒻᒥ ᐃᒡᓗᓕᕆᔨᒃᑯᑦ ᐊᒃᓚᕕᖓᑕ, ᐊᒻᒪᓗ ᐅᑎᕈᑎᒌᓐᓂᒃ ᖃᖓᑦᑕᐅᑎᑦᓵᓂᒃ ᐱᔭᐅᔫᓐᓂᒃ ᐃᓄᐃᑦ ᖃᖓᑦᑕᔫᖏᓐᓂᑦ.
- ᐊᒃᓚᑎᒍᑦ ᐊᒃᓚᑖᕐᑎᓯᒍᑎᑦᓴᔦᑦ
ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ ᓱᕐᖁᐃᑐᒥᒃ ᐃᓄᓕᒫᓂᒃ ᐱᒍᓐᓇᕕᖃᑦᓯᐊᖁᔨᕗᖅ ᑕᒪᑐᒥᖓ ᐱᓇᓱᒍᑎᒋᓕᕐᑕᒥᓂᒃ ᐱᔭᕆᐊᑭᑦᑐᓂᒃᓗ ᑎᒃᑯᐊᓯᒍᑎᓂᒃ ᓄᐃᑦᓯᒍᑎᖃᕐᐳᖅ ᑲᒪᑦᓯᐊᓯᑎᐅᓂᕐᐸᓯᐅᕈᑎᑦᓴᒥᓐᓂᒃ. ᑌᒣᒃᑲᑕ, ᐊᐅᓪᓚᑎᑦᓯᕕᖃᓕᕐᐳᒍᑦ ᐃᓘᓐᓀᑕ ᑐᑭᓯᒪᒍᑎᑦᓴᖏᓐᓂᒃ ᐊᐅᓪᓚᑎᑕᑦᑎᓂᒃ ᓄᓇᕕᒻᒥᐅᑦ ᐊᓂᕐᕌᓖᑦ ᓯᓚᑎᑦᓴᖁᑎᓕᒫᖏᓐᓄᑦ.
- ᓄᓇᓕᓐᓂ ᖃᓄᐃᓘᕐᑎᓯᓃᑦ:
ᐱᐅᓯᕆᔭᐅᖏᓐᓇᓲᖑᖕᖏᑐᑦ ᖃᓄᐃᓘᕐᑎᓯᓃᑦ ᐊᑐᑎᔭᐅᓛᕐᖁᑦ ᓄᓇᓕᓐᓂ ᓇᓗᓀᕐᑕᐅᒪᔪᓂ ᓇᓪᓕᐅᓂᕐᓯᐅᕈᑎᖃᕐᑐᑦᓴᐅᓱᑎᒃ ᓄᓇᓕᒻᒥᓂ ᑲᒪᔨᐅᓲᓂᒃ ᐃᑲᔪᕐᓯᒍᑎᒋᓱᖏᓐᓂᓗ.
ᑐᑭᓯᒋᐊᒃᑲᓂᕈᒪᒍᕕᑦ ᐱᑦᔪᑎᖃᕐᓗᑎᑦ ᑲᒪᔨᐅᓲᑦ ᐅᐱᒋᔭᐅᓂᖏᑕ ᑕᕐᕿᖃᑎᑕᐅᓂᖓᓐᓂ ᐊᒻᒪᓗ/ᐅᕝᕙᓘᓐᓃᓗ ᑲᒪᑦᓯᐊᓯᑎᐅᓂᕐᐹᒥᒃ ᐱᕙᓪᓕᐊᑎᑦᓯᒍᑎᖃᕐᓂᒥᒃ, ᖃᐅᔨᒋᐊᕐᕕᖃᕐᑐᓴᐅᕗᑦ ᐆᑦᕆ ᐋᔅᓰᒥᒃ (RRSSSN) ᐅᕝᕙᓘᓐᓃᑦ Facebook-ᑯᑦ ᑕᑯᒐᓱᖃᑦᑕᓗᑎᑦ ᓄᓇᓕᓕᒫᓂ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᐅᑉ ᑕᑯᓇᓱᑦᑕᐅᕕᖓᓂ.